Nicoya

em 6:00 em morge isch üsi reis de witer gange. z’ziu: vo monteverde uf samara. chum im car iigstige, isch dä es schotterwägli achegfahre wo scho für mitem velo söt verbote si. zudem heter d‘türene während der fahrt offe gla u bi jedem no so chline schuppe ghoornet aus gängs um läbe u tod - me chasech gloub voorsteue wi agnähm di strecki aus passagier isch gsi🚧.

irgendwo ab vom schuss simer uf aawisig vom chauffeur usgstige u hei die vermeindlechi haub stund warte ufe nächst bus afa abhocke. wo de aber nach 5‘ scho eine mit der ufschrift vo üsem nächste haut isch dürebrätteret u nume ghaute het wöumer wi pickti gwunke hei, heimer langsam aber sicher es ziu gseh cho. leider isch de bus gstungget vou gsi u mir si de samt em gepäck i ds schmale gängli a bode ghöcklet🧳.

irgendwenn simer de nach emne wiitere mau umstige i dem samara aacho u zu üsem air bnb gloffe, was sehr zentrau gläge isch. z‘grundstück isch u schön u mir teiles mit paar grosse leguane. üsi mitbewohner im huus si de gottseidank chli chliner usgfaue - nume paar echsene u ameisi🦎.

nach em aacho simer a wunderschön tropisch strand ache, hei z‘mittag gässe (sara: salat, jael: spaghetti) u wi chönts angersch si - e piña colada gschlüürfet🍹.

ner simer häregläge, hei föteli gmacht u de simer scho go iichoufe u ner ab hei. zum z’nacht heimer fürne haubi armee teigware über ta u e feini gmüässauce derzue gmacht🌶.

hüt morge hei mer us ziu gha e angere strand go z‘psüächle. womer aber de a abertuusige muschle u süschtige wunderschöne sache wo üs z‘meer schänkt si häregloffe, isch das ziu schneu verfloge u mir si 3h go müscheli sueche. zudem hei üs viu sandflöh u chlini mysteriösi spinnelä de plan, nümme witer z’gah, grad bestätiget🐚.

em mittag simer wider hei u hei di zwöiti (für mi scho dritti) portion teigware gässe. nachem kulinarische tiefpunkt di letste wuche, isch das für mi himu uf ärde, söfu pasta dörfe z‘verdrücke! mmmhhhh...🍝

em nami simer nomau a strand go d‘seeu la bambele u üser müäde körpere go achefahre. d‘sara hetsech no es surfbrätt gmietet u isch ihres erlernte vo portugal im warme meer go vertiefe. dank de guete wäue u de süsch aagnähme bedingige het si das fei echli guet gmacht!🏄🏻‍♀️

gäge aabe isch de ou nümme viu spannends gloffe ussert dass no di vierti portion teigware uf nis gwartet het. (ps: es het sogar no räste für morn z‘zmittag!😍).

jael - 12.08.19Les mer