Reset search
Vietnam & Philippinen 2023Vietnam & Philippinen 2023
SatelliteEdit route

Vietnam & Philippinen 2023

September - October 2023
A 22-day adventure by Janine Read more
  • 57footprints
  • 4countries
  • 22days
  • 469photos
  • 13videos
  • 14.6kkilometers
  • 12.1kkilometers
Follow Calendar Share Bucket list
Date ascending
  • TravelerVietnam & Philippinen 2023
    Day 10

    Off to Hanoi. 🧧

    September 26, 2023 in Vietnam ⋅ ☁️ 32 °C

    Die Nacht hemmer bis jetzt mit Abstand am beschte gschlafe. Kein Lärm, kei Gwitter, kei Kakerlake & es bequems Bett wo mit weichi Duvets usgrüschtet gsi isch. Au wenns zMorgebuffet hauptsächlich us Ris, Nudle, Curry und Fleisch bestande isch, hend mir no paar für üs „normali“ Lebensmittel gfunde und üs so en feine zMorge chöne zemmestelle. 🥖🍊☕️ Wommer bim Check Out den no nach de drü usglehnte Schirm gfraget worde sind, hemmer ab üsere Notlüg alli drü chli chöne schmunzle.🤭🌂 Als chlini Retourkutsche hemmer denn defür gmerkt, dassmer üse Huet de „Non La“ im Hotelzimmer vergesse hend.🥹👋🏽 Gstärcht hemmer üs uf de Weg zum Flughafe gmacht und nachere knappe Stund hemmer den auscho chöne boarde. Nach knappe 1.5h Flug simmer im Norde, i de Hauptstadt vo Vietnam glandet. Da in Hanoi werdemer üsi letschte 1.5 Täg verbringe bevors den witers id Philippine gaht. 🇵🇭

    To Do:🫰🏻
    - Neue Pulli fürd Nicole chaufe (unterwägs verlore)
    - Vietnamesischi Dong „loswerde“ 💸
    - Train Street erkundige
    - Unterkünft/ Planig fürd Philippine in Ahgriff neh    Read more

    See translation
  • TravelerVietnam & Philippinen 2023
    Day 11

    the smokey town. 🚬 🛵🔥

    September 27, 2023 in Vietnam ⋅ 🌧 28 °C

    Scho wommer im Taxi richtig Hotel gsesse sind, hemmer gmerkt wie dreckig, verpeschtet und lut‘s i dere Stadt isch. Verkehrschaos pur! Jede fahrt Roller aber die wenigschte chönd fahre den es het au praktisch niemert en Füehrerschi. E Personebegrenzig pro Roller gits nöd, mi gseht alles. Mah mit Frau & emne Baby ufm Arm oder drü Chind und eis devo hockt im Schnidersitz am Bode. Für vieli dient de Roller au es Transportmittel. Seg das für Baumaterialie, Isestange oder Palette voller Frücht. Es isch ganz egal für was, alles het ufm irgendwie Roller Platz. Im Strasseverkehr gits au kei Regle, mi kommuniziert eifach mit Hupe. Drum ischs i dere Stadt au so wahnsinnig lut und es herscht e hektischi, gstressti & völlig chaotischi Atmosphäre.🤯
    Dezue here isch dLuft völlig verpeschtet. Es stinkt nach Abgas und ah de Strasseränd gseht mer Locals wo chochet, grillieret oder wo mit Füürchessel alles mögliche ah Schrott verbrennet.🔥 Lut Internet werde da schätzigswis über 500 Tonne Holzchole und über 700 Tonne Abfall täglich verbrennt!!😱 Dezue here rauchet öppe 80% i dere Stadt. Es Päckli Marlboro Zigarette sind öppe glich tür wie en Kafi, also um die 31‘000 vietnamesischi Dong, aso umgrechnet öppe 1,05 Schwizer Franke. Marlboro sind aber mit Abstand die türschte Ziggis, anderi Markene sind nöd mal halb so tür.    Read more

    See translation
  • TravelerVietnam & Philippinen 2023
    Day 11

    Hanoi.

