Utah Beach

ste-mère-église isch es chliises örtli, wo sech ganz dr gschicht rund ume d-day hett verschribe. i by fang mau ar place centrale bir grosse chiuche abghocket, u ha aues chli uf my la würke. dert gseht me übrigens o das berüemte biud vom fauschirmschpringer, wo am chiuchturm isch blibe hange. myr isch hie zerschte mau i mine 59 läbesjährli so richtig klar worde, wi wichtig dr iisatz vo de amerikaner für europa, für d kapitulation vo de dütsche u dermit für ds ändi vom 2. wäutchrieg isch gsi. i hege ja sowiso grossi sympathie für d usa u d amerikaner - ganz im gägesatz zu mire schwigermueter, gäu „kobi“. 😉 dä bsuech hie hett das no mau chli verschtärcht.

när bini i ds „muséum airborne“. sehr iidrücklech. ds guete a dere usschtellig: wemes immer ganz gnau wott wüsse, chame am iigang es storypad fasse u bi jedem punkt e qr-code scanne. dert erfahrt me sicher o d schuegrössi vom kantine-choch. me cha aber o eifach (wi ig) dür di 5 gebäude schlendere u iidrück sammle. u das aues für nume 11 euro. i ha mi nid derfür gha, z frage, öb ne mit dr raiffeisen-charte gratis ichechömi.

utah beach - chli witer öschtlech - isch eigentlech ganz e normale atlantik-schtrand. u de no e schöne - weme vo de freiloufende hüng abgseht. 🤬 aber hie isch ja vor 80 jahr zimlech d poscht abgange. ds mémorial isch ungloublech iidrücklech. i ha e ahnig dervo übercho, was fürne gigantischi mission d operation overlord isch gsi. im musée de debarquement hani myr unger anderem e 20-minütigi doku chönne aaluege. bim useloufe hani paar mau läär gschlückt. wüui nid ha chönne gloube, was sech d mönsche hei chönne aatue. u wüu myr düre chopf isch, dass myr ganz offebar nüt us dr gschicht hei gleert - weme luegt, was hütt uf dr wäut abgeit. so, itz aber gnue gmoralet. süsch chani de nid schlafe.Read more