Quebrada Batallón Imbabura

De Mittwuch started mitere Tochter wo öpis usem Zimmer holt und debi de Tobi, de Hund, au i mis Zimmer loht. Das isch kei gueti Idee, wil de hät sehr viel Freud zum mich i mim Bett bsueche. Do hilft au abeschupfe nüt, er chunnt wider und wider bis schliessli d'Gastmuetter rüeft. Bitz müehsam und i bi natürli hellwach - naja... D'Empanadas zum Zmorge mached vieles wider guet :)
D'Schuel isch hüt sehr ermüedend wil denkintensiv aber he, das derfs ja au geh. Nachher gömer id Stadt go Pizza esse imene versteckte Innehof womer gester im Verbilaufe gseh hend. Und die Pizza isch vo A bis Z selber gmacht und super fein! Lustigerwiis hanged ade Wänd Plakat vode Fondation Beyeler, wo sin Ursprung z'Basel hät. Stellt sich use, dass de Chef en Schwiizer isch. Wie chli d'Welt doch isch 🙈 Unterwegs fallemer natürli wider fast de Touristelädeli zum Opfer, beherrsched eus aber hüt. Mitem Taxi und de Bibi gohts in Parque Cóndor. Dete werded gretteti Griifvögel ufpeppeled und zum Teil für e Wideruswilderig vorbereited. Anderi sind für das z'schlecht zwäg oder hend na Chugle im Körper und werded für immer im Park blibe. Die einte vo dene werded aber als Zuchtvögel brucht und d'Jungtier werded usgsetzt. S'Highligt (nebst de verschiedene Üle) isch e Flugshow mit verschiedene Vögel vor bester Kulisse. De Mitarbeiter verzellt ganz viel zude einzelne Tier - nume leider z'liislig und z'schnell für eusi Spanischkenntnis ^^ Wil s'Wetter jede Moment chönnt zu sehr gwittrig ändere, gömer schliessli mitem Taxi zrugg id Stadt. Dete machi bide anderne dehei na d'Husi und mache mi denn uf de Zruggweg. Für mis dehei hani kein Schlüssel wil "ja eh immer öper dehei isch" hend si gseit. Woni aber dasmal schribe dasi do bi, chumi kei Antwort über. Nach 10 Minute chunnt en Nachber und loht mi Mal dur di erst Türe dure und di zweit direkt id Wohnig isch zum Glück ned bschlosse. Usserd em Tobi, womi wider frenetisch empfangt, isch niemer dehei. Erst so e Halbstund spöter chömeds hei - guet gits Nachbere, sus wäri na lang dusse gstande...
Am Mäntig hemer ide Familie über Desserts gredt und i han versproche, dasi Mal en Chueche nach Schweizer Art bache und hüt isches so wiit. Zuetate hani alli übercho aber das mit de Bachutensilie isch schwirig. Han kei Waag, kein Teigschaber, kei richtigi Schüssle, kei Chuecheform und nume Unterhitz im Bachofe aber he, wird scho klappe. Bitz improvisiert steckt de Chueche schliessli irgendwenn im Ofe und i bi parat für s'versprochene Cordon-Bleue zum Znacht. Es isch eimal meh super fein und i isse wider z'viel aber he, vilicht gits ja morn weniger. Vilicht 🤣Meer informatie