Suche zurücksetzen
Europa 2022
  • Marise Malherbe

Europa 2022

Ein 15-Tage Abenteuer von Marise Weiterlesen
FolgenÜbersichtKalenderTeilenTeilenBucket List
Neuste zuerst
  • Beginn der Reise
    10. Juni 2022
    Marise MalherbeEuropa 2022Marise Malherbe

    Visa stories

    10. Juni 2022 in Äthiopien ⋅ ⛅ 21 °C

    Ok, soos gewoonlik het als op die nippertjie gebeur. Maar dis mos waar die magic in die lewe lê (maak nie saak hoe goed 'n rugby wedstryd was nie, dis daai drie ná die eindfluitjie wat mens onthou). Ek het egter al in April begin reël aan my visa maar die eerste datum wat ek kon kry vir die fisiese afspraak was 31 Mei. Maar, soos Liehet sê, trust nou die een keer wat Marise iets betyds doen dat dit verkeerd loop.
    Ek het toe nou vroeg-vroeg vanoggend deurgery Pretoria, sonder dat ek my paspoort terug het, en TLS kantore toe gegaan om te hoor of daar nie 'n plan gemaak kan word nie. Hulle sê ek moet die ambassade self bel, wat ek toe doen, maar hulle visa afdeling is net beskikbaar 13:00-13:30. So kies ek maar die ontvangs opsie en die meisie sê die visa kollega sal my terugbel. Ek ry solank ambassade toe in Pretoria, van Sandton af, sodat ek my paspoort sommer daar kan oplaai ás hulle dit betyds kan doen. Tessa, van die visas by die ambassade, bel my en probeer als gou reël en laat weet my 11:35 ek kan my paspoort gaan kry (ek moes eintlik 11:25 al op die lughawe wees). Ek gaan haal toe vinnig my visa by Tessa, wat heel opgestres is vir my part (shame) en jaag lughawe toe. Op die lughawe koop ek gou eers die medisyne wat ek belowe het om saam te vat en die Grapetisers vir Tina, want dis wat sy mis van Suid-Afrika. En ek maak al die plekke net-net en is darem uiteindelik op die vlug.
    In Etiopië loop ek vir Oros raak. Ek én hy kyk albei 3 of 4 keer of ons reg sien, maar eet toe sommer gou aandete saam voor ons weer verder vlieg. En drink seker die lekkerste mangosap ooit.
    Môreoggend land ek in Brussels en dan gaan ek na Liehet en Hendrik toe.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Aankom in België

    11. Juni 2022 in Belgien ⋅ ⛅ 18 °C

    In Brussels aangekom, vat ek die geel en blou trein na Nederland en klim in Noorderkempen af, waar Liehet my oplaai. Ons gaan doen eers gou inkopies oppad huis toe. Hulle het soooo baie brode en ander oulike kosse. So baie verskillende tamaties.
    By die huis braai ons, Laudo speel in sy swembadjie en ons vang net lekker op en kuier bietjie.
    21:30 gaan stap ons, want dis nog helder daglig (eintlik sonsondergang, maar dit raak eers na 22:00 donker) en gaan slaap laat.
    Ook... findpenguins draai al my foto's om, maar is glo besig om dit reg te maak.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Frida Kahlo en veel van Brussels

