Callander

Nacheme guete Zmorge hani mi vo de Margaret verabschiedet und sie het mer nomal zwei Chüechli id Hand druckt, dassi au ja nöd verhungere 😊 Die zwei dütsche Ehepaar mached au de Rob Roy Way und mer werded au widr im gliche Hotel am Abig si und wahrschindli denn au de Rest vom Trip. Aso wirdi sie sicher wieder gseh, aber sie sind öppe 40min vor mir scho los.

Hüt heti d Strecki eigentli ähnlich wie gester sölle werde mit 16.1km Wäg. Nur leider het eus d Margaret no informiert, dass ein Teil vom Wäg gsperrt isch, wills deht e Baumchrankeit "Phytophthora ramorum" git und sie drum Forstarbeite müend mache. Plus chönti mer die Chrankheit anschienend uf gsundi Bäum überträge, wemer trotzdem deht durre lauft. Aso hets en Umwäg geh, wo schlussäntli öppe 22.5km Wäg bedütet het 🙈 Es hetti noimed no e Abchürzig gha zum 4km ispare, aber da die nöd so klar ageh worde isch und ich hüt nöd so Luscht gha han mich zverlaufe, bini de kompletti Umwäg gloffe.

S Wätter isch bewölkt gsi und es isch en chalte Wind gange, was OK gsi isch, willi zersch ziemli lang duruf ha müesse laufe und eh heiss becho ha 😅 De Umwäg isch d Veloroute Nr. 7 gsi, aso sind mer die eint oder andere Velofahrer uf dere Strecki begägnet, aber hauptsächlich bini ellei gsi (sowiit ich weiss). Bim einte, chlinere See, em Loch Drunkie 🍻, hets denn aber einigi Wohnwäge gha und Lüt am zälte ⛺️

So gäge de Mittag bini denn am grössere See, Loch Vinachar, acho und han e schöni Ussicht gha zum e Mittagspause mache 👌 Nachere chline Stärchig bini wiiter und en grosse Teil vom Wäg het mi em See entlang gfüehrt. Und denn isch au uf eimal wieder d Sunne cho und es isch schönst Wätter worde ☀️ Was natürli au widr gheisse het, dasses ziemli heiss worde isch 🥵 De Wäg isch aber mega schön gsi amel chli dur en moosbewachsene Wald wos agnehmer gsi isch zum Laufe.

D Strecki het sich echli hiizoge und han amel nöd so s Gfühl gha, ich chume gross vorah. Woni denn äntli wieder e Strecke-Agab vo 4 Meile gseh ha, hani mi gfreut, aber au nöd genau gwüsst was das i Kilometer heisst 🫣 Jetzt weissi, dasses öppe 6.4km sind, was au erchlärt, warum mer de Wäg denn immerno so lang vorcho isch. Aber underwägs hani wenigstens no miteme nette ältere Ehepaar chli gschwätzt. Er het gfröged öb min Name Heidi seg, woni gseit ha ich bi us de Schwiiz 😅 Und denn hani no es orangigs Schaf entdeckt! Mini Google-Suechi het nur ergäh, dass gwüssi Buure ihri Schaf iifärbed damits Schaf-Diebe schwieriger hend, will die Schaf denn uffalled. Aber warum denn nöd alli Schaf deht iigfärbt gsi sind isch d Frag 🤔 Usserd de Buur het das Schaf gstohle? 😱

Nach 22.5km, öppe 34'000 Schritt und ca. 6h bini denn in Callander acho 🥳 Bin nöd ganz eso flüssig underwägs gsi hüt und ziemli viel Foti-Stops gmacht 😇 Und am Schluss isches doch tatsächlich au nomal mehrheitlich duruf gange.. 😫 Aber bin denn erliechtered im Dalgair House Hotel acho und ha i de Bar, wo au als Hotel Reception dient, min Schlüssel entgäge gno. Nachere schöne Duschi bini denn usse is Waverley Pub und hanmer en feine Znacht gönnt. Deht hets en härzige Biergarte gha, zum no chli s Wätter gnüsse. Und nacher hani denn mini Füess mal chli müesse hochlege im Hotelzimmer zum erhole, will morn gahts ja scho wiiter 😅Read more