Reset search
Alexandra SchmidAlexandra Schmid
SatelliteEdit route
traveled in 8 countries Read more
  • TravelerÜsi Australiäreis 22/23
    Day 52

    Port Arthur Historic Site

    January 29, 2023 in Australia ⋅ 🌙 16 °C

    Nachdäm mir geschter chli ä gmüetlicherä Tag am Salamanca Market u ir Stadt gha hei, si mir hüt wieder mau chli wiiter wäg u zwar uf Port Arthur. Dert isch früecher mau äs riesigs Gfängnis gsi, hüt sis aber fasch nur nu Ruinä.

    O wemä vom eintä Gfängnis Trackt nüm viu gseht, cha mä sichs doch nu chli vorsteuä, wi chliini u ängi Zäuänä diä gha hei. Us het aber bsungers z Separate Prison, auso d Isolationszäuänä Iidruck gmacht. Dert isches dazumal sträng verbotä gsi z redä, sogar d Wärter hei sich nur mit Handzeichänä verständigt.

    Ufem heiwäg hei mir nu bimänä Lookout aaghautä. Vo dert us het mä unger angerem Blick ufä Cape Hauy gha, wo mir de während dr grossä Wanderig vo nächscht Wuchä wärdä gah 😁    Read more

    See translation
  • TravelerÜsi Australiäreis 22/23
    Day 50

    Bonorong Wildlife Sanctuary

    January 27, 2023 in Australia ⋅ 🌙 16 °C

    Nach üserer 1. Nacht z Hobart si mir grad diräkt i Bonorong Wildlife Sanctuary gangä gah luegä. Das isch wieder ä Uffangstation für verschiednigschti Tier us Tasmaniä. O da isches wieder sehr interessant gsi, was di Lüüt so z verzeuä gha hei über di Tier. Zudäm hets onu angeri Tier gha aus i dä letschtä Ort, unger angerem hei si o Schlangä 🐍 u Echsänä gha 🦎. U mir hei z erschtä mau ä Bettong gseh 😃 u dr Christian het nu Fründschaft mitemnä Red Tailed Black Cockatoo gmacht 😁.

    Was o sehr interessant gsi isch, äs het äs Spitau gha mitere Viewing Plattform. Dert het mä chönnä zuäluegä, wi di Tier operiert wärdä. Währenddäm mir dert gsi si, isch grad ä Tasmanian Devil operiert wordä. Das armä Tierli isch vomänä Outo aagfahrä wordä u het ä Chieferbruch erlittä. Aber so wis usgsäch, chäm aues wieder guet 😊.

    Zum Zmittag si mir inä Chäs u Schoggi Fabrik gsi gah ässä. Dr Christian het mit sim Menü aber wieder mau chli z Brot vermisst (Wie dazumal z Barcelona scho 😂).

    Am Namittag hets üs när nu ufä Shot Tower z Taroona verschlagä. Dert hei si früecher Munition härgsteut u äs isch sehr interessant gsi zum mau gseh, wi das gmacht wordä isch. Natürlich si mir au di Stägätritt (insgesamt 300 Tritt) bis id Turmspitzä ufägloffä, vo dert us isches ä hammer Ussicht gsi 😎    Read more

    See translation
  • TravelerÜsi Australiäreis 22/23
    Day 49

    Lake St. Clair

    January 26, 2023 in Australia ⋅ ⛅ 8 °C

    Hüt hei mir üs ufä Wäg richtig Hobart gmacht. Ungerwägs hei mir nu bim Lake St. Clair aaghautä zum chli am See entlang z loufä. Mir hei üs entschiidä, dass mir bis zur Platypus Bay göh, ir hoffnig, dass mir öbbä sonä Platypus gseh. Aber leider hei mir wieder kenä gseh 😏

    Aber süsch isches gliich schön gsi, nur leider het z Wätter nid so mitgmacht gha. Trotzem rägä hets aber gliich viu Wanderer ungerwägs gha, wüu dr Lake St. Clair isch di letscht Station vom Overland Track.

    Nachemnä feinä Kaffee☕ si mir wieder wiitergfahrä u si vou gspannt, was Hobart de so aues z bietä het 😊    Read more

    See translation
  • TravelerÜsi Australiäreis 22/23
    Day 47

    Cradle Mountain

    January 24, 2023 in Australia ⋅ ⛅ 11 °C

    Hüt si mir i Cradle Mountain Nationalpark gsi gah wanderä. Mitem Outo hei mir bis zum Visitor Center chönnä fahrä u när isches mitemnä Bus i Nationalpark innä gangä. Eigech hei mir planet dr Lake Dove Circuit z machä. Nachdäm mir gseh hei wi viu lüüt dert dürä si hei mir üs spontan entschiidä ufä Cradle Mountain ufäzgah.

