Reset search
Latinamerica: Bolivia & PeruLatinamerica: Bolivia & Peru
SatelliteEdit route

Latinamerica: Bolivia & Peru

February - June 2023
A 124-day adventure by Maria Read more
  • 42footprints
  • 4countries
  • 124days
  • 609photos
  • 12videos
  • 0kilometers
Follow Calendar Share Bucket list
Date descending
  • TravelerLatinamerica: Bolivia & Peru
    Day 124

    Viaje de vuelta

    June 28, 2023 in Switzerland ⋅ ☀️ 25 °C

    Schliesslich bringt mi de Hostelbsitzer direkt an Flughafe. Wilmer für das dur Lima dure müend, rechnemer mal gnueg Ziit i und started am halbi vieri (de Flug isch am achti). Dank verhältnismässig wenig Verchehr simer am füfi denn scho am Flughafe und ich sattle mini Rucksäck. Währedem asto für de Checkin und d'Gepäckabgab wirdi userwählt, zum min grosse Rucksack nach irgendwelche ussergwöhnliche Gegeständ durchsueche. Wieso ich? Gsehni so verdächtig us? 😂 Tja egal, sölleds alles durchsueche, solangses au wider brav ipacked ^^ De Polizeityp nutzt denn d'Warteziit unter anderem zum probiere a mini Handynummere cho - irgendwie e passendi Verabschiedig us Südamerika🤪
    Er findt denn natürli nüt ungwöhlichs, aber ruumed dank mim Gemötzle vo wege viel Kleider uf wenig Platz au ned grad viel us 💪
    Ja und vo denn a gohts souverän - i überhole sogar es paar Lüt wo normal hend derfe asto ^^ Also Gepäck abgeh, Sicherheitskontrolle hinter mich bringe und Gate sueche. Es goht so schnell, dasi glatti 2.5 Stunde vorem planete Abflug parat bi. Ich zelle mis letste peruansiche Geld und chume zum Schluss, dases grad na für en Snack langed zum ohni Reste ende - guet planed :) De Rest vode Ziit höckli ufem Bänkli und luege Film oder laufe nebed de Boardingwarteschlange hi und her zum vorem lange Umesitze na chli Bewegig ha. So gohts denn doch einigermasse schnell, bismer iistiged und au fast pünktlich (wär ja sus ned Südamerika 😉) abhebed. Chuum richtig ide Luft, gits Znacht und denn heissts probiere schlofe. I froge mich, wieso dasi de Komfort ide Büs ned meh gschätzt han - s'Flugzüg isch dütlich unebquemer 😫 S'eint oder ander Stündli gits denn aber glaub glich und ich flüge ja de Ziit entgege, also isch gli wider Obig. Und denn hani sogar mis eigne Zimmer und es rechts Bett ^^ Schliessli gits Zmorge und denn söttemer scho de Landeaflug starte. Wege "grad chli viel Verchehr in Madrid" machemer zerst na di eint oder ander Zuesatzschlaufe, denn klappeds bestens :) Wie scho letst Mal d'Madrid bruchts au dasmal sini Ziit zum s'Gate für de negst Flug erreiche. Mit Sicherheitskontrolle und Zoll duureds fast e Stund bisi achume - was au heisst, dasi nume na 20 min Ziit han bis zum Boarding. Das langed für frisch mache und Sandwich esse, bevors wider iistiege heisst. Dasmal hani en Fensterplatz und hoffe natürli uf wenig Wulche, was sich au grössteteils erfüllt 🤷🏻‍♀️ Mir wäred pünktlich parat für de Abflug, müend aber na warte - ich nime mal a immerna wege viel Verchehr ^^ Mitere knappe Halbstund Verspötig heissts denn es letsts Mal abhebe. Anschiinend hämer ziml iRuggewind wil trotz spohtem Start landemer vor de agehne Ziit souverän z'Züri und woni denn mis Gepäck wider entgege gno han, gsehni d'Reis als zimli angschlosse 🤗

    Blibed dür grossi Froge:

    Uf was freui mi am meiste zrugg ide Schwiiz?
    1. Hahnewasser
    2. Mini eige Chuchi
    3. Bekannts Umfeld

    Was wirdi am meiste Vermisse:
    1. S'perfekt organisiert Chaos
    2. Frücht
    3. Hilfsbereiti, weltoffni Lüt, wo de verlorne Touris gern wiiterhelfed
    4. D'Überraschige vom negste Tag

    Was wirdi ned vermisse:
    1. Panne mit Büs und Autos
    2. WC-Papier im Chübel entsorge

    Und denn chani mer no ned vorstelle, wies isch, wemer bim Beck oder ade Bushaltestell wider eifach chan in Schwiizerdütsch nach Uskunft froge aber a das wirdi mi bestimmt hüt Obig scho wider gwöhnt ha 🙃
    MUCHAS GRACIAS 🥰 🇪🇨 🇧🇴 🇵🇪    Read more

