Reset search
Nepal & PhilippinenNepal & Philippinen
SatelliteEdit route

Nepal & Philippinen

April - August 2023
A 113-day adventure by Jael Read more
  • 14footprints
  • 3countries
  • 113days
  • 247photos
  • 15videos
  • 19.7kkilometers
  • 18.4kkilometers
Follow Calendar Share Bucket list
Date descending
  • TravelerNepal & Philippinen
    Day 113

    Mindoro

    August 9, 2023 on the Philippines ⋅ 🌬 31 °C

    Die Fähri hie isch lustig. Statt Stüeu heisi eifach Bett, wo dir ufem Ticket eis zueteilt isch. Aso mir wüsse wasmer die nöchste 6 Stund mache, näbst läse u Fium luege sicher o chle schlafe.
    In San José ahcho frage mr no gad wiemer morn witer nach Puerto Galera chöme u gö no gah Znacht esse.
    Am nächste Tag fahre mr mitmne Bus bis zumne Ort u ner müesse mr mitemne Van witer nach Puerto Galera u es Tricycle bringt üs de schlussendlech genau dert ane womer wei. Nämlech füre as Meer. Es blibe üs no 2 Täg hie in Sabang, wo dr Gilles mit Touche verbringt und ig im Bett. I ha irgendeppis verwütsch u bi leider gar nid zwäg.
    So mache mr üs am 8. när ufe wäg nach Manila. Z Tricycle bringt üs zum Hafe womer es Schnäuboot zur Insle vo Manila bringt. U so eppis hei mir beidi nonie erläbt, ds Schiff isch würk vo 0 uf 100 los düset u über die Wäue gumpet mir si üs vorcho wie ihre Achterbahn. Mir si froh gsi womer när ine Bus hei chönne wächsle u schlussendlech no mitemne Taxi zum Flughafe si gfahre.
    Da mir am 3 am Morge müesse ihchecke verbringe mr die Nacht gad am Flughafe u probieres üs gmüetlech z mache.
    Irgendwie stimmt eppis nid ganz mit üsem zwöite Flug, da simer no uf standby. Mir berchöme aber de ner bim Gate glich no dr Boarding Pass. In Dubai gäbe si mir sogar no ä neue u i ha z grosse Glück Business z flüge. I bi so Dankbar wiu i bi immer noni fit. Bim Ihstige trenne sech när üsi Wäge für die 6 Stund Flug u gseh üs wider ir Schwiz.
    Vo de letschte Täg hets nümme so viu Föteli gäh aber die Tricycle si so lustigi Fahrzüg, wo uf jedere Insle chle anders usgseh u drum zeige mr nech no paar vo dene.    Read more

    See translation
  • TravelerNepal & Philippinen
    Day 108

    Palawan

    August 4, 2023 on the Philippines ⋅ ☁️ 31 °C

    Dismau ischs mitm Flugi witer nach Palawan. Ä Insle im Westä vode Philippine.
    Mir gö gad ganz ufe a Spitz vo dere Insle nach El Nido, wo bekannt isch für Chauchsteifeusä, Lagunä u wissi Stränd. Natürlech gits no viu meh z entdecke.
    Aber leider heimer gad chle Päch mitm Wätter, es isch mega windig u rägnerisch u drum chöimer gad nidso viu mache. D Täg gö verbi mit gmüetlech Zmörgele, Spile, Läse und emne Strandbsuech mitem Tricycle odr Motorbike womer widerum imne Resti dä Wäuä zueluege, spile u läse. Die planti island-hopping-tour wird jede Tag vo neuem abgseit. So wie ou d Fähri, für üsä nöchst Haut. Mir nutze d Glägeheit wos de heisst mir chöi witer nach Coron u hoffe uf bessers Wätter. Abgseh vor Fähri si drum immerno aui Wasseraktivitäte abgseit.
    So simer aso am 4. Tag nachemne lustige Prozedere (terminal fee zahle, Sicherheitscheck vom Gepäck, Drogedürsuechig mitemne Hund, Ticket zeige) womer ez scho paar Mau hei dörfe mache (abr geng chle angers isch gsi) ä Stund später as gheisse mit dr Fähri losgfahre. Nach 5 Stund Fahrt mit starchem Wäuegang simer ahcho u churz bevor mr is Tricycle si gstige hets gad afo Rägne i Ströme.
    Mir si in Coron, uf dr Busuanga Island, hie gits näbst schöne islandtoure o ä schöni Ungerwasserwäut mit Schiffswrack vo 1944 zum Erkunde. Die spannendi Glägeheit wei mir natürlech nutze. Doch ufgrund vom Wätter isch o das nid erloubt. Aber immerhin chöimer gah Riff entdecke und dörfe dr Barracudalake unger Wasser erläbe. Zum Glück leit sech z Wätter de glich no u mir chöi o zude verschidnige Wrack abe touche u se vo inne sowie die ungloublechi Landschaft vo dusse bestune. Sone ganze Tag an Bord und unger Wasser isch schono rächt ahsträngend, drum gits aube ä Tag Pouse (ämu für mi, dr Gilles isch so fasziniert vode Wrack). U de hopse mr vo Resti zu Resti u bsueche einisch no dr ‚local Market‘, womer mit gwüssem Respäkt derdür gö.
    Ez geits no zu üsem letscht Stop uf Mindoro.    Read more

