Südostasien 🌏 und USA 🇺🇸

Früeh am Fritig hed de Wecker glütet, am 4:45 simmer uuf will mer öpis speziells sind go luege. Im Dorf gits nämli ganz vill Mönche. Vo üsem iheimische LocalGuide hämmer erfahre, das d‘Mönche alli sehr arm sind und gar nüt händ. Mier händ glernt dass sie jede Morge am 5:30 dur d‘Strasse laufed und sich so bi de Ihemische ihres Ässe für de ganzi Tag ihsammled (mer seit dem „Almosengabe“). Sie laufed mit eher chline Chörb dur d‘Strass dure und jede wo möchti git en chlini Portion is Chörbli was zum Bispill Riis oder Vollchornsnacks chönd sii.
Hüt händ mier dörffe teilnäh und vomene Chörbli vo üs sälber dörffe Riis gäh. Das hed sehr nachdänklich gmacht, z‘gseh mit wie wenig Ässe das sie mönd dure Tag cho. Ich hätt am liebste jedem Mönch e ganze Chorb Ässe gäh… Die jüngste Mönche sind würkli no sehr chli gsi und händ uh jung usgseh was mer denn no meh z‘dänke gmacht hed. Schön aber das die Ihemische würkli jede Morge anestönd und vo ihrem Ässe spändet. Au hämmer glernt das d‘Mönche nach dere Almosegab am 6i für en Stund gönd go bäte. Nachher düends schaffe wie zum Bispil im Garte d‘Blueme wässere oder hälfed putze. Zudem schlafed sie jedi Nacht nur ca. 2 h will sie süsch no über ihri Religion lerned. Üse Guide isch sälber en Mönch gsi und uf d‘Frag wie mers dure Tag schafft mit so wenig Schlaf jedi Nacht, heder gseit, es isch s‘normalste und mer gwöhnt sich drah.

Nach dem Erläbnis simmer go Zmorge ässe und den isch üs die 2tägig Bootstour ufem Mekong bevorgstande! Mer händ ned rächt gwüsst was üs erwarted aber es isch sehr bequem gsi! Es hed Bett und Sitz gha womer hed chönne hinneabestelle zum pfuse.
9h bis zum nächste Stop simmer also dure Mekong gfahre. Denn simmer ahcho bime ganz chline Dörfli in Pak Beng mit 300 Ihwohner. Mer sind go luege wie sie läbed, wie sie choched und wie sie schaffed. Die Mänsche da sind sehr sehr arm, und es isch so schön händ sie üs en Ihblick ih ihre Alltag und ihres Läbe gäh. Mer chan au mit sehr wenig glücklich sii, das hed mer da gseh. Sie wüssed sie händ ned vill aber machid s‘Beste drus will sie ja au nüt anders känned und wie sie mitenand umgönd chönt sich mänge devo es Vorbild näh. Sehr trurig aber au es schöns Erläbnis gsi will mer so vill Liebi und Offeheit empfange hed. Mer händ mit ihne betet und sie händ üs Armbändeli ahgleit us Baumwulle, insgesamt 10 (5 a jedem Arm). Mer hed sich bi jedem dörffe öpis wünsche und nach 3 Täg sött mer sie abnäh oder denn abnäh wenn mer dehei ahchund. Nachher händs üs vo ihrem heilige Wasser gäh (50%ige Alkohol sälber gmacht! Uiii! 🤣🔥).
Mier händ für de Tag dörffe läbe wie sie, gschlafe hämmer i ihrem Hüttli ufem Bode ufeme härzig ahgrichtete Bettli miteme Muggenetz. Ide Nacht hed mer immer de Güggel ghört! 😂
Am nächste Morge ischs denn au scho früeh wieder los gange witer uf üses Boot richtig Thailand…..🇹🇭Read more