    12. Juni 2022 in Belgien ⋅ ☁️ 20 °C

    Ja, ek weet nie hoe om veel en heel te gebruik in Nederlands nie, dis moeilik. Maar dis baie snaaks, die Nederlands. Van hulle allerdaagse woorde is maar lelik in Afrikaans (en andersom - soos Hendrik gou agtergekom het).
    In elk geval, ek word lekker vroeg wakker, want ek wou nie my shutters toemaak vir die son nie - in België kan mens besluit wanneer dit nag is. Jy maak net jou shutters toe en dan is dit pikdonker.
    Ek en Liehet vat toe die trein na Antwerpen centraal statie, waar ek 'n sim card wou koop, maar baie plekke is toe op 'n sondag (bv elke liewe selfoon netwerk winkel), dit staan dus oor tot more en ons vat die volgende trein na Brussels.
    In Brussels loop ons en neem klomp foto's, onder andere van Grand Place, 'n katedraal wat in die jaar 1000 gebou is, en nog vele ander plekke. Ons gaan eet ontbyt by 'n koffiewinkeltjie/restaurantjie, waar ons croissant, 'n baguette (vars, warm en crispy), kaas, botter, konfyt, vars uitgedrukte lemoensap en 'n warm drankie (beste hot chocolate van my lewe) kry. Daarna gaan ons Neuhaus toe - want Tina se ma-hulle het in 2016 vir my Nauhaus sjokolade gegee en ek onthou tot vandag toe hoe lekker dit was. Ek gaan môreoggend bel en plek bespreek by een van hulle sjokolade werkswinkels.
    Daarna gaan ons na Grand Casino om na die Frida Kahlo uitstalling te gaan kyk met klomp van Liehet se vriendinne. Dit was nogal uitsonderlik, met 'n tydlyn van haar lewe vooraf en dan in 'n groot saal nog inligting en video's oor Frida en haar kuns.
    Ons gaan eet toe by Wagamama - 'n oosterse kos restaurant en daarna vat Lisinda ons Atomion toe, maar dit is reeds toe. Ons kry egter die lekkerste belgiese wafel by die trokkie wat dit daar verkoop.
    Ek en Liehet kry toe sulke elektriese scootertjies waarmee mens kan ry as jy dit scan op 'n app. Jy los dit net weer langs die pad as jy klaar is, dan kan 'n volgende mens dit gebruik. Ons ry so 5.6km om weer by die busstasie uit te kom. Jy ry in die fietsrybaan en als is baie mooi ingerig daarvoor. Op sekere plekke moet mens ongelukkig in die pad ry saam met die karre, asook telke male op 'cobblestone' strate wat jou brein weer in plek skud.
    Toe ons terug is in Centraal area gaan kyk ons na Manneken pis en kry vir ons belgiese frites met truffle mayonnaise (maar dis nie iets om oor huis toe te skryf nie). Ons vat die trein terug Noorderkempen toe en stap toe huis. En gaan slaap baie lekker!    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Brugge

    13. Juni 2022 in Belgien ⋅ ☀️ 17 °C

    Ek het vroeg (wel 8uur) saam met Liehet trein gery tot in Antwerp, want sy moes klas toe gaan. Ek het toe 'n panini by Panos geëet en rond gestap in Antwerp tot 10:00 wat die Base oopmaak waar ek my simkaart moes koop. Daar is baie min winkels oop op 'n Sondag, so ek kon nie 'n simkaart kry nie.
    Daarna is ek Brugge toe met die trein. Ek loooooove Brugge, dis só mooi. Ek het 'n fiets gehuur en rondgery in die straatjies en op die ou einde na die plein toe gegaan. Van daar af het ek gestap Torture museum toe, waar hulle meer as 100 uitstalling het van martelingstoestelle - so interessant. Maar ek moes toe 'n powerbank gaan koop, want ek het myne vergeet, en met al die gps en foto's hou die battery nie te lank nie.
    Ek is toe historium toe, waar hulle die prentjie skep van hoe dit was om in vroeër jare in Brugge te bly en handel te dryf.
    Ek het toe terug gery Antwerp toe en saam met Liehet gaan 'koffie' drink by haar kampus saam met haar klasmaats. Daarna is ons huis toe.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Kinderdijk

    14. Juni 2022 in den Niederlanden ⋅ ⛅ 19 °C

    Lekker laat oggend gehad, toe het ek en Liehet Kinderdijk toe gegaan. Daar het ons fietse gehuur en langs die 'dijke' afgery en die windmeule, en museums besoek.
    'n Derde van die land lê onder seevlak en aanvanklik is die windmeule gebruik om die water uit te pomp, maar dis later oorgeneem deur elektriese pompe. Toe die water uitgepomp is en die grond begin droog raak het dit begin sak, soos 'n spons wat uitgedroog word.
    Die windmeule by Kinderdijk is 'n Unesco world heritage site. 2 van hulle is museums en oop om in te gaan en te kyk, maar die res het mense wat in hulle bly, met die voorwaarde dat hulle dit in stand moet hou.
    Ons het toe 'n stroopwafel geëet en teruggegaan Noorderkempen toe, vanwaar ek die trein gevat het Amsterdam toe, en toe die bus tot by die Loftusse.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    'n Dag in Amsterdam