    Zersch si mir vom Lake Dove zum Lake Lilla überägloffä u vo dert us wiiter zum Wombat Pool (leider hei mir ke Wombat gseh, nur ä Echidna). Vo dert us isches när düruf gangä zum Crater Lake, vo wo mä ä super Ussicht uf di angerä Seeä gha het 😃. När isches wiiter zum Marion Lookout gangä, wos mau gredi z Loch uf gangä isch u mä ä chliinä Teil nu het müessä Chlätterä 😅. Dobä aacho hei mir d Ussicht gnossä, nur zum när erfahrä, dass mir ersch i dr heufti si u dr Lookout nu wiiter obä isch 🤦🏼‍♀️ Drum hei mir üs grad ufä wiiterwäg gmacht u si zum eigentlichä Lookout ufä, was sich total glohnt het😊.

    Dr Cradle Mountain isch scho i griffnechi gsi, drum hei mir nid zviu Zyt verlorä u si wiiter gloffä. Bir nächschtä Verzwiigig hei mir üs aber när ufgrund vo dä unsicherä Wätterbedingigä entschlossä, dass mir nid ufä Gipfu ufä göh, sondern si via Horse Track nu dr Bärgchötti entlang, rund umä Crater Lake, gloffä. Mirä Meinig nach isches ä super umentscheidig gsi, isch nämlich wunderschön gsi 😍
    Uf däm Wäg isch nu äs Schlängeli glägä, wo trotz stampfä nid wäg het wöuä. Dr Christian hets de när doch nu gschafft sä chönnä z vertriebä 😅.

    Wieder im Tal unger si mir statt dr Nechi nah vo dr eintä Station wieder zrüg zum Start gloffä, dass het de aber scho afä chli aaghänkt 🥵 aber nach insgesamt über 5 Stung hei mirs wieder ufä Bus zrüg zum Outo gschafft.    Read more

    See translation
  • TravelerÜsi Australiäreis 22/23
    Day 46

    Bicheno

    January 23, 2023 in Australia ⋅ ⛅ 17 °C

    Geschter si mir nu chli z Dörfli Bicheno gah aaluegä. Zersch si mir zum Blowhole gangä, wos wieder so orangi Steinä gha het. U äs het mega wenig Lüüt umägha.

    Vo dert us si mir nu ufänä Lookout ufägloffä, aber da Boumstämm dr letscht Teil vom Wäg versperrt hei, hei mir leider nid sonä tollä usblick gha. Bim Zmittag ässä hei mir när festgsteut, dass mir Idiotä ufä fautsch ufägloffä si u nid uf dä wo mir eigech hei wöuä 🫣 Drum si mir de haut ufä zwöit ufä onu 😅 U zum Schluss si mir nu chli a Strand gangä 😎

    Hüt morgä si mir rächt früech ufgstangä fürä Sunnäufgang gah z luegä uf dr Terrassä. Leider hei mir nid drmit grächnet, dasses rächt bewölkt gsi isch. Drum hei mir vom Ufgang leider nid viu mitbecho, drfür hets aber mega viu Wallabies umä gha 🦘😄

    Nachem Kaffee hei mir di super Unterkunft leider o scho wieder müessä verlah u hei üs ufä Wäg richtig Waratah im Westä vo Tasmaniä gmacht. Dr Wäg isch nid ganz so gsi wie mirs üs vorgsteut hei. Äs isch wieder mau ä ewigs langi Dirt Road gsi übernä grossä Pass. Natürlich hei mir wieder ke Empfang gha, entsprächend isch üs z Navi o wieder usgfauä, drum hei mir nur nach Chartä chönnä fahrä 😬. Gfung hei mir dr Wäg aber gliich u si nach ca 6 Stung fahrä äntlich am nöiä Ort aacho.
    Z Hotel isch rächt aut u trennti Bett hei mir onu 😂 aber drfür isches ruhig, suuber ud Lüüt si sehr fründlich.    Read more