    See translation
  • TravelerLatinamerica: Bolivia & Peru
    Day 123

    Más surf & chill

    June 27, 2023 in Peru ⋅ ⛅ 21 °C

    Es goht gliich wiiter wie di letste zwei Täg, nume werded d'Welle grösser und ich stabiler. Nach de Lektion gester gangi au am Nami mit an Strand, wo e Neuakömmlingin ihri erst Surflektion gnüsst. Mer seit mir, dases dete imene Kafi di zweitbest heiss Schoggi vode Umgebig git - nume häts leider hüt zue und so gits halt en Fruchtsaft amene andere Ort. Gesse wird hüt vo selber Kochetem, han na es paar Restli zum bruche und so chani Geld spare ide Hoffnig, dases genau ufgoh sött mit mim Bargeld bis am Schluss. Ou und ja, min Zimmerkolleg isch würkli en sehr komische Vogel, wo anschiinend sogar d'Hostelcrew Müeh hät zumen versto, und die sind sich argentinischs Spanisch gwöhnt 😂
    Ja und so gönd mini vier Mönet in Südamerika nach de letste guete Welle langsam am Endi zue. Es git es letste lokals Zmittag und denn heissts au es letsts Mal packe und Abschied neh...    Read more

    See translation
  • TravelerLatinamerica: Bolivia & Peru
    Day 121

    Surf & chill

    June 25, 2023 in Peru ⋅ ☀️ 22 °C

    Di letste zwei Täg lönd sich guet zemefasse. Wie erhofft und plant bestönds us usschlofe, esse, surfe, lese, Dessert schneugge, jogge und uf de Dachterrasse hänge. Am erste Tag kämpfi na recht mit Welle. Si sind defintiv chli anderst als z'Ecuador und grad viel häts au ned ume, mir sind also immer chli am warte... Mir bedüted, dass ide Unterkunft na es argentinischs Päärli isch, wo sie au ide Lektion isch. Was au es bitz strub isch: mir sind amene relativ flache Steistrand. Es empfiehlt sich also, möglichst flach z'gheie und ned Chopf vora ^^ S'Wasser isch au dütlich chälter als z'Olón, drum hämer en Ganzkörperwetsuit a, was mini au sus scho iigschränkt Beweglichkeit ned fördered und d'Ufstehbewegig ufem Brett erschwert - janu, morn wirds besser :) Nebst eusnsind au na es paar Vögel, en Seehund und Pinguine im Wasser 🤭 Am Obig lueged d'Argentinier irgend es Fuessballspiel, wo für sie anschiinend mega wichtig isch wil all aktive und ehemalige grosse Näme debi atretted. Für mich isch vorallem faszinierend, wie viel Emotione bi ihne debi sind und wie langsam es Spiel mit pensionierte Fuessballer lauft 🙈
    Im Gegesatz zum erste Tag isch denn d'Lektion am Sunntig scho am Morge wils de Crew grad besser in Plan passt und mir chunnts überhaupt ned drufa. Hüt bini elei - zum Glück, wil es hät na weniger Welle als gester. Die wo chömed, chömed aber guet und i sto zimli uf jedere souverän :) Nachher hani Hunger und bequeme mi vo Beck zu Resti zu Kafi für chlini Snacks, Fruchtsaft und Ziit zum chille und lese :) Denn gangi namel uf e Joggingrundi i di ander Richtig (mues die Dessertkalorie irgendwie verbrenne ^^) und es springt sich scho viel besser als na vor zwei Täg :)
    Ab jetz hani en Zimmerkolleg, woni am Obig nach sim Surfusflug kennelerne. En komische Kauz... Au us Argeninie aber irgendwie würkter wie uf Droge und verstoht au nachem siebte mal erkläre ned, dasi ihn mit sim Akzent ned verstoh wener so schnell redt und dezue ane na murmled. Ha beschlosse dasi ihn eifach meh oder weniger ignoriere biser denn langsamer redt, was Geduld brucht aber gar ned so schlecht funktioniert 🤣    Read more

