Reset search
Andi und PadelAndi und Padel
SatelliteEdit route
Velobegeistertes Paar aus Olten (CH) mit grossen Träumen. Unsere grösste Reise beginnt im Juni 2023 mit Coast to Coast USA in 3 Monaten. Read more Olten, Schweiz
  • TravelerUSA Coast to Coast
    Day 71

    New York - 9/11 Memorial

    August 12, 2023 in the United States ⋅ ⛅ 25 °C

    Hüt heimer üs nach 2 lockere Täg mit Outlet-Shopping und Legoland is Getümmel vo New York gstürzt. Für üs definitiv gwöhnigsbedürftig plötzlech wieder i so Mönschemasse ungerwägs z si. Um üs e Überblick z verschaffe heimer am Morge aus ersts s Rockefeller Center bsuecht und si denn mitem Hop on Hop off Bus dürd Stadt gfahre. E Bsuech bi Hersheys het au nid dörfe fähle: Dört gits bi jedem Bsuech es gratis Schöggeli😋.
    Am Nomittag heimer üs de ar Gschicht vo 9/11 gwidmet. Zersch imene chline Museum vomene offizielle Fotograf wo die ganze Arbeite nach 9/11 fotografisch festghalte het. Denn ischs zum Ground Zero gange, em offizielle Dänkmal. Scho beidruckend das z gseh und im Museum drzue au id Gschicht iztauche. Zum Schluss heimers no pünklech vorem Sunneungergang ufs One Worl Observatory mit fantastischem Blick über d Stadt gschafft.    Read more

    See translation
  • TravelerUSA Coast to Coast
    Day 70

    Outlet und Legoland

    August 11, 2023 in the United States ⋅ 🌙 27 °C

    Am erste Tag nach Akunft in New York heimer üs zersch mou imene riesige Outlet neu ikleidet. Vor auem dr Patrick isch froh wider richtigi churzi Hose z ha und nid ide Badhose müese umezlaufe. Au e grosse Koffer heimer bsorgt, mir hei auso jetz vüu Platz für Souviniers.
    Am Tag druf heimer mitem Legoland grad ar Andi ihres Geburigschänk iglöst. D Chindheitserinnerige si aber irgendwie besser aus d Realität. E ganze Tag isch us Erwachseni schwierig z fülle. Immerhin isch d Miniature World guet gmacht und mir hei vüu Highlights vo üsere Reis wieder entdeckt.
    Zum Abschluss vom Tag simer de ines Restaurant mit typischer Südstaatechuchi. Und vilech simer dört nid zum letschte mou gsi😋.    Read more

    See translation
  • TravelerUSA Coast to Coast
    Day 69

    Portland-Boston-New York

    August 10, 2023 in the United States ⋅ ☁️ 24 °C

    Hüt simer mitem Zug vo Portland uf New York gfahre. S Bueche het sech scho aus umständlech usegstöut, wöu mer 2 Velo derbi hei und d Veloplätz sehr beachränkt si. Der erst Schock hets de gester Obe am 20 ab 10i gä: Es Email vo Amtrak mit der Nachricht der Zug Portland-Boston sig canceled, wöu s Gleisbett vom Sturm usgspüelt worde isch. 3 Minute simer zimlech närvös gsi und de isch nomou es Mail cho. Es isch fausche Alarm gsi. Hüt morge simer auso früeh mit Sack und Pack los zum Bahnhof, wöus gheisse het mitem Velo söu me 30 min. vor Abfahrt dört si. Natürlech heimer aber ersch wo dr Zug igfahre isch wie aui angere ufs Perron chönne. Dr Kondukteur isch zum Glück nätt gsi und het üs ghuufe aus izlade. Zug fahre mit Velo isch do no e grösseri Pain aus bir SBB. Me mues tatsächlech s Vorderrad abmontiere. Nach 30 min. Fahrt richtig Boston simer de 1.5h nüm vorwärts cho wäge "Police Activity" und eme Güeterzug wo üs het söue chrüze. In Boston heimer zum umstige in weiser Voraussicht sowieso 4h iplant gha. So het aus perfekt klappet. In Boston simer de vom Kondukteur mit de Velo ine Wage gschücht worde. Natürlech hets dört kei Veloplatz gha. Auso simer mitsamt Velo düre haub Zug gloffe. D Fahrt uf New York het üs de entlang dr Küste a schöne Landschafte verbigfüehrt.
    In New York acho ischs mitem Velo Richtig Brooklyn gange. Dr Traum vor Andi einisch mitem Velo überd Brooklyn Bridge z fahre isch so au in erfüllig gange. Aber augemein heimer s Velofahre in New York nid aus prickelnd empfunde und si froh simer die nöchste Täg mit dr Metro ungerwägs😅.    Read more

