Reset search
Philippinen
  • Lea Erni
  • Lea Erni

Philippinen

Sun, Love, Ocean and fun Read more
FollowInsightsInsightsCalendarCalendarPhotosPhotosShareShareBucket list
Newest first
  • Trip start
    February 11, 2023
  • Lea ErniPhilippinenTraveler
    1

    Flughafe Züri

    February 11, 2023 in Switzerland ⋅ 🌙 1 °C

    Hüt geit üses nächste Abentür los, in Bern simer mit Sunneschin und bluem Himmel verabschidet worde und jetzt sitze mir am Flughafe und warte ufs boarding.

    See translation
  • Lea ErniPhilippinenTraveler

    Muskat

    February 12, 2023 in Oman ⋅ ☀️ 27 °C

    Dr erst Flug isch gschafft und mir si in Muskat im Oman glandet.
    I de zwöi Stund ufenhaltszit dert heimer lustigi Erfahrige chönne mitnä.
    Ufem Fraue WC z.B hei alli Fraue als erst ihre Hijab abzoge und hei sich vo chopf bis fuess gwäsche was drzue gfüehrt het das s’ganze WC überschwemmt gsi isch, bi de Herre ischs Handwöschbecki churzerhand zum Fuessbad umfunktioniert worde.
    Nach zwöi Stund wartezit heimer de Pünktlich chönne witer Flüge, s’Flugzüg isch nid ganz voll gsi, so das mir grad am Afang hei chönne Platzwechsle und de e ganzi Sitzplatz reihe für üs hei gha.    Read more

    See translation
  • Lea ErniPhilippinenTraveler
    2

    Manila: Houptstadt vo de Philippine

    February 12, 2023 on the Philippines ⋅ 🌙 24 °C

    Nach 17h Weg, 11’700km, 1x Umstige und 15h Flugzit heimers nach Manila gschafft.
    Die Grossstadt besteit us 16 einzelne Städt wo wie Stadtteile zemegfüegt si, in Quezon City eim vo dene Stadtteile lebe elei scho 3Milione Mönsche.
    Mir chöme imne Hotel in Makati City unter, uf de Bilder hets Modern und hell usgseh und ir Realität isches sehr chli und stickig, Klimaalag funktioniert nur beschränkt so das mir agnähmi 28 Grad Zimmertemperatur hei und mir scho vom nüt mache schwitze, dr Gruch schmöckt o nüm grad sehr früsch aber mir si zu müed zum nomal it Lobby ga..
    Mir schlafe i dere lute, grosse, helle Stadt i chürzi i und werde am nechste morge vor Sunne und em blaue Himmel gweckt.    Read more

    See translation
  • Lea ErniPhilippinenTraveler
    2

    37’000 Schritt und e Tuktuk Fahrt

    February 13, 2023 on the Philippines ⋅ ⛅ 25 °C

    Es dunklet langsam i und nachemne lange Tag uf de Bei und über 30‘000 Schritt dür Manila merke mir das mir i dere lute Stadt langsam müed werde, mir finde ufere chline Sitestrass e Tucktuck fahrer umgä vo sire Familie, Kind spile uf dr strass und hüpfe immer wieder ufe Töff vom Tucktuck und tüe so als würde si Fahre.. womer nöcher chöme ghöre mir scho winer üs zuerüeft und fragt öb mir wöi e fahrt bueche, mir bejahe, gäbe churz üsi Adresse düre und scho quetsche mir üs i die chlini Kabine. Kind stritte wär mitem Papi und de zwöi frömde mitcha, dr Jüngst überzügt und darf vore druf hocke. Natürlich het niemer e Helm ane, ir Schweiz undenkbar, da ganz normal.
    Jetzt düse mir los i de Wild Verkehr mit Hupende Outos und stinkende Abgase und lache bi jedem Gas gä und bim slalom dür die andere Verkehrsteilnämende.
    Mir chöme bim Eton Hochus a und dr Rob meint das isch doch nid korrekt, s‘Navi zeigt es geit einisch ume Block. Auso stige mir us und zahle und freue üs ufs Hotel, doch ohje es isch glich s‘falache gsi.. es ischs Eton West und nid dr Eton Tower Makati. Und üses Tuktuk leider scho wieder imVerkehr verschwunde.
    Auso gömer mithilf vom Navi witer und sötte i 13min am Ziel si, leider chunnt üses Ziel nid wüu üs s’Navi a falsch ort manövriert somit simer de glich wieder 30min unterwegs und endlich im Hotel.
    Im Wirrwar vor Stadt finde mir es feins Restaurant wo mir guet Esse. Mir denke churz über usgang nache oder ane Bar doch mir entscheide üs fürs Bett.. Morn geit de s‘Abentür witer nach Cebu.    Read more

    See translation
  • Lea ErniPhilippinenTraveler
    Am liebste jedem Büsi chli liebi gä!Basketball wird a jedem ecke gspilt1Weme mit dr Kamera entdeckt wird und alli möchte ufem Bild si..Kind spile und schwimme im Pasig River wie mir ir Aare

    Manila, lets talk about smock

    February 13, 2023 on the Philippines ⋅ ⛅ 25 °C

    Manila isch e Grossstadt, sie cha guet mit anderne Metropole mithalte was Lärm, Verkehr und o Abgas ageit. Üse Taxifahrer vom Vorabe verspricht üs dases am Mäntig no viel wilder uf de Strasse zue und här geit als am Sunntig abe und er het nid zu viel versproche.
    Mir loufe am Morge los mitem Ziel its Stadtviertel Intramuros z‘cho. Es wird beschribe dases dert no vieli Gebäude us dr kolonialisierigszit vo de Spanier z‘bewundere git und das Stadtviertel gilt als Stadtzentrum (City of Manila) s’Navi git üs ca 2h Fussmarsch a. Mir müesse üs afänglich chli a Verkehr und ihri Regle gwöhne:
    -Mach mit Hupe uf di ufmerksam
    -findisch e lücke fahr los
    -findisch ke lücke, kreier e neui Spur und überhol links oder rechts so wies geit
    -los ufe Verkehrspolizischt wenner luegt, luegter jedoch weg gelte sini Regle nüm ;)
    -Fuessgänger hei ke Vortritt
    -bisch Fuessgänger loufsch düre verkehr als würsch selber drzue ghöre.
    -Fuessgänger Ample si Dekoration und e Empfählig jedoch kes Muss 😉

