Reset search
Nepal & PhilippinenNepal & Philippinen
SatelliteEdit route

Nepal & Philippinen

April - August 2023
A 113-day adventure by Jael Read more
  • 14footprints
  • 3countries
  • 113days
  • 247photos
  • 15videos
  • 19.7kkilometers
  • 18.4kkilometers
Follow Calendar Share Bucket list
Date ascending
  • TravelerNepal & Philippinen
    Day 3

    Kathmandu

    April 21, 2023 in Nepal ⋅ ☁️ 26 °C

    Nach insgsamt 11 Stund Flug mit zwüschehaut in Dubai bini de in Kathmandu ahcho.
    I bi widermau z Asie: es isch eis Chaos ufdr Strass, Lärm vode Motore undem gehupe, schmali Gässli, Stromkabu überau und spezielli Grüch vo aune Site. I füehle mi sofort wohu!
    I dem Labyrinth vo Stadt ischs nid so eifach sech z recht finde, drum gits haut paar Extrarundine. Am Schluss muessi eifach z Hotel widr finge. Wasi zersch o nid gfunde ha, isch es Resti. Hie muesch e Stock witer obe nach eppisem z Esse sueche.
    Nebst em dürd Strasse schlendere hani nach überrede e chlini Stadfüehrig bercho. Ner bini dr Durbar-Platz, wo bekannt isch für sini Temple, gah ahluege. Zmittag hani für 2 Franke bratnigi Momos gesse u ha ner im „garden of dreams“ d Rueh gnosse.
    Eigentlech wäri morn ono in Kathmandu gsi abr da am Sunnti Wahle si, chönnts mit de Busse schwirig wärde. Drum gahni ez scho morn witer id Maya Universe Academy, ca. 6h vo hie us, woni die nächste 5 Wuche verbringe.

    -> Befors witer uf Manila geit, chumi sicher nomau da ane. Dr Swayambhunath (Affentempel) möchti mr nid la entgah!    Read more

    See translation
  • TravelerNepal & Philippinen
    Day 11

    Maya school

    April 29, 2023 in Nepal ⋅ ☁️ 29 °C

    Die houprigi u kurvigi Fahrt vo Kathmandu bis Damauli isch mit usem Fenster luege u mit ere Französin u Nepalesin gsprächle verbigange. Nach 7 Stund bini de i dem chline Stedtli ahcho.
    Dert hani e Stund ufe local bus gwartet, wo schneu jede Platz bsetzt isch gsi aber si heimer glich irgendwie e Sitzflächi freigschuflet. E witeri Stund später ischer de los gfahre u wede denkt hesch dr Bus isch vou de heisi sicher irgendwo no e Lücke gfunde, sigs fürne Person, Ris odr Getränk. Zämequetscht simer i dere Hitz dr Bärg düruf gfahre, ke ahnig wie abr ds Büsli hets gschafft. I bi ire grüene Umgebig ahcho.

    Bir Schueu bini vomne Nepali Volunteer abghout worde u ha gad e Füehrig dürs ganze Gländ bercho.
    Am Abe hets ner z Nationalgricht Dal Bhat geh woni uf traditionelli Art mit dr rechte Hand gesse ha. Dal Bhat gits hie jede Tag zum Zmorge und Znacht, mir chöi abr o seuber im Volunteerbereich choche.
    Am Wuchenend louft hie nid viu. Deu verbringe d Zit imne andere Stedtli odr eifach gmüetlech vor Ort. Am Sunnti schaffe d Nepali dr haub Tag u i ha chönne heufe Pilze ahzpflanze, viu Volunteers hei die nächsti Wuche planet, mit Kids gschuttet odr eifach dr Tag gnosse.

    I bi ez scho e Wuche hie i mim neue deheime: D „old kitchen“ isch üse Ufenthautsrum, im Volunteerhouse schlafe ca. 15 Lüt u ner hets ono einzelni Rüm, d Klassezimmer si ufem Schueugländ verteilt, die meiste fingsch abr im rote Houptgebäude. Uf dr andere Site vor Strass dr Stutz derab fingsch z Hostel. Dert lebe Schueuchind, wo vo wit här chöme u am Abe esse mr mit ihne zäme ir „new kitchen“. Dert ir nechi isch ono gad d Queue mit Trinkwasser u üsi Duschi / Wöschchuchi.

