Sämy und Martina

Täglich chend "nur" 5'000 Touriste de Machu Picchu bsueche - und die meischte (mier inkl.) wennd Föteli ohni anderi Touris druf... d.h. eusi einzig Chance isch am Morge früeh, wenn dHorde nu nid da sind. De erscht Bus fahrt am halbi 6i, doch zum in einem vu de erschte Büs zsi mues mer scho früeh astah... 4ri am Morge früeh!!! So sind au mier in aller Herrgottsfrüeh uf... und doch bi Wiitem nid die erschte gsi. All wo lieber 2 Stund laufed statt de Bus znä, laufed in Schare am 4i vu Aguas Calientes ab... und dSchlange für de Bus isch bis am 5i au mehreri hundert Meter lang :o doch dWartezit isch erstunlich schnell ume, es isch au nid so chalt gsi und mer hend eus au nu churz chenne us dr Schlage schliiche, zum i eusem Hotel nu gschnell was ga zmörgele. Punkt halbi 6i sind 22 Büs vorgfahre, wo eus en schmali Haarnadel-gspickti Strass derufbracht hend. Nachem Ichecke und en gwundne Inka Pfad deruf hemmers denn endlich gseh: Machu Picchu! Die wohl bekanntiste Ruine vu dr Welt sind sehr beeidruckend - umgä vu steile Wänd und höchi, Nebel-verhangni Gipfel!
Nach de obligate Foto-Session het eus de Luis zerscht zur Inka Brugg und denn in die alt Zitadelle gfüehrt, und eus derbi chli meh über Hindergrund verzellt:
Machu Picchu het wohl ursprünglich Llacta Pata gheisse und isch es heiligs Dorf vu de Inkas gsi. Es isch unklar, öb Machu Picchu sganze Jahr bewohnt isch gsi, oder nur als Winter-Rückzugsort gnutzt isch worde. Sicher isch, ases sowohl sehr religiös als au astrologisch prägt isch - an vilne Orte gfindet mer Ehrige vu de Inka Trilogie und an Sternehimmel usgrichteti Architektur. Sicher isch au, as Machu Picchu sini mind. 500 Bewohner nid het chenne selber ernähre - au wenn schier endlosi Terrasse zur Befestigung und zur Landwirtschaft agleit worde sind. Also isch das Dorf uf Nahrigsmittel usem 30km entfernte Ollantaytambo agwise gsi. En wiitere Grund, wieso as das ganz en spezielle Ort het messe sii, wenn dInkas also kei Müeh gscheut hend!
Wie mer scho geschter in Ollantaytambo gseh hend, sind au hie dHüser und v.a. dTempel sehr akkurat und passgenau baut worde. Machu Picchu isch ganz us Granit baut worde - teilwis mit bis zu 90% Quartz-Ateil, so as MP oft au als Energie-Ort bezeichnet wird. DBasis vum Dorf bildet ufwändigi Terrasse (mached rund 65% vum ganze Bauwerch us), wo gschickt nachem natürliche Vorbild gfüllt worde sind: zunderscht Stei, Chiesel, Sand und zoberscht fruchtbare Bode. Zämä mit extra agleite Abflusskanäl het das es sehr effizients Drainage-System ergä - wohl de Hauptgrund, wieso hüt nu guet 75% vu dr Zitadelle guet erhalte sind.
Mer schätzt, ases ca. 30 Jahr duuret het, MP zbaue. Mer het über 150 "Standardzimmer" gfunde, chlini doppelstöckigi länglichi Hüser wo klassischerwis ei Mittelschicht-Familie glebt het. Im EG het mer kocht und dMeersäuli ghalte, während mer im obere Stock, direkt underem genial festgmachte Strohdach gschlafe und Essware ufbewahrt het. DInkas, also dOberschicht, hend in grössere Hüser gwohnt: sie hend drü mitenand verbundni "Standardzimmer" gha - sogar en Art Plumsklo hends gha! Fliessend Wasser het natürlich au nid derfe fehle: daderzue hend dInkas en Kanalisation vunere 1km entfernte Quelle baut - so as hüt nu es Bächli zerscht in mehrere Becki und denn am üssere Rand vum Dorf derabgurglet.
