Oruro

D'Nacht isch warm gsi, s'Zmorge gross und fein: mir sind parat für de Tag :) Fehlt nume na Zmittag für ufem Gipfel. Ufschnitt und Härtchäs kenneds do ned und au Brot findemer irgendwie meh dur Glück als Können. Zum Glück hämer na en chline Reste schwiizer Chäs, so chönnts ganz guet cho. Öppe am halbi nüni isch pünktlich mit de es bitz wärmere Ziit vom Tag Abmarsch. D'Stiigig am Afang halted sich na in Grenze und trotzdem merkemer scho dütlich e Astrengig - das chönnt na zäch werde für mich 🙈 Je nöcher dasmer am beidruckende Sajama chömed, desto steiler wird au eusen Weg zum Nachbarberg und i chume tatsächlich zimli is schnuufe und kämpfe bis am Schluss. Zwüscheziitlich isch de Untergrund so sandig, dasmer bi jedem Schritt wider es bitz zrugg rutsched - danke für nüt. Wo de Gipfel griifbarer wird, sprinted de Simon ab, ich mag defintiv ned mithebe aber han ja au kei Stress ^^ Bim vermeintliche Gipfel gohts denn namel es paar Meter wiiter. Hett jetz ned müese si aber isch au machbar und de Stolz woni denn dobe bi isch scho einigermasse gross 💪 Es fühlt sich eifach gar ned so höch a wil de Berg vor de Nase halt namel 1'500 Meter höcher isch ^^ Im Windschatte gnüssemer euses Zmittag und d'Sunne, bevors uf de andere Siite uf de Abeweg goht. Bi dem goht d'Höchi zimli schnell vergesse... Unterwegs gsehmer es Viscacha devohusche, sus isches zimli usgstorbes Gländ. Erstuunlich: au uf dere Höchi wachsed na Bäum. De höchstglegni Wald vode Welt befindet sich i dem Nationalpark :) Am Fuess vo Berg simer recht nöch am Sajama zue, wasen na iidrücklicher schiine loht als vorher scho! Ufem Weg dur es Tal zude Hochebni zrugg, chömed eus es paar verruckti mit Ski ufem Rugge entgege. Die wend wohl ide negste drü Täg de Sajama erklimme... I bi grad ganz glücklich ohni das ^^ Euses negste Ziel sind d'Therme zmitzt ide Hochebni. Zum die erreiche laufemer eifach mal querfeldein dur Büschli, Lamas und über es warms Bächli. Ned allzuwiit weg gsehmer immer mal wider Staubwirbel ide Luft - beidruckend. Es zieht sich schliessli es bitz zude Therme aber mir schaffeds und gnüssed die "Erfrischig" mit Bergsicht 🥰 Dases es bitz bewölkt isch, isch öpis Neuers für eus z'Bolivie ^^ Für de Zruggweg bstellemer eus es Taxi, so dasmer für e eventuell astrengendi Wanderig morn chönd Energie spare. Stellt sich use, dass das e verhältnismässig grossi Abzockig isch. Mir zahled 60 Bolivianos (7 Franke oder so). Für das chömer imene Städtli zweimal go Zmittag esse aber egal, isch ja immerna zimli billig... Dehei gheiemer em Hostelmensch über de Weg und reded über de 6'000er. Stellt sich use daser z'tüür isch für eus zwei elei. Chosted meh als di viertägig Tour di letste Täg. Mir seged drum ab, do machemer lieber eine bi La Paz ide Nöchi. Denn würemer gern e heissi Duschi gnüsse aber nach meh als füf Minute warte ischs immerna iischalt. Eini vom Hostel chunnt go luege, macht öpis und meint denn dases "caliente" isch, was heiss und warm heisst. Stellt sich use dases vorallem ned chalt isch aber au ned gnueg warm zum ufwärme. Und nach füf Minute ischs denn wider ganz chalt - danke für ned viel... Unter de Decki wärmemer uf bises Znacht git. Währedem esse chunnt en Dütsche verbi, wo Lüt für en 6'000er am Mäntig suecht. Er verzellt viel und hett au scho en Bergfüehrer aber mir sind ned überzügt wil de eint Gipfel bitz langwilig und de ander zu astrengend tönt. Müemer eus na überlegge. E churzi Diskussion spöter segemer au ihm ab. Mir werded aber vermuetli in Kontakt blibe, vilicht chunnter z'La Paz mit eus mit - oder mir mit ihm :) Zum eus warm halte erfrogemer bim Hostel heisses Wasser und mached Teeli im Zimmer. Recht müed und mitem Plan zum morn de Lagune (mir würeds ehner Bergsee nenne) nochejage, gömer einigermasse erschöpft go ligge 😊Read more