Rio Verde

Es isch Ostersunntig und ich wett id Chile, mal erfahre wie das so isch imene religiöse Land a somene wichtige Fest. Di andere zwei wo gester gmeint hend, si würed vilicht mitcho, sind gester na wiiter und dementsprechend sicher no ned parat, wo ich am halbi achti verwache. De Gottesdienst isch abem sechsi am Morge de ganz Tag und fangt all Stund eifach wider vo vorne a ^^ Ich bi pünktlich am achti dete und mues mich hinde anestelle, wil d'Bänk pumpevolle sind. De Bsuech isch phänomenal. Ha na nie sone Atmosphäre gspürt. So machts meh Spass als ide Schwiiz 😍 Und wili d'Ostergschicht scho kenne, verstohni au, was si so verzelled. Bim Vater Unser uf Spanisch laufi denn aber am Aschlag ^^
Zrugg im Hostel gits Zmorge und ich triffe ersti verkatereti Lüt a. Guet bini ned mitgange. Min Zimmerkolleg isch gar ned erst im Zimmer acho. Bin ja gspannt uf sini Gschicht 😂
Nachher mieti es Bike für hüt. Es git e Veloroute wo meh oder weniger nume abwärts goht und a 7 Wasserfäll verbichunnt. Bevori die astüre, gangi na ide Stadt bide Bungeejumping-Brugg go zueluege. Nimmt mi Wunder, wie das so isch und bim Zueluege bini froh dases anderi mached und ned ich. Han lieber länger Spass für das Geld 🤪 Währedem Warte windets mis Bike um und s'Hinterrad isch irgendwie futsch. Zum Glück treffed sich grad es paar professionelli Velofahrer au uf de Brugg und setzeds wider zeme :) Also los jetz. Ich büge am Afang falsch ab und lande ufem Wanderweg wo denn ned so velofründlich isch, wie d'Kids bim Abzwieger behaupted hend... Nach 1.5 km ufe und abestosse chunnt es Bähnli uf di ander Flusssiite, woni mis Bike chan mitneh - danke. Mit bester Sicht uf de erst Wasserfall flügemer über d'Schlucht :) Öppe bim dritte Wasserfall triffi uf Lüt, woni vo Cotopaxi kenne und schlüsse mi ihne a. Nummer 6 und 7 seged di schönste zwei häts gheisse und vermuetli drum müemer au Iittritt zahle, wases aber bi beidne wert isch. Nummer 6, d'Cascadas Pailón del diablo sind super usbaue und mer chan so nöch a di beidruckend verbischnellende Wassermenge ane, dases eim scho fast fürcht... D'Cascadas de Machay hingege sind viel weniger touristisch aber ned weniger schön. Ruhig fallt s'Wasser au do vo sehr höch id Schlucht abe. Mer chönnt go bade, ich bevorzuge aber es Brötli i dere Ziit ^^
En Lieferwage bringt eus denn wider zrugg uf Baños ufe - gmüetlich :)
Ich bestimme, dasi jetz e Massage verdient ha. Vode Schwiizerinne hani e Empfehlig übercho und gange mi grad schnell go amelde für inere Stund, so dasi na schnell chan dusche. Und dete liggi also zimli gli ufem Schrage und probiere mi z'entspanne, was natürli denn au schnell glingt. E Stund spöter bini eimal komplett durekneted und fühle mi wie neugebore - passt ja zu Ostere 🤣
Anstatt direkt zrugg gangi na schnell am Busterminal verbi go probiere usefinde, um weli Ziite morn en direkte Bus uf Macas fahrt. Das Ziel isch ned soo bekannt und wils verschideni Busabüter git, muesi meh oder weniger jede einzeln aluege. Am Schluss bini zimli sicher, dass Abfahrt 17.30 für mich di einzig sinnvoll Lösig isch. De Zruggweg nachher nimi im Zickzack in Agriff und isse unterwegs Znacht. Zrugg im Hostel isch chille für mich elei agseit und scho fast hetti wider agfange packe aber das isch mangels Motivation uf morn Morge verschobe ^^Baca selengkapnya