Panama bis Kanada

S iireise id USA hed super klapped. Womer usem flughafe cho sind, hämmer zerst mal e chälteschock gha. Die schwäre winterstürm i de USA hend au kalifornie ned verschont ond so esches da so chalt wie sit öber 30 jahr nöm 🙈 d sunne hed zwar gschune ond es hed gheisse es sig 11 grad, aber es esch en fiisi biise gange... Ond wemmer usem 30 grad warme mexiko city chunnd esches umso schlimmer... Also 0hemmer welle es uber zum hotel nä. Das hed 120 stutz gchosted...da hemmer üs grad umentschiede ond hend die 2 stund areis mit öv i chauf gno. En öv tagespass hed 5 dollar gchosted. Zerst simmer bus gfahre, denn zug, denn mit me bus wo e ganzi stund nor gradus gfahre esch, ond denn nomol met me bus. S hotel esch weder sehr edel gsi ond de name "hollywood historic hotel" passt perfekt. Mer händ no es gratis zimmer upgrade übercho ond händ es eggzimmer gha met schöner ussicht uf de hollywood schriftzug.
Chum hemmer üses züg im hotel deponiert, simmer au scho los zum walk of fame (wieder mit em bus, hend ja e tagespass gchauft mer sparfüchs 💡). Det simmer de chli entlanggschländeret ond denn au no schnell ine lade go jeans ond dicki pullis chaufe 😅.
Zrug im hotel simmer id bar wo grad näbedrah esch go znacht ässe ond denn is bett.
Am nächste tag hämmer tickets för d universal studios gha. Es hed grägnet ond esch chalt gsi aber mer händ üs halt guet ipackt ond los esches gange. Ich bi natürlich grad uf hogsmead ond hogwarts zuegstüüred ond ha es butterbier trunke. Mer send de au 2 bahne det gfahre, die 2. esch sones virtuells erläbnis gsi wo uf me bildschirm am harry nachegfloge besch ond de sitz hed grüttled....nachär esch üs beidne schlächt gsi 😂
A de früsche luft esches besser gsi ond so simmer als nächsts uf en ei stündigi studiotour womer mit somne chli zügli dur filmsets gfahre worde esch ond eim chli verzellt worde esch. Das esch sehr spannend ond idrücklich gsi. Aschlüssend heds zmittag gä im krusty burger 🤭 nach de simpsons wält hemmer eigentlich no id super mario wält welle, ned z letscht zum vill filmli ond föteli mache för am erich sini neffe, leider hemmer denn gseh, dass mer det virtuell mues astah onds för de tag gar kei plätz me hed 🙈 also simmer halt no alles mögliche andere go aluege: en mumie achterbahn, d jurassic park wält, s super silly funland vo de minions ond villes meh. Am obig simmer tod kaputt is bett gheit 😅
Am nächste tag hettemer eigentlich tickets gha för de six flags magic mountain park (am erich sis geburigschänk a mich 😃), leider hed de wägm schlächte wätter zue gha. Mer chönnd das aber zum glück nachehole bevor mer uf kanada flügid, hoffentlich spielt denn s wätter mit 🙈. So hemmer de tag demit verbracht üse campingtripp chli z plane ond de simmer no uf d suechi gange nach ere gitarre füre erich - bruchemer scho im wohnmobil! 😍 E gitarre uszsueche esch e wüsseschaft för sich aber nachdem de erich gfühlt jedi gitarre im lade usprobiert hed, hed er sich de för eini entschiede 😜
Am obig hemmer als abschluss eigentlich nomol i de bar näbem hotel welle go ässe aber die esch zue gsi well grad irgend en film det dreiht worde esch 🤷‍♀️ bi dem wätter hemmer aber ned z wiit welle ond so simmer zum italiener ei strass wiiter, au sehr fein gsi 😊Læs mere