Othón P. Blanco

Ds tönt ja ersch mau ganz cool. Mir fahre mitem Mietouto vo Mahahual nach Belize Stadt und göh ufd Fähre. ⛴️
So eifach wie dir und mir üs das vorstelle ischs äbä de nid gsy.
Bis zur Gränze nach Belize isch natürlich aues guet gange. Mir hei no ikouft und si mit Fröid im Gsicht richtig Gränze gfahre.
Hie di 7 Schritte wime üs d Ferie es bizzli z verleide macht. 😡
1. Verlange ä Usreisegebühr in Mexiko vo ca. 60 Chf
2. Verlange 5.- bim Übertritt nach Belize für Quarantäne Reinigung wo überhoupt rein gar nüt isch gmacht worde, ussert äs Zettäli usfülle und abstemple.
3. Immigrationskarte usfülle und Pass abstämple.
Nachdäm heimer dänkt ok! Mir chöi gah. Aber Achtung...
4. Seperate Schalter dasmer z Mietouto chöi überenäh. Git es Zetteli wome muess mitnäh. Und e Stämpu i Pass!!!!
5. Dusse bim Outo verlangt när eine 15 Dollar für irgendwelchi Administrationsgebühre.
6. Nähr heimer a Gränzübertritt chönne womer nomau eim hei müesse zeige dasmer dä Stämpu im Pass hei! Notabene isch dä Grenzübertritt öppe 5m vom Gebäude mit auem andere entfernt..
Iz häbet nech: Dä ar Barriere wo dr Stämpu und Pass kontrolliert seit: Ok aues guet. I muess iz eifach no zu däm Fenster dert gah (3 Meter vo ihm entfernt) und däm dert inne dr Pass mitem Stämpu und dä Zettle oh no zeige. Tatsächlich hockt dert eine dinne wines Pfung Dräck und bestätigt mir wie die 5 andere vorhär, dass mir dä Stämpu dinne hei 😂
7. Mir müesse no nachem Gränzübertritt e separati Versicherig löse für z Mietouto.
D Rahel und ig hei üs zu däm Zitpunkt richtig verarscht und abzockt gfühlt, bis üs e mega nätte Mah bi däm Versicherigsbüro aues het bestätigt das ds so richtig sig und het üs oh no paar Tipps gäh.

So iz cha Belize starte! (Hei mir dänkt...)
Übere Northern Highway wei mir richtig Belize City fahre. Dä "Highway" isch aber ersch no am entstah, im Momänt isches eifach meh ä Schotterstrass😅 Eh ja hei mir haut chli lenger...
Kurz vor Belize City, uf dr Suechi nachemne ATM und WiFi wärde mer imne chline Coffeeshop fündig.
I wirde ufem Parkplatz aghupt wöui würklech nid so grad ha parkiert. Dr stopp dert isch aber oh nid planet gsy, wöu ig ha wöue useha für zum cherä da mir e ATM are Tanksteu hei gseh.
Dä Typ wo us däm Outo usstigt, nachdäm ig mi Fauxpas ha korrigiert, fragt üs de oh gad öb mir Hiuf bruche.
5 min später hocke mir mitemne Kaffi und WiFi i däm Coffeeshop und hei es mega cools Gspräch mit däm 150kg farbige Maa.
Mir hei när chönne Gäud uselah und am Nami am 3 chöme mir de in Belize City ah. Ufem Parkplatz zur Fähre wo mir üses Outo 1 Wuche löh la stah heimer wider e mega fründliche und hilfsbereite Mah troffe woni no e chli Sympahthiedeal ha chönne ushandle.😅 Mir hei Glück u chöi gad sofort ufd Fähre richtig Caye Caulker. D Fahrt geit öppe 45min.

D Insle gfaut üs mega guet! Richtigs Karibikfeeling hie, mir füehle üs mega wohl. Speter simer no dr Sunneungergang am Strand ga luege und hei dert üsne Ouge fasch nit trout. Dert am Strand si eifach öppe 10 Stachuroche umegschwumme😳🥰
Nachem Sundowner göh mir ga ässe. Für mi grilled Redsnapper und für d Rahel grilled Chicken.
Dr Abe löh mir ufem Stäg bim Fische beobachte mitemne Bier la usklinge. 🥰🐟🪸🐠

Belize het houprig gstartet, aber het nachem Gränzübertritt mit meeega tolle und fründleche Lüt gwüsst z überzüge. 🥰Baca selengkapnya