Piedimonte Etneo

Am Morge wärded mier Abgholt für üsi gfüerti Tour zum Vulkan Etna. Dank Corona, sind mier die einzige wo die Tour bueched hend und so hendmier sogar en Privattour. Üse Guide verzellt vill Gschichtlichs über die immerno aktivi Etna. Idrücklich gsend mier en Wüesti vo Lavastei vom Usbruch 2002 und de Unterschied zu de ältere Lavaflüss wo bereits wieder Gras und Fichte drus wachsed. Üsi Guide verzellt üs stolz wie Villfältig sie d Etna nutzed für Plantage, füre Bau oder sogar für Bindli und ihre Honig. Imne schöne Fuesswäg laufed mier verschiednigi "sekunäri Krater" ab und Bestuned d Landschaft. Ebefalls gsehnd mier bis zu de Hauptkrater und chönd sogar beobachte sie de einti devo no vor sich hi Qualmt (waser aber agäblich immer miech).
Mit Taschelampe und Helm usgrüsted bestieged mier en Höhli wo dur die Lavaflüss erschaffe worde isch. Es feins Zmittag mit iheimische Spezialitäte und sizilianischem Wy darf natürlich au nid fähle. Und so mached mier üs wiiter ufe Wäg zu de Altacaraschlucht. Idrücklich laufed mier dur das Naturschauspiel und nämed sogar es churzes Bad i dem ischalte Fluss. Erschöpft vo dem ufregende Tag sind mier froh wieder zrugg i üsem Camping z sii.
Mit insiderinformatione und Tipps vo Dütsche Mitcamper sind mir für die negste Täg guet grüsted und lönd de Abig mit Meersicht la Usklinge.Read more