    See translation
  • TravelerNepal & Philippinen
    Day 97

    Camiguin

    July 24, 2023 on the Philippines ⋅ 🌬 28 °C

    Camiguin isch e chlini, fridlechi Insle mit viu Charme. I nume 64 km bisch einisch rundum, wasmer natürlech mit emne Motorbike gmacht hei. So heimer einisch vo jedere Perspektive d Insle und ihri Umgebig gseh.
    Ungerwegs heimer natürlech ono paar Sache ahgluegt:
    Die Vulkaninsle het näbst Wasserfäu, hot springs sowie cold springs und diversi Touch- und Schnorchuspots z biete.
    Mantigueisland isch ca. 10min. mit emne Philippinische Motorböötli entfernt u ir gliche Zit heschse eue umlofe. Die wissi Insle isch bekannt für die grüene Meeresschiudchröt. Während zwöine Touchgäng heimer vili bunti Fische gseh u sicher 20 Schiudchröt vo wit u nöch dörfe beobachte.
    Während ere Wuche heimer die Insle a Land u unger Wasser erkundet.
    Vo aune Site winke üs die Iheimische zue u rüefe „hello“ u o ide Resti heimer härzigi Begägnige mitem Personau gha, wo üs chle vom Läbe hie verzeut het. Eppis womer üs dra hei müesse gwöhne: D Lüt ässe hie um die 6si am Abe Znacht u gö so am 8di ume is Bett. Dementsprächend hei d Resti, wede Glück hesch, bis am 9ni offe. Da abr Näbäsaison isch u nid so viu louft ischs villech oscho am 6si zue. Du fingsch aber eue irgendwo no Barbecueständ mit Chicken, Fisch odr Frosch am Spiess.
    Ide ganze Philippine isch Basketbau extrem verbreitet. Überau ide Strasse spile si u i jedem no so chlinste Örtli fingsch e Basketbauplatz. Uf dr einte Erkundigstour simer dür luti Musik u viu Lüt ufmerksam worde u ahghaute zum luege was da louft. So simer spontan zumne Basketbaumatch cho u hei dert vo Ahfang ah mitgfieberet.

    So schneu geit d Zit ume u ez geits witer nach Palawan.    Read more

    See translation
  • TravelerNepal & Philippinen
    Day 89

    Bohol

    July 16, 2023 on the Philippines ⋅ ☁️ 29 °C

    Nach drüne Flüg bini mi drüehaub Stund Verspätig de ändlech uf de Philippine u bim Gilles in Cebu ahcho.
    Bim Znachtesse heimer üs lang ustuscht u scho dr nächst Tag planet. Da mir beidi ke Städtefäns si geits nämlech gad witer uf Bohol, ä Insle 2-4 Stund mit dr Fähri entfernt.

