Ladākh

Nacheme kurze Schreckmoment vorem Zmorge womer gmeint hei dases nume Porridge het, si de die biz ize beste Chapati vom Trek ufem Buffet gstande (z'erschte mal dases überhoupt Uswahl zwüsche 2 Sache gä het) . Womer üsi Sache zämepackt hei gha si mer losgloffe. Direkt vom Zeltplatz isch de Weg steil deruf zum 2 Pass vom Trek gange. Obwohl ou mir richtig langsam si gloffe heimer zimlich viu Lüt wo vor üs gestartet si wider überholt. Nach üsere 2 Trinkpouse (es het alli 30min e Trinkpouse gä) sis de no 600m gsi und mir hei ghofft dases üs in 30min längt. Mir si sogar viu schneller gsi und heis in 20min ufegschafft 💪😂.
Vom Pass us heimer de ou de Gletscher gseh womer gester hei versucht zfinde aber dä wär no sehr viu witer gsi und mir si froh gsi dasmers denn nid länger versucht hei.
Es paar Fotos und e kurzi Pouse später isches denn no viu steiler uf de andere Site wider abegange. Nach de erste 800 Höhemeter bergab heimer e Schlucht erreicht wo de Weg am Fluss entlang isch witer gange. Insgesamt heimer dä denn ou 25x überquert bis uf 1 Fuess vo de Meret isch ou alles trocke blibe.
Churz vor Chogdo heimer de d "Strass" erreicht und wenn mir üs richtig informiert hätte wär üs ou klar worde das die meiste Lüt hie ihre Trek beende. Für üs isches hüt aber no 5km witer uf Shang Sumdo gange wo mir nacheme Homestay gsuecht hei. Bevor das mir öpper troffe hei, heimer no ds Huus gfötelet wo am meiste abecho usgseht im ganze Dorf und kei 3min später simer de i genau das Huus inegloffe wöus üses Homestay für die lezti Nacht isch 😂 ou vo inne gsehts meh us wie e Stall und schmöckt ou dementsprechend aber immerhin isch ds WC im Huus das wär bim andere nid gsi.

Und mir hei no dänkt dasmer vo hie us villicht dem Typ us Leh chöi schribe wenns WLAN het. Immerhin isches uf de Karte e wissi Strass und nid nur es gstrichlets Wägli wo zu dem Dorf führt. Am Namitag wirds ämu nüt mit däm mau luege wies de Usgseht wenns am Abe Strom het...

Nachtrag 1:
Ganz lieb dänkt heimer zum Znacht e Teller mit rohe Gurke, Zwiebele und Tomate übercho und scho wo sis abgleit het heimer üs alli agluegt und hei üses Lache nume knapp chönne unterdrücke womer üsi Gsichtsusdrück gseh hei. (me mues villicht wüsse dasmer sehr schnell lache und vor lache gränne mir schiebes eifach uf d Höchi und d Müdigkeit) mir hei üs aber zu schlecht gfüehlt das alles la zstah und drum het sich d Noémie uf d Serviette gstürzt grad womer wider allei si gsi. Si het se wiso ou immer hinter ihrem Rügge versteckt grad I däm Moment wo d Bsetzerin wider us de Kuchi isch zrügg cho und direkt dört häre isch gloffe wo d Serviette si gsi. Während sicher fasch 5min het si gsuecht und gsuecht bis die ganzi Familie im Esszimmer isch gsi und gluegt het wo die Serviette si. Mir si eifach dört ghocket und hei nümme chönne ässe so fest heimer müesse lache. Zum Glück isch aber de Fernseh gloffe mit Kinderwerbig uf Indisch und d Meret het immer wider uf das zeigt wo üsi Lachafäll zu stark si worde 🤣
Womer de wider allei si gsi heimer ds Gmües I de Serviette la verschwinde und nach de Chapatis vor es paar Täg het ds Buuchtäschli vor Noémie hüt derzue dient das la z verschwinde ohni dases öpper merkt.
Und immerhin hei mir ou während em restliche Znacht immer wider Lachafäll gha dases nid all zu uffällig isch gsi dasmer glachet hei wo si d Serviette gsuecht hei 🤭
Me chönnt ou säge mir hei chli de Blöd...

Nachtrag 2: Gester am Abe hets im Camp e Israeli gha wo ahnschinend d Höchi nid so guet vertreit het und die andere vo sire Gruppe hei versuecht es Ross z organisiere wo ne abe bringt. Mir hei denn eigentlich gmeint gha er isch wider weg aber hüt bim Zmorge hei mir ihn plötzlich wider gseh und er isch immer no wie es hüffeli Elend uf en Stuhl ghocket aber ize hets würk Lüt gha wo es Ross und e Tragi parat hei gmacht.
Während em ufeloufe uf de Pass heimer de plötzlich vo hinge es Ross ghört und si hei sich tatsächlich entschide ihn no uf de Pass zbringe 🤦‍♀️ Dobe auso nomal 400 Höhemeter höcher als was er vorher isch gsi hei si ne de abgesetzt und ds Ross isch wider de glich Wäg abe is Camp und er isch zersch 20min dört blibe 🤦‍♀️ bevor daser mit Saurstoff isch abegloffe. Mir hei ihn de relativ schnell überholt gha und denn nüt meh vo ihm gseh. Grad nachem Zmittag hets aber 2 Helikopter gha wo es paar mal über üs gfloge si und mir hei zum Spass no gseit gha dases villicht für ihn isch aber nid würk ernst wöu wiso brücht er 2 Helis. Womer de uf de Strass si acho het aber de ou no e Ambulanz dört gewartet und eine vo sire Gruppe und da heimer scho würk dänkt gha das die für ihn das si.
Bim Znacht si denn ou no Nachrichte im Fernseh cho und plötzlich hei mir Israeli ghört und denn isch tatsächlich es Foto vo ihm im Helikopter und denn eis am posiere mit de Crew in Leh. Dä vo üsem Homestay het de ou gseit dases vo hüt isch aber denn si die 2 Helikopter wou glich würk für ihn gsi 🤔Read more