    I ungerrichte mitemne Nepali English literature und ha no Bibliotheksstunde mit de 1. und 2. Klasse. Da derzue verzeui es anders mau meh.    Read more

    See translation
  • TravelerNepal & Philippinen
    Day 25

    Maya school - ungerrichte

    May 13, 2023 in Nepal ⋅ ☀️ 34 °C

    D Schueu startet hie am 10ni mitem Morgekreis (ds isch z beste vom Tag).
    D Chind trudle um die haubi ih, spile fangis ufem platz, rede mitenang u sobaud du derzue chunsch, chasch sicher si ds dr mindestens eis Chind am Arm hanget. Wes lütet wird e grosse Kreis gmacht u ner schliesse au für 1min. d Ouge, e churzi Meditation. Derna umarmsch zur Begrüessig aui um di ume. D Chind sowie Volunteer stöh a ihrem Platz mitem Armtest id Rheie ih, so dsde rundum di gnue Platz hesch. Aui zäme singe die Nepalesischi Nationalhymne mit vouer Energie - dr Text isch würk schön. Jetz werde churzi news teilt, neui Volunteers vorgsteut oder spezielli Sache ahkündet. Nach dem Teil gömer zude „Amphitheaterstege“ u es paar Chind zeige e Performance z.B. singe, tanze, es Gedicht vortrage, es churzes Theater odr es Rätsu zum löse. Immer am Friti si d Volunteers mitere Performance drann.

    Vo 10.30 - 13.30 u ner widr vo 14.15 - 16.30 isch Ungerrichtszit + Klassestund vo 16.30 - 17.00. Dr Stundeplan isch jede Tag chle anders, mir erfahre jewile vor de 10ni wenn mr wo müesse si. D Chind hei ihres Klassezimmer u für jedes Fach e anderi Lehrperson, wo vo Zimmer zu Zimmer geit. Üsi Tafele isch es Whiteboard u e Drucker hets zwar aber de sött nur für spezielli Sache brucht werde. Zum Glück hei d Chind Büecher u Notizheft, schüsch müesstme aues vo Hand vorbereite.

    I ha insgsamt 4 Lektione. Zäme mitm Ujwal ungerrichti English literature ir 1. + 2. Klass. Er isch hie sit 5fi ir Schueu u isch ez 16ni, geit unge im Stedtli id Highschool u schaffet nebebi as Lehrer. So wie ganz viu anderi ou, uf die Art gebe si eppis ar Schueu zrug.
    D Chind si u lebendig, offe u warmhärzig. Englisch isch uf dere Stuefe abr no schwirig, drum bini froh dsi mitemne Nepali cha ungerrichte. Ir Bibliotheksstund isch Zit für Gschichte, zum Spiele und chle si.

    Am 5fi loufe d Chind hei odr werde mitm Schueubus heibracht. Deu Chind wohne im Hostel uf dr andere Strassesite. Die gsehni am Abe zum Tanze u Znachtesse wider.

    D Zit zwüsche de Lektione verbringi ir old kitchen, mit Wasser hole, dusche odr wösche.    Read more

    See translation
  • TravelerNepal & Philippinen
    Day 39

    Maya school - Volunteer‘s

    May 27, 2023 in Nepal ⋅ 🌧 27 °C

    I bi insgsamt 5 Wuche zum ungerrichte / assistiere da. Nebstem em Ungerrichte gits aber ono anderi Tätigkeite, wod as Volunteer chasch schaffe. Rund um z Schueugländ hei si Landflächi/terrasse, wo z Agriculture-team Gmües u Ris ahpflanzt. Derzue gits o es Construction-team, wo z.B. neui Schueugebäude bout.

    I lebe hie so z säge ire grosse WG. Es isch e kunterbunte Mix us 20-30 Volunteers. Vo Kanada, England, Belgie, Holland, Dänemark, Dütschland, Frankrich, Italie, Russland. Deu blibe für mehreri Monet, deu für 1 Wuche. Mir verbringe viu Zit zäme ir old kitchen oder mache Usflüg.

    Am Samsti wird immer ä morning hike mit Zmorge und es local dinner ahbote. Am 7.30 geits los dr Hügu deruf bis mr über de Wulche si u wemer Glück hei e mega Usblick ufd Schneeberge wie z.B dr Anapurna odr Fishtale hei. Ez geits witer dür z Dörfli bis mr bi üsne Gastgeber ahchöme. Ds si d Grosseutere vore ehemalige Schüelerin. Si choche für üs Zmorge u Masalatee.
    Am Abe chöimer bi epperem ir Umgebig vor Schueu gah Znacht esse, derzue gits Raksi („hochprozentige“ Alkohol) wosi ihschenke as wers Wasser.

    Am Wuchenend mache viu e Usflug nach Pokhara oder Bandipur.
    Bandipur isch es chlis Bergstedtli u bekannt für die schöni Architektur vode Newaris. I ha dert e Nacht mit dr Bianca, Siena und Sofya verbracht. Mir hei vorauem viu gesse.

