Calgary

Euse ersti Tag in Calgary, en Suntig hämmer miteme mega guet zmorge im Sidewalk Citizen gstartet, wo sehr populär zsi schiint. Es hät zwar ewig dured isch aber wie gseit mega guet gsi. Nachem iichauf im Real Canadian Superstore (Ich lieb de Name) simmer den nacheme chline Snack uf eusi ersti Tour in Calgary. De Name vo de Tour? Craft Beer and Street Art, e super combo. Euse Guide dasmal isch unglaublich komisch gsi, er het sich weder vorgestellt no irgendwelchi Erklärige überd Tour abgeh. Mer hend den je en zimmli feine Flight Bier bstellt (Es het na 2 Fraue uf de Tour gha mit eus). Und es isch würkli katastrophal gsi, de Guide het keis Gspröch gstartet. D Simona und ich hend ihm den sini Arbet abgnah und ahfange Gschichte über Bier verzelle (mer hend ja chli Erfahrig als Guides😉) und so isch s ganze den langsam bitzli in Schwung cho. Nach de Bier simer dur d Stadt gloffe und hend echt cooli Street Art gseh. Euse Guide het aber au über die nöd wükli öppis gwüsst. Nach 3 Stunde hetter eus den ine wiiteri Bierbar bracht und het gmeint Touri gängi nacher nomal wiiter, obwohl sie luut plan denn fertig gsi wär. Eus und de Zwei andere Gäst häts dän aber glanget, mir hend gseit mir müessed go znacht Ässe und hend eus denn verabschidet. Puh, das isch echt schlimm gsi, s Konzept vode Tour isch echt cool, aber de Dude brucht Training. Z Nacht hets im South Block BBQ & Brewing geh, mega nices BBQ (Blueberry burnt ends sind mega gsi) und es paar würkli feini Bier us de huuseigene Brauerei. So das wärs für dasmal, bis bald ihr fliissige Läser.Read more