Djemaa el Fna

Scho isches so wiit und d'Ferie in Marokko started. Zug und Bus bringed eus uf Basel an Flughafe, wo alles riibigslos klapped und mer bald am Gate sind. Meh als e Stund müemer na warte bis s'Boarding started. Ufeme Platz mit bester Sicht uf s'Gschehe dusse verbringemer d'Ziit. Debi werded na es paar letsti Sache nocheglueged, abeglade und vorbereited. Schliessli hebt s'Flugi pünktlich ab :) D'Sicht usem Fenster isch naja... Trotzdem erkenner schwiizer See, d'Alpe, Pyrenäe, s'Mittelmeer und schliessli zeigt sich denn au Afrika. Im Landeaflug machemer e ersti Beurteilig: gseht gar ned so "abegranzt us wiemer bitz chönnt befürchte" :) S'Klima ufem Rollfeld isch dank de fortgschrittne Ziit und vermuetlich au em Saharastaub überraschend agnehm. Wie meistens folgt denn en längeri Warteziit vorem Zoll und ned motivierti Mitarbeiter wo es paar Froge stelled, bevormer s'Gepäck fassed wo scho parat isch. Und denn d'Frog wo mi am meiste nervös gmacht hät im Vorfeld: wie chunnt mer vom Flughafe id Stadt? Mir entscheided eus für s'Taxi und lönd eus eifach vode Masse la leite. So duureds ned lang bismer i eim dine höckled. Und de Simon hät sogar scho sonen alte Mercedes gseh woner unbedingt au mal na wett mitfahre, ein wichtige Punkt für d'Reis isch also scho fast abghöggled ^^ Bis ganz zude Unterkunft chömer ned fahre wil d'Gasse schlicht viel z'schmal für Autos sind. Also laufemer und wehred eus gege all die Lüüt, wo eus wend de Weg zeige (und nachher Geld defür verlanged). Locker findemer euses Riad und chönd s'Zimmer bezieh. So nennt mer die chlline herzig Unterkünft wo en Innehof hend. D'Idrück bis jetz: Msrrakech fühlt sich ned stadtig a wils ned höcher als zwei Stöck baued. De Verchehr sind Taxis und Roller und isch na überrschend organisiert. Di viele Gässli mit Lädeli sind herzig aber au eng und stressig. Alles isch besder zwäg als denkt. Viel Lüt wie Taxifahrer oder Receptionistin chönd tatsächlich nur es paar Wörter uf Englisch. Mis Französisch isch sehr iigrosted aber chunnt bestimmt na besser ^^
Nach churz abefahre ziehts eus uf de Hauptplatz "Jemaa el-Fnaa" wos Märtständ git. S'sehr ufdringliche Servierpersonal (also es sind usschlüsslich Männer) wiisemer mit Müeh und Not es Ziitli ab bismer entscheided, zums eifach irgendwo bi eim probiere. Wil wies lauft und wases git verstömer eh nirgendwo 😂 Mir seged eifach immer jaja und hend am Schluss en grösseri Uswahl a Gmües, Fleisch, Couscous und Brot ufem Tisch. Schmöckt alles fein aber so richtig gnüsse chömers wegem hektische Triibe trotzdem ned. Als Desdert gits es ersts mal en Tee (de Name fallt mer nüme i) und denn heissts zahle. Es isch definitiv z'tüür aber egal, so gohts wohl jedem Tourist am erste Obig 🤣 Denn gömer direkt zrugg id Riad und gheied müed is Bett. Viel gmacht hämer zwar hüt ned aber so Reisetäg mit de erste Idrück sind trotzdem immer ermüedened. Mir sind eus einig dasmer wiiterhin sehr gspannt sind uf di negste zwei Wuche, wie schnell mer eus a Kultur, Rüef us de Moschee, lärmigi Märt, ufringlichi Verchäufer und alles andere markkanidsche gwöhned. Vilicht ischs ja usderhalb vode Grossstadt au wider ganz anderst. Es wird definitiv es Abentüür 🤭もっと詳しく