    Damauli isch z Stedtli am Hügu unge. Hesch zwüsche 20-30min. mitm Bus abe. Dert machi zwüschdüre e Ihchouf für Zmorge, Snacks u natürlech fürne haut imne Restaurant.

    Am Abe geit mängisch ä Jeep ufe zum Ussichtspunkt, wo de die ungloublechi Ussicht chasch gniesse.

    A üsne Barbecues ir old kitchen wird irgendeinisch d Gitarre füre gnoh u gsunge.

    D Zit hie isch jetz leider scho düre. Abschid neh isch nie eifach aber ez geits witer dür Nepal.    Read more

    See translation
  • TravelerNepal & Philippinen
    Day 42

    Chitwan National Park

    May 30, 2023 in Nepal ⋅ ☀️ 38 °C

    Vo Damauli geits witer nach Sauraha. Zäme mit dr Pauline, Camille und Cecilie verbringi die 4 stündigi Fahrt. Z hingerst im local Bus heimer dr Gsamtüberblick und es fäderet so schön ds villech dr Chopf ahschlasch. Aber z seubergmachte Bananebrot u die früsche Lichi mache aues wett.
    Ir nöchi vom Nationaupark wärde mr zimzt uf dr Strass usem Bus „gschmisse“. Er het gmeint mir wei hie use, mir hei nid gwüsst womer si u da stöhmr plötzlech. Es mini Taxibüsli het üs ner zum Hotel bracht.
    Hie treffe mr d Bianca, Siena und Sofya, wo vo Pokhara her chöme - ä chlini Maya-Reunion.

    Füre nächst Tag steit ä Jeep-Safari düre Nationaupark ah. 10 Stund houpere mr dür wunderschöni Landschaft, wo gfüeut au 10min. wächslet. Ungloublechi Böim mit de schönste Parasite, Elefantegras, wo bis zu 7m höch cha wärde, Flussbett, Vögu, Pfaue, Wiudsöi, 4 verschideni Reharte, Affe, Krokodiu und Nashörner (i verrate nech jetz nid wasme schüsch no hätt chönne gseh). Müed chöme mr uf dr andere Site vom Fluss ah u gniesse dr Sunneungergang.

    Am zwöite Tag mache mr e Kanufahrt ufem Fluss und e 3 stündigi Hikingtour düre Dschungu. D Instruktion bevor mr los loufe isch sehr wichtig. Was mache mr wenn üs es Tier attakiert:
    - Elefant: renn so schnäu de chasch.
    - Nashorn: renn zickzack, la eppis vo dir la gheie u chlätere e Boum zdüruf oder versteck di hinger emne grosse Boum.
    - Bär: blib ir Gruppe mach di gross u schrei so lut de chasch.
    - Tiger: lueg ihm id Ouge u louf langsam rückwärts.
    So jetz wüsster wasme schüsch ono hätt chönne gseh. Wärendem hike heimr 7 Nashörner bimne Sunnebad im Fluss gstört, Reh, Affe und e Fuessabdruck vomne Tiger gseh. Üsi Highlits si dfinitiv d Nashörner gsi, z Bluememeer ufem Fluss und z bechlättere vomne Boumparasit. Flüchte heimer vor keim Tier müesse.
    Dr Nami heimer am Pool la usklinge.

    U scho am Morge druf trenne sech üsi Wege - Cecilie & Sofya gö zrug nach Maya, Pauline nach Pokhara, Bianca, Siena u Camille nach Kathmandu und i gah witer nach Lumbini.    Read more

    See translation
  • TravelerNepal & Philippinen
    Day 44

    Lumbini

    June 1, 2023 in Nepal ⋅ 🌬 40 °C

    Dr Geburtsort vo Buddha. Es git hie nid viu meh as e rise Parkahlag mit verschidne Temple rundum u natürlech dr Ort ud Ruine, wo Buddha isch ufd Weut cho u ufgwachse. Da me ke Föteli vode Temple darf mache, hani haut die schöni Parkahlag und d world peace pagoda gfötelet.
    Am Mittag hani scho gnue gseh resp. ke Energie meh gha, wius enorm heiss isch. Lut locals 40-44 Grad…
    Für mi geits drum oscho witer nach Pokhara, woni chle e lengeri Zit wirde blibe.    Read more

