BoliviaDepartamento de La PazVentana14°34’29” S 67°36’43” W
June 1, 2023 in Bolivia ⋅ ☁️ 26 °C
S'Kanu bringt eus flussufwärts zude Lodge Masaquipe. D'Landschaft do isch vergliche mit Ecuador viel hügeliger und intressanter 😍 Unterwegs machemer Halt bide indigene Familie Alcira und produziered dete euse eige Zuckerrohrsaft und chaufed Schoggi us lokale Kakaobohne zum d'Familie unterstütze. So guet wie schwiizer Schoggi isch si leider ned ^^ D'Lodge isch liecht erhöht glege, was mitem ganze Rucksack es bitz müehsam aber dank eusem Höhetraining guet machbar isch. A di füecht-heiss Luft müemer eus defür na gwöhne... Ja und nachem Zimmerbezug (gseht gmüetlich us) gits scho es sehr feins Zmittag. Am Namittag stoht en erste Bushwalk a. Debi entdeckemer d'Walking Trees, wo sich als weltwiit einzigi Bäum chönd bewege, und zwar bis zumene Meter pro Jahr. Denn findemer en usghöhlete Baum, wo als Fledermuushuus dient, probiered Chnoblibaum und trinked sehr erfrischends Wasser direkt gfiltered usemene Ast :) Eine vode wichtigste Bäum isch d'Asaipalme, wil die Frücht vo allne Tier gesse werded. Nachem Znacht miteme riese Buffet luegemer churz ide Bäum vode Lodge verbi und findet ganz vieli Tarantulas 🤭 Euses Team bestoht usem Guide Yajro, em Will us England, wo irgendwie ned sonen motivierte und liecht überforderete Idruck macht und emene Dütsche woni de Name ned weiss, wo es bitz schutzelig aber ganz lustig isch ^^
De zweiti Tag bestoht useme lange Walk dur de Dschungel, mal uf bessere und mal uf schlechtere Weg. Unterwegs essemer imene Refugio frisch zuebereiteds Zmittag und mached en Powernap. D'Witterigsbedingige bruched viel Energie... Am spötere Namittag treffemer im zweite Refugio i, womer mitere Art Luxuscamping übernachte werded. Nachem frische Znacht machemer eus namel uf Tiersuechi im Dunkle. Leider simer wenns um Tier goht hüt zimli erfolglos und so fühled sich di viele es bitz orientierigslose Kilometer vom ganze Tag nach na viel meh Distanz a aber halb so wild, schön und beidruckend isches ja :)
Au am dritte Tag gohts nacheme riichhaltige Zmorge zmitzt im Nirgendwo z'fuess los. Inere drüstündige Wanderig gohts zum Papageiefelse, womer d'Ussicht und d'Tier gnüssed und eus denn ufem Zruggweg uf zimliche Abwege dur de Wald schlönd. Das isch intressant aber astrenged, so dasmer froh sind womer zrugg ufem richtige Weg sind. Zrugg im Refugio gits Zmittag und denn heissts Rucksäck fülle und ab zum Fluss marschiere. E Stund spöter simer dete und baued euses eigne Floss, zum zrugg id Lodge cho. Zum Glück liit alles Material parat und de Yajro machts au ned s'erst mal, so dasmer bald (vo Sandflies verstoche) ufem Floss flussabwärts triibed und d'Rueh gnüssed :) Zrugg ide Lodge duureds na drü Stunde bis zum Znacht. Di erst verbringemer mitere chalte (öpis anders gits ned) Duschi und Bier trinke bim Ussichtspunkt, ide zweite produzieremer mit Hilf von Yajro eigni Fingerring us Same und di dritt Stund wird wider chillt. Nachem Esse machemer eus z'dritte es letsts Mal uf Tiersuechi (di andere zwei Touris hend scho zrugg müese) und siehe da, mir entdecked e Schlange 🤗 Nach dem Usflug gheiemer zimli erschöpft unter eusem Moskitonetz inen tüüfe gsunde Schlof :)
Viel z'früeh schelled de Wecker am sechsi am negste Morge zum packe und zmörgele, bevors zrugg id Zivilisation goht und vo dete us denn na id Pampas. D'Morgestimmig mit Nebel ufem Fluss isch genial 🥰Read more
BoliviaDepartamento de La PazVentana14°34’29” S 67°36’43” W
June 1, 2023 in Bolivia ⋅ ⛅ 27 °C
Wie akündet häts do im Dschungel ned soo viel Tier wie in Ecuador. Do werdemer denn wohl ide Pampas dütlich erfolgriicher si hoffi. S'eint oder ander hämer aber trotzdem entdeckt:
- Oropendola
- Capybara (Wasserschwein) uf de Afahrt mitem Kanu
- Howl Monkey ide Lodge
- Makao Papageil (blaue Rugge) ufem Obigwalk
- Eichhörndli ide Lodge
- Capuchin Monkey und Lionmonkey (am esse) in Lodgenöchi bim Wandere am zweite Tag
- Jungle Turkey bim Zmittag im Refugio
- Cricker Insect unterwegs
- Verschiedeni Frösch bide Nightwalks
- Verschiendsti Spinne. Die einte tödlicher als di andere...