    September 27, 2023 in Vietnam ⋅ 🌧 27 °C

    Da mir hüt am Morge am viertel vor 2 vo Hanoi uf Manila flüget, hemmer üs hüt de ganz Tag müsse i dere Stadt dureschlah. Am 12:00 Uhr isch d‘Uscheckzit im Hotel gsi. Mir hend gwüsst dass de Tag i dere „Horrorstadt“ ewigs lang si wird und drum hemmer denn au erscht am 11:59 Uhr uscheckt.🤭 Im Vorrus hemmer üs den es Ihchaufszenter usegsuecht, sind döt higloffe und wommer ahcho sind het sich herusgstellt dasses e riese Märthalle mit second hand Chleider isch. „Wommer ufme T-Shirt e Etikette mit „Vera Moda“ gseh hend, isch für üs isch zimlich schnell klar gsi dass das au Chleider vo Tourischte si müend. Üsi Vermuetig isch, dass das sogar Chleider us „verschollene“ Koffer vo Tourischte gsi sind. Trotzdem ischs no spannend gsi was da alles ahbote worde isch. Will dNicole ihre Pulli imne Nachbus ligge lah het, het si sich da sogar no miteme neue Pulli (nöd mit dem vom Föteli😂) ihdeckt, demit si bim nögschte Flug nöd frührt.🧥
    Das sogenannte Shoppingzenter hemmer den zimli schnell gseh und den ischs uf üsi Beizetour gange.🍹Vo Kafi zu Reschti zu Kafi zu Souvenirlade den wieder zu Reschti und wieder ines Kafi, so isch üse Namittag den glich no ganz gmüetlich worde und somit isch die Zit glich no einigermasse schnell vergange.☕️ 🥡 Üses Hanoi Highlight staht aber immerno vor de Tür und zwar isch das die bekannti Train Street. 🚃🤭    Read more

    See translation
  • TravelerVietnam & Philippinen 2023
    1
    Day 11

    train street. 🚃

    September 27, 2023 in Vietnam ⋅ 🌧 26 °C

    Die berüehmti Train Street zgseh, isch für üs es absoluts Muss. Geg de Abig, lut Internet am 19:00, 20:45 und 22:00 Uhr bretteret de hundert Jahr alti Zug zwüschet dene enge Hüserblöck und Beizli im Schrittempo über dBahngleis durs Städtli. 🚃 Wommer am 18:45 Uhr bim Bahngleis ahcho sind, hemmer gmerkt, dass de spezielli Zug nöd nur für üs sehenswert isch. Eis Getrubel rund um das Bahngleis. De Zuegang zu de direkte Beizli am Bahngleis wird vonere Abschrankig versperrt und zuesätzlich no vo Polizischte überwacht. Willmer ohni en Local gar nöd zumne Kafi am Bahngleis chunt herrscht e müehsami Stimmig ah de Abschrankig. Jede Local wett natürlich so viel Tourischte wie möglich bi sich im Beizli als Gascht ha und somit herrscht ah de Abschrankig scho fascht en Kampf um Tourischte. Nach dutzend Ahfrage simmer den amne Local über d‘Abschrankig is Kafi gfolgt. All die Beizli i dem schmale Strässli sind gfüllt mit ufgregte Tourischte gsi. Vieli sind au scho am Bahngleis gstande und hend mit de Kamera gspannt uf de Zug gwartet. Zu dene gspannte Touris mit Handy und am Bahngleis hend übrigens au mir ghört, aber wo den bis am viertel vor 8ti immerno kein Zug zgseh und zghöre gsi isch simmer den mal is Beizli eis gho neh.🍹 Plötzlich hets den gheisse, dass de Zug erscht am halbi 9 ihtückerle wird. Churz vor de halbe 9ä sind den all die nervöse, gspannte Touris inkl. mir wieder ufgstande und hend Kameras am Bahngleis wieder parat gmacht. 📸
    Nacheme Horne ischs den würkli nümme lang gange, de Zug isch ihzfahre cho und nachere knappe Minute ischer denn au schowieder furt gsi.🤭 Trotzdem het sich die Minute glohnt und ganze drum herum mit de Belüchtig & de Lampiön hend e mega schöni, gmüetlichi Abigstimmig gmacht.😍💡    Read more