    See translation
  • TravelerLatinamerica: Bolivia & Peru
    1
    Day 119

    Cusco - Punta Hermosa

    June 23, 2023 in Peru ⋅ ☀️ 21 °C

    Es stoht namel usschlofe a und hüt klappeds besser. Nachher gits wider es grosses Zmorge und denn heissts alles packe für d'Wiiterreis ad Küste. Mit allne zemekaufte Souvenir wirds langsam enger im Rucksack aber es passt na 😇 Ich ghöre übrigens au wider öpis ufem lingge Ohr :) Wo alles zemegsuecht isch, hani na Ziit, zum namel ide Stadt es paar Snacks organisiere (wett für di ganz Busreis usgrüsted si falls us irgendwelche Gründ wider Pause gstriche werded...) und namel es bitz de Tänz zueluege. Selbstverständlich bini pünktlich und vollpackt zrugg im Hostel und entscheide mi für d'Variante z'fuess an Busbahnhof go. Chan nachher na gnueg lang umehocke... Nach 20 min wirds denn langsam astrengend mit beidne Rucksäck aber es isch nüm wiit. De gross Rucksack chani grad abgeh und denn na es letsts Sandwich für de Znacht poste. Schliessli beziehni min Platz ide Frontreihe und mir fahred fast pünktlich am eis los. Mis Ziel isch Punta Hermosa, was öppe ei Stund südlich vo Lima ade Küste liit und vo do us öppe 20 Stunde Fahrt bedüted... De Sitz isch recht abgranzt aber wird scho klappe mit schlofe und es hät defür fast kei Lüüt :) Nachere Halbstund Fahrt haltemer oberhalb vo Cusco plötzlich und es goht gar nüt meh. Infos gits wie gwöhlich kei, bismer si eus selber erfroged: Alternator am Arsch, so chömer ide Nacht ned fahre. Was d'Lösig isch weiss weder eusen Chauffeur na sus öper. Irgendwenn hani gnueg vom umesto und gange es Glace go sueche. Woni zruggchume wird grad en andere Bus aghalte, womer anschiinend chönd istiege. Aber müemer namel zahle? Das weiss niemer und isch au grad de meiste egal, hauptsach mir chömed wiiter - mit drü Stunde Verspötig bis jetzt... Us mim schöne Logeplatz wird eine ide hinderste Reihe mit verchlebtem Fenster und dur das zimli gar keinere Ussicht- scheibe... Immerhin isch de Bus glaub es bitz bequemer. Schliessli fangt mini Sitznachberin a mit mir rede, mini Motivation zum antworte halted sich aber no in Grenze ^^ Irgendwenn wirds dunkel und ruhig im Bus. Nume ich bin bi ned müed, lise, mache Administration und schriibe Blog. Zum Glück hani Esse iglade wil Znachthalt gits i dem Bus tatsächlich keine 🤷🏻‍♀️😂 Irgendwenn bin au ich gnueg müed zum es bitzeli döse. Viel meh isches aber glaub ned wil erstens hämer es Baby nebeddra wo öppe all Stund mal afangt schreie, zweitens hani wider Problem mitem Druckusglich und drittens isch de Platz für mini Bei zimli knapp. Irgendwenn wirds hell und mir halted für es Zmorge. Also bi mir für Zäh butze wil Zmorge hani au debi gha ^^ Denn heissts wider istiege und na di letste vier Stunde in Agriff neh. Us vier werded füf Stunde woni trotz schlechter Nacht nüm chan schlofe. Schliessli wirdi imene gfühlt 30 Sekunde lange Halt in Punta Hermose am Rand vode Schnellstross usegschmisse (ohni dasi namel öpis han müese zahle). Vo do us ischs en 20 minütige Spaziergang is Hostel, woni nach 25 Stunde umehocke sehr gern in Agriff nime. S'Hostel würkt sehr fründlich, familiär und bis jetz es bitteli einsam wili kei anderi Gäst entdecke. De Vorteil a dem isch, dass mis teilte Zweierzimmer vermuetli zumene Privatzimmer wird 🤭 Mit surfe wirds hüt vernünftigerwiis nüt meh drum beschäftigi mi mit lese uf de Dachterrasse und enere Erkundigsjoggingrundi, wo recht astrengend isch. Gibe jetz mal de schlechte Nacht und ned em viele Esse vode letste vier Mönet d'Schuld ^^ Denn folgt wider chille, düschele, Wasser ichaufe, dur s'Zentrum schlendere und schliesslich go Znacht esse :) S'Ziel vode negste Täg isch ja tatsächlich viel chille, quasi Ferie vode Ferie mache und ich glaube, das goht i dem Städtli ganz guet 🤗
    Oh und ich gseh widermal en komplett bewölkte Himmel. Das häts ide letste Wuche sit Bolivie eigentlich gar nüme geh. Hoffe eigentlich na uf de eint oder ander schön Sunneuntergang am Strand und ned nume Wulche 🙈    Read more