    I dem ganze Chaos fallt üs aber uf das alli trotzdem guet uf üs luege, gseh sie üs, Winke si, passante wo merke das mir nid genau wüsse wo mir über Strass chöi, stoppe dr Verkehr damit mir glich über Strass chöi. Es wird üs viel Zurglächlet und zuegrüeft und wenn me bim Fötele entdeckt wird wird sofort Posiert und alli möchte mit ufs Foto. Im Park wärde mir agspriche öb mir nid würde mit wildfrömde Fotos mache und het me einisch ja gseit isches selbstverständlich das alli andere o dörfe. 😉

    Es isch warm und tüppig und dr Smock gseht me im Verkehr ufstige und schmöckt me die ganz zit bim loufe, i de ruhigere Gasse gseht me vieli Tier, die wo öperem ghöre wärde miter churze Schnuer abunde damit sie o nid weg chöi und Streuner loufe ume uf dr suechi nach esse weme für si i schäli uft Strass stellt.
    Einigi gseh gsund us und abderi abgmageret und nid jedes Tier laht sich la strichle.
    I dene ruhigere Strasse gseht me guet dr Unterschid vo Arm und Rich. Teilwis gseht me chlini chind sobald dr Verkehr stopt uft Outos zueloufe und at schibe chlopfe oder si gumpe is tucktuck und strecke ihri Hand us und rüefe Coins coins.. werde mir gseh wird a üsne chleider zupft und Händ werde nach üs usgstreckt ir Hoffnig uf es paar Münze.
    Chlini Hüser us Blech und Stoff stöh näbä Hochhüser wo lüt mit Azüg betrette und wieder verlöh, bewacht dür Sicherheitspersonal ( no nie heimer so viel Sicherheitspersonal gseh wie hie). Grossi Kettene wie MC Donalds und Joliibee reie sich i rei und glid und vordranne stöh Strasseverchöifer mit Ihrne Essensständ. Kinder i Schueluniforme wärde vo Ihrne Eltere abgholt und anderi schwimme ohni Ufmerksamkeit vo Ihrne Eltere im Pasig River und gö sich dert go wäsche und erfrüsche, was eim uffallt die meiste hei trotz all dem no immer es lächle ufem Gsicht. Me merkt die Stadt isch voller Lebe.    Read more

    See translation
  • Lea ErniPhilippinenTraveler
    1
    11

    Irgendwo uf Cebu Island im Bus bi 15grad

    February 14, 2023 on the Philippines

    In Cebu acho, wärde mir vo Rägä begrüesst.. dr Wetterbricht meints i de nächste Täg nid so guet mit üs und seit trotz Trockezit mehreri Regetäg vorus. Mir si chli unschlüssig was mir sölle, doch mir beschliesse üses ursprüngliche Ziel: Moalboal azfahre. Mir lö üs vomne Taxi a Busbahnhof bringe, überall steit das me entweder mit Busse oder mit Vans zu de verschidene Ortschafte bracht cha wärde, Vans sölle chli zueverlässiger si, doch leider finde mir die nid bim Busbahnhof sondern nur die gelbe Busse vo Ceres, jetzt heimer fast ke anderi wahl als glich e grosse Bus z‘näh da Busse und Vans bis am 17.00 Uhr us Cebu losfahre und mir scho 16.00 uhr hei und o irgendwenn am Ziel möchte acho. Sobald mir üses Ticket hei und üs gseit wird das mir ca 2-3h weg vor üs hei wärde mir schnell zum Bus glotzt, mir hei Glück er söll grad abfahre. Nur mir si no grad nid guet vorbereitet und hei nid mal Zit üs es jäggli usem Koffer z‘nä.. im Nachhinein eher e Fähler da die Busse ca uf 15 Grad abeküglt wärde 😅❄️
    Umwickelt mit üsne ersatz Kleider usem Handgepäck sitze mir de gueti 3.45h im Bus für as Ziel. Zwüschedrinn me merkt fast nid daser haltet stige immer wieder lüt us und i, die eigentliche 3 Stops bis as Ziel wärde definitiv zu 15 Stops und ab und zue springt e Essensverchöifer i Bus und bietet fritierti Banane und verschideni Chips a oder Wasser. Zum Glück heimer immer wieder öpis z‘lache und chöi üs uf das Abentür ila.
    In Moalboal acho verpasse mir fast us‘stige. Doch dr Rob merkts no grad rechtzitig. Üsi köffer stöh scho dusse parat, mir wärä auso unbemerkt witer gfahre und üses Gepäck wär in Moalboal blibe. 😅 Bim Busstop wärde mir scho vo Tuktuk fahrer erwartet. Für ca 2.- p.P. Wärde mir samt üsem Gepäck zu üsere Unterkunft bracht. Es het dr ganz Tag uf Cebu grägnet und vieli Grundstück si mit Wasser überfluetet o üses chline Hotel, mir müesse üs de fürnes grössers Hüttli/Zimmer entscheide wüu üses Gepäck schüsch nid i üsem Zimmer platz het.
    Nachemne feine z‘Nacht hocke mir nochli im Hotel Restaurant und Gmeinschaftsbereich und lö dr Abe la usklinge.    Read more