    Tagbilaran - Loboc - Batuan - Anda

    In Tagbilaran ahcho simer no gad witer bis nach Loboc u hei dert am Fluss e Nacht verbracht. Am nöchst Tag heimer es Motorbike gmietet u si mit dem quer dürd Insle zude Chocolatehills u hei die ganzi Umgebig erkundet. Mir si ungloublecher Natur u härzige Dörfli zmizt im Nüt begegnet. Übernachtet heimer imne härzige „Chalet“ in Batuan.
    Vo dert us simer am Tag druf zumne Wasserfau u si zur Abchüehlig gah schwümme. Witer isches när zur Tarsier Sanctuary, womer dr chlinst Primat hei dörfe gseh. Dä isch so gross wie dini Fust, het grossi Ouge u längi Skelettfinger. Zrug in Loboc ahcho heimer gluegt wiemer nach Anda chöme u si ner los mit: Tricycle - Jeepney - Bus - Tuktuk. (Die hei hie die lustigste Fahrzüg i aune Farbe u grössine.)
    In Anda heimer üs när ä gmüetleche Strandtag a eim vode wisse Stränd gmacht.

    Wiu es geit scho witer nach Camiguin ä chlini Insle südlecher vo Bohol.    Read more

    See translation
  • TravelerNepal & Philippinen
    Day 83

    Kathmandu / Pokhara

    July 10, 2023 in Nepal ⋅ ☁️ 29 °C

    Reiseplanänderig…
    Eigentlech wäri am 17. Juni witer nach Manila gfloge. I ha aber churzfristig in Kathmandu entschide no lenger in Nepal z blibe u mini Flüg anuliert. Sither bini wider in Pokhara u gah dert verschidnige Sache nache: am Morge bsuechi aube e Yogastund u gniesse derna es feins Zmorge, lise no chle im Resti oder plöiderle mit Lüt, mache e Spaziergang am See, spile Ping-Pong oder mache e Usflug. Zudem hani mr e Ukulele sowie es Nepali-Sprachbuech kouft u versueche chli eppis z lerne. Am Abe gniessi d live Music mit Touris und Locals, singe Karaoke odr bsueche mau dr movie garden.

    Ds Land mit au sine Eigeheite isch mr totau as Härz gwachse. Mit de Fotos probieri nech es paar Ihdrück mitzgeh vom Land ohni Regle, dr ungloubleche Natur, dr Viufaut vode Tier u dr Stimmig hie in Pokhara.

    Nebst de Fotos möchti o gern es paar Gschichtli teile:
    > „Namaste didi“ so wirdi hie oft ahgsproche u immer wider ghörsch d Lüt „dai“ odr „didi“ sege. Hie nenne sech aui „dai / bhai“ odr „didi / bahini“ = grosse odr chline Brüetsche u Schwöstere. Hie stöh d Lüt fürenang ih u we eppis isch chasch druf gah ds dir epper zu Hiuf chunnt.
    > Dal Bhat, z Nationaugricht, berchunsch hie zum Teu für 125 Rupees (80 Rappe). Si chöme dr sogar vo auem cho nachefüue wede möchsch u z beste isch du issischs vo Hang. Zum Zmorge, Zmittag u Znacht -> Dal Bhat power 24 hour.
    > Au bot fahrt in Pokhara ä Stadtbus verbi u es git zwar einzelni Hautesteue aber die bruchts eigentlech nid. Du winksch am Bus, stigsch ih u sitzisch am beste so schneu wie müglech ab odr hebsch di emu guet fest, drücksch am Türchef es paar Rupees id Hand u seisch ihm de wede möchsch usstige, de chlopft er ad Wand u es wird ahghaute.
    > Z schönste ischs am See z hocke u die ungloublechi Kulisse u weni Glück ha dr Sunneungergang z bewundere. Es geit nid lang u gli sitzt epper näbe mir u plöiderlet fröhlech mit mir. Ha no nie so viu liebi Mönsche kenneglernt.

