Süd-Ost Asien

Koh Tao - e Insle, wo eus uh mega us eusere Komfortzone usegholt het. Nach 4 Täg Henge hemmer entschide, eus nach Phi Phi Island doch nomal uf e Insle z'wage. En Schwizer womer in Chumphon kenneglernt hend het eus New Heaven Dive Resort empfohle; det hemmer gad en 3tägige Open Water Dive Kurs buecht. Am Zischtig am 7ni am Morge ischs Schiff gfahre, am 9i simmer acho & am 9.3p isch euse Kurs losgange 🥴 Mir hend de Naz, euse Instruktor kenneglernt & er het eus am erste Tag a Basics erklärt & s'Equipment zeigt. Wie bereitet mers vor, wie leit mers ah etc - und denn simmer in Pool go Üebe. Tally het am Afang recht Müeh gha, zum sich gah lah & druf vertraue, das au unter Wasser alles funktioniert und sie WÜRKLI schnufe cha, wenn au nöd dur d'Nase. Nach ca. 3 Stund im Pool simmer ziemlich duregfrore (!) gsi & froh, wo mer vom Naz in Firabig entlah worde sind. Mir hend ihn denn am Abig nomal troffe zum zemme de Sunneuntergang luege; er isch en richtig coole Typ 😄

Am zweite Tag simmer ufs Meer usegfahre & det go Tauche, mal bis uf 10 Meter abe. Und ja, was söllemer sege - WOW! Mir sind beidi völlig sprachlos zruggcho vo dene Tauchgäng. Die Unterwasserwelt isch eifach atemberaubend schön & vielfältig; sie het eus völlig i ihre Bann zoge! 😍 es het denn glich no en churze Panikmoment geh, womer e Üebig zum Luft teile gmacht hend.. de Jonas het de Tally sin Ersatzregulator müsse geh - und hett en ihre verkehrt ume aneghebt. Tally het kei Luft becho, sondern nur s'Muul voll Wasser & panischi Auge. De Naz het reagiert, ihre sin Ersatzregulator geh & so Tally beruhigt 😅 aso ja, wüki es atemberaubends Erlebnis.. Nachdem mer d'Üebig denn no richtig gmacht hend, simmer eifach no go umeschwümme - und hend tatsächlich no e Schildkrot gseh! 😍🐢

Am dritte Tag simmer wieder is Meer & hend eus nachem zweite Tauchgang offiziell Open Water Divers döfe nenne! 🤝

Die restlich Zit uf de Insle hemmer für Verschiedenes gnutzt. Mir sind go Iisbade igendwo ide Hügel obe. Het richtig guet tah, so bi 0 Grad go bade - scho fasch so, wie wemmer im Winter ide Altstadt vo Winti amigs in Brunne sind 🥶 mer sind viel go Schnorchle, hend uhhhh mega fein gesse (danke Naz für all die Empfehlige) & Tally het de Jonas no dezue bracht, uf en Felse im Meer klettere und inegumpe 😁 mir hend es chlises Dihei gfunde uf Koh Tao - das au wüki dank em Naz, womer regelmässig zum Esse oder Kafi troffe hend, eimal no go Tauche sind nach eusem Kurs & wo eus au wüki viel über d'Insle verzellt het ❤️

Es isch schön, wemmer chli e Routine het, au wemmer uf some Abentür isch. Und doch schlicht sich igendwenn chli de Wunsch ih, chönne witerzieh & neui Gegende kennelerne. Und so simmer denn am Mittwuch, 10te Mai - e Wuche nachdem mer uf Koh Tao acho sind - ufs Schiff in Richtig Koh Phangan gstige 🥂😊Читать далее