    See translation
  • TravelerNepal & Philippinen
    Day 58

    Pokhara

    June 15, 2023 ⋅ ⛅ 27 °C

    I sitze gad i eim vo mine lieblings Kafi/Resti, so wie jede Tag. The Juicery Cafe isch direkt am Fewa See. Es git hie super Zmorge mit Säft u Smoothies u am Abe isch e gmüetlechi Stimmig mit Live Musig oder Karaoke.
    8 Stund isches kurvig übere Siddhartha Highway (e Passstrass mit schöner Landschaft) gange. Links u rechts vo mir heisech Lüt übergeh u i bi o irgendwie chle ahgschlage u müed gsi. Im Bus hani aber 2 Froue (us Portugal u Mexiko) kenneglernt u de speter zum Znacht troffe. Mir si mit dr Idee ufcho e Trek zäme z mache u hei die nächste 2 Täg planet u organisiert. Derwile heimer no e Französin kenneglernt, wo o ufe Mardi Himal Trek chunnt. Am 6si am Morge ischs de los gange, müed u chle schwach, wiui am vorder Abe niso viu ha möge esse aber gspannt. Z füft mit üsem Guide simer vo Kande 1770müM los bis zum Forest Camp 2550müM. Mir si über sehr viu Stäge und Wege düre Waud gloffe u zwüsch düre simer bimne chline Dörfli odr Teahouse verbi cho. Leider isch mir überhoupt nid guet gange womer si ahcho u i ha nur 5 Bisse vo mim Znacht möge esse. Nachere fasch schlaflose Nacht hani probiert mit de andere witer z loufe aber mi Körper het zweni Energie gha, drum bini umdreit, ha Pouse gmacht, blose Ris probiert z esse u bi vo dert us ner abe gloffe für zrug nach Pokhara z cho. Ja u da hani ner am nöchst Tag 6 Stund im gliche Kafi mit lese, esse, Podcast lose u eifach chle si verbracht.
    Die rästlechi Zit isch gmüetlech mit Yoga langem Zmörgele, verschidne Lüt plöiderle, live Musig lose, emne Usflug zumne Wasserfau, Sunneufgang, sound bath odr ere Massage verbi gange.
    Dr Plan wär eigentlech gsi scho früecher nach Kathmandu z gah u d Umgebig dert z erkunde aber Pokhara isch mr as Härz gwachse u so si zwöi Wuche drus worde.    Read more

    See translation
  • TravelerNepal & Philippinen
    Day 83

    Kathmandu / Pokhara

    July 10, 2023 in Nepal ⋅ ☁️ 29 °C

    Reiseplanänderig…
    Eigentlech wäri am 17. Juni witer nach Manila gfloge. I ha aber churzfristig in Kathmandu entschide no lenger in Nepal z blibe u mini Flüg anuliert. Sither bini wider in Pokhara u gah dert verschidnige Sache nache: am Morge bsuechi aube e Yogastund u gniesse derna es feins Zmorge, lise no chle im Resti oder plöiderle mit Lüt, mache e Spaziergang am See, spile Ping-Pong oder mache e Usflug. Zudem hani mr e Ukulele sowie es Nepali-Sprachbuech kouft u versueche chli eppis z lerne. Am Abe gniessi d live Music mit Touris und Locals, singe Karaoke odr bsueche mau dr movie garden.

    Ds Land mit au sine Eigeheite isch mr totau as Härz gwachse. Mit de Fotos probieri nech es paar Ihdrück mitzgeh vom Land ohni Regle, dr ungloubleche Natur, dr Viufaut vode Tier u dr Stimmig hie in Pokhara.

    Nebst de Fotos möchti o gern es paar Gschichtli teile:
    > „Namaste didi“ so wirdi hie oft ahgsproche u immer wider ghörsch d Lüt „dai“ odr „didi“ sege. Hie nenne sech aui „dai / bhai“ odr „didi / bahini“ = grosse odr chline Brüetsche u Schwöstere. Hie stöh d Lüt fürenang ih u we eppis isch chasch druf gah ds dir epper zu Hiuf chunnt.
    > Dal Bhat, z Nationaugricht, berchunsch hie zum Teu für 125 Rupees (80 Rappe). Si chöme dr sogar vo auem cho nachefüue wede möchsch u z beste isch du issischs vo Hang. Zum Zmorge, Zmittag u Znacht -> Dal Bhat power 24 hour.
    > Au bot fahrt in Pokhara ä Stadtbus verbi u es git zwar einzelni Hautesteue aber die bruchts eigentlech nid. Du winksch am Bus, stigsch ih u sitzisch am beste so schneu wie müglech ab odr hebsch di emu guet fest, drücksch am Türchef es paar Rupees id Hand u seisch ihm de wede möchsch usstige, de chlopft er ad Wand u es wird ahghaute.
    > Z schönste ischs am See z hocke u die ungloublechi Kulisse u weni Glück ha dr Sunneungergang z bewundere. Es geit nid lang u gli sitzt epper näbe mir u plöiderlet fröhlech mit mir. Ha no nie so viu liebi Mönsche kenneglernt.

    So aber ez isches Zit zum witer gah.
    Am 10. Juli geits los ufd Philippine.    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English