- Baby Pukarara Schlange. Wow, die söll zimlich giftig sii und hängt eifach so ide Palme vode Lodge ume 😅
- Paraba Roja- (Papagei). Zu dem Felse chömeds go Nester baue und dementsprechend vieli sind au ume. Beidruckend 🥰
- Ameise und Termite so weit das Auge reicht, wobi vorallem di grosse Fireants beidrucked
- Glüehwürmli oder so öpis :)Read more
BoliviaEl BeniSan Pedro14°7’28” S 66°47’1” W
June 3, 2023 in Bolivia ⋅ ☀️ 30 °C
Nacheme churze Ufenthalt im Office gohts mitem Auto los. Am Flughafe (wo sehr improvisiert und chli schiint ^^) holemer na drü anderi Teilnehmer für eusi Gruppe ab. Mit Pia, Kristie und Andreas us Dütschland hämer s'Auto voll und fahred drü Stunde lang ufere holprige Baustellestross de Pampas entgege. Unterwegs entdeckemer Büffel, halbwildi Chüeh, Capibaras und es Fuultier 🤗 Schliessli bringt eus es Boot di letste zwei Kilometer bis direkt zum Camp. Und uf de Fahrt sind scho vieli Kaimane, Vögel und Schildkrotte z'gseh :) Ide Lodge werded Zimmer bezoge, wo sehr gross und miteme eigne Bad und warm Wasser usgstatted sind und denn gits Zmittag, was au do wider sehr fein isch. Wil vorem drü alli Tier na z'heiss hend zum sich bewege, legged au mir e Siesta i, bevors mitem Boot flussabwärts uf Affesuechi goht. Nebst es paar Howl Monkeys findemer vorallem di andere übliche Verdächtige wie Kaimane und Vögel nöcher am Wasser. Imene breitere Bereich häts denn es paar pinki Delphin, wasmer zerst usem Boot gnüssed und denn is Wasser gönd. Anschiinend vertriibed d'Delphin all Kaimane und Piranhas - hoffemer mal dass das stimmt wil am Ufer isch z.B. eine vo dene Kaimane am sünnele... D'Überwindig lohnt sich spötistens, wo nume öppe zwei Meter vor mir en Delphin uftaucht 🤗 Nach dem chline Abentür gohts wiiter flussabwärts und schliessli machemer Halt und probiered eus im Piranha fische. Ich bi di erst wo öpis fangt, es isch aber kein Piranha und au z'chli zum mitneh - janu, ha trotzdem freud :) Und churz druf laufts vorallem bide Manne recht guet, so dasmer bis am Schluss füf essbari Fisch hend. Ich schaffes au na zumene Piranha, aber typischerwiis nume emene chliine ^^ Wos afangt iidunkle machemer eus uf de Zruggweg und gnüssed unterwegs de Sunneuntergang 🥰 S'Znachtbuffet loht ned lang uf sich warte und nachher gohts zimli direkt na uf e nächtlichi Bootfahrt. Es lüchted eus vorallem massewiis Kaimanauge und ab und zue Vogelauge entgege :) Kaimanarte gits do zwei. Di schwarze werded bis sechs Meter gross, di wiesse "nur" öppe vier. Nebst de Tiersuechi isch d'Fahrt im Vollmond au sus super entspannt. Müed chömemer zrugg id Lodge und lönd eus es letsts Mal vode Dschungelgrüsch in Schlof singe :)
De letst Dschungeltag started wider miteme guete Zmorge, bevormer alles packed und namel uf e frieldichi Bootstour gönd. Dasmal isch s'Ziel Totechopfäffli finde und wenn möglich knuddle. Und siehe da, es klapped. Chum sichtemer di erst Familie, stiigeds uf s'Boot und womer denn na e Banane uspacked, wirds erst richtig genial mit Äffli wo uf eus umechlettered. S'gliche machemer au na binere zweite Familie. Das zellt defintiv zu mine Highlights vode ganze Reis bis jetz 🥰 Am Mittag simer zrugg ide Lodge, gnüssed es letsts Zmittag und verabschieded eus denn vode andere, wo na en Tag länger blibed. Bald höcklemer im Auto und sind ufem Zruggweg nach Rure. Was derf bi mir und enere lange Autofahrt ned fehle? Genau, es lüchtends Alarmlämpli und e offni Motorhuube. Lustigerwiis isches aber es bekannts Problem wo eifach glöst werde chan und so gohts schnell wiiter - Glück gha :) Nachher gohts problemlos bis is Dorf, womer na zwei Stunde Ziit hend, bis de Nachtbus nach La Paz fahrt, wo s'Office scho ohni froge für eus bueched hät - danke :) D'Ziit verbringemer mit Znacht esse und überlegge, wo mer eusi letste vier Täg in Bolivie wend verbringe. Schliessli einigemer eus mal uf e Unterkunft es bitz usserhalb vo La Paz, wo sehr ruhig und naturnöch söll si zum chli abefahre :) Ja und denn gohts los, wider miteme Tuktuk an Busterminal und vo dete imene halbguete Nachtbus uf de lang Zruggweg uf La Paz. Bi mim Sitz isch de Hebel zum de Sitz hintere lo kaputt, was d'Nacht ned unebedingt bequemer macht aber janu, gits. Und es hät keis WC, drum haltemer so öppe all zwei Stunde ^^Read more
BoliviaEl BeniSan Pedro14°7’28” S 66°47’1” W
June 3, 2023 in Bolivia ⋅ ☀️ 31 °C
D'Tierwelt do ide Pampas gliicht scho zimli dere z'Ecuador. Vorallem Vögel gsehmer zimlich di gliiche wie vor zwei Mönet und au Affe findemer kei neui - was mich überhaupt ned stört. Han au Freud a dene woni scho mal gseh han. Fuultier gits uf de Anefahrt au z'bestuune 🤭 Und Kaimane kenni au us Ecuador scho, do chömers aber au am Tag beobachte und es git dütlich meh. Wasi ned erwarted hett, sind di pinke Dephin au do une - segemer aber natürli ned nei :) Wases zuesätzlich git sind Capybaras und Schildkrotte :)Read more
BoliviaDepartamento de La PazMallasaMuela del Diablo16°35’27” S 68°4’11” W
June 5, 2023 in Bolivia ⋅ ☀️ 17 °C
Nach über 13 Stunde Busfahrt werdemer z'La Paz irgendwo usegschmisse. Mega erholt simer ned aber euses Programm hüt verlangt das au ned. Mir laufed mal los ide Hoffnig, irgendwo es Wlan z'finde und checke, ob sich eusi Unterkunft gmeldet hät, schiitered debi aber. Defür entdeckemer öpis ungsunds Zmorge ^^ Nachher nehmemer es Taxi zu eusem Campingplatz es bitzeli usserhalb vode Stadt. Dete acho, chömer euses Zimmer (also Tipi) bezieh und chilled denn bi schönstem Wetter und bester Ussicht zerst Mal ide Hängematte und halted namel es Nickerchen. Schliessli gohts los is Dorf für es klassisches Zmittag mit sehr sehr viel Fleisch... Nachher bringt eus en Minibus in richtig nöchgleges Valle de la Luna, wo mit sine spezielle Steiformatione söll besteche. Di letste paar Meter laufemer wilmer dringend no en Bancomat bruched. Debi chömemer au amene Töff- / Quad-Vermieter verbi und lönd eus (natürli uf Dänge vom Simon ^^) mal vom Agebot inspiriere. Ich bi no ned so überzügt vo dere Sach wil vieles denn uf so Gravelroads wär und das isch ned soo mini Welt. Entscheidemer spöter... S'Valle de la Luna isch für eus denn so halbe faszinierend wilmer in Uyuni s'gliche scho in gross gseh hend. Schön isches trotzdem und en verbiflügende Kolibri machts na bitz besser :) Z'fuess machemer eus uf de Zruggweg zum na es super feins Helado abstaube. Das gnüssemer, während mer es paar Locals bim Sunntignamittagfuessball zuelueged ^^ Schliessli bringt eus wider es Büsli zrugg i euses Dorf, womer i verschiedene Lädeli es paar Sache für s'Znacht posted und denn ufem Campingpatz währedem Iidunkle es Bierli gnüssed :) Nachere halbwarme Duschi gits Znacht: Joghurt mit Frücht. Perfekt für eusi vom Zmittag immerna recht volle und vorallem fleischbelastete Mäge ^^ Denn wirds scho chälter und mir kuschled eus unter di warm Bettdecki :) Mir hend eus übrigens für e Töfffahrt morn entschiede - ich bin ja mal gspannt 🙈
D'Nacht isch nume es bitzeli chüehl und super bequem und lang gsi. S'Zmorge gnüssemer wider bi beste Verhältnis, bevormer eus parat mached und uf s'Taxi warted, wo eus sött zum Töffheini bringe. D'Kommunikation mit ihm isch gester per Whatsapp meh schlecht als recht gsi und wo nach 30 min immerna keis Taxi uftaucht, entscheidemer eus für d'Variante selberorganisierte Minibus. Ich teile ihm das mit und er meint "aha, ich hett halt eui Adresse brucht". Zum Glück hani ihm de Name vode Unterkunft ned drü mal mitteilt... Egal, mir chömed amel a und es hät na zwei Töff für eus. Wie lang dasmer wend go, wüssemer aber immerna ned. Chunnt eigentli drufa, wie wohl dass ich mich fühle und das chani erst nach es bitz fahre beurteile. Es git d'Möglichkeit, zum en Teil fahre und denn entscheide, wie wiiter - tönt doch guet, machemer so :) Also Schutzkleider, Helm und Töff fasse und denn mal vor de Bürotüre es paar Meter fahre. Ich lerne erst jetz, wie schalte bimene Töff funktioniert und han no bitz müeh mit de Intuition aber eigentli gohts, mir chönd also los. Nach 20 min uf de asphaltiere Stross hani mi an Töff gwöhnt und bi parat für d'Gravelroad. Über die fahremer denn zum erste Ussichtspunkt mit perfekter Ussicht uf d'Stadt und s'Tal. Jetz müemer entscheide, wie wiiter und das fallt zu Gunste vode wiitere Strecki. Bedüted im Gsamte öppe 5 Stunde ufem Töff. Zerst fahremer ufe uf d'Hochebni, denn dete einigermasse flach alles am Illimani entgege und hinde wider 1'400 Höhemeter abe zrugg uf e asphaltierti Stross, wo eus i zum Teil recht höchem Tempo zrugg zum Usgangspunkt füehrt. Ich fühle mich tatsächlich zimli wohl (usser uf eim Abschnitt mit recht viel Sand ide Spure und denn, wenn irgendwelchi Hünd azspringe chömed) und han sogar ab und zue Ziit, zum d'Umgebig aluege währedem fahre ^^ Natürli stoppemer immer mal wider zum d'Ärm und Händ bitz entspanne und Umgebig gnüsse :) Nach tatsächlich öppe knapp füf Stunde simer zrugg und mini Händ denn durchus froh dases fertig isch. Sus hämer aber Spass gha - isch definitiv di richtig Entscheidig gsi zum di länger Rundi mache :) Was eus erst ufem Zruggweg so richtig bewusst wird: mir sind weder nacheme Füehreruswiis no nacheme normale Uswiis gfroged worde. Die Lüt wüssed also ned mal eusi Näme ^^ Dummerwiis hät hüt d'Heladería vo gester zue, drum gits halt es Stuck Schoggitorte - doof ^^ Zrugg i eusem Dorf isch wider Zuetate für s'Znacht zemechrömele agseit. Es git Rösti mit Speck, Zwieble und Spiegelei 🤩 Schmöckt ned ganz wie dehei aber isch sehr fein :) S'Bierli vorher derf natürli au ned fehle und zum de Obig usklinge lo, chillemer i eusem Tipi und lueged en Film. Dases immer am sibni scho dunkel und do au scho recht chalt isch, isch scho bitz müehsam...
Hani mal erwähnt, dasi ufem Zruggweg vode Pampas ade lingge Hand na vomene Wäspi gstoche worde bin? Hüt isch scho di ganz Hand recht agschwulle. Bitz müehsam aber isch amel gange zum Töff fahre, denn isches au ned allzu schlimm ^^
De negst Morge gnüssemer nachem Zmorge und packe namel ide Hängematte chillend und Sunne und Rueh tankend, bevors mitem Taxi zrugg is hektischere Zentrum goht. Mir checked wider im gliche Hotel i wie letst Mal und mached eus denn uf de Weg zum Busterminal, zum min Bus übermorn uf Cusco bueche. Klapped alles tiptop. Über en chline Seilbahnumweg und emene Zmittag höch über de Stadt glangemer id Touristestrosse und bueched en Tagesusflug zude Todesstross für morn. Als Belohnig gits es Kafi (heissi Schoggi) imene internationalere Lade. Schliesslich folgt na Souvenirshopping. Wie z'erwarte gebemer ganz viel Geld us, aber immerhin für sinnvolli Sache denkemer :) Es bitzeli schad: s'gfühlt einzige T-Shirt vom Huayna Potosí ide passende Grössi für de Simon söll erst morn wider gliefered werde aber denn hämer kei Ziit zums abhole. D'Ladebsitzer sind denn so lieb, dasmer scho mal zahled und sie s'T-Shirt morn eusem Toureabüter bringed sobalds achunnt - danke :) Denn isch scho fast wider Obig und Ziit für dusche und denn namel fein und gmüetlich go esse - natürli miteme Glas Wii. Als Abschluss folgt na en churze Bsuech im Pub, bevormer einigermasse ziitig is Bett gönd. Morn müemer immerhin scho am viertel ab sechsi ufsto!Read more
BoliviaDepartamento de La PazSacramento AltoSerrania Sacramento16°15’29” S 67°47’9” W
June 7, 2023 in Bolivia ⋅ ☁️ 18 °C
Als Abschluss und eis vode Highlights in Bolivie stoht hüt - am Simon sim letste Tag - d'Todesstross a. Bis 2007 und de neue Strass isch das di einzig Verbindig vo La Paz is Amazonasgebiet gsi. Hüt wird si na vo es paarne Locals als Zuefahrtsstross und vo vielne Touriste als Abfahrt mitem Velo gnutzt. Ich fühle mich am Morge leider ned guet, wetts aber trotzdem probiere und trette dementsprechend de Weg is Office und vo dete mitem Minibus und de Velos ufem Dach zude Laguna Estrellani a. Dete fassemer eusi Schutzchleider und s'Bike. Di meiste montiered das alles motiviert, während ich wege doch einigermasse starcher Übelkeit mitem Gedanke spiele, das ganze abzbreche. Letst mal woni das ufem Huayna Potosí überleit han, isches nachher guet cho und so entscheidi mi au jetz, zum mal de erst Teil in Agriff neh und denn wiiterluege. Zum eus as Bike gwöhne startemer d'Fahrt uf 4'650 müM und bringed di erste 1'000 Höhemeter mit faszinierende Gebirge um eus ume uf de neue Stross hinter eus :) Es goht würklich nume abwärts und isch dementsprechend gmüetlich 😎 Währedem fahre vergissi au mini Übelkeit recht guet. Jetz heissts Velos wider uf s'Dach lade wil es chunnt en recht lange Teil wos wider liecht astiegt. Erst nachher gohts los uf de richtige Todesstross. Beidruckend schlängled sich die grössteteils einspurig Schotterstross während knapp 30 Kilometer regelmässig ganzi 2'800 wiiteri Höhemeter s'Tal abwärts. Churz vor Abfahrt ischmer namel richtig schlecht aber jetz gibi nüme uf... Nach churzem Agwöhne fühli mi recht wohl bi dere holprige Sach (amel sicher wohler als ufem Töff ^^), bi aber trotzdem sehr gern eini vode hinterste. So chönnti wenn au immer nötig ahalte und niemer stresst vo hinde :) Stückli für Stückli lömer d'Schwerchraft ihri Arbet mache und erfahred bi verschiedene Stops Gschichte über d'Abschnitt und Unfäll vo do. A einere Stell häts erst grad en Hangrutsch geh, dete chömed grad nume Fuessgänger und Velos dure... D'Stops sind bitter nötig wil s'permanente Bremse goht ganz schön id Finger und Handglenk und au ab und zue richtig chöne d'Landschaft gnüsse isch super :) Nach knappe zwei Stunde erreichemer s'Ziel und chönd eus alli stolzi Überlebendi vode Todesstross nenne. Dass bis 2007 de ganz Verchehr, also au Büs und Lastwäge, die Stross meh oder weniger heil überstande hend, isch hüt unvorstellbar... Während de Guide über di wiit meh als 3'000 tödlich verunglückte Autofahrer und 49 tödlich verunglückte Velofahrer brichted, verschwind ich hinterem Hüttli und erledige, was sich scho de ganz Tag akündet hät. Immerhin häts gwarted bis jetz 🤢 Dankeme Tablettli us de Tourapothek überstohni di churz Fahrt bis zum Zmittagplatz problemlos und chume dete anstatt Buffetesse e Schüssle Frücht über - danke :) Denn hämer Ziit zum im Pool bade und dusche, mir nutzeds aber lieber zum uf de Liege chille und de anderne zueluege :) Schliessli gohts uf di rund drüstündig Zruggfahrt im Büsli - wasi grössteteils ohni Übelkeit übersto. Bin denn aber sehr froh, womer zrugg im Hotel sind und ich chan is Bett ligge. Das mitem T-Shirt hinterlegge hät ned ganz klapped wils hüt ned gliefered worde sind. Mir nehmed drum s'Geld zrugg. Gesse hani de ganz Tag nüt und dementsprechend chli sind d'Energiereserve jetz au... Eigentlich isches en geniale Tag gsi mit super Landschafte undere coole Velofahrt aber das mit dem chrank si trüebt d'Sicht halt chli... Ich entscheide schliesslich, ned wie planed morn morge sondern en Tag spöter uf Cusco wiiterreise. Es bitzeli Ziit ha zum erhole schaded sicher ned. Dank vollem Iisatz vom Receptionist klapped das mit de Umbuechig denn tatsächlich au - danke :)
Ide Nacht gohts mir besser, defür verwütschts de Simon au na - war zu befürchten... Für ihn ischs aber na doofer, wil i wenige Stunde wird er im Flugzüg zrugg id Schwiiz hocke. Am vieri lüted de Wecker und es heisst leider Abschied neh. Schön isches gsi! 🥰 Bi gspannt, wies wird wider elei...
Es paar Stunde spöter weissis: ned so lustig. So halbe chrank imene Hotelzimmer gammle womer vorher s'zweite gsi isch, macht kei Spass...
Es goht mer grundsätzlich grad es bitz besser, drum waagi mi id Stadt und sueche en Buechlade. Fündig wirdi ned. Entweder sinds zue oder gar ned ume 🤷🏻♀️ Zrugg im Hotel chilli uf e Liege ade frische Luft und befasse mi mal es bitz mit Cusco und Social Media ^^ Währenddesse merki, dass de Buch wider dümmer tuet und ich han wider kei Appetit meh. Es langed na für en churze Usflug zum T-Shirtlade, wo jetz s'gwünschte Stuck endlich acho isch, bevor d'Stimmig endgültig kipped. Di restlich Gschicht vom Obig verzelli ned detailliert, es beinhalted aber es Telefon id Heimat (sorry für d'Störig zmitzt ide Nacht...) und en Bsuech ide Farmacía direkt nebedem Hotel. Dete chumi anderi Medis über und tatsächlich beruhigt sich alles und ich chan einigermasse guet schlofe :)
D'Nacht zeigt sich recht guet und am Morge hani sogar hunger und isse s'ganze Zmorge. Do hani ja scho fast (würkli nume fast) wider Energie. Es folgt e Ziit im Hotel umegammelnd, bevori mi überwinde zum miteme Minibus (d'Reception erklärt, wele dasi am beste söll neh vo dene tuusige) gohts in Richtig vomene Park, woni mer es ruhigs Plätzli zum frischi Luft gnüsse und Blog schriibe erhoffe. De Bus findi, de Park isch aber entweder ned zuegänglich oder sus gschlosse. Wieso au immer en Park gschlosse isch... Jetz merki wie wenig Energie dasi han und sueche mer drum di negst Seilbahn womi wegtechnisch uf Umwege aber energietechnisch effizienter a mis negste Ziel, de Busterminal bringt. Unterwegs pösteli öpis chlises zum esse und mache amene andere grüene Plätzli Halt für mini Plän vo vorher :) Schliessli merki, wieni immer energieloser wirde und gange wiiter zum Busterminal. Ich reserviere für morn de Bus uf Cusco namel neu und hoffe, dasi mi dasmal chan dra halte. Leider wends mer mitem Priis ned entgege cho, au weni scho mal voll zahlt han - janu... Joa und churzi Ziit spöter bini erschöpft zrugg im Hotel, legge mi uf de Terrasse here und nicke i :) Nachher währedem gammle und Peru recherchiere chumi tatsächlich hunger uf öpis rechts z'esse über und mache mi uf zum Italiener nebeddra für en Teller Pasta. Devo esse magi nume so en Drittel aber bin scho recht glücklich über das, vorallem wili mi au nachher na guet fühle. Zrugg im Hotel folgt e längeri Packaktion. Es isch mal Ziit, zum alles us- und wider ordentlich iirume. Jetz mit Souvenir wirds platztechnisch ned eifacher 🙈 Selbstverständlich bini erfolgriich und chan beruhight wider früeh aneligge :)Read more
BoliviaDepartamento de La PazDesaguadero16°34’51” S 69°1’55” W
June 10, 2023 in Bolivia ⋅ ☀️ 15 °C
Danke Bolivie!
Die ganze vier Wuche (usser di erste Täg in Santa Cruz und di letste zwei chranke Täg in La Paz) sind eis grosses Highlight gsi. Unglaublich, wie viel Landschafte i so wenig Land passed 🤭
Nach Santa Cruz hämer mit Sucre e wunderschöni Hauptstadt gfunde, umgeh vo Hügel wo eigentlich sötted Nationalpärk si wemer si so aluegt. Es negsts Highlight sind di beidruckende Silbermine vo Potosí gsi, bevor in Tupiza überraschend roti Felse uftaucht sind. Dete isch di viertägig Tour dur s'südliche Gebirge gstarted. All paar Stund hät sich d'Landschaft gändered, es sind immer neui Lagune und Berggipfel uftaucht und ned z'vergesse sind natürlich di unzählige Lamas, Vicuñas und Strusse unterwegs. Als Abschluss hät di beidruckendi Salzwüesti vo Uyuni gwarted - unvergesslich! Denn ischs wiitergange uf Sajama, en ablegne verschlofne Ort, wo aber jedi Minute Areis wert gsi isch. D'Tagesusflüg uf über 5'000 Meter sind wunderschön gsi. Bis do here häts rund um d'Vulkän blubbered und gstunke, wasmer souverän ide Thermalbäder usgnutzt hend. Di zweit Hälfti vode Reis hät rund um La Paz stattgfunde. Zerst es paar ruhigi Täg am Titicacasee mit viel Sunne, Glace und Sicht uf d'Berge. Denn isch d'Bestiigig vom Huayna Potosí agstande, wo so fordernd wie au schön gsi isch und woni na lang stolz druf zruggluege wirde :) Schliesslich isches mal schnell 4'000 Meter abe in Dschungel und d'Pampas gange. Au das isch wider sehr beidruckend gsi mitere wahnsinnige Pflanze- und Tierwelt. S'Hightlight dete isch ganz klar s'Füettere vo frei lebende Totechopfäffli gsi 🥰 Zum tatsächliche Abschluss hend rund um La Paz mit de Töfftour und de Death Road namel zwei adrenalingladni Aktivitäte mit erholsamer Chillerziit ufem Campingplatz dezwüsched uf eus gwarted. Alles i allem hämer also sehr viel erlebt und gseh 🤗
Am Afang hani Angst gha dasmer als Team ned funktioniered, was aber überhaupt nie es Problem gsi isch :) Und au a das Spanisch do hani mi entweder sehr schnell gwöhnt oder d'Lüt hend abgseh vom erste Hotel sehr suuber gredt :)
Mini Empfehlig für Bolivie: unbedingt verbigo! Es isch es super Land, d'Lüüt mega offe und d'Kultur wird dankeme immerna sehr grosse Ateil vo Indigene au na sehr gross gschriebe, wasmer a jedem Egge gseht und gspürt 💃
Mir hend mitem Mai glaub au genau di perfekt Reiseziit verwütscht. Niederschlag hämer genau ufem Huayna Potosí zwei Stunde lang in Form vo Graupel und in La Paz zwei Stunde lang Rege gha - meh ned ☀️ Au isches nie würklich chalt gsi usser natürlich ide Nächt ide Berge aber au das söll ide andere Jahresziite na dütlich extremer si :)
Hasta pronto, Bolivia te espera! 😍Read more
PeruCuscoSacsaywamanPlaza de Armas Cusco13°30’60” S 71°58’44” W
June 11, 2023 in Peru ⋅ ⛅ 17 °C
D'Nacht isch unruhig, i gibe aber de Nervosität d'Schuld. Buchtechnisch fühli mi guet und das au no wo de Wecker schelled. Fertig packe, Taxi bstelle, Hostel in Cusco reserviere und ab die Post an Terminal! Usnahmswiis bini sogar mal z'früeh dra, das isch aber guet, so langeds na zum Snacks und es Zmorge organisiere :) Pünktlich 20 min nach de offizielle Abfahrtsziit startemer e theoretisch öppe 13 stündigi Busfahrt im no zimli leere Bus. Ich han widermal es guets Händli ide Sitzplatzwahl bewiese, chan nämli mini Lehne wider ned abela... Janu, hät ja grad na gnueg anderi freii Plätz :) I gnüsse di letste Blick uf La Paz abe, s'Chaos in El Alto und denn d'Sicht uf d'Berge und de Titicacasee. Nach 2.5 Stunde simer ade Grenze zu Peru und werded ufgfordered, eusi Frücht abzgeh. Hoffentli chömemer die zruggüber. Denn heissts usstiege und im Passbüro go ab- und wider amelde. Es wird i südamerikanischem Tempo gschaffed, also stömer recht lang ume. S'guete: mer chunnt in Kontakt mit de anderne Touris usem Bus und so ide Gruppe isch s'warte churzwiiliger. Wasmer no ned ahned: s'grosse Warte chunnt erst nachher zrugg im Bus. Anschiinend hät zerst grad de Verchehr, wo us Peru chunnt Vortritt, so dass mir namel einehalb Stunde müend warte bismer wiiter chönd - ups, das sind total gueti drü Stunde ade Grenze ^^ De weniger lustig Teil ade Sach isch, dass eusen Zmittaghalt jetz gstriche wird zum die einehalb Stunde wider irgendwie ufhole - zum Glück hani gester Obig und hüt morge na mini Snacks es bitzeli ufpoliert 🙈 De Kafihalt wo hett sölle am vieri passiere, loht uf sich warte bismer devo usgönd, dass au dä gstriche isch. Eigentlich chunnts ja ned drufa, wenn dasi achume aber han amel scho na gern e ungefähri Idee und ohni Internet und Google Maps isches schwer abzschätze. Bis am spötere Namittag beschäftigi mi mit es bitz Blog schriibe, useluege (ich entdecke Flamingos 🤗) und Podcast lose. Denn raffi mi sogar uf zum de E-Reader füreneh, mues aber feststelle daser kei Saft hät. Unlogisch, hanen doch gester na voll glade... So werded di letste vier Stunde nachem Sunneuntergang (wo dankenere Stund Ziitverschiebig gegenüber Bolivie jetz scho am halbi sechsi isch :/ ) sehr langwiirig. Zum schlofe bini z'wenig müed, jasse magi nüme, vom Podcast lose bruchi au mal e Pause und d'Sterne hani denn au mal gseh, au wenns wunderschön sind. Irgendwie goht d'Ziit ume und wieni öppe gschätzt han, simer churz nachem zähni, also nach 14 Stunde im Bus und ohni d'Möglichkeit zum Wasser und Ähnlichs nochefülle am Terminal in Cusco. Dete lönd sich d'Elisa us de französische Schwiiz und ich ines Taxi gheie und eus miteme Zwüschestop bimene Bancomat (ha bim ned existente Zmittaghalt au na kei peruanischi Sols chöne organisiere...) bi eusne jewiilige Hostels absetze. I bilde mer no gar kei Meinig zu mim, bin eifach froh dasi mini Nudelsuppe uf Vorrat debi han und no chan wärme und gnüsse, bevors ab in Masseschlag goht. Das hani fast vermisst 😂 Minere Gsundheit gohts hüt super, ha chöne esse wasi han wele und mi zu keim Ziitpunkt schlecht gfühlt :)
De erst Tag inere neue Stadt starti am liebste mitere Free Walking Tour. Ich verwache öppe mit de Sunne am sechsi und han dementsprechend na Ziit, zum umegammle, mitem Hostelbsitzer über Toure und so pläuderle und denn es Kafi sueche zum gmüetlich zmörgele bevor d'Tour started. Für s'eigne Zmorge bini no ned usgrüsted. Ide Stadt lauft scho einiges. Grund defür isch, dass am 24.6. (also i 13 Täg) s'Fiesta del Sol gfiired wird und das wird scho kompletti zwei Wuche im Vorus täglich gfiired, wils sus viel z'viel Lüt a eim Tag kanalisiert hetted. Anschiinened sind also au Peruaner guet im en Grund zum fiire finde 😂 Ich bin uf jede Fall perfekt pünktlich parat für d'Tour und folge em Guide ide chline Gruppe anen ruhige Platz. Dasmal gits leider ned so viel Fakte z'verzelle wil er redt so schnell, undütlich und abghackt, dasi selber nume en gfühlte Zehntel vode Informatione mitüberchume. Schad, aber chas geh. Uf jede Fall isch klar, dass Cusco d'Inkahauptstadt gsi isch und do alli Inkatrails herefüehred. Insgesamt gits 25'000 km Weg... Joa und denn weissi no, dass Peru sit 1824 unabhängig isch und zerst vo Mine, denn vom Fische und hüt hauptsächlich vom Tourismus lebt. Au na intressant isch, dass d'Sradt i wenige Jahre vo 50'000 und 500'000 Iwohner agwachse isch. Natürli chumi scho na anders es bitz mitüber aber hauptsächlich gnüssi di enge Strössli, Inkamuure, spanische Baute und feine Gschmäcker unterwegs. Uf engstem Ruum gits 13 Kathedrale z'beguetachte - ganz schön viel... Zum Abschluss stiigemer uf en Ussichtspunkt und kosted ufem Abeweg Ceviche. Us Ecuador kenni das als Fischsuppe, do isches aber ehner frische Fisch, wo übertriebe mit Zitrone und Zwieble gwürzt wird, was denn tatsächlich unerwarted fein isch :)
Nach de Tour schlenderi e Stund lang im Zickzack dur d'Strössli uf Nahrigssuechi und stelle am Schluss fest, dasi priistechnisch am gschiidste am Afang gesse hett. Ups, janu, wirds halt es bitz tüürer, isch immerna okey und super fein :) Nachher gangi uf Agency-Suechi zum mini negste Täg plane. Debi findi zerst e SIM-Charte miteme nette Verchäufer, womer denn grad au na en Kontakt für Toure git. Also besser gseit isches sini Familie und er lüted grad a. Ich mache so Züg ned gern am Telefon, isch doch viel eifacher vor Ort zum über alles rede aber ja, so kläremer das mitem Machu Picchu mal grob, si sött aber na Infos schicke. Währendi uf die warte, gangi für anderi Sache und meh Infos ine zuefälligi Agency und laufe dete erst öppe zwei Stunde spöter miteme volle Chopf und vielne Ideene wider use. Fix planed isch morn und de füftägig Salkantay Trek uf de Machu Picchu abem Mittwuch (hüt isch Sunntig). Sorry de andere Dame fürs ned beachte, hesch der mit de Infos z'viel Ziit lo 🤷🏻♀️ Mit dene Ideene und Plän freui mi jetz richtig uf di negste Täg und bi gspannt, obs mer überhaupt na go surfe langed bevori hei mues oder obs mer z'guet gfallt do. Nach jetzigem Ziitplan wirds scho fast knapp mit de denkte füf volle Täg am Strand - i wirdes gseh 🙈
Schliessli gits ufem Zruggweg bi Dämmerigstimmig es Stuck Torte und en Stop im Supermärt zum selber choche nachher. Ja und so verbringi de Rest vom Obig mit so ganz normale Alltagssache im Hostel und gange früeh go ligge. Merke di chline Energiereserve na und sött morn au einigermasse beziite ufsto :)
Trotz de schlechtere Tour muesi sege gfallts mer do recht guet. Es hät aber au sehr sehr viel Touris ume und isch dementsprechend sehr europäisch 🙈Read more
PeruCuscoOllantaytambo13°15’26” S 72°16’1” W
June 12, 2023 in Peru ⋅ ⛅ 17 °C
Hüt stoht e Tour is Valle Sagrado, s'heilige Tal a, wo verschiedensti Stops hauptsächlich bi Inkastädt gmacht werded. Benennt isch s'Tal tatsächlich nachem Fluss wo dur de Hauptort Urubamba dureflüsst. De Tommy us de Agency hät gmeint ich wirde am peruanische 6.30 vorem Hostel ufglade. Umso überraschter bini, woni tatsächlich überpünktlich abgholt wirde. Liit wohl dra dasi ned im Zentrum wohne und drum als ersts dra chume. Eusi Zwölfergruppe bestoht hauptsächlich us Südamerikaner i ihrne normale Ferie. Zum Glück isch na ein Engländer mit wenig Spanischkenntnis debi, sus wär de ganz Tag vermuetlich usschlüsslich in Spanisch und jetz mit beidne Sproche chani perfekt lerne :)
Nachere neblige Afahrt isch de erst Stop bimere kunsthandwerkliche Stofflade in Chinchero. Dete wird eus erklärt, wie hauptsächlich us Alpaka und Schofwulle farbigi Stöffer und Kleider entstönd. Natürlich lauft wider alles mit natürliche Ressource. Eigentlich wär Vicuñawulle na viel flauschiger. Wil die Tier aber nume wild lebed, isches au viel tüürer. Und Lama isch ned ganz so fluffig wie alli andere.
Nume wenigi Fahrminute entfernt treffemer ebefalls in Chinchero uf di erst historisch Inkastädt und erfahred es bitz öpis über de Ufbau vom Ort. Ganz obe isch de Teil für di religiöse Aktivitäte, grad unedra de grossi Festplatz und na wiiter une d'Terrasse für d'Landwirtschaft. Apflanzt sind vorallem Quinoa und Härdöpfel worde.
Au allgemeini Infos zude Inkas gits. So hend ide Ziit vor de Spanier ab ca. 1250 bis 1572 total 13 Inkas gherrscht, wobi de Pachacútec vo 1438 bis 1471 de wichtigst gsi isch. Uf ihm sini Ziit sind alli grosse Ort rund um Cusco wie z.B. au de Machu Picchu zruggzfüehre.
Mitem Büsli gohts wiiter zum Muray, enere andere Inkaruine. Uf dütsch übersetzt heisst das tüüfe Kreis und es wird schnell klar wieso. Gemäss Forschige sölled uf dene verschiedene Terrasse dank de unterschiedliche Temperature verschiedeni Experiment rund um d'Landwirtschaft stattgfunde ha. Umgeh vode steile Hügeli söll es tribhusähnlichs Klima gherrscht ha bide Terrasse une.
Im herzige Städtli Maras machemer de negst churz Halt imene Salzlädeli, womer verschiedeni Salz chönd probiere und natürli au chaufe. I beherrsche mi wiiterhin souverän 💪
De Grund für de letst Halt zeigt sich jetz am negste Ort, de Salzpools Marasal. Imene ufwändige Terrassesystem hend d'Inkas über 3'500 Pools zur Salzgwünnig usem salzhaltige Flusswasser i dem Tal baue. En Pool brucht öppe 20 - 25 Täg zum uströchne. Debi entstönd drü Schichte Salz. Ganz obe s'wiesse wege de Sunne, ide Mitti s'pinke wegem rote Gstei ide Poolwänd und une es bitz brünlichs wegem Bode.
Aschlüssend fahremer zwei Dörfer wiiter für es Zmittagbuffet. Speziell Freud hani am grosse Salatbuffet - endlich mal öpis gsunds :)
De erst Halt nach de Stärchig isch e wiiteri Inkastädt, wo sich Ollantaytambo oder uf Dütsch Rastplatz nennt. Au das isch en multifunktionale Ort gsi mitem Sunnetempel ganz obe, wo am 21.6. jewiils d'Sunne frontal drufschiint. De Ort isch vorem Ifall vode Spanier ned fertig baue worde, was dur umenandliggendi Stei dütlich wird.
Jetz folgt e längeri Fahrt zude letste Inkastädt vo Pisaqa. Flächemässig isch das de grössti Ort womer hüt bsueched und bestoht nebst de ladwirtschaftlich gnutzte 104 Terrasse, em religiöse Teil und drü Ortsteil au useme Friedhof, was für Inkas ungwöhlich isch. Leider sind d'Gräber wege de Grabbiilage usgraubt worde und nume d'Löcher ide Wand übrig. Gold und Silber hend für d'Inkas übrigens kein Wert gha usser ihrere Bedütig für Sunne und Mond.
Im Dorf selber folgt denn de letst Halt vo hüt und zwar imere Silber- und Steischmucklade, womer au id Herstellig chönd driluege. Wahnsinnig, mit wie viel Geduld d'Stei i di passend Form gschliffe werded... Jetz chan au ich de Versuechig nüme widersto und sueche mer bezahlbari Ohrering us 😇
In kompletter Dunkelheit gohts uf de Zruggweg. De ganzi Tag isch übrigens sehr touristisch gsi. A jedem vo dene Ort hend sich unzähligi Touris türmt... Zum Teil isches fast es bitzeli zu extrem gsi aber das schiint gemäss Guide do normal z'si und i mues mi wohl dra gwöhne. Zrugg ide Stadt gangi mit de Liz us Mexiko na öpis z'Nacht go sueche. Dankem Mittagsbuffet hämer beidi kein riesige Hunger und finded es Lokal mit passende Vorspiese. Sie verzellt, warum Mexiko es guets Reiseland söll si und ich froge mich, warum dases bi eus (oder amel mindestens bi mir) ned bekannter isch. Tönt nämlich grundsätzlich na cheibe guet und abwechsligsriich. S'einzig Problem gsehni im Akzent - han recht müeh mit ihrem Spanisch ^^ Zrugg im Hostel ziehts mi nach dem beidruckende Tag uf de Spure vode Inkas zimli direkt is Bett. Morn schälled de Wecker immerhin scho vorem vieri 😊😅
Übrigens: Di peruanische Note fühled sich a wie Spielzüggeld wo jederziit chönnt riesse oder in Füür ufgo 😂Read more
PeruCuscoSacsaywamanPlaza de Armas Cusco13°31’12” S 71°58’42” W
June 13, 2023 in Peru ⋅ ☁️ 15 °C
Pünktlich bini parat zum zwüsched vieri und füfi abgholt werde für e Wanderig zude 7 Lagunas. Wo am viertel ab füfi immerna nimer ume isch, lüti am Tommy us de Agency a. Er isch überrascht dasi parat bin wili ihm anschiinend nie bestätigt han dasi d'Tour würklich wett mache. Was bruchts denn meh als "ja, bitte gern reserviere" und "👍" nachdem er mer all Infos gschickt hät?! Bi zimli hässig, vorallem wili jetz für nix so früeh ufgstande bin und au ewigs gwarted han. En Kommunikationsfehler chas ja mal geh aber isch halt kacke jetz. I probiere mi z'beruhige und ligge denn namel ane. Tatsächlich schlofi irgendwenn i und verwache erst am nüni wider - perfekt zum am zähni namel e Free Walking Tour bueche. Ide Stadt isch au hüt wider Tanz und Musig im Gang und i wür gern länger als füf Minute zueluege aber d'Tour warted ned :) Als einzigi anderi Teilnehmerinne sind zwei Amerikanerinne debi, wo sich als super lieb usestelled. De Jair, eusen Guide, isch viel besser als dä vor zwei Täg. Nach füf Minute weissi scho meh Gschichte über d'Stadt und d'Inkas als letst Mal nach 2.5 Stunde 🙈 Di prägendste Infos:
- Inka isch es Wort vode Spanier und bedüted "Herrscher". D'Inka hend sich selber "Quechua" gnennt, so heisst au ihri Sproch wo bis hüt gredt wird und s'Gebirge um Cusco. De Jair zieht das denn au während de ganze Tour dure mit Quechua anstatt Inka :)
- De Originalname vo Cusco isch Qosqo, was in Quechua "Mitte der Welt" bedüted, was de Ort für d'Quechua au gsi isch
- Heiligi Tier sind de Kondor, Puma und d'Schlange gsi. Vorallem das mit de Schlange hät zu Riibige mit de Spanier gfüehrt, wil im Katholismus d'Schlange öppe s'Gegeteil bedüted
- Öppe 50 cm unterem gsamte Zentrum befindet sich d'Muure vode Quechuabaute. Sie chömed bi Strossesanirrige und so immer mal wider zum Vorschii
- 1650 und 1950 häts grossi Erdbebe geh, wo mit Usnahm vode Quechuamuure zimli viel vode Stadt zerstört worde isch
- Menscheopfer (Chind & Jugendlichi) sind normal gsi und e Ehr für d'Familie. De Glaube as Lebe nachem Tod hät ghulfe debi
- Oberirdisch sind nume na wenigi Quechuamuure übrig, wo aber viel zude Gschicht und Kultur priisgebed. Wie die riesige Stei usem 25 km entferte Vulkangebiet uf Cusco cho sind, isch bis hüt unklar. E neui Theorie mit bestechende Argument beseit, dass s'Gstei verflüssigt, in chline Portione transportiert und denn z'Cusco wider in Forme gosse worde isch. Das wür au d'Passgnauigkeit erkläre. Zwüsched de einzelne Stei isch kei Zement oder so verwendet worde...
- Ise hät mer ned kennt. Vulkanstei sind mit härterem Meteoritegstei bearbeitet worde
Im letste Teil git eus de Jair Tips, wo dasmer di beste Alpakawullesouvenir, Gmäld, Drinks und Restaurants finded - tönt alles guet :) Zum Abschluss höcklemer eus ines Resti mit perfekter Ussicht über d'Stadt und trinked en Maraguya Sour, wo ähnlich isch wie de lokal Pisac Sour aber anschiinend besser. Und er isch würklich fein aber au gföhrlich süess ^^ Schliesslich verabschided sich de Jair und mir gmüsseds na es bitz. Denn gohts in nöchglegne lokale Märt Muki für s'Zmittag. Wili s'Zmorge meh oder weniger übersprunge han, hani jetz en Mordshunger. Währedem esse spricht eus en zuezüglete Local a und git na es paar Tips - danke! Leider meinter au, dasmer südlich vo Lima ned so guet chan surfe, was ja eigentlich mini Idee gsi wär. Mal gugge. Schliessli trenni mi vode andere zwei und spaziere uf Umwege zu minere Agency. Wetts morn namel probiere mit de 7 Lagunas. Ufem Zruggweg id Unterkunft suechi mer na e neui Sunnebrülle. Di ander hani anschiinend irgendwo (kei Ahnig wo) ligge lo.... Zrugg im Hostel packi alles für morn, denn muesi nachher nüm wenn d'Lüt scho halbe schlofed und scho gar ned morn morge früeh und gönne mer e langi Duschi. Denn ziehts mi währedem Iidunkle in Mercado San Pedro, de grössti lokali Märt. Dete gönni mer en riese Fruchtsaft und lo mi vo Snacks und Schmuck verfüehre 😇 Aschlüssend spazieri zum Hauptplatz, luege dete de Tanzgruppe bim probe zue, gange ines Kafi e heissi Schoggi (wo ned guet isch) und es Stuck Torte (wo sehr guet isch) go schneugge, lise es bitzeli ade Wärmi und bequeme mi denn zrugg is Hostel. Scho am nüni bini bettfertig, was au guet isch wils ja morn wider früeh ufsto heisst. Direkt schlofe tueni ned, sondern luege na Videos über de Sankantaytrek zum mi uf di negste Täg vorbereite :)Read more