    15. Juni 2022 in den Niederlanden ⋅ ☀️ 21 °C

    Ek het 'vroeg' opgestaan (7uur) en bus en trein gery Rijksmuseum toe. Daar is nie rerig woorde wat die Rijksmuseum kan beskryf nie. Ek dink mens moet minstens 'n hele dag daar spandeer. Dis so ryk aan kuns en geskiedenis, selfs die sale is geskiedkundig. Hulle is tans besig om die Nagwag van Rembrandt te restoureer. Sjoe. Ek kan nie regtig veel sê nie, dis iets wat mens self moet beleef. En waarvoor ek moet terugkom.
    Daarna het ek vir Tiané gekry vir middagete in Amsterdam by Winkel 43, wat bekend is vir hulle appeltert. Sy praat al Nederlands soos 'n Nederlander.
    Jancke het my daar kom kry en toe loop ons bietjie deur die strate en gaan eet 'n nederlandse pannekoek. Dis 'n dikker pannekoek met appel en kaas in.
    Daarna het ons op 'n kanaal 'cruise' gegaan deur die kanale in Amsterdam. Mal interessant. Al die huise is teenaan mekaar gebou en omdat die grond so nat is sak van die dele en die huise staan skeef. Elke huis het ook 'n katrol met 'n haak aan die bokant, waar hulle in vroeër jare die speserye ens op katrol het (en nou die meubels as mense trek) sodat dit in die boonste verdiepings gestoor kon word, omdat daar so baie vloede was, want dit lê onder seevlak. 'n Klein botteltjie peper het omtrent dieselfde gekos as 'n huis. Die man wou egter nie dat ek vir hom peper bring in ruil vir 'n huis nie. How times have changed...
    Die huise het ook almal verskillende tekens in die vensters bo hulle deure. Dis gebruik vir aanwysings omdat mense nie kon lees in daai tyd nie, tot Napoleon Bonaparte begin het met huis nrs.
    Ons het toe verder deur die strate en winkeltjies geloop. By Rokin metrostasie het ons met die roltrap afgegaan, want tussen die roltrappe is 'n glaskas met alles wat hulle opgegrawe het toe hulle die stasie gebou het. Daarna het ons krokette gaan eet by Van Dobben en blommemark toe gegaan.
    Op Damplein het ek gesit en die mense gekyk, met die duiwe wat almal gelyk opstyg en in 'n sirkel vlieg terwyl 'n omie sit en saksofoon speel.
    Jancke het my daarna na die biblioteek gevat waar sy altyd gaan studeer het. Dis baie hoog, so mens kry 'n mooi uitsig van die stad.
    Ons het toe deur die rooiligdistrik gestap en huis toe gegaan.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Zaanse Schanz en Utrecht

    16. Juni 2022 in den Niederlanden ⋅ ☀️ 21 °C

    Ek het saam met Jancke se ma en vriendin gery en hulle het my by Zaanse Schanz gaan aflaai. Daar het ek rondgeloop en gaan kyk hoe maak hulle kaas - dit vat 10 liter melk om 1 kg kaas te maak van koeimelk. Hulle het klomp verskillende soorte kaas en hou 'n demonstrasie om te wys hoe om kaas te maak. Ek het toe verder gestap na die klompe winkel, waar hulle 'n demonstrasie doen van hoe om klompe te maak. Dis baie interessant, en ek dink dit was baie harde werk vroeër. Elke area se klompe lyk anders en mens kon vroeër sien waar iemand vandaan kom deur na hulle klompe te kyk. Wanneer die klompe uitgedroog is en hard is, kan n kar oor hulle ry en hulle het 'safety clearance'.
    Ek het toe gestap na die windmeul wat oop is, wat gebruik word as 'n klipmeul, met 300kg klipwiele wat sandsteen maal as die wind waai. Hierdie spesifieke meul word gebruik om olieverf te maak.
    Ek is hierná Utrecht toe, waar ek na die Speelklok museum toe is. Hulle het klomp outomatiese musiek masjiene en die hele geskiedenis daarvan. Elke uur word daar 'n begeleide toer gedoen en dan word die musiek gespeel.
    Na die speelklom museum het ek langs 'n kanaal gaan sit en by Winkel van sinkel 'n glasie vonkelwyn gaan drink tot Brogen gekom het. Ons het rondgeloop deur die straatjies en by 'n kaas restaurant, waar die verskillende kase met toppings op 'n band verbykom soos sushi, gaan eet en sap drink. Ons het toe verder rondgeloop en later gaan eet by 'n oosterse restaurant, wat baie lekker was.
    Ek vat toe die verkeerde bus en kom eventually 23:30 by die huis aan.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Kaasmark en Leuven