Fürd Ehrig vu Sunne und Pachamama hends en Art doppelstöckige Tempel baut: ufeme grosse Felse hends en rundi Struktur baut, mit lediglich zwei Trapez-förmige Fenster. Jewils am längste und chürzischte Tag schint dSunne genau durch eis vu de beidne Fenschter gschune und derbi es perfekts Viereck (keis Trapez meh!) ufe Steibode zeichnet. Under dem Templo del Sol (Sunnetempel), hend dInkas sowohl de natürlich Fels mit kunstvoller Meissel-Arbeit kombiniert: das isch de Höhle-artig und klassisch drüeckig Tempel vu dr Pachamama.
De Luis het eus denn nu dBedütig vum Inka Chrütz erchlärt - womer übrigens in MP nur halbiert gseht, mit dr Idee derhinder as de Schatte das Chrütz vervollständigt. Einersits stellt sInka Chrütz sChrütz vum Süde dar - doch es symbolisiert nu sehr vil meh. Die vier Siite hend jewils drü Stuufe, die stehnd für die wichtigste Inka Grundsätz:
3 Levels vum Lebe: Undergrund (Schlange), Lebe uf dr Erde (Puma) und de Himmel (Condor)
3 Arte vu Arbet (wo all erfülle mend): schaffe fürenand und mitenand (in de Gmeinschaft), soziali Arbet (Wegbau &co) und Schaffe in de Mine resp. fürd Oberschicht
3 "Gebot": lüg nid, stil nid und sig nid fuul
3 Lebens-Grundlage: Wüsse, Liebi und Arbet
Bis hüt isch unbekannt, wieso as MP verlasse worde isch. DSpanier sind nie so wiit vordrunge, somit hätt das Dorf eigentlich guet chenne ghalte werde - doch cs. zur gliche Ziit wie dSpanier uf Peru cho sind (1532) isch MP sim eigete Schicksal überlah worde. In de folgende Jahrhunderte het de Wald gwucheret und so het mer am Afang vum 20. Jhd. nüm vil vu dr Zitadelle gseh. DBuure hend zwar die künstlich agleite Terrasse vu de Inkas selber fürd Landwirtschaft bruucht, doch sie hend "dene paar Muure" nid wiiter Beachtig gschenkt. Erscht wo de Amerikaner Forscher Hiram Bingham sich zämä mit National Geographic ufd Suechi nach de ageblich im Dschungel verlorne Inka Schätz gmacht het, het er MP "wiederentdeckt" und sofort de historisch Wert drin entdeckt. Während drü Jahr het er usgiebig grodet, grabe und gforscht - und am Schluss all gfundne Artefakte mit ind USA zu siner Alma Mater Yale zruggbracht - so as Peru hüt nur es paar wenigi Ton-Töpf vum alte MP bsitzt...
Nach dere sehr idrückliche Tour i dr alte Zitadelle simmer dGegend nu chli selber ga erkunde und hend de Machu Picchu Mountain agstürt (nei, das isch nid de Berg hinder de MP Zitadelle - das isch de Huayna Picchu - mier sind ufe gegenüberliegende Berg). Da mer beid vu de Tour und vum früene Ufstah chli gräderet gsi sind, hemmer eigentlich nu de Trail welle starte und denn scho gli mal en Pause ilegge und chli nacheschlafe - so isch dMartina scho mit dr Banane in dr Hand losgloffe. Doch die Inka Stege sind steil geg ufe gange und bi dene vile Lüt hets eus gar nid agmacht irgendwo zhalte. So simmer wiiter und wiiter, bismer 2'670 Treppe später ufem Gipfel gstande sind - dMartina immernu mit dr Banane i dr Hand :D nacheme Blick ufd Uhr hemmer nid schlecht gstuuned, grad mal 65 Minute hemmer für über 600 Höhemeter gha! Vum 3'000m höche Gipfel het mer en tolli Vogelperspektive uf MP gha - all die Mänschemasse sind plötzlich nüm so präsent gsi.
Derab simmer denn wieder mal schnell gsi - teilwis hemmer Lüt uf allne Viere überholt :o en Halbstund später simmer scho wieder für de Bus derab am Astah gsi und hends eus denn imene super Französisch-Peruanische Resti in Aguas Calientes la guet ga la. Etz sitzemer fuul und zfride wieder im Zug - dismal uf Cusco... mer freued eus sehr uf en heissi Duschi und es weichs Bett - dismal ohni Wecker stelle!*Read more