Reset search
Michelle KienerMichelle Kiener
SatelliteEdit route
📍 Bolivia Read more Thun, Schweiz
  • TravelerSüdamerika
    Day 30

    Vom Land i Ferieort

    May 12 in Uruguay ⋅ 🌧 14 °C

    D Nacht im Hostel isch sehr ruhig gsi u mir si bezite uf zum Punta del Este no chli aluege.
    Leider isch recht wüest Wätter, drum simer eifach chli uf dr Peninsula spaziert. Z Punta del Este isch dr südlechst Punkt vo Uruguay u me merkt richtig dases e Ferieort isch. Es het sehr viel Hotels, Feriewohnige u Restaurants. Im Moment louft nid viel, da mir neb dr Saison dert si.
    Bim Hafe unde heimer sogar no Seelöie gseh u mir hei üs dert es zitli chönne vertörle, wiu mir gseh die ja nid gad au Tag.

    Gäge Mittag simer witergfahre u hei no e Halt gmacht in Chihuahua am Strand, eifach wiu dä Ort so heisst. ;)

    När simer witer uf Montevideo id Houptstadt. Oh hie regnets wie verruckt u drum hei mer im Hostel icheckt u si när ines Kafi. Dert heimer üsi witerreis plant u gmerkt, wie schlecht mir plant hei. D Fähre geit nämlech scho e Tag früecher aus mer gmeint hei. Drum müesse mer morn scho wieder uschecke u chöi Montevideo nume am morge aluege. Immerhin hei mers no rechtzitig gmerkt.    Read more

    See translation
  • TravelerSüdamerika
    Day 29

    Wy degustiere statt wandere

    May 11 in Uruguay ⋅ ⛅ 16 °C

    Da mir zwei Täg gad viel Outo si gfahre, hei mir üs chli meh wöue bewege u drum heimer gester no e gfüehrti Wanderig buechet bim ne Wyguet. Vo Treinta y Tres bis dert häre simer ume öpe 2.5h gfahre u d Landschaft isch wunderschön gsi. Mega hügelig u engi Strässli hets gha u es isch recht abentürlech gsi. De simer de acho bir Bodega Garzon. Dert heimer picknicket u vou motiviert üsi Wanderschueh gsattlet. Womer de zur Rezeption si gloffe simer üs scho recht underdressed vorcho, wiu ds dert aus so schigg isch. Bir Ameldig het üs die Dame när gseit, das d Wanderwäge ufgrund vom Räge i mieserablem Zuestand sige u sis nid empfähle, die Wanderig zmache. Mir dörfe aber gern d Füehrig dür z Wyguet mache u degustiere. De heimer denkt "Wine not" u hei üs dert agschlosse. Vorher heimer üsi Wanderschueh ume ituscht gäg Turnschueh u hei no es feins (u tüürs) Kafi gha. Di Füehrig isch sehr intressant gsi u dr Guide het sich sehr Zit gnoh, aus z erkläre. Sie hei 500ha Oliveplantage u 250ha Rebe mit 17 verschiedene Wysorte. I ha z erste mau sone Füehrig gmacht u mega viel über Wy u d Herstellig erfahre. Dr Wy womer hei dörfe probiere isch oh sehr fein gsi.
    Dr Guide het üse de no verzeut, das es scho nid normau sig, setig Überschwemmige z ha wis aktuell het. Ds Wasser chunnt schins vo Brasilie wius dert scho so fest grägnet het i de letschte Tage. Schono krass irgendwie...
    Am Abe simer de no uf Punta del Este gfahre. Dä Ort isch gad sehr belebt und touristisch im Verglich zu vorher u mir gspannt, was es dert morn aus z entdecke git.    Read more

    See translation
  • TravelerSüdamerika
    Day 27–28

    Land, Land u no meh Land

    May 9 in Uruguay ⋅ ⛅ 17 °C

    Z Carmelo simer am morge no hurti a Strand füre bevor mir üs ufe läng wäg nach San Gregorio de Polanco hei gmacht. D Wäge si wahnsinnig läng hie u für das mer bitz vorwärts chöme, simer es rechts Stück gfahre.
    Zwüsch in hei mer natürlech oh pöiseli gmacht a schöne Plätzli. D Strasse si aui mega grad u si schier endlos u ds Land sehr flach. Scho bi üsem erste Stopp in Mercedes heimer gseh, dases dert huere überschwemmt isch. Je me mir richtig San Gregorio si gfahre, desto schlimmer isch ds oh worde mit dene Überschwemmige.
    In San Gregorio hätte mir eigentlich zwöi Nächt plant gha, für de no chli meh i Norde zgah. Da mir aber hei Hochwasserwarnige becho, hei mer üs de entschiede, e Tag früecher gäge Süde zgah. Ds isch e gueti Entscheidig gsi.