    See translation
  • TravelerUSA Coast to Coast
    Day 67

    Portland, Maine

    August 8, 2023 in the United States ⋅ 🌧 21 °C

    Nach dr abentürleche Rückreis usem Acadia Nationalpark, simer froh gsi het mitem Airbnb aues tiptop klappt. Üse Host isch e äutere Herr wo vüu z verzöue het gha und üs zersch mou 45 min. aus über Portland erklärt het.
    Tags druf heimer e Velotour zumene State Park im Süde vo Portland ungerno. D Küstelandschaft mit Klippe und Sand isch wunderschön. Uf der Mailboat-Rundfahrt zu verschidene Insle ir Umgäbig isch Ungerwägs immer d Post us- und iglade worde. A üsem letschte Tag hets fasch dr ganz Tag grägnet. So heimer zersch mou no üse Trip nach Washington plant und si denn id Altstadt zum es paar Mitbringsel z bsorge. Morn geits früeh mitem Zug über Boston witer nach New York.    Read more

    See translation
  • TravelerUSA Coast to Coast
    Day 64

    Acadia Nationalpark

    August 5, 2023 in the United States ⋅ ☀️ 21 °C

    Nachdem mr gester mitem Bus über Bangor ufe KOA-Camping uf dr Mount Desert Island si gfahre, heimer hüt dr Acadia Nationalpark erkundet. Mir hei auso üsi Veloschueh gäge d Wanderschueh tuuschet - oder eifach die einzige Schueh abhaute womer drbi hei😅 und si mitem Bus nach Bar Harbor und witer i Park gfahre. S Busnetz isch erstuhnlech guet usbout und gratis für aui wo e Nationalparkpass chaufe. Eigentlech si es paar chürzeri gmüetlechi Spaziergäng ufem plan gstange. Am Schluss ischs glich eher e chlini Wanderig worde. Aber fürd Ussicht ufd Seeä und s Meer het sechs glohnt.
    Denn heimers üs in Bar Harbor no chli guet loh go und zum Abschluss s türste Glace ever (27 Dollar für 2 Glace) gässe.
    Eigentlech heimer am nöchste Tag mitem Bus wöue retour uf Portland fahre. Mir hei aber nid realisiert, dass der Bus vo Bar Harbor uf Bangor am Sunti nid fahrt. Es Uber heimer au nid gfunge. Zum Glück simer am Obe vorhär scho mit üsne Cabin-Nochbere bim Popcorn mache ufem Füür is Gspräch cho und mir hei gwüsst, dass si i die glichi Richtig gö. Si hei ihre Pickup komplett umgruumt, das mir au no Platz finge und hei üs bis zum Busterminal in Bangor gfahre.    Read more

    See translation
  • TravelerUSA Coast to Coast
    4
    Day 62

    Yes - mir heis gschafft🥳

    August 3, 2023 in the United States ⋅ ⛅ 24 °C

    Hüt morge hei mir üs für einisch ke Wecker gstöut. Natürlech simer aber trotzdem beidi am haubi 7i scho wach gsi. Mir hei üs de vüu Zit gno und no chli die schöni Lag gnosse, während mr druf gwartet hei das üses Zäut tröchnet. Het mässig klappet und es isch doch no e Tröchnigsaktion nötig worde.
    Denn heimer die letschte 50 km unger d Räder gno. Leider nid grad die schönste vor gsamte Reis. Es het vüu Verchehr gha und zum Teil nid mou e Shoulder. Zum Glück heimer uf de letschte Kilometer nomou chli Trail chönne fahre. Aus ersts simer direkt as Meer zum es paar Fotis mache. Denn heimer üses Velo bimene Warmshower, wo zwar nid cha hoste aber üsi Velo lagere, für es paar Täg abgstöut und si is Hotel. Hüt steit no chli Sightseeing und vor auem es gmüetlechs Znacht ufem Programm.    Read more

    See translation
  • TravelerUSA Coast to Coast
    Day 61

    Die letschti volli Etappe

    August 2, 2023 in the United States ⋅ ☀️ 22 °C

    Hüt heimer no einisch e sehr chauti Nacht gha (7°C am Morge). Aber d Sunne het üs zum Glück bim Zmorge scho chli gwärmt. Mir hei üs fasch es Kilo Joghurt mit Müesli gönnt bevors a letscht Pass isch gange. 630 Höhemeter si bis ufe ufem Plan gstange. Zum Glück ufere sehr agnähme Stross. Obe het üs e schöni Ussicht erwartet. Kes einzigs Alphüttli z gseh isch für üs immer no speziell.
    D Abfahrt isch de umso besser gsi wöus e ganz früsch teereti Stross isch, eis vode beste Gfühl ufem Velo.
    In Conway heimer de e 4er Gruppe Velofahrer troffe, womer die letschte Täg immer mou wider vo wietem gseh hei. Sie si au uf ihrne letschte Kilometer vo Seattle nach Bar Harbor.
    Hüt simer nomou imene State Park, zum Glück heimer no es Plätzli becho. Ir Umgäbig si aui Campings usbuecht und wäre au sehr tüür. Me merkt dasmer wieder i touristischeri Gefilde chöme.
    Morn fahre mr no die letschte 50 km bis Portland😃    Read more