    See translation
  • TravelerLatinamerica: Bolivia & Peru
    Day 116

    Palcoyo

    June 20, 2023 in Peru ⋅ ☀️ 8 °C

    Zeme mit zwei Hostelkollege heissts abem vieri parat sto. Di andere zwei mached aber de "richtig" Rainbowmountain. Ich wirde miteme Auto abgholt, wo Platz für 9 Touris hät und nachem übliche hektische Zemesueche vode passende Lüt sind denn au all Plätz bsetzt und d'Fahrt chan richtig losgo. Ich bin sehr müed und nicke bald mal für es längers Ziitli i. Erst churz vorem Zmorgehalt bini wider awesend. S'Zmorgebuffet zeigt sich fruchtig und fein :) Mit dere Stärchig im Mage nehemer di letst Fahrstund in Agriff, wo eus entlang vomene Inkatrail es Tal duruf füehrt. Au immer begleitet werdemer vom Red River, wo eigentlich kristallklar isch aber wege irgendwelchne Mineralie rot erschiint. Vo Ziit zu Ziit wird de Weg vo Lamas oder Schöf blockiert, wo halbe panisch devorenned ^^
    Schliessli heissts irgendwenn, mir seged uf 4'600 müM acho und eusi "Wanderig" started. De Rundweg füehrt bis uf 4'900 müM, verbi a verdchiedene Ussichtspünkt mit Sicht uf mehreri schöni und faszinierendi mehrfarbigi Krete ide Umgebig. Debi hämer au immer Sicht uf s'bekannte Red Valley und de Ausangate, woni bide Wanderig "7 lagunas" vode andere Siite bestuunt han. Di verschiedene Farbe chömed wenig überraschend dur verschiedeni Mineralie z'Stand. De höchst Punkt vode Rundi isch inmitte vo lustige Felsformatione, wo sich Felsewald nennt. Je länger dasmer unterwegs sind, desto meh windets und plötzlich bini froh, dasmer früeh ufgstande sind - vorallem au wilmer di erst Gruppe gsi sind und na freii Sicht hend :) Zrugg im Auto nicki bald wider i. Irgendwie verwachi hüt eifach ned richtig. Bi glaub na bitz nebedem Rhytmus. Zuesätzlich chumi Problem mitem Druckusglich über und ghöre uf links plötzlich nume na schlecht. Hoffentlich hört das bald wider... Vorem Zmittag stoppemer binere originale schöne Inkabrugg, zemebastled us Tierhuut und Holz. Bin mer immerna ned sicher, obi dere Brugg oder de neue nebddra wo in Baugrüst ghüllt isch meh vertraue ^^ Churz spöter simer wider im Resti und lönd eus vom Zmittagbuffet verwöhne. Denn folged namel knappi zwei Stunde Rückfahrt und erstuunlich früeh bini wider im Hostel. Es heisst heissi Duschi gnüsse und denn ab id Stadt für es Znacht mitem Paul, wo hüt Nami au z'Cusco acho isch 🤭 Es wird en lustige Obig mit lustige Gspröch, spitzfindige Diskussione, feinem Alpakand zwei wiitere Kollege für en Piscococktail nachem Esse :)    Read more

    See translation
  • TravelerLatinamerica: Bolivia & Peru
    Day 116

    Relajar en Cusco

    June 20, 2023 in Peru ⋅ ☀️ 19 °C

    Das mitem richtig Usschlofe isch schwirig wil di lieb Dame im Bett nebed mir am halbi achti afangt telefoniere. Mit Lutsprecher selbstverständlich. Willkomme zrugg im Masseschlag ^^ Janu, stohni halt uf und bereite mis Zmorge zue. Rüehreibrötli, Konfibrötli und Frücht lönd sich gseh :) Denn gohts ab an Busterminal zum für übermorn en Bus ad Küste sueche. Wirde bim zweite Abüter fündig, wo mi denn öppe e Stund vor Lima sött imene chlinere Städtli useschmiesse. Zrugg im Hostel stoht es Telefonat mit de Schwiiz ufem Programm, bevors widermal is Stadtzentrum goht. Dete schneuggi en MC Flurry, wo gar ned mal so schlecht schmöckt wie im Usland erwarted und stelle mi denn zu allne andere Schaulustige an Strosserand. Au hüt isch wider Musig und Tanz als Vorbereitig für s'Sunnefest Intir Aymi agseit. Verschideni Schuele präsentiered ihri Tänz und di einte mached dezue selber Musig. D'Musig an sich wär ganz okey (usser dases meistens zwei Flöte debi hend wo ned zemestimmed, was aber au sehr schwirig isch) aber vorallem de wiiblich Gsang isch zu 98% schrecklich. Nach zwei Stunde ide pralle Sunne (ohni Sunnecreme - die hani hüt vergesse 🤦🏻‍♀️) hani gnueg und de Zuefall wetts, dass genau denn au Donna & Mike ufem Platz erschiined und ich na chan Schulde begliiche. Wil si denn na wend zueluege, trenned sich eusi Weg schnell wider ^^ Mich ziehts namel uf Souvenirjagd. D'Suechi nach dem eine T-Shirt woni gern hett zeigt sich müehsamer als denkt und so vergoht d'Ziit ganz schnell 🙈 Schliessli wirdi aber na fündig :) Ufem Zruggweg is Hostel triffi de eint Mitarbeiter vo dete na zmitzt ide Stadt a - wie chli doch d'Welt isch und es hät ja au ned wenig Lüt uf de Strosse ^^ Denn machi Halt imene Buechlade zum mi für e langi Busreis usrüste und entdecke na e wie sich usestellt sehr gueti Bäckerei 😇 Im Hostel isch endlich e langi heissi Duschi agseit und denn namel mit Lüt über d'Tour vo morn rede. I wett gern zude Rainbow Mountains aber weiss, dases wemer mitere Tour goht sehr sehr viel Lüt dete hät. Anschiinend isches abem Mittag denn sehr ruhig und drum würi gern Lüt finde zum es Taxi teile und selber go. Es blibt aber bi dere eine potenzielle Mitfahrerin, woni gester scho atroffe han. Dementsprechend entscheidi mi für d'Variante Palcoyo ä, wo weniger überloffe söll si und au farbigi Berge hät und bueche grad über s'Hostel. Denn mchi alles parat, bevors wider id Stadt goht wil ich han mehrfach d'Empfehlig vomene sehr feine Alpakaburger übercho, woni wett go probiere. Lustigerwiis chamer de uf zwei Arte bstelle und ich versto beidi weder uf Englisch na uf Spanisch, so dass de Servierboy zum Übersetzer griife mues ^^ Glaube han schlussendlich s'richtige bstellt, es isch nämli würkli super fein :) Schliessi isch scho spöter als denkt und ich mache mi direkt uf de Zruggweg zum asatzwiis wach si, weni morn morge wider am vieri abgholt wirde...Read more