    See translation
  • Lea ErniPhilippinenTraveler

    Moalboal and the sardin run

    February 15, 2023 on the Philippines

    O hüt startet dr Tag mitemne stark bewölkte Himmel, doch mir mache s‘beste drus. Mir miete i üsere Unterkunft e Roller und mache üs ufe Weg is Dorf/Stadt Zentrum damit mir Gegend chli chöi erkunde. S‘Zentrum vo Moalboal befindet sich ir Panagsama Road, dert findet me alli Restaurants, Kaffees, Bars und o vieli Touchshops. A jedem Strasseegge werde eim Toure zu de verschidene Sehenswürdigkeite Abote, me cha zu verschiedene Wasserfäll, go Bade, Canyoning mache oder zum Osmeña Peak , em höchste Punkt uf dr Insle, wandere.
    Mir Spaziere dür die Strass, gö zum Meer und gseh sobald mir ufs Wasser luege würum Moalboal so beliebt isch. Schare vo Touriste usgrüstet mitere Schwimmweste, Toucherbrille und Schnorchel tribe mit Ihrne Guides übers Wasser und sueche nach de Sardine wo i grosse schwärm vor dr Küste umeschwimme.
    I bueche füre Namittag mi erst Touchgang um das spektakel chönne z‘Beobachte.
    Damit o üse Hunger gstillt isch gö mir ines süesses Kaffi und möchte dert z‘Morge esse, leider bruche si über 40min bis eis Gricht mal ufem Tisch isch und nachdem üsi Getränk und z‘Morge vom Rob nach 60min no immer nid uftuschet isch worde zahle mir was mir becho hei und mache üs uft suechi nachere neue Option.
    Mir finde grad am Strand es süesses Lokal namens the Shake, dert chame super feini Bowls esse, bechunnt guete Kaffe und super Watermelon Shake.
    Am Namittag machi mi de ufe weg zum Touchzentrum und freue mi uft Unterwasserwelt.
    Mir si e grossi Gruppe und drum werde mir i zwöi Gruppe ufteilt. Nachdem mir alli Usgrüstet si chöi mir üs grad vorem Touchzentrum is Wasser stürze und vom Ufer us geits de zum Riff.
    Leider Merkt me de Koralle dr Massetourismus a, sie se a vielne orte zerstört und usbleicht. Üse Touchgang geit ca 1h und mir halte alli fest Usschou nach de Sardine, doch leider si kenni uffindbar. A Land erfahre mir dass das erst vor 3 Mönet mal vorcho isch und sie normalerwis Sardine immer finde.
    Am Abe gömer bi zite is Bett da mir üs füre nechst Tag e Wanderig zum Osmeña Peak vornehme. D‘Bsitzerin vo üsem AirBnB meint das mir das locker ellei mitem Roller schaffe.    Read more

    See translation
  • Lea ErniPhilippinenTraveler
    11

    Osmeña Peak

    February 16, 2023 on the Philippines ⋅ 🌧 21 °C

    Am 4.30 Uhr lütet üse Wecker und am liebste würde mir üs im Bett umdreie und witer schlafe, doch mir ghöre ke Rege und drum beschliesse mir im dunkle loszfahre ir hoffnig das mir dr Sunneufgang ufem Osmeña Peak erlebe.
    Mit üsem 50kubik Roller fahre mir los, im Navi vom Handy gits üs 3 verschideni Route a und mir si üs nod ganz einig welli jetzt echt die besti isch. Mir versueche die ersti Strecki und biege ines chlises Sitesträssli ab wo ufe erst Blick eher ane schotterpiste erinneret. Nach churzer zit heimer wieder es passabls Strässli vor üs und mir fahre voller Vorfreud witter bis mir bimne Strasseabschnitt im Matsch stöh und üs dr Roller fast umkeit, dank dr schnelle Reaktion vom Rob stürze mir nid vom Roller. Dr weg wird immer schlimmer und mir merke die erste Sunnestrahle am Himmel, lut Navi simer aber no immer ca 1h vo üsem Ziel entfernt. Mir beschliesse weg de immer schwiriger werdende Strasseverhältnis chert z‘mache und dr ander weg z‘probiere ir Hoffnig das mir dert uf besseri Strasse treffe.
    Nach witere 30min biege mir i zwöit Weg ab und finde dütlich besseri Strasse vor üs, s‘Lebe rund um üs erwacht langsam und mir ghöre immer wieder e Hahn dr Tag akünde. Mir fahre a chline Quartier verbi wo Fraue am Wösche si jetzt wo me chli blaue Himmel gseht, chind uf dr Strass spile und Männer sich ufe kommend Tag vorbereite. Kurve um Kurve dr Berg druf immer höher und höher. Mir het e Wunderbare Blick über Moalboal.
    Leider chöme mir o uf dere Strecki ane unüberwindbare Punkt für üs, da Strass dür dir strke Unwetter verschüttet si worde. Mir stelle dr Roller ab und mache üs z‘Fuess witer ufe Weg. Nach ca 1h ufwerts mache mir kehrt da mir dr restlich Tag brüchte bis mir irgendwenn bim Osmeña Peak würde si.
    Bim abeloufe gseh mir immer wieder Iheimischi wo über die verschütteti Strass ufwerts und o wieder Abe fahre als wers selbstverständlich und als wers e ganz normali Strass. Zrügg bin Roller fahre mir wieder Talwerts nach Moalboal wo mir hüt no Sardine wöi go Jage.    Read more

    See translation
  • Lea ErniPhilippinenTraveler

    Where are the Sardines?

    February 16, 2023 on the Philippines ⋅ 🌧 24 °C

    Nach dr lange Reis mitem Roller zum Osmeña Peak simer wieder zrügg in Moalboal und chum simer dert regnets wie us chüble. Da mir aktuell ke Hoffnig uf besserig hei schnappe mir üsi sache und mache üs düre Rege uf zu de Sardine.
    Mir wöi si uf eigeni Fust finde und nid e Guide drfür zahle wo üs are Boje hinter sich herziet.
    S‘Meer isch hüt düre Rege und dr Wind wild und ar Küste entlang chame Welle Beobachte wo unruhig übers Meer tanze.
    O wenn me bim Schnorchle uf de suechi nach de Sardine eh nass wird beschliesse mir no e Moment z’warte und hoffe das o s’Meer chli zur rueh chunnt.
    Sobald dr rege chli nach laht lege mir üsi Flosse und Brille und Schnorchel a und mache üs ufe Weg zum Riff.
    I schwimme immer witer ufs offene Meer ir hoffnig dasi Sardine finde jedoch ohni Erfolg. Sie blibe eifach weg. Villich dür Unruhe vom Sturm irgendwo is Meer tribe.
    Bim Usecho frage alli Hoffnigsvoll öb me de Sardine het gfunde, weme verneint ghört me immer die glichi Antwort: where are the sardines?? Hüt werde mir se nüm finde.
    Am Abe esse mir no imme chline lokale Restaurant wome sich cha Spiessli ussueche, die werde de ufe Grill gschmisse und eim mit verschidene Bilage serviert. Me cha alles mögliche wähle, vo Hüener Darm, Herze, Lebere Puletbrust, Schweine Buch, schweinespiessli usw oder o früsche Fisch, Garnele und no vieles me.
    S‘Esse isch sehr fein gsi und dr Gruch vom Grill het viele Aglockt, wo de ufne freie
    Platz vorem Restaurant gwartet hei.    Read more

    See translation
  • Lea ErniPhilippinenTraveler
    Die fast unsichtbare Qualle hinterlö chlini stiche uf dr Hut.

    Where are the sardines? I found them!!!