    17. Juni 2022 in Belgien ⋅ ☁️ 26 °C

    Elke Vrydagoggend van April tot September is daar 'n kaasmark in Alkmaar op die waagplein. Dit gebeur al sedert 1365 en word steeds vandag op die tradisionele manier gedoen. Al die kaas word vroeg die oggend uitgepak en dan gedra deur die kaasdraers na die skaal, want daar was net een skaal, en geweeg. Dit word dan verhandel. Die kaasdraersgilde reël en onderhou die mark.
    Daarna het ek Leuven toe gegaan en vir Tina op die stasie gekry. Ons het toe deur die bondgenotelaan gestap en by Notre dame restaurant gaan eet, waar Olivia ons gekry het. Dit het gevoel asof daar niks tyd verloop het sedert hulle in Suid-Afrika was nie, maar dit was al vyf jaar terug.
    Na ete het ons deur Leuven geloop. Dis 'n universiteitsdorp, met oulike restaurantjies en die langste 'bar' in Europa, wat basies net n klomp plekke aanmekaar is en dan sit almal buite by stoeltjies en tafeltjies en kuier. Ons het ook deur Begijnhof, 'n parkie en die ou stadsmure gestap, en gekyk waar het Oliva skoolgegaan en Tina gebly terwyl sy geswot het. Ons het die aand afgeëindig met 'n kersie-appelsap en spekuloos tiramisu by 'n straat restaurantjie waar hulle altyd gekuier het as studente.
    Olivia se kêrel maak e-bikes so sy het met hare gery en ons is toe almal na my hotel toe, want ons was te laat vir check-in. Gelukkig was daar toe iemand wat skoonmaak wat ons gehelp het om in te kom.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Aankoms in München

    18. Juni 2022 in Deutschland ⋅ ☀️ 27 °C

    Ek het 'vroeg' probeer uitcheck, maar daar was niemand wat my betaling kon vat nie, so ek moes wag tot hulle 07:00 aan diens kom. Ek is toe stasie toe en het die ICE trein gevat na Munich. Dit was bietjie deurmekaar want die kaartjie kantoor kon nie vir my 'n kaartjie verkoop nie omdat die trein binne 10 min daar sou wees, so hy sê toe ek kan 'n kaartjie op die trein koop. Die man op die trein sê toe dit werk nie regtig so nie, ek kan probeer om een te koop op die internet, maar dit wou dit nie verkoop nie omdat die trein reeds weg is uit die stasie uit. Hy sê toe ek kan net by die volgende stop 'n kaartjie koop, maar net voor die volgende stop maak hulle 'n afkondiging dat die trein nie verder gaan ry nie en almal moet oorklim op ander treine.
    Ek koop toe 'n kaartjie by die treinstasie en klim op die volgende (baie vol) trein, waar ek (en klomp ander mense) tot op die eerste stop in die gangetjie gestaan het. En dis mal warm. Maar ek het darem sitplek gekry by die volgende halte tot in Munich. Die trein ry tot 300km/h en dis so mooi groen hier. En in Duitsland moet mens nog maskers dra op publieke vervoer. Maar dis al. En dit maak nie sin nie.
    By Munich het ek die ondergrondse trein en tram gevat hotel toe. Daarna het ek vir Wilhelm gaan kry in die stad en ons het iets gaan eet by 'n regte duitse restaurant, waar hulle tradisionele duitse klere dra (selfs die griek, Niko, wat ons bedien het). Daarna het ons deur die stad en parkies gestap en na al die mooi geboue gekyk. Oral is mooi (baie) ou geboue en fonteine.
    Ons sluit ons aand af met 'n bier (en ek met 'n Johannisbeeren sap - dis een of ander bessie en vir nou my gunsteling) in 'n biertuin agter 'n restaurant. Die restaurante het sulke donkerhout afwerkings wat glo eie is aan Beiere en almal is baie jolig oral.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    'n Dag in Munich