    Am nächste Tag simer drum ume früeh witer gfahre. Julian het unbedingt sone 2km längi Brügg wöue ga agugge. Dr Bueb het freud gha womer de ändlech si acho :)
    D Strasse dert häre si nüm ganz so guet gsi, es isch aus Chies u het huufe Schlaglöcher. Drum isch me hie oh teilwis oh ewigs unterwegs. Nach dr Brügg simer witer, wiu üses nächste Ziel wär de z Städtli Treinta y Tres (uf Dütsch eifach 33). Irgendwenn ufem Weg simer de tatsächlich nüm witer cho, wiu d Strass komplett überschwemmt isch gsi. De heimere grosse Teil ume müesse zrugg fahre u i ha zgfüehl gha mir heige ewigs bis uf ds Treinta y Tres. Richtig Süde wird d Landschaft aber ume hügeliger u gfaut üs besser aus ds ewige Flachland.

    Mir si am Abe de guet acho u mega lieb begrüesst worde ir Unterkunft. Mir hei nämlech bi öperem daheime Pfuset u ds isch würklch es mega herzigs Zimmer gsi. Z Nacht simer uswärts ga esse, da mer beidi nüm so hei möge choche.    Read more

    See translation
  • TravelerSüdamerika
    Day 26

    Auf zu neuen Ufern

    May 8 in Uruguay ⋅ 🌬 18 °C

    Iz startet d Reis ersch richtig... Dä Morge simer früeh uf u si a Hafe gfahre worde. Dert näme mir d Fähre übere uf Colonia del Sacramento in Uruguay.

    Uf dr Fähre hets huere ängi Sitzreihe gha u i scho fasch e Panikattake wius ke Platz het. Nachdem d Fähre de isch gfahre simer aber ufs Oberdeck u hei dert obe Föteli gmacht, d Skyline vo Buenos Aires gseh verschwinde, Lüt beobachtet u gluegt wie Küste vo Uruguay füre chunnt. Nach guet 1.5h simer auso im ne neue Land acho. Hie hei mer z Outo gfasset u si afa mau iz Land usegfahre.

    Es isch gad e anderi Welt hie. Viel grüener, viel weniger Lüt u viel ruhiger. Im ne chline Dörfli hei mer hurti e Stop gmacht für nes Pöiseli. Ner simer bime Tankstelleshop öpis z esse ga hole, wius het hunger gäh.
    Iz simer in Carmelo acho, wo mir ime Bungalow übernachte. Ds Dörfli isch mega herzig u mir hei sehr Freud, wieder chli ufem Land z si 😊    Read more

    See translation
  • TravelerSüdamerika
    Day 24–25

    Lazy days

    May 6 in Argentina ⋅ ☀️ 19 °C

    Am Mäntig isch z Wetter besser gsi aus erwartet u drum hei mer üs entschlosse nach Puerto Madero z gah, wiu dert hets sones Reserva Ecologica. Ja womer de dert si acho hei mer müesse feststelle, das ds immer am Mäntig zue isch. I Zuekunft wärde mer auso immer vorher hurti luege. De simer haut umdräiht u hei afa feini Waffle zum zMittag gässe.
    Nachdem hei mer de beschlosse hei zgah u afa üsi witeri Reis plane. Zum znacht simer nomau use ines feins Restaurant, woni scho zwöi mau bi gsi. Aber z esse isch würklech dr wahnsinn dert u es het sech ume mau glohnt.

    Am Zischtig hei mer beidi nid so Motivation gha. I ha d Stadt langsam gseh u Julian isch äuä no nid ganz acho hie u immer no müed vo dene viele Idrück. Drum simer nume use zum ga esse. Zwüsch in hei mer Zit gnützt zum Unterkünft bueche in Uruguay, Spieli spile u läse. E fuule Tag, aber ds bruchts zwüsch düre oh. Mir si gloub beidi froh, wes iz de es Land witer geit    Read more

    See translation
  • TravelerSüdamerika
    Day 23

    Es Stück Heimat und e Insider Tipp

    May 5 in Argentina ⋅ ☁️ 20 °C

    Oh dä Morge heimer afa mau miteme gmüetleche Zmorge gstartet. När isches los gange richtig Zentrum. Da Julian z erste mau da isch simer nomau dr Plaza de Mayo mitem Casa Rosada ga aluege. Vo dert wimer witer dür San Telmo gloffe. Dert hei si au Sunntig e Märit. I bi zwar vor zwöi Wuche scho gsi, aber dismau simer no witer gloffe u es het no meh neus z entdecke gäh. Bekannt isch dert nämlech die grossi Markthalle. Dert in hets unzähligi vo Essensständ u wahnsinnig viu Lüt gha. Plötzlech hets recht heimelig gschmöckt u siehe da... Die hei hie e Raclette Stand. Mir zwöi Bünzli hei üs fasch nüm erhout, eis z probiere hei mer üs aber de doch nid derfür gha.
    Wo mer dert use si, simer übere Antiquitäte-Märit gloffe u de isch mer plötzlech i Sinn cho, das mer vo üsere Spanischlehrerin ja hei e Tipp übercho für nes Restaurant i dere Gägend. Es isch de tatsächlich gad ume Egge gsi u mir heis usprobiert. Ds het sech definitv glohnt. Ds Restaurant isch i somne Hinterhof uf ere Terrasse u es het üs würklich sehr gfaue. Z Ässe isch oh sehr fein gsi. Vo usse rächnet me gar nid mit so öpisem, drum isch dä Insider Tipp sehr cool gsi.
    När simer no zum Obelisk gloffe u hei die beide tolle Buechstabe gfötelet. Z Wetter isch de när rächt grusig worde u drum simer heizue u hei e gmüetleche Abe gmacht.    Read more