    February 17, 2023 on the Philippines ⋅ 🌧 24 °C

    Am Morge teile mir üs uf, dr Rob geit ines Open Gym und trainiert dert und i packe wieder mini Brille, Schnorchel und Flosse und stürze mi it Welle. Mis Ziel Sardine finde!
    Guides chöme mit entüschte Kunde usem Wasser, sie säge mir scho grad sie gloube nid dasi Glück wirde ha, sie sige nüm da, sit drü Täg werde die grosse Sardine schwärm vermisst!
    Lächelnd äusseri nur: i‘m an optimist!
    I schwümme bis zum Riff und de am Riff entlang ar Küste uf und ab, einisch lani mi mit dr strömig la tribe und einisch schwimmi wieder gege strömig ufwerts.. ar küste findi se nid, drum schwimmi immer witer use ufs offene Meer, umgä vom tüfe Blau und vo de Welle wo immer grösser werde je witer duss i bi. O da schwimmi uf und ab mini Ouge is dunkle blau grichtet.
    I gniesse s‘Meer um mi ume, die Schönheit wo tief unde verborge ligt und das Blau wo uf mi sone Aziehig usüebt dases mi no witer usezieht.
    Nachere stund im Wasser hani Hoffnig scho fast verlore dasi Sardine finde, würum sött i se gseh wenn si sit 3 Täg verscholle si und die güebte Guides se nid mal finde. Ar Küste wit weg vo mir gsehni wieder alli Schnorchler mit de Schwimmweste wo sich a de Boje festhalte und sich vo ihrne Guides löh la vorwerts zieh, kenne ziehts so wit use wie mi. I frage mi wie lang i no söll usschou halte und öbi evt glich zrügg söll und genau denn blitzt öpis i mim Ougewinkel uf und woni mi undreie und genauer ane luege gsehni e rise schwarm Sardine vor mir.
    Mis Herz macht e gump und i würd mini Freud am liebste userüefe: I FOUND THEM!
    Scho schwimmi mitte imne risige Sardine Ball. Sardine Bewege sich mit eim im Rhythmus vom Meer, sie teile sich uf sobald du abtouchsch und du befindisch di ihrem Kreis umgä vo hunderte vo chline glitzerne Fische, wenn du wieder uftouchsch verschliesst sich dr Ball wieder unter dir. So blibe ca gueti 10min für mi ellei und luege dem Spektakel zue und gniesses das Erlebnis für mi ellei z‘ha!
    (Leider gits kes Foto da GoPro beschliesst das dr Akku leider leer isch sobald i se erblickt ha)
    Nach ca 10min winki as Ufer und rüefe lut: i found the sardines und scho stüre alli wo sich troue s‘offene Meer a um am Sardines run zuezluege.
    I mache mi zrügg as Ufer und uft suechi nachem Rob.
    Woner ghört dasise gfunde ha und nid ha chöne es Bild ufnäh bietet er a e neue Akku im üsere Unterkunft z‘hole, woni de nomal s‘offene Meer astüre mitemne neue Akku und erneutem Optimismus findi se nüm. Es söll wohl e Erinnerig i mim Herz blibe!    Read more

    See translation
  • Lea ErniPhilippinenTraveler

    We are driving through the rain again

    February 17, 2023 on the Philippines ⋅ ☁️ 27 °C

    Mir stige wieder ine Bus, üses nechste Ziel isch Oslob.
    Oslob isch bekannt für sini Walhaie. Mir stüre Oslob aber vorallem weg de Fähre richtig Bohol a. Uf dr fahrt regnets, dasmal simer aber besser grüstet füre Bus und hei Pulli und Jäggli scho bereit womer anesitze da o i dem Bus Klimaalag uf ca 15grad igstellt isch.
    Los geit die holprigi 3h fahrt vo Moalboal nach Oslob.
    Irgendwenn heimer de Bus praktisch für üs ellei, nach ca 2hmüesse mir no füre rest vom Weg umstige. Mir gäbä am Ticketkontrolleur t‘Adresse vo üsere Unterkunft düre und wärde de nätterwis grad drvor abglade.
    Üses Hotel ligt in Oslob City. Wie mir später erfahre gits o Ortschaft Oslob Whale Shark watching wos viel me Touriste het und natürlich jede Morge Walhai Tour startet.
    Am Abe loufe mir no dür Oslob City, ar Houptstrass ischs Stoubig und chlini lädeli reihe sich anenand.
    Am Meer findet me de no Überreschte vor Spanische Kolonialzit und es risigs Freiluft Kino wo e rise Atraktion isch. Familie hocke ufem Rase und luege i gross Bildschrim wo e Amerikanischi Kömödie mitem The Rock und em Kevin Heart zeigt.
    Touriste gseht me wit und breit kenni ussert üs, was üs fast spannender macht als dr Film selber. Mir schlendere über Promenade und mache üs de ufe Heiweg zum Hotel.
    Im Hotel erfahre mir de ar Reception das ab Oslob täglich am 15.00 e Fähre nach Bohol startet je nachdem wie s‘wetter isch, das cha aber erst am nechste Tag gseit wärde und drum beschliesse mir üs glich mal uf zude Walhaie z‘mache um z‘evaluiere öb mir das möchte mache oder nid.    Read more