    19. Juni 2022 in Deutschland ⋅ ☀️ 30 °C

    Ons het die dag begin met die rooibusse (hop on hop off). Hulle het 3 roetes wat elk 'n uur neem, deur die stad, Nymphenburg paleis toe en deur Schwabing. Daar is so baie geskiedenis en sulke mooi geboue. Ek het altyd gewonder wat die groot ophef is oor al die geboue in Europa wat almal so post op hulle vakansies... tot mens voor hierdie geboue staan. En die kerkklokke lui en dit voel of jy in 'n fliek is.
    Ek het sonbrandroom in my oog gekry, wat toe baie brand en my oog laat swel, so na die busse is ons eers na Wilhelm se hotel om oogdruppels te kry. Dis regtig handig om in sulke situasies saam met iemand te reis wat spesialiseer in oftalmologie, want waar anders sou ek oogdruppels kry? Alles in Duitsland is toe op 'n Sondag, daar is net 'n paar enkele restaurante en museums oop.
    Ons het toe gaan eet by 'n straat restaurantjie en die trein gevat na BMW museum en die olimpiese park. Die BMW museum is nog besonders. Dit het die hele geskiedenis van BMW en modelle van die karre, motorfietse en vliegtuig enjins, asook die kleimodelle van die karre en nog baie goed. Ook, BMW maak Rolls Royce. Interessant - wanneer hulle aan 'n nuwe model werk en dit toetsbestuur plak hulle hom met 'n film vol swart en wit lyne in verskillende rigtings sodat mens nie die vorm van die nuwe model kan uitmaak tot dit vrygestel word nie.
    Na die museum het ons na die 'welt' gegaan waar klomp nuwe karre uitgestal is. Die elektroniese karre is amazing. En daar was 2 Rolls Royce karre.
    Ons is toe olimpiese park toe, waar Wilhelm in die olimpiese swembad gaan swem het. Daarna is ons na die Englischer Garten. Dis 'n groot park in Munich waar mense piekniek hou op die groot grasperke en sport speel, mense ry fiets of stap deur die park, en daar is 'n rivier wat daar deur hardloop waar mense (en Wilhelm) inspring en afswem, en daar is selfs plekke in die rivier waar hulle surf.
    Daarna het ons 'n bier (en ek weer my gunsteling Johannisbeere sap) gaan drink en aandete geëet (alhoewel ek net apfelstrudel met vanilla sous geëet het - die Duitsers se porsies is massief).
    Ons het toe teruggestap deur die park en vir oulaas iets gaan drink by die restaurant waar ons die eerste aand geëet het. Ons het toe gaan slaap, want more moet ons albei vroeg weer vertrek na ons onderskeie plekke.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Frankfurt, oppad na Hamburg

    20. Juni 2022 in Deutschland ⋅ 🌧 18 °C

    Ek het vroegoggend treinstasie toe gegaan en met die sneltrein gery Frankfurt toe, waar ek die trein na Mandie-hulle gevat het. Sy het my op die stasie gekry en ons het na hulle huis gestap wat letterlik 3 minute van die stasie af is. Ons het toe eers 'n rukkie gekuier tot haar kinders van die skool af gekom het en toe het ons gery na Seligenstadt, 'n ou (een van die oudste) klein dorpie langs die Main rivier.
    Daar is die mooiste ou huisies wat van die 1700's af kom en heel skeef is, maar staan en in stand gehou word. Die klooster het 'n pragtige tuin en plek-plek langs die pad is sulke koper plaatjies met die name van die jode wat in die huise gebly het. Ons eet lekker pastries en ry toe aan na Aschaffenburg, ook op die Main rivier, waar ons na Schloss Johannisburg gaan. Dis basies 'n paleis/kasteel, wat in die 2de wêreldoorlog amper vernietig is, en later herbou is.
    Ons het deur die ou deel van die dorp gestap en toe teruggegaan huis toe sodat ek betyds (amper nie) kan wees vir my trein terug Frankfurt stasie toe sodat ek op die sneltrein Hamburg toe kan klim (wat ook laat was).
    Die autobahn werk lekker, maar basies soos die regterkantste baan in Gauteng. Ry vinnig en gee pad as iemand vinniger as jy ry. Daar is net nie 'n spoedbeperking nie. Ook, as al die bane staan beweeg al die karre outomaties uit die middelste baan sodat dit oopgehou kan word indien noodvoertuie moet deur beweeg. O en mens word beboet vir enige iets wat jy verkeerd doen. Baie beboet. So almal luister. Hulle werk ook op 'n vertroue sisteem. Dis selde dat hulle op die treine kyk of mens kaartjies het, maar as jy nie het nie en hulle vang jou word jy beboet. Gelukkig kry mens van Junie tot Augustus 'n 9 Euro kaartjie wat 'n maand lank hou vir alle publieke vervoer, behalwe langafstand treine.
    Kinders stap van 6 jaar af self skool toe. Hulle word geleer. Die roete skool toe is verseker deur die skool en as iets gebeur op die roete is die skool verantwoordelik vir die kostes.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    'n Dag in Hamburg

