Provincia de Parinacota

Hüt gohts nachem Zmorge mitem Taxi s'Tal hintere bises nüm wiiter chan. Chosted eus en guete Batze aber ja, alles laufe wär definitiv z'viel. Vo dete us startemer bi windige bis sehr windige Verhältnis de 550 Meter höch Astieg zum erste Bergseeli, wo uf knappe 5'000 müM liit. Unterwegs treffemer Lamas und Viscachas, was immer gueti Gründ sind zum schnell ahalte und dureschnuufe ^^ Min Körper lauft scho es bitz am Aschlag nach gester wider i dere Höchi aber langsam und stetig gohts eigentli. Bin uf jede Fall froh dasmer ned für en 6'000er gstarted sind am Morge früeh. Bide Laguna Chiar Kota werdemer für d'Astrengige belohnt. Verschneiti Berge spiegled sich im Wasser :) Da müemer eus grad miteme chline Snack im Windschatte belohne! Wiiter gohts witerhin mit Gegewind namel es paar Höhemeter ufe, de chilenische Grenze entgege. Schliessli chömed eus sogar drü verschiedeni Gruppe Wanderer entgege - grad bitz viel los do! Uf de Grenze hämer denn au de höchsti Punkt vo hüt erreicht. De Übertritt nach Chile - ohni Passkontrolle - fühlt sich super a 🤣 Inmitte vonere mondartige Landschaft mit Schneeberge rundume, erschiined di zwei andere Lagune :) Di erst isch teilwiis gfrore - neinei, mir hend ned chalt! Au d'Ente gsehnd lustig us, wenns probiered ufem Iis umespaziere ^^ Mir sueched wider Windschatte und gnüssed zum Zmittag es Konfibrötli. Hüt hämer s'Brot im Hostel übercho wil s'Lädeli im Dorf no zue gha hät. Verbi au am dritte liecht nach vulkanische Mineralie müffelnde Seeli stiigemer s'letst Mal es paar Meter ufe wider zude Landesgrenze. Zrugg uf bolivianischem Gländ gohts s'Tal durab de heisse Quelle und Sajama entgege. Dasmal findemer Rösser, Vicuñas, Lamas und endli Ruggewind :) Einigermasse gli simer bide Geysire und ganz vielne iheimische Männer, wo im warme Bächli am wäsche sind. Mir entscheided eus wegem Wind und wili s'Badtuech vergesse han ilade gege bädele und spaziered eifach so vom einte farbige Pool zum negste und stuuned über d'Energie vo Vulkän :) Und nach dem folgt en langwierige Zruggweg uf Sajama, acht Kilometer dur di langwilig sehr flach und staubig Ebni. Aber wider es Taxi zahle hämer ned so Lust und mir hend (vergebens) ghofft, dass di wäschende Lüt zrugg chömed und eus mitnehmed. Janu, mir chömed heil a und müend ja morn nüt mache usser reise :) Im Dörfli stattemer de Chile, oder besser gseit em Gloggeturm en churze Bsuech ab. S'Stegehuus det ufe isch sogar für bolivianischi Grössene ehner chli baue würi sege ^^ Denn gits es Glace bevormer eus im Zimmer nachere chalte Duschaktion wider unter d'Decki kuschled und ufwärmed. Bim Znacht simer hüt di einzige - ide Zwüschesaision lauft do würklich ned viel. Für eus isches aber eigentli di best Ziit wil im Summer ide Hauptsaison isches na chälter und im Winter häts meh Niderschlag... Denn folgt e Diskussion mitem Hostel über d'Chöste. Ich bi de Meinig, dasmer wege de chalte Duschi sötted weniger zahle. Si seit, mir hetted eus halt sölle melde. Hämer ja und han au kei Lust zum all füf Minute go motze. Und denn verlömer morn Morge s'Hostel vorem Zmorge und ich wür drum gern di letst Nacht ohni Zmorge bueche (was si am erste Tag gseit hend segi möglich). Jetzt heissts, dases ja ned ihres Problem isch wemer früehmer gönd - danke für nüt! Si macht denn aber immerhin Brötli und heiss Wasser parat, dasmer selber chönd zmörgele. So ganz überzügt simer vom Service ned. Schliessli zahlemer brav (usser dasmer mal Guetzli und Brötli vo ihrem Lädeli uf Rechnug gno hend, das verschwiigemer als Gegeleistig für di chalt Duschi). Denn gohts zimli erschöpft ab go ligge, morn schelled de Wecker immerhin scho am halbi füfi...Read more