    See translation
  • Lea ErniPhilippinenTraveler
    11

    Oslob and the Whale Sharkes

    February 18, 2023 on the Philippines ⋅ 🌧 26 °C

    Normalerwis wandere Walhaie vo Jahr zu Jahr Kilometer um Kilometer quer düre Pazifik, die längst Wanderroute wo vo de Walhaie dür Meeresbiologe gmässe isch worde isch über 20‘000 Kilometer lang gsi. (Vo Panama bis uft Philippinen)
    Uf ihrem weg chrütze si verschideni Länder und je nach Jahreszit wenn me Glück het findet me dr eint oder ander uf sire Wanderroute. A gwüsse Stelle wie vor Australie, Mexico oder de Seychelle findet me teilwis me als 500 Tier versammlet.
    In Oslob hei vor vielne Jahr Fischer Walhaie mit fueter aglockt und das het wiederum vieli Touriste aglockt. Die Walhaie wome in Oslob findet hei ihri natürlichi Wanderschaft unterbroche und sich vor Oslob agsidlet.
    Die Touriste Attraktion isch sehr umstritte, einersits wird gseit das Mönsche die natürliche Instinkt vo de Walhaie zerstöre idem sie se afüettere und sie so zum blibe verleite. Befürworter sege wiederum das me so vom usterbe bedrohti Tier vo de gfahre wo ihne uf Ihrere Wanderig begegne wie ihri natürliche Gegner, aber o Jäger wo se jage und töte und Frachtschiff wo se schwer chöi verletzte düe schütze.
    Mir si üs selber nid so sicher wie mir das finde doch gich locke si üs a, Chance mal e Walhai ts’gseh verleitet eim sehr.
    Im Dörfli acho wo sehr uf Touriste usgleit isch findet me verschideni Touchshops und Souveniershops. Schlange zum Schnorchle isch ewig lang und me müesst e Nummere zie und ca 3h warte da mir nid scho am 6i dert acho si. Mir entacheide üs drum im erste Moment drgege da mir nid so lang im Rege möge stah. Doch dür alli Guides aglockt wo dir verspreche wen du e Touchgang machsch chame sofort is Wasser wagi das glich. Vom Ufer chunnt me direkt zu de Walhaie wo dür Fueter aglockt werde. Im erste Moment toucht me is Blaue use ohni öpis z’gseh bis uf einisch e grossi Schwanzflosse erblicksch. Dr Blick wanderet ufe zu de Boot wo alli Schnorchler zu dene grosse Tier bringe und mitzt drinn schwimme mehreri Walhaie uf dr suechi nachem nechste Fueter wo us de Boot is Wasser gschmisse wird. Ir tiefi merkt me dr troubel vo de Schnorchler nid sondern cha de grösse Fische usem Meer mit gnue abstand zueluege. Me söll von Kopf und körper mind 3 meter abstand halter und vor Schwanzflosse sogar 5Meter da si ein drmit schüsch chöi treffe. Nachemne churze Touchgang vo ca 40min geit me zrügg a Land. Me toucht mit gmischte gfühl wieder uf da me einerseits glücklich isch die Wunderschöne Tier gseh z’ha und glich nid so sicher isch öb das dr richtig ort mit de richtige Gegäbeheite isch.    Read more

    See translation
  • Lea ErniPhilippinenTraveler

    Ferry, Ferry take us to Bohol!

    February 18, 2023 on the Philippines ⋅ 🌧 26 °C

    Nach dem scho vollgladene Morge undem Touchgang mit de Walhaie wird üs gseit das in Oslob ufgrund vom Wetter hüt ke Fähre me abfahrt, jedoch am Taloot jede Tag am 16.00 Uhr e Fähre nach Bohol ableit. Vo Olob nach Taloot het me mitem Bus ca 2.5-3h auso packe mir üsi sache zämä und stige i nechst klimatisiert Bus i.
    Nach 2.5h erreiche mir üses Ziel und werde bim Hafe grad abglade, mir loufe richtig Pier, doch es würkt wie usgstorbe, es paar Busse warte ufem Vorplatz, unter emne Bus entdeckt me e Hängematte und dr Fahrer wo sich usruht anderi sitze zäme im Schatte und warte uft Abfahrt. Mir mache pa uft suechi nachemne Ticketschalter doch ohni Erfolg. Mir finde e sehr nätte Sicherheitsbeamte wo üs eröffnet das hüt ke Fähre me nach Bohol ableit sondern. Erst ir Nacht am 3.00Uhr am Morge und de no eini uf die 10.00 Uhr am Morge.
    Mir sueche de spontan uf AirBnB und Booking öb mir evt e Nacht in Taloot chöi übernachte und Fähre uf die 3.00 am Morge chöi nä jedoch findet me wit und breit ke Schlafmöglichkeit. Drum geits mitem Bus witer nach Cebu City wo mir hoffentlich die letschti fähre no verwütsche oder mir am nechste Tag eini chöi nä.    Read more

    See translation
  • Lea ErniPhilippinenTraveler

    Cebu City, Hotel mit Witblick

    February 19, 2023 on the Philippines ⋅ 🌩️ 25 °C

    Am Vorabe Checke mir im Bai Hotel in Cebu City i, nach dere lange Busfahrt, em chli Frustrierende Ergebniss das am Samstig gar ke Fähre vor Taloot Warft abgleit het, so wie versproche, trette mir ine anderi Welt i. Ine chlini Blase umgä vo Luxus, Sicherheitschecks, still beobachtens Personal wo sobald öpis bruchsch a dire Site stöh. Ir Parfümierte Igangshalle chöme mir üs i üsne Reise chleider scho fast chli underdressed vor.
    Dr lang Tag im Bus bi immer stärker wärdendem Rege het üs müed gmacht.
    Mir beschliesse im Hotel go z‘Nacht esse.
    Mir hei gloub beidi no nie sones risigs Buffet gseh, e reis um die Kulinarischi Welt. Nach dem z‘Nacht und dem lange Tag gheie mir is Bett und finde zimlich schnell i schlaf, am nechste Morge stöh mir bi zite uf und gö no e Rundi is eigene Hotel Fitnessstudio und mache üs bereit für üsi witerreis.
    Bi Tag wird eim nur no bewusster das me vore Blase umgä isch. Bi Tag gseht me usem Fenster und gseht was Nacht und Finsternis verborge het. Chlini gruppierige vo Hüser, erbout us Holz, bläch und Tüecher, chinder wo dusse uf dr Strass zwüschem Verkehr spile und anderi wo bettle. Ide Quartier gseht me die früsch gwäsche i Wösch wo zwüschem Füür und de Hüser hängt. Me gseht s‘ware Cebu und ihri Mönsche.    Read more

    See translation
  • Lea ErniPhilippinenTraveler
    Fort San Pedro erinneret no hüt a Komandant Miguel Lopez de Legazpi

    Pier 1

    February 19, 2023 on the Philippines ⋅ 🌧 28 °C

    Da mir Online ke Tickets fürt Fähre me chöi choufe fahre mir vom Hotel direkt zum Pier One, üse Taxifahrer versuecht üs ufem Weg zur Fähre grad no e Crash kurs in Philippinisch gä, damit mir die wichtigste Wörter scho chöi wenn mir in Bohol, üsem nechste Ziel, achöme.