    See translation
  • TravelerLatinamerica: Bolivia & Peru
    Day 115

    Salkantaytrek - día 5: Machu Picchu 🥰

    June 19, 2023 in Peru ⋅ ☀️ 20 °C

    04.00: Wecker. Hallelujah, überhaupt ned usgschlofe heissts packe, Zmorgepaket schnappe, uschecke und Abmarsch. Zum Glück hani gester na es Croissant pösteled, woni scho ha chöne esse, sus wäri e wandelndi Liiche ^^ Pünktlich zur Toröffnig am füfi simer une am 1'800 Stegetritt lange Astieg zum Machu Picchu und nehmed dä denn meh oder weniger motiviert in Agriff. Ich bin wider mit Donna & Mike unterwegs - das Tempo passt eifach am beste und mir hends recht lustig :) Also jetz redemer natürli ned, sondern fokussiered eus uf de Astieg im Stirnlampeliecht und d'Morgedämmerig... ^^ Bald mal bini nume na im T-Shirt unterwegs wils ganz schön warm git. E knappi Stund spöter erreichemer d'Höchi, snacked öpis, gönd uf s'WC (ide Ruine häts keis!) und stelled eus denn id Warteschlange. Es goht schnell vorwärts und so simer bald dine und erhasched ersti Blick uf di no im Schatte liggend Ruinestadt. Es folgt en wiitere Astieg zum bekannte Ussichts- und Fotispot, womer e langi Pause iilegged bis d'Sunnestrahle d'Ruine erreiched 🤩 Denn gits wider e Gschichtsstund vom Rubén. D'Spanier sind zwar nie bis do here vordrunge, trotzdem sind jeglichi möglichi Dokument zerstört worde, so dasmer relativ wenig über de Ort weiss, ned mal de Originalname devo. D'Stadt söll ab 1450 baue worde si und isch zum Ziitpunkt vode spanische Akunft no ned fertigg stellt gsi, wasmer au guet gseht. Es sölled zude Spitzeziit bis 1'000 Inkas do glebt ha. Wie jedes Dorf bestoht au das hauptsächlich us de Landwirtschaftsterrasse, em Wohnteil und em Zeremonie-/ Religionsteil. S'Wasser wird entlang vom einte Inkatrail anegfüehrt und chan a einere Stell im Dorfzentrum abzapft werde. Nachdem d'Inkas vor de Spanier tüüfer in Dschungel gflüchted sind, isch de Ort es bitzeli vergesse gange. D'Widerentdeckig dur Locals isch scho länger her aber würklich wider bekannt worde isch Machu Picchu dur e vierjöhrigi Forschig vom Hiram Bingham ab 1908. Er hät vomene Local, wo in Machu Picchu glebt hät, de Tip und denn au Füehrig übercho und alles agfange erforsche und id Welt use träge. D'Stadt liit uf de Krete zwüsched de beidne Gipfel Machu Picchu (=alter Berg) und Huayna Picchu (=junger Berg). Sit 1983 ghört de Ort zude UNESCO Weltkulturerbe und achtung Fun Fact: für de Bsuech und besser Zuegang vom spanische König wenigi Johr spöter hät mer en eigentlich wichtige Stei im Zentrum vom Hauptplatz entfernt. Wo daser jetzt isch, weiss bis hüt niemer ^^ Bide Usgrabige hät mer ide Stadt ei Mumie und en Friedhof usserhalb vom Dorf gfunde. Im Opfertempel sind Lamas, Meersäuli und au Mensche gopfered worde. Natülich gits na viel meh z'verzelle aber ich weiss au nüme alles. Di ganz Stadt isch uf jede Fall viel wiitläufiger als ichs uf de Fotis vermueted hett. Und es isch genau so beidruckend zum durelaufe wie erwarted und vorhergseit. Tatsächlich es bitzeli en magische Ort - wenn nume all die Touris ned wäred ^^
    Nach drü Stunde ide Ruine verlömer de Ort und nehmed de individuell Abstieg in Agriff und siehe da, jetz fangt mis Chnü glich na a zwicke aber jetz chanis verchrafte :)
    Zrugg im Dorf gömer is Hostel, montiered d'Finke und spaziered denn los id Stadt für s'Zmittag. Es git en feine Burger. Denn spazieremer sus na chli ume, schneugged öpis gsunds im lokale Märt und gönd denn an Bahnhof, womer eus alli wider finded und zeme knappi zwei Stunde lang mitem Zug zrugg uf Ollantaytambo fahred. Dete stoht es Minibüsli parat und namel knappi zwei verschlofni Stunde spöter simer alli glücklich aber kaputt zrugg ide Stadt. Es folgt e Verabschidigsrundi - i füf Täg wachst mer scho recht zeme :) Ich gange mini Wanderstöck (woni sehr froh drum gsi bin) go abgeh und pöstele denn ufem Heiweg na en Snack zum Znacht und Zmorge für morn. Im Hostel wär d'Idee gsi zum lang go dusche und denn direkt is Bett go - es chunnt aber anderst wil na ganz viel Lüt wach sind und mir Froge über de Trek, Cusco und Bolivie stelled. Da chani ja schlecht abchlemme und mega müed bini grad au nüme. Schliessli wird us de lange e churzi Duschi wili denn glich bald mal is Bett wett, wasi ja au verdient han :)