    21. Juni 2022 in Deutschland ⋅ ☀️ 19 °C

    Ek het lekker laat geslaap en toe my klere gaan ingee by die droogskoonmakers, waarna ek op die scootertjie ding rondgery het en sightseeing gedoen het tot Neil ook klaar was op die skip. Ons het gaan burgers eet by Dulf's burgers, want as mens in Hamburg is, waar hamburgers vandaan kom, moet 'n mens 'n ordentlike burger eet en Dulf's word oral sterk aanbeveel. Dit was baie lekker. Maar dalk op dieselfde standaard as 'n goeie burger in Suid-Afrika.
    Daarna het ons met die scootertjies gery na Hamburg Dungeons, maar hulle kaartjies was reeds uitverkoop. Ons ry toe hauptbahnhof (sentraal stasie) toe en klim op 'n hop on hop off bus, maar dis 'n blou bus. Ek gaan maar net sê die rooie is die beter keuse. Nietemin het ons baie mooi plekke en ou geboue gesien. Daar is 'n strook langs die riviere wat ongelooflike mooi huise (eintlik mansions) het. Hamburg het omtrent 2500 brûe, die meeste van enige stad in die wêreld. Dis meer as in Londen, Amsterdam en Venisië saam. Dit het ook meer kanale as Amsterdam en Venisië saam. Hamburg is die tweede grootste stad in Duitsland en die derde grootste hawe in Europa. Dit het ook die oudste handelsbank in die wêreld.
    Hier is aansienlik meer bedelaars as in die ander plekke waar ek was, en ek sien ook meer mense wat geïntoksikeerd in die strate loop en hulle baklei en skree soms. Dalk is dit die hawe...?
    Ons gaan drink toe iets by 'n restaurantjie en eet roomys, waarna ek my klere gaan optel en ons toe verder ry na ek eers nóg 'n simkaart moes koop omdat my data op is en ek dit nie kan aanvul in Duitsland nie, siende dat ek 'n Belgiese simkaart het.
    Ons ry toe met die scootertjies tot by die rivier en sit op die wal en drink en bier - ek kan seker nie in Duitsland gewees het en nie minstens een bier gedrink het nie. Ons bel ook vir Ilna, wat bly is dat ek oor die hele see gevlieg het en met Neil kuier. Hulle sien mekaar darem oor so 2 weke. Ons ry toe heen en weer langs die rivier en kyk die huise en gaan eet toe aandete by nog 'n duitse restaurant (en drink vir oulaas nog 'n bier). Daarna gaan stap ons deur Reeperbahn, wat hulle rooiligdistrik is, maar ook waar die klubs is. Daar kom toe 'n hele optog van voor af (ons weet nou nog nie waaroor dit gegaan het nie) en die sekuriteit stoot net almal uit die pad uit voor die optog uit. Weird plek dié. Daar is ook 'n straat waar net mans mag deurstap. Dit is toegemaak en daar staan sekuriteit voor die ingange.
    Ons gaan toe terug hawe se kant toe en loop met 'n tonnel onderdeur die rivier en gaan sit in 'n parkie en kyk uit oor die stad se liggies en gesels tot 00:30. Ek ry toe huis toe met die scootertjie en kry 'n vroeë treinkaartjie Brussels toe vir 04:11, so ek stort en pak toe en sit nou op die stasie en wag vir my trein.
    Almal praat net Duits hier en alles is net Duits, en soos Mandie sê, toe ek vra wat is Duitsland se tweede taal, dis ook Duits.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Terug in Brussels