    Guten Tag: Magandáng araw pô
    Ja: Opò
    Nein: Hindí pô
    Danke: Salamat pô

    Nachdem mir am Pier One achöme stö mir churz bim Ticketschalter a und chöi de zwöi Tickets fürt Fähre am 13.00 ergattere.
    Zum Pier und i Wartebereich chunnt me nur mitemne Ticket, nachemne churze Sicherheitscheck, wome o grad het chönne lasi, da öbs Pipst oder nid, s’Gepäck schlussendlich eh nid Kontrolliert wird ;) , checke mir de üses Gepäck i und gö de nomal chli use go loufe damit mir bi endlich sichtbarem Blaue Himmel nid ir Wartehallen umesitze.
    Ide Strasse gseht me s‘ware Lebe vo Cebu City, Mönsche vor Ihrne Ständ, verchoufe caramelisierti Banane oder grilliere Spiessli fürs z‘Mittag. Gseh si Touriste rüefe si eim immer wieder zue und frage öb me öpis möcht, öpis brucht und wenn me verneint düe si eim glich o Wasserfläsche entgegenstrecke. Taxis fahre sobald si eim gseh langsamer und hupe oder rüefe lut fragend usem Fenster: Taxi?!
    Mir loufe bim Fort San Pedro verbi, es befindet sich ganz ir nächi vom Hafe wo at Kolonialzit 1565 und die Spanische bsetzer erinneret.
    Da mir no ke z‘Morge hei gesse hei mir usschau für öpis z‘esse damit mir nid Hungrig zwöi Stund uf dr Fähre sitze. Mir entdecke e Jolibee Filiale (Fastfood Ketti vo de Philippine, wie e McDonalds) und da üs das jede empfohle het versueche mir üses Glück dert mal. Im Nachhinein wüsse mir dases nur es einmaligs Erlebnis isch gsi wo mir nid unbedingt muess wiederhole.    Read more

    See translation
  • Lea ErniPhilippinenTraveler

    Vo Cebu City nach Bohol

    February 19, 2023, Philippine Sea ⋅ ☁️ 28 °C

    Mir sitze ir Fähre nach Bohol (Tagbilaran)
    Leider chame sobald me uf dr Fähre isch nüm use a die früschi Luft. Mir Fahre a schöne grüene, Hügelige Insle verbi mir chline Buchte und schöne Sandstränd, wo zum Bade und Sünnele Ilade. S‘Wetter blibt witerhin besser als die vordere Täg, o wenn me Wolke am Himmel gseht blitzt immer me Blaue Himmel uf und laht üs uf bessers Wetter hoffe.Read more

    See translation
  • Lea ErniPhilippinenTraveler

    Sunset

    February 19, 2023 on the Philippines

    In Bohol wartet e Blaue Himmel uf üs. Mir chöme mit dr Fähre in Tagbilaran dr grösste Stadt vo Bohol a, sobald me vo Bord chunnt kämpft me sich zu sim Gepäck füre und de chame z‘Pier verlah und isch umgä vo Taxi-, Van- und Tuktukfahrer, alli rüefe eim zue und wenn du nid reagiersch wirsch a tippt oder scho fast zumne wartende Outo härä glotzt.
    Mir eintscheide üs fürnes Tuktuk und lö dr Hafe schnell hinter üs. Nach ca 15min fahrt chöne mir bi üsem Hotel a und wärde sehr nätt i empfang gno. Mir bezieh üses Zimmer mit Ussicht ufe Pool und ir Ferni z‘Meer. Nachemne churze Spaziergang um Gägend chli erkunde düe mir üs im und am Pool entspanne. Mir werde nach üserer lange Reis s‘erst mal mitemne wunderschönne Sunnentergang belohnt.
    Am Abe fahre mir de mitemne Tuktuk zumne Restaurant wo üs dürs Hotel empfohle isch worde, wo me typisch Philippinischi Grucht cha esse.
    Üse Tuktuk Fahrer dr Joey bietet sich füre nechst Tag a üse Tourguide z‘si und üs die bekannte Orte vo Bohol ts‘zeige. Mir sie nochli unschlüssig öb mir sone Tour sölle mache drum git er üs sini Nr. und seit mir sölle üs bi ihm melde falls mir Interesse hätte. Mir chöme im Restaurant a, dr Joey isch weg und da merke mir das mir ihm no gar nüt fürt fahrt zahlt hei, während em Esse steit er plötzlich wieder nebe üs und seit er holi üs uf die 9ni wieder ab für hei er müess aber no anderi Kunde irgendwo ane fahre.
    Nachere liecht erschwerte bstellig da Karte nur uf Philippinisch gschribe isch gsi und Bilder vom Esse nid immer richtig hei chönne zuegwise werde, bechömme mir es sehr feins Philippinisches Esse uftischt.
    Nachem esse warte mir de vorem Restaurant uf üses versprochene Tuktuk jedoch isch dr Joey nid in Sicht, nach 15min wartezit beschliesse mir langsam los z‘loufe und mal it Richtig vo üsem Hotel z‘cho und nach 5min werde mir aghupt und dr Joey macht e vollbräms vor üs und ladet üs wieder i 😉. Ihm isch sini Verspätig sehr unagnehm und drum meint er am schluss mir müesse nüt zahle oder eifach das gä wo mir für richtig Halte. Mir werde nie erfahre öb mir zu wenig, zu viel oder richtig bezahlt hei.    Read more

    See translation
  • Lea ErniPhilippinenTraveler

    Chocolate Hills

    February 20, 2023 on the Philippines ⋅ ☁️ 29 °C

    Am frühe Morge heimer üs e Roller gmietet und si mitemne Sack voller dreckiger Wösch zumne Wösch Salon gfahre und hei se zum Wäsche gä mitem verspreche das mir sie am Abe de troche wieder chöi go abhole.
    Mir hei entschide das mir Insle Bohol uf eigeni Fust wöi erkunde und drum simer de mitem Roller richtig Chocolat Hills gfahre. Üs isch sofort ufgfalle das Strasseverhältnis sehr viel besser sie gsi als uf Cebu. Mir si dür chlini Wohnorte, Riisfälder und Städt gfahre. S‘Navi het üs nid immer a Richtig ort glenkt und dür die eher schlechti als rechti Internetverbindig heimer de o ab und zu nachem Weg müesse Frage so das mir o zu de Chocolat Hills si cho.
    Vieli erhoffe sich villich feini Schoggi bi de Chocolat Hills z‘finde jedoch wird die Suechi Erfolglos blibe. Dr Name trege die höger wo sich über mehreri Kilometer hinweg zeige wüu sich s‘Grass ir Trockezit uf dr Kuppel brun färbt und sie so usgseh als wöre sie mit Schoggi überzoge.
    Wie dir Chocolat Hills entstande si isch no nid ganz klärt.
    Es git vieli Legende wie Chocolat Hills entstande si, eini drvo verzellt das e Junge kräftige Riese namens Arogo sich ine jungi sterblichi Tochter vomne Häuptling dr Aloys verliebt het. Wo sie vertorbe isch isch sis Herz broche und er het bitteri Träne vergosse und die Träne hei die Hügel bildet und züge no immer vo sire tiefe Trur wüu er sini liebsti verlore het.    Read more

