Cuadrilla Once

Das isch e gueti Nacht gsi! Warm und fast durchgehend. Nach de Packaktion gohts 05.30 direkt is Auto und ab id Salzwüesti. Es isch na iischalt... Während mer über di endlosi Wiiti vode 11'000 Quadratmeter grosse Salzflächi fahred, started scho d'Morgedämmerig 😍 Vom Mond erkennt mer e ganz chlini Sichle und dank de Dunkelheit au de komplett Leermond schwach. Hüt bin ich DJ, das heisst au am Morge früeh scho Rockmusig ^^ Nach fast ere Stund Fahrt erreichemer s'erste Ziel, d'Isla Incahuasi. Warm iipackt bestiigemer de vo Riesekaktus übersähti Hügel und gnüssed di farbefroh Morgestimmig ufem Ufeweg. D'Höchi isch sehr guet merkbar ^^ Dobe findemer es Plätzli im Windschatte und warted, bis d'Sunne pünktlich 06.55 (ich han somit d'Wett gwunne 🤪) ufgoht. Di meiste Lüt verschwinded denn zimli gli, mir gnüssed aber die Moment vode wärmende Sunne na recht lang :) Zrugg dune bim Auto isch grad no so knapp Schatte und wider iischalt. Es git es Zmorge und denn spazieremer los um d'Insle, bismer ufgabled werded vom Guide - es isch gigantisch do! De negst Stop isch ide Mitti vode Wüesti für es lustigs Fotoshooting. D'Ziit debi verflügt nume so. Denn frogemer de Guide, obmer au mal derfed fahre und nach sehr viel Überzügigsarbet seiter schliesslich ja zunere chline Rundi pro Person - muchas gracias, das isch en riese Spass 🤭 Denn gohts wiiter zum einzige Salzhostel, wo würkli ide Wüesti baue isch. Dete gits e churzi Besichtigung und Souvenirständ. Und denn verlömer de magisch Ort us Iis schliessli und holpered wider uf Schotterstrosse am Zmittag und vielne wiitere Souvenirlädeli im Dörfli Colchani entgege. De Guide verzellt, dases Flamingo zum Zmittag git, es stellt sich aber wenig überraschend als Poulet use ^^ Do hämer jetz au s'erst mal wider Internet und entscheided nachere churze Recherche, dasmer ei Nacht in Uyuni mached und bueched es Hostel. Ja und denn nehmemer Kurs uf Uyuni, wo mitem Dampflokifriedhof de letst Halt astoht. En recht lustige Ort mit vielne usgmusterete und verfallne Dampflokene zum umechlättere :) Nachher bringt eus de Guide zum Hostel und verabschieded sich. Trinkgeld gebemer kei wil er isch leider meh eifach en Fahrer als en Guide gsi und hät sehr wenig zu all dem womer gseh hend verzellt... Mit es bitz Müeh und eim Telefonat vomene Souvenirlädeli us findemer denn de richtig Igang is Hostel. Dete probieremer usezfinde, wie dasmer euses negste Eventuellziel, de Nationalpark Sajama chönd erreiche. Das isch ned so eifach usezfinde und mir bestimmed, dases wohl miteme Glace eifacher isch. Unterwegs im Dorf findemer e Reiseagency wo über d'Areis genau s'Gegeteil vo eusere Reception seit. S'Internet isch sich au ned sicher drüber... Per Zuefall chömemer am Resti verbi, wo Margaux & Sarina uf ihren Nachtbus warted und höckled eus zu ihne. Nacheme Bierli gömer an Busbahnhof und hoffed, dete Infos überzcho und siehe da, das klapped. Anschinend söttemer en Bus uf Oruro chöne neh und dete fahred denn "ab und zue" Minibüs zum Nationalpark - das tönt doch vielversprechend. Mir sueched also en Abüter wo zu üsere Wunschziit uf Oruro fahrt und denn schribi amene Hostel in Sajama, obs echt tatsächlich Minibüs git und ob sie no Platz hend für eus. Und jetz stoht endlich di lang ersehnti heissi usgibi Duschi a. Ich übertribes eventuell es bitz mit de Duur vo dere aber he, tuet nach vier Täg halt scho guet 🤭 Schliessli isch na es bitz Fotis sortiere agseit, bevors zum Zancht mit de Ladies wider is Resti goht :) Mir bstelled Lamm, das müemer nach so vielne Lamas ide Berge jetz probiere und es isch sehr fein! Es wird en lustige Obig und ich chume sogar no Antwort vom Hostel über, dases würklich müest klappe mitem Minibus ab Oruro morn - perfekt :) Zrugg im Hostel lauft au d'Heizig - das chan nume e gueti Nacht werde :)Læs mere