Weltreise

Am Mäntig esch so ehn rägnerische Tag gsi, dass mer üs entschlosse händ ih es Museum z goh. Im Sklave Museum hämmer viel öber die trurigi Vergangeheit vo Kapstadt erfahre. Wo met use cho sind esch scho Zmittag Ziit gsii und mer händ üs mit zwoi vo de Tour im eastern food corner troffe. Det hämmer för 3.- riesigi Portione becho 😍. Am Nomittag simmer no uf ehn free walking tour und denn esch üs de Räge z blöd worde. Mer sind zrug is Hostel und händ de ganzi Nomittag Billiard gspielt.

Au am Ziistig heds no grägnet. Mer händ chli usgschlofe und sind denn is District 6 Museum. Das esch es Gebiet in Kapstadt wos d Bewohner ih de Ziit vo de Apartheid eifach us de Hüüser grüehrt händ. Mer händ üs vo ehnere Frau loh ume füehre wo sälber früehner det gwohnt hed und so alles werklich miterläbt hed. Am Nomittag simmer de no is Aquarium well ich no nie ih so ehmene riesige Aquarium gsii bi und de simmer no chli ah de Wasserfront umegloffe.

Am Mittwuch hämmer ehn Tour is Armeviertel (d Township) chli usserhalb vo de Stadt bueched. Das esch sehr spannend gsii und esch üs werklich nöch gange. Üse Guide hed üs verzellt was sie mit ihrem Projekt alles guets möched, wies de Lüüt probiered z hälfe und wo Problem ligged. Mer händ aber au werklich viel sehr armi Höttli gseh. Zuesätzlich hed üs üse Guide au ih eis Höttli wo d "Bar" esch mitgnoh. Es hed es Füür gha dinne und ganz viel Lüüt. Er hed es riesigs Bier bstellt wo mer ganz traditionell alli teilt händ.

Gester esch denn de letschti Tag vo minnere Wältreis ahbroche. De Luca und ich sind am Morge ihs Brownies&Downies - es Kaffi wo Lüt mit Downsyndrom usbilded wärded.

Zum no ehn coole Abschluss vo minere lange Reis z ha bi ich denn no uf ehn chlini Wanderig. Gstarted ha ich im Botanische Garte und bi vo det us zu ehmene Wasserfall deruf glofffe wo ich au no ehn schöni Ussicht über Kapstadt gha ha. Wo ich zrug cho bi sind de Luca und ich ih es mega härzigs äthiopischs Restaurant schön go ässe ☺️.Leer más