    Hüt hämer uf de Strecki Aguas Calientes - Machu Picchu - Aguas Calientes 9 km und 600 Höhemeter Astieg und Abstieg via 1'800 Stegetritt überwunde.
    Im Gsamte über alli 5 Täg hämer 73 km Distanz, gueti 3'100 Meter Astieg und gueti 4'000 Meter Abstieg absolviert :)

    De gsamt Slakantaytrek chani als füftägigi Wanderig nume Empfehle (chürzer isch stressig). Es isch e Useforderig wemer sichs ned ganz soo gwöhnt isch mit Mehrtäger, aber für mich ischs dank de guete Organisation und de Chocherei vom Team sehr guet machbar gsi. Unterwegs trifft mer uf verschiedensti Landschafte, Lüt und Pflanze, chan viel über d'Umgebig und d'Gschicht lerne und au ab und zue mal es bitzeli Ziit für sich selber gnüsse 😍

    So und jetz freui mi uf s'Usdchlofe morn :)    Read more

    See translation
  • TravelerLatinamerica: Bolivia & Peru
    Day 114

    Salkantaytrek - día 4

    June 18, 2023 in Peru ⋅ ☀️ 18 °C

    De José hät kei Mitleid mit üs und setzt Tagwach scho uf 04.45 a - natürlich au wider mit Coca-Tee :) Die Nacht isch tatsächlich scho fast agnehm war aber immerna unbequem gsi. Janu, hüt Obig söll es richtigs Bett warte. Und e Duschi ^^ Au de Weg hüt kennt kei Schonfrist. Vo Afang a gohts einigermasse steil ufwärts und scho gli treffemer uf de Inkatrail, womer denn au de ganz Tag werded druf blibe. Nach drü Stunde im Schatte ufwärts wandere mit bester Ussicht is Tal, erreichemer de höchst Punkt für hüt und rüsted eus mit Touristespray und -Salbi us. Also Moskitostray und Sunnecreme... De Astieg isch öppe glich viel gsi wie na vor zwei Täg aber wils 2'000 Meter tüüfer liit, hät sichs ganz agnehm gloffe. Nach 10 min Abstieg chömemer zude Ruine vo Llactapata, was "hohes Dorf" bedüted und zu Inkaziite als Zollstell dient hät. Wil das Volk kei Geld kennt hät, hät mer de Zuetritt mit Dienstleistige zahlt, also zum Bispiel Hilf bim Arzt oder so. Vo do us gsehmer denn au es ersts mal uf euses grosse Ziel abe, de Machu Picchu 🤗 Es folgt en steile, lange und heisse Abstieg uf Hydroelectrica, wo s'Zmittag imene Resti uf eus warted. Unterwegs gsehmer en riese Wasserfall, wo usem nüt zum Felse use chunnt. Anschiinend ischer de Abfluss vom Stausee und de Stromproduktion uf de Berghintersiite und ned immer "in Betrieb".
    Nachem Mittag mached sich Donna, Mike und ich direkt und elei uf de Wiiterweg wil mir als einzigi in Aguas Calientes, em hpttige Ziellrt und Usgangsort für de Machu Picchu, na müend es Itrittsticket für morn organisiere. Di andere zwei tuubed ab wie vom Aff bisse. Mir isch das egal, ich wett mis Glace und d'Ussicht es bitzeli gnüsse. Spöter stellt sich use, dass sie eifach nume na hend wele so schnell wie möglich acho - hani scho denkt und mich drum au ned störe lo ^^ Es goht 10 km wiit entlang vom Bahngleis, schön konstant aber agnehm astiigend. Churz vor Akunft schribemer am Rubén, dass "my friends" im Amarsch sind und mir mached en Treffpunkt ab damit er eus chan instruiere für d'Tickets. Nach zwei Stunde und zwei entgegenommende Züg erreichemer de Dorfplatz, wo sich wie erwarted touristisch und nervös zeigt. Zuesätzlich lauft Live-Musig, wo ned grad guet isch ^^ Mir finded de Rubén und chönd problemlos es Ticket für morn morge früeh bueche und schnapped eus au grad na en Stämpfel für in Pass :) Ja und was machemer jetz mit dere ganze Ziit bis di andere chömed? Genau, Glace (resp. Schoggimousee) im Dörfli gnüsse. Währenddesse chömed scho di andere zwei Holländer