Weltreis

Die letschte 1.5 Täg Safari sind numal magisch gsi! Geschter Morge hemmer wieder Mal zwei Elefante-Teenies bim Striite chenne beobachte, später isch eus en andere trompetende Teenie am Jeep nache! Am Abig hemmer zwei grossi Löwe-Brüedere gseh, wo vu de Autos völlig unbeidruckt gsi sind. Zum dene durch de Busch nachezmöge het euse Ranger Oliver numal offroad Vollgas gä, was sich so au uszahlt het.
Am Abig hemmer im Tree House vu dr Lodge übernachtet, es Baumhuus bimene Wasserloch. Ca. 5m über Bode und 5 Autominute vum Camp entfernt isch das grad numal chli wilder als bis etz gsi... de Busch isch zimli luut gsi, mit vilne Hyäne, emene Leu und unzählige Vögel, v.a. zum Ufwache. Mer hends sehr gnosse und hend sogar nu guet gschlafe, eher zheiss hemmer gha mit allne Deckene und Bettfläsche!
De hütig Morning Drive het denn numal alles toppt: am Afang hemmer es paar Giraffe und Zebras gseh, dernach isch de Busch wie usgstorbe gsi... sogar d Impalas hend sich rar gmacht. Doch denn isches Schlag und Schlag gange: en grossi Herde Büffel, zwei Rhinos, en zuetraulichi Hyäne und en schlanki Leopardin! Die schön Chatz isch uf dr Pirsch gsi und het sich au wieder nid durch s Auto la störe. Und zum Schluss hemmer euses Glück fascht nüm chenne fasse womer denn au nu zwei Schwöschter-Löwinne gseh hend! Die eint isch chli agschlage sind und het ghumplet, die andere het en halbherzigi Jagt uf en Büffel gstartet. Beid Löwinne sind am Jeep rächt nöch cho, direkt a dr Autoflanke entlang sind gloffe und hend eim au direkt id Auge gluegt! Es unglaublichs Erlebnis!
Nachem Morning Drive hemmer nu en churze Bush Walk mitem seniore Ranger Cédric gmacht. Er het kei Meter im Busch chenne laufe ohni as ihm 10 Sache ufgfalle sind. Er het eus Spure vu Rhinos, Büffel, Hippos und Antilope zeigt, erchlärt wie Elefante Wasser sueched und weli Pflanze asmer für was bruche chan. S Unglaublichschte isch aber gsi, wie anderscht as eus dTier wahrgno hend, nur wel mer plötzlich zFuess statt im Jeep underwegs gsi sind. Die Giraffe, Zebras und Impalas hend eus sehr kritisch beäugt und hend scho ab ca. 100m Nöchi sehr schnell sWiiti gsuecht - bis etz hemmer weder Zebras nu Giraffe so schnell gseh renne wie hüt vor eus bim Bush Walk! De Cédric het eus denn erchlärt, as dTier d Jeeps mit de Gäst als ei grosses Ganzes wahrnehmed, as si abgseh vum Motoregrüsch und Dieselgruch nid vil vu de Mänsche mitbechemed und sich so scho vu chli uf an die komische Chaschte-Tier gwöhned. Es isch effektiv en Augeöffner gsi, ases nu lang nid selbstverständlich isch, die wilde Tier usem Jeep nur us es paar Meter Distanz derfe bestuune.
Mer hend etz 4 wundervolli Täg in Umlani verbracht und hend alles sehr gnosse. Etz fahremer nu die letschte 500km in Südafrika, uf Johannesburg, wo morn euse Flug uf Sri Lanka gaht.Meer informatie