Veragalle Point

In Mirissa acho, het üs ir Unterkunft scho de Yännu begrüesst. Mir hei üs mega gfreut, nach so langer Zit ändlech mau wieder es vertrouts Gsicht z’gseh. Leider isch mit ihm aber o grad z’schlechte Wetter cho. A däm Tag isches zwar zum Glück no einigermasse guet gsi und mir si de ganz Nami am Strand gsi, hei ab und zue chli Spieli gspiut (ändlech mau wieder chli Härdöpfele) und es paar Bierli und Mojitos trunke! Am Abe simer ines geils Resti ga z’Nacht esse und hei dert nomau chli gspiut, si aber recht früeh ga schlafe wüu de Ätti (yännu) uf sim Flug nidso viu het gschlafe. Ufem Weg iz Resti isch de Sacha leider no ufere Stäge usgrütscht, wüus vom viele Rege so glitschig isch gsi, und hetsech dr Rügge prellt. Am nächste Morge isches churz no troche gsi, nachdem mir aber im Kaffi vis a vis vor Unterkunft üsi Espressi und Flat Whites bsteut hei hets abeglah wie us Chüble. Das het üs aber nid devo abghaute, trotzdem mitem Tuktuk nach Weligama a Surfstrand z’fahre. Dert hets zwar immerno gregnet, aber mir hei Unterschlupf gfunde imene Strandbeizli. Nach es paar Spielrundine und Kotu Roti hets de zum Glück gege Nami irgendwenn ufghört rägne, so dasmer glich no chli a Strand hei chönne liege. De Yännu hetsech am Nami es Surfbrett gmietet und isch chli ga surfe, de Sacha het leider wegem Rügge nid chönne 😢 I ha o eis gmietet, bi aber nach 10 min use wüui gmerkt ha dases eue glich nidso mis Ding isch, z’viu Respekt vor de Welle (wo absolut nid höch si gsi 😂)
Am Abe heimer wieder fein gässe u si derna no ine fancy Bar am Meer öpis ga trinke.
Am nächste Tag hets leider scho vom Morge ah wieder abeglah, und wüumer sowieso a dem Tag witergreist si heimer üs entschiede, nachem z’Morge grad de Bus z’näh.Les mer