    See translation
  • TravelerUSA Coast to Coast
    Day 60

    S Ziel vor Auge

    August 1, 2023 in the United States ⋅ 🌙 12 °C

    Hüt morge hets doch tatsächlech Näbu gha und mir hei üses Zäut widermou nass müese zämenäh. Öpis womer definitiv nid wärde vermisse😅
    Nach 5 km heimer per Zuefall s Schüud entdeckt wos gheisse het, das die Stross wo mir druffe hei wöue fahre i 7 Meile gesperrt isch - die 7 Meile wäre natürlech au no bärguf gsi. Drum 15 km Umwäg in Chauf gno, wöu Hoger uf fahre und merke mir chöme nid düre, heimer nid wöue riskiere. D Glace nach 2/3 vor Tagesetappe het üs motiviert. Es witers Mou heimer für 1 Chugele glich vüu becho wie ir Schwiz für 2-3. Trotzdäm het sech der Patrick 2 Glaces gönnt.
    Denn simer nomou e namelose Pass uf und zum Tagesabschluss wieder abegfahre. Hüt heimer s erste mou erläbt, dass e Camping ke Zäutplatz meh verfüegbar het. Zum Glück hets mehreri Campings gä. Morn steit scho dr vorussichtlech letscht vou Tag ufem Velo ah. Unglaublech wie schnäu d Zit isch vergange.    Read more

    See translation
  • TravelerUSA Coast to Coast
    Day 59

    Ändlech widermou e Pass

    July 31, 2023 in the United States ⋅ 🌙 16 °C

    Und widermou hets Donuts zum Zmorge gä, dasmou wöu mr gester Obe nid aui hei möge ässe.
    Denn simer scho gli wider ufene Fähri, die öutischti Drahtseilfähri vor Wäut übere Lake Champlain. Sobaud mir aus einzigi Passagier si druf gsi, simer au scho gfahre. Mit der Überfahrt hei mer au New York (vorerst) hinger üs glo.
    Denn ischs in Vermont hügelig zue und här gange. Mir hei sitere Ewigkeit dr erst Pass erklumme und dä hets in sech gha, 19% isch d Stigig ar steilste Stöu gsi. Nachere ebeso steile Abfahrt heimer üs fürne Mittagspause imne Restaurant in Rochester entschide, öpis wo mir säute gmacht hei. Meistens heimer am Mittag nur e churzi Pause mit Verpflegig us dr Velotäsche gmacht.
    S Ziel hüt isch e Camping bi Royalton gsi. Dä isch ersch sit es paar Täg wieder offe nachdems Mitti Juli e Überschwemmig ir Region het gä.
    Hüt Znacht wärde mr nomou dra erinneret wie chaut dases bim Zäute au cha si. D Dechi womer in West Yellowstone kauft hei und denn dänkt hei, mir näme die nur es Teilstück mit chunnt au hüt zum Isatz und wird mit üs dörfe heiflüge😉    Read more

    See translation
  • TravelerUSA Coast to Coast
    21
    Day 58

    Neue Tag, bessers Wätter

    July 30, 2023 in the United States ⋅ 🌙 19 °C

    Zum Glück het s meiste, wo vom gestrige Räge nass worde isch, über Nacht möge tröchne und fürs angere heimer e Föhn gha😅
    Nacheme widerum usgibige Zmorge mit Bagel, Porridge und (mehrere) Donuts simer voller Energie i Tag gstartet. Eigentlech heimer mou dänkt es wärde 120 km und widerum einiges a Höhemeter. Dank däm dases nid so warm isch gsi und mr trotz em ständige Uf und Ab guet si vorwärts cho heimer üs de für 40 km meh entschide. Hüt ischs dür schöni Wälder und a idyllische See verbi gange.
    Mit dr Akunft in Ticonderoga föh mr morn mit dr letschte Charte vo Adventure Cycling ah. Chli Wehmuet chunnt do scho uf und mir probiere die letschte Täg ufem Velo no voll uszchoste.    Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English