um de Egge und mir höckled na z'füfte für en erfrischendi heissi Schoggi und es Jenga ines Resti. Denn werded Zimmer bezoge: richtige Luxus miteme bequeme Bett, Duschi und so richtige Wänd rundume ^^ Dummerwiis hends nach de heisse Duschi vode Lou irgend es Probelem mitem warme Wasser, wo sich vorem Znacht au nüme löst. Ich verschiebe das Unterfange also uf spöter... Znacht gits wider imene Resti und ich entscheide mich für Alpaka, was wider e gueti Wahl isch :) Ufem Zruggweg heissts Snacks für morn organisiere und denn das mit de heisse Duschi namel probiere - es klapped :) Möglichst bald gohts denn aber au is Bett wil morn heissts namel es bitz früehemr als sus scho ufsto 😅
    Mini Füess und eigentlich de ganz Körper mached die Strapaze immerna erstuunlichguet mit. Usserd dem Zeche woni scho sitem Afang bitz Problem han, merki fast gar nüt usser natürlich es bitzeli e gsamtheitlichi Erschöpfig :)

    Im Gsamte hämer hüt uf de Strecki Paltaychayoc - Hydroelectrica - Aguas Calientes 24 km, 1'160 Höhemeter Astieg und 900 Meter Abstieg überwunde.    Read more

    See translation
  • TravelerLatinamerica: Bolivia & Peru
    Day 113

    Salkantaytrek - día 3

    June 17, 2023 in Peru ⋅ ☁️ 18 °C

    Tag 3 isch de Erholigstag. Trotzdem isch au hüt wider scho am füfi Tagwach mit Coca-Tee. D'Nacht isch okey gsi au wenn ned so warm wie erhofft und d'Matratze sind ned würklich bequem, so dasi jetz e verspannti Hüft han vom Ligge ^^ Eusi Wanderig hüt füehrt alles entlang vom Fluss Santa Teresa talabwärts, immer es bitz ufe und denn es bitz meh abe. Debi hämer besti Ussicht uf d'Dschungelumgebig :) De Rubén erklärt eus immer mal wider öpis über Pflanze und Frücht und verpasst eus au e Kriegsbemalig. Die hebed zum Glück nume bis zum negste mal wäsche und ned wie im richtige Dschungel zwei Wuche ^^ Uf halbem Weg machemer binere Maracuya-Farm miteme Shop Pause. Nebst frischer Maracuya häts au ganz viel anderi Frücht zum probiere :) Mit dene Vitamin gstärcht gohts namel wiiter, bismer schliessli de Fluss über e meh oder weniger vertrauenswürdigi Brugg überquered und uf de andere Siite inen Minibus istiiged, wo eus zum Camp bringt. Bin mer ned sicher ob das nume wege dene isch, wo de Trek i drü bzw. vier Täg mached und am Nami wiiter müend oder ob das sowiso iiplaned isch. Ischmer eigenglich au egal wil mini Füess freued sich, zum hüt scho am Mittag zude Schueh use cho :) Vorem Zmittag halti en churze Nap im Zelt, bi recht müed vom früeh ufsto. Nachem Zmittag verabschiedemer eus vode Irinne, de Familie und em Costa Ricaner, wo morn scho werded ufem Machu Picchu si während mir namel e Rundi wandered. Au mit ihne goht de Rubén, womer aber morn wider werded atreffe für de letst Tag. De "Ersatzguide" nennt sich José und chan lustigerwiis nume Spanisch. Zum Glück simer s'zweite ide Gruppe wo chönd übersetze für di andere. Euses Namittagsprogramm sind d'Hot Springs in Santa Teresa, wo eus en Minibus anebringt - das hämer eus verdient! Meh als e Stund lang gammlemer im warme (für mich trotzdem na es bitzeli z'chalte ^^) Wasser. Min Körper gnüsst die Wohltat... Zum Glück simer früeh dra, wil bald mal füllt sich s'Bad zimli fest und d'Erholig wird dementsprechend weniger. Denn gits dete na es Bierli, bevormer pünktlich uf d'Happy Hour mit Popcorn zrugg im Camp sind und au hüt wider es riese Znacht serviert überchömed. Nach dem Namittag simer definitiv parat für en wider intensivere Tag morn 😊