    22. Juni 2022 in Belgien ⋅ ⛅ 24 °C

    Ek het net na 04:00 op die trein geklim. Daar is 'n hele paar dronk mense op die trein daai tyd van die oggend.
    In Brussels het ek my tas in 'n locker gaan bêre op die treinstasie en gaan rondloop in Brussels en geskenkies, ens. gaan koop.
    Ek het ook 'n Neuhaus roomys geëet, wat hulle maak volgens jou spesifikasies. Neuhaus is nog steeds my gunsteling sjokolade.
    Daarna het ek 'n scootertjie/step gevat en Atomium toe gery, waar mens met 'n hyser opgaan tot heel bo, met 'n 360° uitsig van Brussels en ook van Miniature Europe. Daarna loop jy deur 'n uitstalling wat die geskiedenis van die Atomium vertel - dis basies gemaak as 'n simbool van wêreld vrede en dat almal aan mekaar 'connect' is - ek kan nie nou dink wat die regte Afrikaanse woord is nie. Mens gaan verder op met die roltrappe waar daar 'n skouspel van ligte is. Die volgende area is 'n uitstelling van View from my window, wat in lockdown begin is, om mense ook aan mekaar te 'connect'. Dis baie interessant, al die foto's.
    Daarna het ek nog 'n rukkie rondgestap en toe huis toe gegaan.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Ghent

    23. Juni 2022 in Belgien ⋅ ☀️ 27 °C

    Ek en Liehet het vir oulaas bietjie gaan ontbyt by 'n oulike koffiewinkel naby hulle huis. Laudo is skool toe. Daarna het ons na die bakkery gegaan. Hier koop mens brood by die bakkery en vleis by die slagter, ens. Sy het my toe na hulle gemeenskapspark gevat, waar daar klomp grasperke en bome en 'n dammetjie is, met kinders wat oral speel.
    Ek is toe met die trein Gent toe, waar ek 'n fiets gehuur het en na Gravensteen gegaan het. Dis 'n kasteel waar die graaf van Flanders in die middeleeue gebly het, en het baie goed behoue gebly. Die storie van die graaf en die kasteel word deur 'n oudiomasjientjie vertel soos wat mens aanbeweeg. Hulle was nogal wreed in daai tye met al die torture wat hulle gedoen het. Iemand het selfs erken sy is 'n heks en het die duiwel gesoen omdat hulle haar getorture het.
    Ek het toe in die strate afgeloop en deur graffitistraatje gestap, wat net vol graffiti is. Ek het ook by 'n baie oulike antieke winkeltjie ingestap.
    Ek is toe terug, maar die trein van Antwerp af is gekanselleer so ek moes wag vir die volgende trein, 'n uur later. Die publieke vervoer hierdie twee weke het my glad nie beïndruk nie. Dit was eksponensieël meer laat of gekanselleer as wat dit op tyd was.
    Ek het 'n hawaiian poke bowl gekry vir aandete en toe die laaste trein huis toe gevat, waarop Hendrik ook was, want hy het vir sy werksmense gebraai. Verlede week het dit eers omtrent 22:30 donker geword. Nou is dit al 22:00 donker.    Weiterlesen

    Übersetzung anzeigen
  • Marise MalherbeEuropa 2022Marise Malherbe

    Laaste dag in Europa

    24. Juni 2022 in Belgien ⋅ ☁️ 21 °C

    Vanoggend was dit 'n stryd om alles te pak en in Brussels te kom, betyds vir die sjokolade werkswinkel by Neuhaus, en die trein was alweer laat. Ek het my bagasie in die lockers op die trein stasie gelos en die werkswinkel gaan doen.
    Dit was baie interessant. Sjokolade moet gesmelt word teen omtrent 45°C en dan afgekoel word tot 30-32°C om mee te werk.
    Daarna is ek direk lughawe toe, want hulle staak. Als het darem vlot verloop en ek het vir die doane beampte gesê hulle moet in Suid-Afrika kom leer hoe dit werk as mens staak, want daar is niks wat brand nie. Die vliegtuig is omtrent 'n uur vertraag, maar ek is uiteindelik weer in SA.    Weiterlesen

    Übersetzung anzeigen
    Ende der Reise
    24. Juni 2022
  • 2025© FindPenguins
  • Start
  • Über uns
  • Gruppen-Tracking
  • Presse
  • Nutzungsbedingungen
  • Datenschutz & Cookies
  • Hilfe-Center
  • Impressum