    See translation
  • TravelerVietnam & Philippinen 2023
    Day 11

    💸

    September 27, 2023 in Vietnam ⋅ 🌧 26 °C

    Nach de Train Street hemmer üs den no mit Snacks für de morgig Reisetag ihdeckt. Luschtig wie i dem Supermärt dSchwizer Schoggene abgschlosse gsi sind.🍫 Da mir no zviel Bargeld vo Vitnam hend und shüt üse letscht Abig isch, hemmer hüt de ganz Tag glueget dassmer so viel wie möglich Bar & nöd mit de Charte zahlet, demit mir das Geld nöd heineh münd. Mir sind denn no ine Bar öpis go trinke und planet isch gsi, dassmer den nacher zrugg is Hotel gönd, üs umziend, parat für de Flug machet und öppe am 23:00 Uhr mitm Taxi an Flughafe fahret. Wommer im Beizli den zahle hend welle, hemmer müesse feststelle dassmers mitm Bargeld usghe wohl zu guet gmeint hend und sGeld nöd mal meh für üsi Drinks glanget het. Da isch üs den plötzli au in Sinn cho dassmer fürs Taxi ja auno Bargeld hettet sölle phalte.🤷🏻‍♀️ Willmer da mit de Charte au nöd het chöne zahle, sind dManu und ich losgspeedet und hend üs uf dSuechi nacheme ATM Bankomat gmacht währenddesse dNicole im Beizli gwartet het. Mir hend den gar nümme so viel vorigi Zit gha und sind mit Maps vo Bankomat zu Bankomat gange. Leider hettmer sich uf die ahzeigte Bankautomate ufm
    Maps nöd immer chöne verlah. 2/3 vo den e Automate sind gar nöd ume oder den usser Betrieb gsi.🏦
    Mir sind den aber doch no zu Bargeld cho und sind e halb Stund spöter wieder bi de Nicole im Kafi ihtroffe. Ahschlüssend simmer zrugg is Hotel, hends Taxi cholah und hend üs uf de Weg zum Flughafe gmacht. Wommer den scho fascht usem Städtli und em Verkehrschaos dusse gsi sind het am Taxifahrer sis Handy gschellet. De Hotelbsitzer isch drah gsi und het ihm mitteilt, dass üses Zimmer für die Nacht nonig zahlt isch. Mir sind nöd ganz druscho aber uf all Fäll hemmer den nomal müesse chere und sind zrugg zum Hotel gfahre. Da mir üs au nümme sicher gsi sind, nüt hend chöne vorlegge und mir dringendscht an Flughafe hend sölle, hemmer den da au keis Büro ufgmacht und hend de offnig Betrag vo dene knappe 30.- no zahlt. Zum guete Glück hettmer i dem Hotel chöne mit Charte zahle sust hettmer dBargeldbezug Taxe nomal müesse in Kauf neh.😆    Read more

    See translation
  • TravelerVietnam & Philippinen 2023
    Day 12

    Reisetag, hellö Philippines. 🇵🇭

    September 28, 2023 on the Philippines ⋅ ☁️ 31 °C

    01:45 Uhr, Flug von Hanoi nach
    —> Manila (Ankunft 06:30 Uhr)
    ➡️ Stimmig: müed, greizt, zickig & gnervt.
    🥱🙄👹😐😤

    13:50 Uhr, Flug von Manila nach
    —> Puerto Princesa (Ankunft 15:15 Uhr)
    ➡️ Stimmig: Nachem (fascht nöd essbare) zMorge, zwei Kaffis und chli döse hemmer wieder chöne lache.
    ☕️🍳🤗🥰😂

    15:30 Uhr, Bus von Puerto Princesa nach
    —> El Nido (Ankunft ca 21:30 Uhr)
    ➡️ Stimmig: hungrig aber Tomatespaghetti to go, chötzlig, träg, ungeduldig, müed
    🤷🏻‍♀️😌😵‍💫🤫😮‍💨

    22:30 Uhr, Ankunft El Nido
    —> Einchecken Hotel
    ➡️ Stimmig: erliechteret, luschtig, hungrig aber zmüed zum no öpis esse, vorfreudig uf en chillige Tag am Strand
    😍👙🍹🌞🌴