    Im Gsamte hämer hüt uf de Strecki Collpapampa - Paltaychayoc 8.5 km und 250 Meter Abstieg z'fuess überwunde. S'Camp befindet sich uf "nur" na 2'000 müM.    Read more

    See translation
  • TravelerLatinamerica: Bolivia & Peru
    Day 112

    Salkantaytrek - día 2

    June 16, 2023 in Peru ⋅ ⛅ 5 °C

    Pünktlich am füfi werdemer vom Rubén mit Coca-Tee gweckt. Danke, ohni dä wäremer öppe ned zum einigermasse warme Schlofsack use cho 🙈 D'Nacht isch zwar chalt aber grad so okey gsi Ich bi öppe all zwei Stunde verwached und han jedes Mal uf s'neue es bitzeli Wärmi gsuecht ^^ S'Guete ade WC-Pause isch su indem Fall nachher s'zrugg in Schlofsack schlüpfe.... Währedem Zmorge stossed drü Irinne dezue, wo de ganzi Trek wege Ziitmangel i drü Täg mached. Am viertel ab sechsi isch in immerna grosser Chälti und Schatte Abmarsch. Es stönd im erste Teil 700 Meter Astieg uf de 4'600 Meter höch Salkantaypass a. Debi teilt sich d'Gruppe recht uf: d'Eltere nehmed vo Afang a s'Ross, mir Junge laufeds einigermasse problemlos usser de eint Sohn zeigt Symtom vo Höhechrankheit und di schlecht aklimmatisierte Irinne kämpfed sich meh schlecht als recht irgendwie ufe und gsehnd alli zeme miserabel us... Janu, ich chas uf jede Fall gnüsse und bin beidruckt, womer direkt unterem Salkantaygletscher stönd und dem sini Macht gspüred 🤩 Ufem Pass belohnemer eus mit Snacks, bevors vom Rubén e Gschichts- und Geographiestund git. Anschiinene isch i dene Gipfel d'Gletscherschmelzi mit tägliche Lawine und Felsstürz extrem z'beobachte - er rechnet demit, dass alli Gletscher rundume scho i 20 Johr komplett verschwunde sind. Bis im Jahr 2020 häts do d'Laguna Salkantay geh. Bimene riesige Felssturz isch die aber zuegschütted und s'ganze Wasser mitere riesige Fluetwelle s'Tal abwärts gspüelt worde. D'Abbruchstell und die riesige Felse im Tal sind guet z'erkenne 😅
    In Peru gits drü offizielli Landessproche, wobi Spanisch ned dezue zellt. 5% vode Bevölkerig lebed d'Religion vode Inkas, wobi de Rubén en Teil devo isch. Us dem Grund dankemer denn bimene chline Ritual de Pachamama für alles bis jetz und bitted wiiterhin um guets Glinge - faszinierend wiener das mit eus teilt. Nach dem Teil folgt de für mich härteri Teil vom Tag, de Abstieg. Bis zum Zmittagcamp sinds 2 Stunde, nachher folged wiiteri 3.5 Stunde bis us Nachtcamp, alles immer abwärts. Am Morge laufi na elei und lo mi vode Gletscher links und rechts am Weg beidrucke, am Namittag henki mi Donna & Mike a für de endlos schiinend Abstieg dur de peruanisch Upper Dschungel a. Erst währedem Iidunkle isch euses Camp endlich in Sichtwiiti - ich bin zimlich fertig vo dem Tag. D'Ussicht währedem ganze Tag entschuldigt einiges aber han trotzdem Angst um mini Zeche, wo vo dem viele abwärts laufe es bitz in Mitliideschaft zoge werded... Bin denn dementsprechend froh, dasmer nach Popcorn & Znacht au hüt wider recht gli gönd go ligge :) Si hend gseit dases nume ide erste Nacht chalt wird si aber so ganz wohlig warm ischs au hüt no ned und ich verchrüche mich wider mit Chappe und Händsche tüüf i mim Schlofsack 😇

    Hüt hämer uf de Strecki Soraypampa - Salkantaypass - Collpapampa 21 km (devo sind 15 km Abstieg gsi), 800 Höhemeter Ufstieg und 1'900 Höhemeter Abstieg überwunde. De höchst Punkt ufem Salkantaypass liit uf 4'630 müM.    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English