    So aber ez isches Zit zum witer gah.
    Am 10. Juli geits los ufd Philippine.    Read more

    See translation
  • TravelerNepal & Philippinen
    Day 58

    Pokhara

    June 15, 2023 ⋅ ⛅ 27 °C

    I sitze gad i eim vo mine lieblings Kafi/Resti, so wie jede Tag. The Juicery Cafe isch direkt am Fewa See. Es git hie super Zmorge mit Säft u Smoothies u am Abe isch e gmüetlechi Stimmig mit Live Musig oder Karaoke.
    8 Stund isches kurvig übere Siddhartha Highway (e Passstrass mit schöner Landschaft) gange. Links u rechts vo mir heisech Lüt übergeh u i bi o irgendwie chle ahgschlage u müed gsi. Im Bus hani aber 2 Froue (us Portugal u Mexiko) kenneglernt u de speter zum Znacht troffe. Mir si mit dr Idee ufcho e Trek zäme z mache u hei die nächste 2 Täg planet u organisiert. Derwile heimer no e Französin kenneglernt, wo o ufe Mardi Himal Trek chunnt. Am 6si am Morge ischs de los gange, müed u chle schwach, wiui am vorder Abe niso viu ha möge esse aber gspannt. Z füft mit üsem Guide simer vo Kande 1770müM los bis zum Forest Camp 2550müM. Mir si über sehr viu Stäge und Wege düre Waud gloffe u zwüsch düre simer bimne chline Dörfli odr Teahouse verbi cho. Leider isch mir überhoupt nid guet gange womer si ahcho u i ha nur 5 Bisse vo mim Znacht möge esse. Nachere fasch schlaflose Nacht hani probiert mit de andere witer z loufe aber mi Körper het zweni Energie gha, drum bini umdreit, ha Pouse gmacht, blose Ris probiert z esse u bi vo dert us ner abe gloffe für zrug nach Pokhara z cho. Ja u da hani ner am nöchst Tag 6 Stund im gliche Kafi mit lese, esse, Podcast lose u eifach chle si verbracht.
    Die rästlechi Zit isch gmüetlech mit Yoga langem Zmörgele, verschidne Lüt plöiderle, live Musig lose, emne Usflug zumne Wasserfau, Sunneufgang, sound bath odr ere Massage verbi gange.
    Dr Plan wär eigentlech gsi scho früecher nach Kathmandu z gah u d Umgebig dert z erkunde aber Pokhara isch mr as Härz gwachse u so si zwöi Wuche drus worde.    Read more

    See translation
  • TravelerNepal & Philippinen
    Day 44

    Lumbini

    June 1, 2023 in Nepal ⋅ 🌬 40 °C

    Dr Geburtsort vo Buddha. Es git hie nid viu meh as e rise Parkahlag mit verschidne Temple rundum u natürlech dr Ort ud Ruine, wo Buddha isch ufd Weut cho u ufgwachse. Da me ke Föteli vode Temple darf mache, hani haut die schöni Parkahlag und d world peace pagoda gfötelet.
    Am Mittag hani scho gnue gseh resp. ke Energie meh gha, wius enorm heiss isch. Lut locals 40-44 Grad…
    Für mi geits drum oscho witer nach Pokhara, woni chle e lengeri Zit wirde blibe.    Read more

    See translation
  • TravelerNepal & Philippinen
    Day 42

    Chitwan National Park

    May 30, 2023 in Nepal ⋅ ☀️ 38 °C

    Vo Damauli geits witer nach Sauraha. Zäme mit dr Pauline, Camille und Cecilie verbringi die 4 stündigi Fahrt. Z hingerst im local Bus heimer dr Gsamtüberblick und es fäderet so schön ds villech dr Chopf ahschlasch. Aber z seubergmachte Bananebrot u die früsche Lichi mache aues wett.
    Ir nöchi vom Nationaupark wärde mr zimzt uf dr Strass usem Bus „gschmisse“. Er het gmeint mir wei hie use, mir hei nid gwüsst womer si u da stöhmr plötzlech. Es mini Taxibüsli het üs ner zum Hotel bracht.
    Hie treffe mr d Bianca, Siena und Sofya, wo vo Pokhara her chöme - ä chlini Maya-Reunion.

    Füre nächst Tag steit ä Jeep-Safari düre Nationaupark ah. 10 Stund houpere mr dür wunderschöni Landschaft, wo gfüeut au 10min. wächslet. Ungloublechi Böim mit de schönste Parasite, Elefantegras, wo bis zu 7m höch cha wärde, Flussbett, Vögu, Pfaue, Wiudsöi, 4 verschideni Reharte, Affe, Krokodiu und Nashörner (i verrate nech jetz nid wasme schüsch no hätt chönne gseh). Müed chöme mr uf dr andere Site vom Fluss ah u gniesse dr Sunneungergang.