    See translation
  • Lea ErniPhilippinenTraveler
    1

    Koboldmakis

    February 20, 2023 on the Philippines ⋅ ⛅ 30 °C

    Nach de Chocolat Hills mache mir üs ufe weg zu de Koboldmakis de weltwit chlinste Primate. Me findet sie im Philippines Traiser sanctuary, es Naturreservat wo sich füre erhalt vo dene chline Tier isetzt. Im Igangsbereich findet me vieli Informationstafele zu dene chline Tier mit ihre grosse Glubschouge, denn geits witer ufemne churze Dschungelpfad wo Guides uf eim warte wo guet uf Koboldmakis ufpasse und luege das Regle (wie Flüstere, nur ohni Blitz Fotografiere und Tier nid alenge) ighalte werde. Im Reservat lebe me als 100 vo dene chline süesse Tier. Uf dem chline Pfad chunnt me aber nur a 8 Koboldmakis verbi, sie sitze im Schutz vo de Blätter ufemne Ästli und ufgrund vo Ihrere grössi se sie guet tarnt und drum i freier Wildbahn fast nid uffindbar.

    Nachem Bsuech im Philippines Traiser Sanctuary mache mir üs ufe Heiweg.
    Mir fahre dür Wälder zrügg richtig Meer und de ar Küste entlang wieder zrügg nach Tagbilaran zu üsem Hotel.
    Obwohl nachem ganze Tag Roller fahre üse Po scho flachdrückt isch entscheide mir üs no zum Alona Beach z‘fahre und üs dert de Sunneuntergang go aluege.    Read more

    See translation
  • Lea ErniPhilippinenTraveler
    Hello Buddy

    Alona Beach und Buddy

    February 20, 2023 on the Philippines ⋅ ⛅ 29 °C

    Nach 30min Rollerfahrt chöme mir vo üsem Hotel zum Alona Beach. Mir si fast chli überforderet vo de viele Touriste, gfühlt 100 Tourishops wo alli s‘gliche verchoufe und Restaurant und Clubs wo sich anenad reihe.
    Dr Weg zum Strand muess me z‘Fuess überwinde und nach churzer Zit erstreckt sich vor eim e lange Strand. Mir spaziere ar Promenade entlang bis mir es schöns Plätzli finde wo mir üses Tüechli usbreite und de es bad im Meer nähme. S‘Wasser isch Kristall klar und schön warm. Nach dere abchüelig sitze mir de uf üsem Tüechli und luege am tribe vom Strand zue, immer me Touchboot lege am Strand a und bringe die fröhliche Toucher vo ihrne Touchgäng zrügg. Uf dr Promenade wird Sunset Yoga abote und es versammle sich immer me lüt um ei Yoga Trainerin und Yogamattene wo scho vorbereitet vor ihne lige.
    Kind renne ume und springe is Wasser, es wäre Selfies gmacht, Hünd wärde spaziere gfüehrt.
    Im ganze tumult hüpft e chline brune Hund (dr Buddy) zum Rob ufs Tüechli, me gseht das sis Fäll vo Lüs und Piltz befalle isch und trotzdem würkt er ganz zfriede uf dr suechi nach öpis essbarem.
    Dr Rob und er spile e rundi mitem Stöckli und wenn er eim ganz fröhlich agumpt wett me ne am liebste ipacke und mitnä.
    Mir gniesse dr Sunneuntergang, Sunne verfärbt sich am Himmel Orange/Rot und dr Himmel wird Rosa.
    E wundervolle Abschluss vo dem wunderschönen Tag.    Read more

    See translation
  • Lea ErniPhilippinenTraveler

    Bee Farm

    February 20, 2023 on the Philippines

    Zum z‘Nacht mache mir üs ufe Weg zur Bohol Bee Farm.
    Bohol Bee Farm isch im 1998 gründet worde, die ganz gschicht het mitemne Gmüesgarte und mit 4 Mitarbeiter gstartet. Sie hei nid nur Gmües about sondern o sechs Kolonie vo Biene hei gha und drmit Honig hei produziert, im Jahr 2000 isch das ganze scho viel grösse gsi und sie hei 200 Biene Kolonie gha und si alli drü Mönet i ne neui Stadt vo Bohol umgsidlet um Honig z‘produziere.
    Mitlerwile isch das es grosses Unternehme, me cha ir Bee Farm übernachte, es git e Shop wo verschiedeni Produkt verchouft und o es Restaurant wome sehr fein cha esse.
    Hüt findet me ir Bee Farm leider ke Biene me, ufgrund vor Pandemie hei sie ke Königinne für Ihri Stämm chönne la importiere und somit hei sich ihri schwärm nüm chönne vermehre. Jetzt bezieh si Honig vo lokale produktione vo de Philippine.    Read more

    See translation
  • Lea ErniPhilippinenTraveler

    Mitem Bus vo Tagbilaran nach Guindulman

    February 21, 2023 on the Philippines ⋅ 🌧 27 °C

    Nachdem mir im Hotel nachem Busstop gfragt hei und üs alli mit grosse Ouge aluege und Gsichtet verzie, biete sie üs ah eher es Tricycle z‘nä anstatt die ewigs langi fahrt mitem Bus. E Priis cha üs niemer nenne, sie meine mir sölle grad mitem fahrer verhandle, o er nennt ke Priis woner üses Gepäck iladet drum entscheide mir das mir de glich dr Bus nämmä und die längi beschwärlichi Reis uf üs näme.
    Üse Fahrer dr Joey bringt üs de richtig Busstop, woner de üse Bus uf dr gägä Fahrbahn gseht winkt er ihm und git ihm es Handzeiche zum Stoppe. Mitte uf dr Strass mache mir de e Fahrzügwechsel und sitze im Bus wo üs gwunderigi Ouge entgege luege, da mir die einzige Touriste si wo hie im Bus hocke. Mir finde trotz viel Gepäck es plätzli im hintere Teil vom Bus und scho geit die Reis richtig Ziel Guindulman los.
    Im Bus isch grad e Prediger es gebät ines Mikrophon am spreche und es paar hei ihre Händ verschränkt und Bäte mit.
    Mir chöme erstuhnlich guet vorwerts sobald mir us dr Stadt Tagbilaran dusse si.
    Mir fahre a Strassemärkt, Fischerdörfli, Häfe, Riisfälder und Wohngebiet verbi und i jedem Wohngebiet egal wie gross oder chli findet me immer wieder e Basketball platz. Überall gseht me lüt wo schaffe, ihri Boot vorbereite oder im Schatte hocke. Kind spile uf de Vorplätz oder loufe i ihrere Schueluniform am Strasserand richtig deheim wo vermuetlich ihres z‘mittag uf sie wartet.
    Uf dr Riisfälder gseht me es regs tribe, Pflüege, säie, ernte und dr Riis wo ir sunne tröchnet und immer wieder muess umgruert werde das o jedes Riischörndli schön troche isch.
    Mir fahre ar Meeresküste entlang, s‘wasser isch so klar das me dr Sand und Stei cha erkenne und es lockt üs usstige und e gump fürne schöni abchüelig is Meer z‘mache.
    Busstops gits kenni, es wird pfiffe oder es Handzeiche gä wemme use möcht usstige oder vor Strass wird gwunke so das dr Bus weiss daser neui Passagier muess uflade. S’Busticket chouft me gmüetlich im Bus wenn me sis Ziel gnennt het.
    Mir freue üs ufe witer Tag o wenn mir merke das mir de Regewulke immer nöcher chöme.    Read more

