Üsi Australiäreis 22/23

Mir heis gschafft!!!! 😃

Nach 4 Täg, 3 Hüttenä u 48 Kilometer si mir zwar pflotschnass, aber überglücklich im Ziu aacho. Pflotschnass aber nid nur total verschwitzt, sondern meh wüus dr ganz Tag grägnet het 😅😂

Tag 1, 2.5 Stung, 4km
Nach dr erläbsnisriichä Bootstour, hei mir nid öbbä schön im Trochenä chönnä abem Boot gah, nei mir hei iz Iischautä Wasser dörfä u a Strand loufä. Aber so schlimm isches ja nid gsi, mir si ja dankem Rägä u dä Wäuä wo ufz Boot gsprützt het eh scho nass gsi 😅. Vo dert us isches när z Fuess wiiter gangä zur 1. Hüttä (Surveyors), wo mir nachemnä wunderschönä Sunnäungergang dr Tag 1 hei lah abklingä.

Tag 2, 4 Stung, 11km
Obwouh mir z Zimmer nu mit 6 angernä, wiudfremdä Lüüt hei müessä teilä, hei mir doch ä rächt aagnähmi Nacht gha (auso ämu ii, dr Christian chöit dir säuber fragä 😉) Nachemnä Kaffee si mir o scho wiiter marschiert. Mir hei grad äs paar Wallabies gseh hüt u o süsch isches sehr aagnähm gsi zum loufä. Gägä Mittag si mir de scho ir nöiä Hüttä (Munro) aacho u hei dert d Ussicht gnossä, ämu sowit wis gangä isch bi däm Wind 🙈

Tag 3, 7 Stung, 19km
Hüt si mir richtig Cape Pillar usägloffä. Vom Wätter har hei mir hüt mega schwein gha, äs isch zwar rächt früsch, aber drfür schiint d Sunnä. Däm seit mä perfekts Wanderwätter. Vorem Cape Pillar si mir zersch nu ufä Blade, vo dert us het mä super Ussicht ufä Cape Pillar überä. Aber mä mues definitiv Schwindelfrei si für dert ufä, äs isch rächt schmal u links u rächts geiz vou z Loch abä. Drfür het mä ufem Cape Pillar säuber schön Platz, dass mir dert hei chönnä zmittag ässä. När si mir wieder zrüg zur Munro Hüttä u vo dert us wiiter zur hütigä Hüttä, dr Retakunna Hüttä. Dert hets o wieder viu Wallabies umä gha u mir hei nä vom Liegistueh us chönnä zuäluegä. Perfekt zum dä sträng Tag lah usklingä.

Tag 4, 6 Stung, 14 km
Bim Ufstah het z Wätter nu super usgseh, mir hei ä wunderschönä Sunnäufgang dörfä gniessä. Nur leider het dr Rägä nid lang uf sich lah wartä, drum si mir gliich bi Zytä wieder abgloffä. Bis mir ufem Mount Fortescue dobä gsi si, isch dr Näbu ufzogä u mir hei überhoupt nüd vor Ussicht gha. U wägem Rägä hei mir leider gar nid viu vor Umgäbig mitbecho. Mir hei aber Glück gha u d Sunnä het äs paar Minutä fürägluegt wo mir ufem Cape Hauy gsi si. Aber leider zwenig, dass mir gliich nid richtig hei chönnä tröchnä. U vo dert aa hets när so richtig afä aahänkä. Aber nach 2 wiiterä Stung hei mirs äntlich iz Ziu gschafft, wo dr Bus uf üs gwartet het, wo üs uf Port Arthur gfahrä het.

Aues i auem isches äs unvergässlichs Erläbnis gsi wo mir sofort wieder würdä machä.

Das isch mau ä churzi Zämäfassig vo denä 4 Täg, we dir nu meh weit erfahrä oder nu meh Föteli weit gseh, sit dir de mau zumänä Kaffee bi üs iigladä sobaud mir wieder daheimä si 😉Leia mais