Río Yanayacu

De Bus bringt eus trotz zwei Stops zum irgendwas ade Reife umeschruube schliesslich souverän wider uf Quito. Ich han es grosse Teil vode Fahrziit tatsächlich mit Blog fertigmache verbrocht. Bi so vielne Fotis woni wett driha brucht das erstuunlich viel Ziit. Im Hostel warted es Zimmer mit 16 Better uf mich. Ich chume s'Bett im hinderst Egge zuegwise über und ha sogar Platz, zum na es paar halbfüechti Sache ufhenke :) Woni denn im Bett ligge, bini plötzli überhaupt nüm müed. Glaube das isch, wili es bitz nervös bin, jetz woni uf mich elei gstellt bin und ha au na überhaupt nüt bueched usser die Nacht... Viel z'früeh verwachi au wider und fühle mi grad gar nüm müed, also fangi a, Hostels für di negste Nächt bueche. Ich gange uf Latacunga für ei Nacht und mache denn de Quilotoaloop, was e Wanderig bestehend us drü Etappe mit Übernachtigsmöglichkeite i Hostels isch. Nach dem stohni uf und gange id Stadt go Zmorge und en Lade sueche, wo mis Internet chan verlängere. Schnell wirdi fündig und gange zrugg go esse und fertig packe. Schliessli stoht au d'Anna uf und mir chönd eus verabschide - was a pleasure :) Es Taxi (wo trotz Priisverhandlige doppled so tüür isch wie Uber, mues s'negst Mal für grösseri Strecke vo Afang a Uber neh) fahrt mi ad Bushaltestell, wo de Bus uf Latacunga fahrt. 2 Stunde spöter chumi dete a, laufe zum Hostel und froge mal, wases so z'mache git im Dorf. Drü Chile und ein Ussichtspunkt - wow... Nachem Zimmer bezieh gibi mini Wösch ab und mache mi uf is Dorf. Stellt sich use, dass das so chli isch, dasmer i 30 Minute meh oder weniger alles abgloffe isch. Vode Chilene isch nume d'Kathedrale würklich zuegänglich und mis Timing bringts fertig, dasi e Hochzig crashe. Ich laufe gliichziitig dur de Siiteigang ine wie s'Brutpaar vo hinde. Upsi 😅 Zmittag gits für $1.25 irgendwo inere chline Strassebeiz und s'Glace zum Dessert isch glich tüür ^^ Nachher höckli in Park, gnüsse d'Sunne und lise es bitz. Irgendwenn gangi go poste für mini Wanderig und denn zugg is Hostel go d'Dachterrasse usnutze, alles umpacke für d'Wanderig und esse. Uf choche ide Hostelchuchi hani no ned so Lust und wenn s'Esse uswärts so billig isch, chönnts au si dass sich das ned wird ändere - mal luege. Hüt gits eifach es bitz Gmües miteme Brötli. Isch eifach, fein und goht i jedere Chuchi. Schliessli heissts früeh is Bett go. Merke, dasmer vo letst Nacht es paar Stündli fehled und wett ja morn fit si :)
Bin jetz übrigens sit genau 5 Wuche do z'Ecuador und han na vier wiiteri vor mir 🌋Read more