    See translation
  • Lea ErniPhilippinenTraveler
    Dr Rob isch dr KatzeflüstererAmpelsystem uf de Philippine

    Guindulman und Whisky

    February 21, 2023 on the Philippines ⋅ 🌧 26 °C

    In Guindulman acho stige mir bim Busstop usem Bus und werde grad gmusteret. Wo mir nachefrage öb üs es Tricycle chönnt zu üsere Ubterkunft bringe simer umringt vo 10 Lüt wo üs uf üses Telefon und Google Maps luege nimer isch sich sicher wo die Unterkunft söll si. Mir einige üs das mir se mit üsem Google Maps bis zur Adresse lotse. Scho sitze mir im nechste Tricycle mit üsem Gepäck und werde zu üsere Unterkunft gfahre. Nach ca 5min biege mir ine chline Sitestrass und si mitte imne Wohnquartier, dr Weg wird immer enger und holpriger. Wo mir abiete z‘Fuess witer z‘ga chunnt das gar nid i frag und mir werde bis vor üsi Unterkunft bracht.
    S‘Hus ligt z‘mitzt im grüene und es paar Hüener, Katze und Hünd loufe im Garte ume schüsch isches sehr ruhig und mir si üs nid sicher öb überhoupt öper deheime isch. Tür isch offe und mir rüefe i lang Gang wo sich dunkel vor üs usstreckt. Ke Antwort, auso gömer mal inne bis mir am endi vom Gang achöme und me i hinter teil vom Garte gseh. Erneut rüefe mir: Hello?! Und da bechöme mir de schliesslich e überraschti Antwort. Erwartet simer nid worde und üsi buechig grad nid uffindbar.. aber mir werde trotzdem sehr Herzlich empfange und es wird üs grad es Zimmer abote.
    Das dusse no regnet sitze mir chli uf dr Veranda und finde es chlises Büsi zum schmüsele. Ufgrund vome Missverständnis wird das Büsi de vo üs ufe Name Whisky touft.
    Dr Whisky gniesst strichel einheite sehr und machts sichs bim Rob sehr gmüetlich was wiederum ihn sehr Happy macht.
    Wo de dr Rege verbi isch beschliesse mir e Spatziergang in Guindulman z‘mache und Ortschaft chli z‘erkunde.
    Touriste gits hie nid viel das merkt me da mir immer wieder agsproche werde und üs tuegwunke wird.
    E chline Hunger tribt üs de zure lokale Bäkerei wo mir für 10pesos (ca 17rappe) es süesses Brötli esse. Nachdem mir ortschaft hei erkundet teile mir üs mit es paar Iheimische es Triecycle und fahre nach Anda.    Read more

    See translation
  • Lea ErniPhilippinenTraveler

    Anda und Oreo

    February 21, 2023 on the Philippines ⋅ 🌧 26 °C

    Anda isch es grössers Dorf ar Küste vo Bohol. Mitem Tricycle isch me ca in 30min dert. Mir werde bim Marktplatz abgstellt und chöi grad am rege tribe dert zueluege.
    Lustigerwis het me z‘gfühl das s‘Dorf erst jetzt zum lebe erwacht, ufem Märit wärde Ständ füre Abe vorbereitet, es wärde Riis, Frücht, Fleisch und Fisch abote.
    Wie immer findet me e Sportplatz im Zentrum, dert renne Jungs und Mädels Barfuess oder mit Flipflops amne Basketball nache und spiele zämä Basketball. Mir loufe dürt Strasse und gniesse das Sunne wieder überhand het gno. Ufem Weg zum Strand chöme mir amne Fisch Stand verbi und wo mir frage öb mir es Bild dörfe mache wird o hie wieder flissig posiert. Am beste isch so lang witer Fotografiere bis sie nüm posiere und me ihri natürlichi fröhlichkeit cha ifange.
    Bim Strand erwartet üs wiise Sand und Ebbe. Ebbe zieht die Iheimische use uf dr suechi nach Seeigle und Krebse watte sie dürs Wasser und Sammle dert für Ihres z‘Nacht.
    Me cha Seesterne beobachte wo sich langsam überem Sand furtbewege und chlini Kräbsli wo dr Sunne entgege loufe, sobald sie jedoch e huch vore gfahr wahrnähme sich im Sand vergrabe.
    Üse Weg krützt sich mitemne chline Welpe, er gseht ehrlich gseit nid sehr gsund us, sis Fäll isch zerfrässe vo Flöh.
    Wenn me ihm zu nöch chunnt bückt er sich i deckig und zuckt scho fast zämä. Nachdem er chli vertroue het gfasst cha me ihn de glich strichle, was ihn und natürlich üs sichtlich glücklich macht.
    Es bricht eim teilwis fast Herz wenn me streunendi Tier gseht und me weiss viel cha me nid drgege mache.
    Mir nenne de chli Hund Oreo da sini Hut wiis dür sis Fell düreblitzt.
    Nachemne feine z‘Nacht imne Restaurant wo ar Decki sehr viel Spinne het beherbergt. Versueche mir üs ufe heiweg z‘mache. Wo mir öper frage öb sie wüsse wo mir e Mitfahrglegeheit nach Guindulman finde, luege sie üs alli mit grosse Auge a oder fange a lache und frage was mir de dert wölle. ;) wo mir de öper finde wo üs fahrt wirds e sehr holprigi und langsami Spazierfahrt zrügg nach Guindulman.
    Müed und zfriede nachemne lange und ereignisriche Tag gheie mir i üses Bett.    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice