August 2017
  • Day184

    Hola Schwiiz, hola Winterhur

    January 31, 2018 in Switzerland ⋅ ⛅ 7 °C

    Nach em ne knapp 11stündige Flug, si mr wedr ir Schwiiz glandet. Ungloublich wie schnäu me zrugg isch u am ne völlig andere Ort. Vo Familie u Fründe si mr in Empfang gnah worde u heis gnosse, aui wedr chöne zUmarme. U ez gahts wedr as Iläbe diheime... Wösche, Poscht dureakere, Wohnig iruume und und und... Aber das aues ganz tranquilo 😊
    Esch e ungloublichi schlniZit gs, wo me hei dörfe erläbe u wärde na lang devo verzöue u devo tröime! Gott het üs riich beschänkt u vorauem beschötzt!
    Danke fürs mitverfolge. U wenn dr meh wöit ghöre u gseh, de dörf me
    üs gärn ilade 😉 Mer freue üs üch aui bald emal wedr dörfe zgseh. U ned vergässe, am Samstig isch Offni Türe bi üs vo 14.00-18.00.

    The End.... oder doch de Afang? 🤔
    Read more

  • Explore, what other travelers do in:
  • Day183

    Flughafe San José ...

    January 30, 2018 in Costa Rica ⋅ ☀️ 23 °C

    Boa, tatsächlich nimmt ou üsi Reis es Änd. Komischs Gfühl zwösse, dass mr i biz meh wie 15 Stund wedr ide Schwiz sei...
    Mit üsem Pick Up si mr die letschte Höhemeter u Kurvene gfahre u heis zum Glöck problemlos wedr chöne abgäh! Dur de Stau si mr ez schliesslich am Flughafe glandet u warted ez, bis mr chöi ichegge...

    Emau na es riise Dankeschön a aui, wo üsi Reis im Blog mitverfolgt hei u immer mou wedr in Gedanke u im Gebät bi üs gsi sei!
    Read more

  • Day182

    gli Back Home...

    January 29, 2018 in Costa Rica ⋅ 🌙 17 °C

    Wow, scho si die 6 Mönet reise gli ume. Nöchste Mittwuch, 31.1. am 14.50 sötte mr mit de LX8037 vo San Jose mit Edelwis in Züri acho.

    Und will mr üch aui möglichscht schnäu wedr möchted gseh, si üsi Türe ade Thurgauerstrasse am Samstig, 3. Februar vo 14.00-18.00 offe, um e feine Kaffi ztinke u paar Guetzli zässe! Mer freue üs, üch bald wedr chöne z’umarme u bruche üch, um üs biz öber sbrüelende Aug ztröschte... 😉Read more

  • Day178

    Finca LiL Capi Costa Rica

    January 25, 2018 in Costa Rica ⋅ ⛅ 24 °C

    U scho si mr am letschte Ort vo üsere 6 monatige Reis acho. Mer si ez uf de Finca vo Licht in Lateinamerika, wo de Töse vor 15 Jahr e Jahresisatz gmacht het. Für de Töse scho fascht biz es heicho ine vertrauti Umgäbig. Da dörfe mr es schöns Gästehuus bewohne u da und döt biz mithälfe, aber ou eifach dUmgäbig uskundschafte u dHängatte gnüsse. De Gedanke, dass mr i weniger aus e Wuche heireise, stimmt üs freudig ufs Wiederseh, aber ou biz truurig, dass die wärtvoll Zit scho bald verbi isch. Drum gnüsse mr die Täg da umso meh 😉Read more

  • Day175

    Bahia Drake

    January 22, 2018 in Costa Rica ⋅ ☀️ 23 °C

    Nachere witere rumplige Autofahrt dur Schlamm u 6 Flüss si mr heil ar Pazifikküste da uf de Halbinsle Osa acho. Bahia Drake esches ruhigs Fläckli, zimli vo Urwald umgäh. Da huuse mr wedr mou im ne Zäut u lose de Urwaldgrüsch ide Nacht zue. Da hei mr ez ou ändli mou e Nightwalk gmacht. Mit em ne Guide si mr im Dunkle i Waud ine u hei Insekte, Spinne, Frösch, Eidechsli, Ameise, Schlange u anders gfunde. Sehr interessant, wenn ou zwöschedure biz „gfürchig“ gsi! U de hei mr üsi letschti Schnorcheltour uf üsere Reis gmacht zur Insle Caño. Da hei mr namau e Hai, Schildchrote u e Huufe Fisch dörfe bestuune.
    Das esch ez üse letschti Ort gsi, bevor mr na für ei Wuche u dFinca vo LiL göi. Ungloublich wie schnäu die Zit doch plötzli vergaht...
    Read more

  • Day173

    Reserva Indigena Guaymí de Osa

    January 20, 2018 in Costa Rica ⋅ 🌬 10 °C

    Uf de Halbinsle Osa hei mr dörfe es Indianerreservat vo de Guaymí ga bsueche. DSchwiizerin Daniela wohnt döte mit ihrem indigene Ehema Esteban u ihrne drü Chind. Mer hei zwöi Täg biz is Läbe vo ihne dörfe ineluege. Sehr spannend u erläbnisriich gsi, es biz vom ne indigene Läbe mitzbecho.

  • Day170

    Uvita -Bahia Ballena

    January 17, 2018 in Costa Rica ⋅ ☀️ 26 °C

    Uvita esch es chlises Dörfli, wo ned sehr touristisch isch. Da hei mr im ne schöne Hostel, umgäh vo Wald dörfe pfuuse. Mer hei üs namau ufe Wal-Delfin-Schnorchel-Tour begäh. Dasmal hei mr leider dWale ned gfunde, deför si etlichi Delfine vor üs umegschwumme u umegumped u bim Schnorchle hei mr vöu grossi u chlini Fisch, Seeigel, Seestärne u grossi Muschle dörfe gseh. Üs het die Unterwasserwäut ufs neue packt. Gottes Gschöpf si eifach soo kreativ!Read more

  • Day168

    Quepos - kei Bsuech Manuel Antonio

    January 15, 2018 in Costa Rica ⋅ ☀️ 20 °C

    Am Morge früeh si mr in Malpais ufbroche zum uf dFähri zfahre. Doch paar Schlaglöcher witer si mr inere Kolonne vo Autos gstande. dLüt hei gstreikt u e grossi Strasseblockade gmacht, wöu si e besseri Strass wöi. Verständlich! Für üs het das gheisse me wie e Stund zwarte, im Schatte vom Auto zsitze u aues mit de Rueh znäh. Natürli hei mr de die planti Fähre verpasst u hei 2.5 Stund uf die nöchsti müesse warte. Nach de stündige Überfahrt esches ändli mal biz vorwärts gange, bis mr wäge Strassearbeite 25min wedr hei müsse warte. Si mr froh gsi, wo mr bi üsem Guesthouse acho sei. Am nöchste Tag hei mr wele i Nationalpark gah. Doch scho bim Anefahre churz nach de 7 ni hei mr hider u vor üs etlichi Autos gha. Wo mr de bim Igang dAstahschlange gseh hei, het de Töse an Turnaround gmacht. De Massetourismus esch nüt für üs... Mr hei de Tag de schliesslich gmüetlich a verschiedene Stränd verbracht.Read more

  • Day167

    Santa Teresa - Malpaís

    January 14, 2018 in Costa Rica ⋅ ☀️ 21 °C

    Über mehreri Flussdurchquerige u unzählige Schlaglöcher si mr uf Sante Teresa gfahre u hei ändlich e Camping-Platz gfunde, wo mr zu mindest ufem Parkplatz hei chöne pfuuse u trotzdäm Sicht ufs Meer gha hei. Mit zwöi Luftmatzatze ufe de Ladeflächi vo üsem PickUp hei mr e bequemi Nacht underem freie Himmu gha 😂 Lustig zum Beobachte esch gsi, wie Iheimischi-Tico-Familie ihre ganz Huushalt zum Campe mitgnah hei. Vo Chüelschrank u Gfrüüri öber Elektrohärd u rechtigi Matratzene esch aues debi gsi. U die rundliche Mamas de ganz Tag ide „Chuchi“ am wärchle u am uf dZält ufpasse😉 Mer hei de Strand gnosse u eifach usgspannt.
    Die zwöit Nacht hei mrs wedr biz komfortabler gha im me schöne Hotel mit gmüetlichem Pool in Malpaís. So hei mr die letschte zwöi Täg uf de Halbinsle Nicoya gnosse.
    Read more