Homún

Mir freuä üs, Merida chönne hinger üs z lah. Aber vorher göhmer no i Walmart in Merida. Wöu mir beidi no nie i somne Lade si gsy. Und mä muess sägä, es isch scho krass, wases dört aues git. 😅😂

Dr Plan isch hüt nach Izamal z fahre und unterwegs wieder ine Cenote ga z bade.
Mir wüsse, dases i dere Region ziemlich bekannti Cenote git wo mitemne Schiene System verbunde si und dasme sicj mitemne Wage und Ross cha la ume fahrä.
Da mir aber eher di wenig bekannte Cenote ufem Radar hei, probiere mir denä us Wäg z gah. 😅
Einfacher gseit aus gmacht, überau stöh Mexikaner wo üs die Tour wei verchoufe. U di clevere Cheibe stöh de immer uf de Speedbumbs wome uf 5 km/h muess abebrämse wöus üs süsch dr Chevi id Einzuteili würd zerlegä. När legä si der di laminierte Cenote-Tour-Verchoufsbletter fasch ufd Windschutzschibe ufe. 😂

Uf Google-Maps si öppe mau Cenote itreit. Aber es git de teu no clevereri Mexikaner wo a ihrem Verchoufsstandort über Google e Cenote itrage, so das mä direkt zu ihne si härägfahre. 😅

Nach dene fausche und irrefüerende Abstecher heimer de doch no d Cenote Yaxbacaltun gfunde.
Es isch es öppe 15 Meter töifs Loch und inne si Flädermüüs umegfloge. 😅 Es isch ufne wäg mega schön gsy aber när irgendwie oh chli unheimlich. Es het scho chli überwindig brucht für iz Wasser z gah. Z schöne isch gsy, dass mer wieder für öppe 5 Min si allei gsy.

Z Highlight isch aber di nächsti gsy, d Cenote San Isidoro. Mir fahre wieder ufne fasch lääre Parkplatz und chöme i sone Hotelalag😉
Es isch e hammer schöni Alag mit verschiedänä Swimmingpools und schöne Bungalows.
Mitts drin hets e chlini Cenote womer hei chönne ga bade und die isch eifach troumhaft gsy. 😍
Nachdäm mir dr Nami i dere wunderschöne Alag am Pool hei gnosse simer witer richtig Izamal gfahre.

Izamal isch es chlises Stedli und bekannt für ihri farbige Hüüser. Izamal kennt bir Fassade nämlich nur 1 Farb und die isch Gäub.
Es isch mega schön hie. 😍🥰 Mir chöme gad perfekt ufe Sunneungergang und erfreue üs über die mega schöne Hüüser.

Usserdäm heimer e neui Fründschaft gschlosse mit emne härzige Perro! 😍🥰 Drum heimer ihm no es znacht spendiert. 😅

Ga esse simer imne mega schöne Restaurant und hei dr Abe gnosse.
I däm Restaurant hets feins Bier gäh, mexikanisches Ässe und leider 2 Schwizer... (Ca. 65) 😂🤦 Die zwöi schwizer hei z Gespräch mit üs ufgriffe, am Anfang sehr agnehm über z Reise gredet. Es het sech när usegsteut, dass die beide systemkritischi impfgägner si gsy. Und hei üs probiert imne üsserst eisitige Gspräch, ("Ja und dir heit Rächt" vo üsere Site, ir hoffnig si löh üs gli i rueh.) ihri Meinig ufzdrücke. Ganz e schlimmi haub Stund vo üsne Ferie... 😂🤦

Mir hei iz ämu no es Bier nachä bsteuut und mache üs luschtig über so armi Lüüt. 😂Read more