    See translation
  • TravelerÜsi Australiäreis 22/23
    Day 44

    Wineglass Bay

    January 21, 2023 in Australia ⋅ ⛅ 18 °C

    Hüt si mir im Freycinet Nationalpark gsi gah wanderä. Dert hei mir dr Hazard Beach Track gmacht. Bi derä Wanderig isch mä zersch zumänä Lookout cho, vo wo mä perfekti Sicht ufd Wineglass Bay gha het. När si mir zu a Wineglass Beach abägloffä.
    Dert unger hets när ä Warntafelä gha, dass dä Wäg wo mir hei wöuä gah, überfluetet sigi us nid empfohlä wärdi dert dürä zloufä. Mir si aber gliich gangä 😁 U dr Wäg isch nur äs paar wenigä Ortä nu chli Matschig gsi, süsch isch tiptop gangä 😅

    Chum dra dänkt, ha i scho wieder ä Schlangä 🐍 gseh wo knapp näb mim Fuess wäg isch 🙈 Di isch aber so schnäu drvo gschlänglet, dass dr Christian sä nüm gseh het. Nur äs paar Meter wiiter het mi nu ä Echidna vou verchlüpft wo bhabä am Wägrand gsi isch 😅. Nachdäm dichtä Gestrüpp si mir a Hazard Beach cho, wo üs genau so schön dünkt het wie dr vorherig. Dert hei mir äs pöiseli gmacht.

    Aaschliessend hei mir üs uf di letschti Etappä gmacht. Di het sich nu rächt zogä u isch nu rächt sträng gsi. Aber nach insgesamt 4 1/2 Stung, 11 Km u über 1'300 Stägätritt, si mir wieder bim Outo aacho. Jetzt si mir nu chli dr Aabä bim Grillä u mitemnä Bierli 🍺 am usklingä u am luegä, was mir morn machä😊    Read more

    See translation
  • TravelerÜsi Australiäreis 22/23
    Day 43

    Bay of Fires

    January 20, 2023 in Australia ⋅ ⛅ 17 °C

    Hüt hets bi üs wieder früech tagwach gäh, da mir nu hei müessä fertig packä. När isch üsi Reis wiitergangä ad Ostküste vo Tasmaniä. Dr Wäg isch rächt houperig gsi, Kilometerwiis isch nur Dirt Road gsi 😑 Zudäm isch üses Navi ufgrund vo schlächter Internetverbindig usgfauä u am Tank het mä chönnä zuäluegä wis immer weniger wordä isch 🙈 Nachdäm üsi Aaspannig immer meh gstiigä isch, si mir irgendwenn z St. Helens aacho u üser Närvä hei sich wieder chli beruhigt 😅

    Vo dert us isches richtig Strand gangä. Äs isch wiisä Sand mit türkisem Wasser u orangänä Steinä gsi, wunderschön 😍 Im Wasser hei mir sogar när nu ä Rochä gseh umäschwümmä 😁.
    Im Namittag innä hei mir üs när ufd Suechi nach üserer Unterkunft für di nächschtä paar Nächt gmacht. Vor Veranda us het mä hammer Ussicht uf z Meer u Wallabies hets o wieder umä 😊

    Jetzt si mir nu di nächschtä Tag am planä.

    Äs isch extrem, wi viu toti Tier hiä uf dr Strass liegä u aui fahrä nur drum umä oder sogar nu mau drüber. Hüt bini sogar säuber usgstiigä u ha äs tots Wallaby ab dr Strass zerrt. Das isch eifach nur truurig 😢😔    Read more

    See translation
  • TravelerÜsi Australiäreis 22/23
    1
    Day 42

    Trowunna Wildlife Sanctuary

    January 19, 2023 in Australia ⋅ ⛅ 15 °C

    Da mir üs scho glii uf diversi Wanderigä begäbä, wei mir vorbereitet si, drum si mir hüt i Trowunna Wildlife Sanctuary gangä zum chli öbbis über d Tasmanischi Tüüflä z lernä. O di Tour isch wieder mau sehr ufschlussriich gsi u mir hei ä huufä glernt. U mir hei mau ä sones Tüüfeli dörfä striichelä. Erstuunlicherwiis isch z fälli vo denä mega fiin u weich 😃