    Am zwöite Tag mache mr e Kanufahrt ufem Fluss und e 3 stündigi Hikingtour düre Dschungu. D Instruktion bevor mr los loufe isch sehr wichtig. Was mache mr wenn üs es Tier attakiert:
    - Elefant: renn so schnäu de chasch.
    - Nashorn: renn zickzack, la eppis vo dir la gheie u chlätere e Boum zdüruf oder versteck di hinger emne grosse Boum.
    - Bär: blib ir Gruppe mach di gross u schrei so lut de chasch.
    - Tiger: lueg ihm id Ouge u louf langsam rückwärts.
    So jetz wüsster wasme schüsch ono hätt chönne gseh. Wärendem hike heimr 7 Nashörner bimne Sunnebad im Fluss gstört, Reh, Affe und e Fuessabdruck vomne Tiger gseh. Üsi Highlits si dfinitiv d Nashörner gsi, z Bluememeer ufem Fluss und z bechlättere vomne Boumparasit. Flüchte heimer vor keim Tier müesse.
    Dr Nami heimer am Pool la usklinge.

    U scho am Morge druf trenne sech üsi Wege - Cecilie & Sofya gö zrug nach Maya, Pauline nach Pokhara, Bianca, Siena u Camille nach Kathmandu und i gah witer nach Lumbini.    Read more

    See translation
  • TravelerNepal & Philippinen
    Day 39

    Maya school - Volunteer‘s

    May 27, 2023 in Nepal ⋅ 🌧 27 °C

    I bi insgsamt 5 Wuche zum ungerrichte / assistiere da. Nebstem em Ungerrichte gits aber ono anderi Tätigkeite, wod as Volunteer chasch schaffe. Rund um z Schueugländ hei si Landflächi/terrasse, wo z Agriculture-team Gmües u Ris ahpflanzt. Derzue gits o es Construction-team, wo z.B. neui Schueugebäude bout.

    I lebe hie so z säge ire grosse WG. Es isch e kunterbunte Mix us 20-30 Volunteers. Vo Kanada, England, Belgie, Holland, Dänemark, Dütschland, Frankrich, Italie, Russland. Deu blibe für mehreri Monet, deu für 1 Wuche. Mir verbringe viu Zit zäme ir old kitchen oder mache Usflüg.

    Am Samsti wird immer ä morning hike mit Zmorge und es local dinner ahbote. Am 7.30 geits los dr Hügu deruf bis mr über de Wulche si u wemer Glück hei e mega Usblick ufd Schneeberge wie z.B dr Anapurna odr Fishtale hei. Ez geits witer dür z Dörfli bis mr bi üsne Gastgeber ahchöme. Ds si d Grosseutere vore ehemalige Schüelerin. Si choche für üs Zmorge u Masalatee.
    Am Abe chöimer bi epperem ir Umgebig vor Schueu gah Znacht esse, derzue gits Raksi („hochprozentige“ Alkohol) wosi ihschenke as wers Wasser.

    Am Wuchenend mache viu e Usflug nach Pokhara oder Bandipur.
    Bandipur isch es chlis Bergstedtli u bekannt für die schöni Architektur vode Newaris. I ha dert e Nacht mit dr Bianca, Siena und Sofya verbracht. Mir hei vorauem viu gesse.

    Damauli isch z Stedtli am Hügu unge. Hesch zwüsche 20-30min. mitm Bus abe. Dert machi zwüschdüre e Ihchouf für Zmorge, Snacks u natürlech fürne haut imne Restaurant.

    Am Abe geit mängisch ä Jeep ufe zum Ussichtspunkt, wo de die ungloublechi Ussicht chasch gniesse.

    A üsne Barbecues ir old kitchen wird irgendeinisch d Gitarre füre gnoh u gsunge.

    D Zit hie isch jetz leider scho düre. Abschid neh isch nie eifach aber ez geits witer dür Nepal.    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English