    See translation
  • TravelerSüdamerika
    Day 22

    Wieder vereint

    May 4 in Argentina ⋅ ☁️ 18 °C

    Hüt morge bini früeh uf u a Flughafe gfahre. I bi dr Julian dert ga abhole u es isch schön, darf i ihn nach drü Wuche scho ume gseh 😊

    Nachdem mer oh mi Rucksack abghout hei simer afa mau ines Kafi ga zmörgele. Mir hei nämlech no müesse warte, bis mer i üses Airbnb chöi. Churz nachem zmorge hei mer de inedörfe u hei üs igrichtet u zwäg gmacht.
    Am Nami simer de när dür Palermo spaziert, hei öpis gässe u si no i Ecoparque gange. So heimer d Umgäbig vom Airbnb chli erkundet.

    Am Abe simer beidi sehr müed gsi, wiu mer nid so viu Schlaf hei gha u drum simer früeh ga schlafe.    Read more

    See translation
  • TravelerSüdamerika
    2
    Day 17–21

    No e letschti Schuelwuche

    April 29 in Argentina ⋅ ☀️ 18 °C

    I dere Wuche isch nid sehr viel gloffe. I has sehr gmüetlech gnoh.

    Am Mittwuch heimer ke Schuel gha, wägem Tag der Arbeit. Drum bini denn chli dür Palermo gschlenderet, wo si no e Flohmi hei gha. När hami ines Cafe ghöcklet u die witeri Reis planet.

    Am Donnsti hei mer de derfür e ganze Tag Schuel gha zum Unterricht nachehole, daher bini denn beschäftigt gsi. Was mi aber bsunders het gfreut isch z churze Telefonat gsi mit de Haräldlers. :)

    Am Friti isch de scho mi letscht Schueltag gsi. Am Nami hani no mis Züg zämepackt u am Abe bini anes Asado. Ds isch sones argentinisches Grillfest u d Schuel het ds organisiert. Obwous mi zersch bitz het agschnäggeler, ischs doch e sehr coole Abe gsi u i ha intressanti Gspräch gha mit de Schuelgspänli.

    I ha viel spanisch glehrt, iz freui mi aber oh ufs umereise u neus entdecke.    Read more

    See translation
  • TravelerSüdamerika
    Day 16

    Ä gmüetleche Sunntig

    April 28 in Argentina ⋅ ☀️ 20 °C

    Dä Morge hani ume eis Abwechslig brucht für mis zmorge (normalerwis issi hie ir Gastfamilie Toast mit Gonfi oder Dulce de Leche) u bi drum ines Kafi ume Egge ga zmörgele. Dert hani es Avocadotoast mit Ei gha u es feins Kafi 😍😋

    Glücklech bini när witers zum Botanische Garte gange. Z coole hie in Buenos Aires isch, das die meiste kulturelle Aktivitäte wie Pärk u Musee gratis si. I bi auso ner dr ganz Nami düre botanisch Garte gschlenderet, ha paar Ufgabe gmacht i mim Spanischbuech, ha gläse oder eifach nume Musig glost. Ha die "me time" gad sehr gnosse.

    Iz bini daheime u warte ufs znachtesse. Morn startet bereits die letschti Wuche vo mire Sprachschuel. Krass wie schnäu Zit doch vergeit.    Read more

    See translation
  • TravelerSüdamerika
    Day 15

    Es neus Tier entdeckt

    April 27 in Argentina ⋅ ☀️ 17 °C

    Z Buenos Aires hets recht viu Pärk u i ha mir vorgnoh das Wucheend es paar z bsueche.

    Hüt bini im Ecoparque gsi, quasi dr Zoo vom Stadtteil Palermo. Si hei dert vieli Infos über d Umwelt usgschribe u ds Bewusstsii bir Bevölkerig über Tier und Umwelt söu gförderet werde. Di meiste Tier wosi hei, hei si vo nöime grettet u luege iz dases ihne guet geit. Zudem het dr Park viel Böim u Seeli u bietet e schöne Spaziergang.
    Mis Highlight sii dert Capybaras gsi.😍 Di hani bisher nume vo Biudli kennt u si loufe dert, zeme mit de Pfaue, frei im Park ume.

    Nachem Park bini no es gigantisches Kafi ga trinke. I dem herzige Kafi het dr Bsitzer selber Gitarre gspiut u woni ha zahlt bini no churz mit ihm iz Gspräch cho. Woni ihm ha gseit, dasi no am spanisch lehre bi, het er sogar extra langsamer gredt, was mega flott isch.

    Iz bini ume daheime, da i langsam ha chaut übercho. Es herbstelet richtig u Temperature si am sinke. Da muesi mi äuä zersch no dra gwahne. 😉    Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English