    23:30 Uhr, Guetnacht Reisebuddys. 🌙✨💛    Read more

    See translation
  • TravelerVietnam & Philippinen 2023
    Day 13

    Vanilla Beach, El Nido. 🌞

    September 29, 2023 on the Philippines ⋅ ☁️ 29 °C

    Will momentan dRegemönet im asiatische Rum sind isch dReiseempfehlig eher gring. Mir hend üs aber dezue entschiede, die eher höch Regewahrschindlichkeit in Chauf zneh defür hemmer e wunderschöni, blüehendi Natur und mir chönd uf überfüllti Stränd, Büs und uf usbuechti Hotels verzichte. Das die letschte zwei Täg in Vietnam ziemlich viel gregnet het, üs aber zum Glück nöd gstört het willmer e i de Stadt gsi sind, hemmer hüt umso meh uf schöns Wetter für üse Strandtag da in El Nido ghofft. Am halbi 10ni ischs denn (wortwörtlich) us de Matratze gange. 😂 Nachdem mir de zMorge uf de Veranda gesse hend, üs ahschlüssend für de Strand parat gmacht hend, simmer mitm „Tricycle“ an knapp 5km entfernte Strand tückerlet. De wunderschöni Vanilla Beach het da uf üs gwartet. Au wenns Wetter zwüschetdure mal echli zue due het unds mal echli dunneret het, ischs de ganz Tag troche bliebe und mir hend de fuhli, schöni Tag i vollschte Züg chöne gnüsse. Mir hend denn während dem dSunne untergange isch auno en megafeine zNacht imne Strandbeizli chöne gnüsse. Ahschlüssend wär no d‘Fullmoonparty ufm Plan gstande. Die het am 17:00 Uhr gstartet und wo mir den um die 19:00 Uhr das Partyareal direkt am Strand abcheckt hend, hets nöd mal es Dutzend Lüt gha und no kein Chnoche isch uf de Tanzflächi gsi. 😂💃 Da gsehtmer, dasses au en Nachteil si chan wenns mal nöd viel Touris umehet.🤷🏻‍♀️Read more

    See translation
  • TravelerVietnam & Philippinen 2023
    Day 14

    Inselhopping Tour. 🐠

    September 30, 2023 on the Philippines ⋅ ☁️ 29 °C

    Gester Abig hemmer üs dezue entschiede für de hütig Tag e Inselhopping Tour zbueche. Wo am halbi 8ti de Wecker gschellt het, het keini so richtig möge ufstah. Wommer bim zMorge uf de Veranda denn no gseh hend dasses regnet, wärmer am liebschte grad alli nomal under Bettdecki verschwunde. Am halbi 9i isch üs sTricycle den bim Hotel go abhole und mir sind zemme mit üsem Vegi Lunchpacket wommer vom Hotel becho hend, zum Treffpunkt am Strand gfahre. Da DNicole üse Oberschnorchler ihres Schnorchelzüg scho debi gha het, hend nurno dManu & ich müsse Taucherbrülle & Schnorchel miete. (Ja Nicole ez hesch du üs mal derfe uslache.😂) Wos üs den no Flosse hend wele vermiete hemmer üs dezue entschiede dassmer die nöd bruchet will üsi Adilette sich au i dene Ferie wieder als Alleskönner bewiese hend.🩴 SWetter isch den au immer schöner worde. Am halbi 10ni simmer den samt Usrüschtig ufs Boot verfrachtet worde und sind churz drufabe zum erschte Stopp zum Bacuit Beach gfahre. Das da all die Toureboot de erschti Stopp ihlegget het mer am überfüllte, abglegne Strand gmerkt. Mir hend üs da e Abchüelig gönnt und nacheme Stündli ischs den witers zum zweite Punkt, zum big Lagoon.🛶Read more

    See translation
  • TravelerVietnam & Philippinen 2023
    Day 14

    Kajak Tour, Big Lagoon. 🛶

    September 30, 2023 on the Philippines ⋅ ☁️ 29 °C

    Vom Boot hemmer den derfe ufs Kajak umstige. Nöd numme vom kristallklare blaue Wasser simmer fasziniert gsi sondern au vo de ganze Umgebig, de Felse und de Natur. Wo dSunne den no zwüschet de Klippe duregschnunne het, het die Stund ufm Kajak nümme schöner chöne werde. 🌞
    Ahschlüssend isches den witers zum 3te Stopp em Corong Beach gange.    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English