    Näbscht Tüüfeli hei mir onu Wombat (dörfä striichelä 😍), Eastern Grey Kangaroos, Spotted-tail Quoll, Eastern Quoll, Potoroo, Kookaburra u nu ganz viu angeri Vögel gseh. Umä gha häts aber nu jehnschti angeri tasmanischi Tier, wo mir aber leider nid gseh hei. U vom Pademelon hei mir leider nur 1/4 gseh, wo grad dä Tüüfeli gfüetteret wordä isch 🤦🏼‍♀️

    Aaschliessend si mir nu id Melita Honey Farm 🍯 gangä. Dert het mä 40 verschiednigi Honig chönnä probierä, unger angerem Himbeer-Honig, Mandel-Honig, Manuka-Honig, Schoggie-Honig, Chili-Honig u nu ä huufä angeri. Di meischtä si aber nid so nach üsem gschmack gsi 😬 Zum probierä hei mir ä Nougat-Stängel kouft mit tasmanischem Honig, wo mir bedi würk sehr gärn gha hei.
    Ds Ambiente i derä Honey Farm isch aber super gsi, mä het aues becho dert, eifach i Bienli-Art . Usserdäm hets im Ladä innä nu äs eigets Biendli-Volk gha, womä chli het chönnä beobachtä.

    Ufem heiwäg hei mir nu ä churzä Zwüschästopp in Deloraine gmacht, wo mir si äs Kaffee gah trinkä.
    Jetzt si mir üser Köffer 🧳 wieder am packä, wüu morn geiz de richtig Ost-Küste 😎    Read more

    See translation
  • TravelerÜsi Australiäreis 22/23
    Day 41

    Platypus und Seahorses

    January 18, 2023 in Australia ⋅ ☁️ 19 °C

    Da mä mega viu Glück bruucht um Platypusä ir Wiudnis z gseh, si mir hüt haut innä Uffangsstation gangä gah luegä. Dert hei mir sehr viu über diä speziellä Tier u über d Echidnas glernt 😃

    Grad näbem Platypus House isch nu z Seahorse World gsi, drum si mir dert onu grad gah luegä. O diä Tour isch wieder sehr lehrrich für üs gsi u mir hei viu Sachä erfahrä, wo mir über di Tier nu nid gwüsst hei. U mir hei tatsächlich eis dörfä uf dä Häng häbä 😁

    Am Namittag si mir nu uf George Town überä gfharä. Das isch di eutischti Australischi Stadt. Äs isch äs härzigs Städtli gsi mitemnä schönä Lüüchtturm u ärä Pinguin Kolonie. Hüt hets aber so extrem gwindet, dass mirs nid so lang dert usghautä hei. Äs het sogar dr neu Huet vom Christian mögä usem Outo gwindä wo är iigstiigä isch u i ha ihm när dörfä nachäsecklä😅    Read more

    See translation
  • TravelerÜsi Australiäreis 22/23
    1
    Day 40

    Devonport und Sheffield

    January 17, 2023 in Australia ⋅ ⛅ 21 °C

    Hüt hei mir wieder mau chli usgschlafä u hei üs nachem ufstah ufä Wäg richtig Devonport gmacht. Ufem Wäg isch aber nu d Anvers Chocolate Factory glägä, wo mir schnäu ä heissi Schoggi si gah trinkä. Diä isch zwar fein, aber für üsä Gschmack viu z süess gsi 😬. Drfür het mä dert chli chönnä zuäluegä wi si d Schoggi machä u sogar nu säuber chli probiärä.

    Bim Iigang vo Devonport si grad zwöi grossi Fährenä 🚢 im Hafä gsi, dass isch scho sehr iidrücklich gsi. När si mir grad wiiter zum Lüüchtturm. Vo dert us het mä hammer Sicht gha u mir hei grad chönnä zuäluegä, wi di eint Fähri 🚢 abgleit het. Aaschliessend si mir nu chli dür z Stedtli dürä gloffä u si öbbis chliises gsi gah zmittag ässä.

    Nachdäm hei mir üs o scho wieder ufä Rückwäg gmacht. Dasmau si mir aber nid ufem gliichä Wäg zrüg wie am morgä, sondern hei nu ä chliinä Umwäg über Sheffield gnu. Das isch äs mega härzigs Dörfli, wo mir super gfauä het. Mä het wunderbarä Blick ufä Mount Roland u überau a dä Wänd si schöni Gemälde gsi. Viu schöner aus di Graffiti-Kunst vo Melbourne.

    Dr Aabä hei mir hüt wieder mau mit üsnä liäblings Nachbuurä, dä Wallabies, lah usklingä 😊    Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English