Süd- und Zentralamerika

Mi hütig Plan het folgendermasse usgseh: Am Morge ga d Mayastätt Uxmal aluege u am Nami dür Mérida schlendere. Wi dr nech iz öpe chöit denke, isch das ganze natürlich anders usecho.

I bi am Morge am 8i ufe Bus nach Uxmal u bi oh dert ume die einzigi Touristin gsi. Unterwegs hets e chli Geduld brucht, da üse Chauffeur gfüehlt a jedem Kiosk unterwegs het ghaute zum sech öpis ga pösterle. Churz vor de 10ni bini de in Uxmal gsi. I ha mi entschiede die Mayastätt ohni Guide ga azluege, wiu mi hei Priise mega höch dünkt. Dinne hets aber viel Infotafele zu de Gebäude u e chli öpis über d Mayas hani ja scho in Chichen Itza erfahre. Uxmal het ebenfalls huufe Temple u Gebäude wo denn zumal si wichtig gsi u i has schono idrücklech gfunde, vorauem oh wie gross das es isch.
Gäge Mittag bini de fertig gsi u es isch mega heiss gsi. I bi ume zrugg zur Busstation gloffe, wiu i denkt ha, die Busse fahre de sicher regelmässig zrugg uf Mérida - tüe si nid, e Dame dert het gseit, dr nächst sigi ersch zwüsche 3 u haubi 4i. Heisst i muess iz 3h hie warte. Gad näbe dran isch no es Schoggimuseum u i bi dert mau ga luege was ds würd choste. Dr Herr ar Kasse het gmeint, mängisch fahrt oh Bus zwüsche 12i u 12.30 u i ha de mis Glück nomau probiert. Wo de am 1 am Nami immer no kene isch cho, bini zrugg u ha das Schoggimuseum no bsuecht. Si zeige dert, wie das Mayas früecher dr Kakao brucht hei, wie si gläbt hei u was si hei gässe. Zudem het me chönne are Mayazeremonie zueluege. Ds isch echt no spannend gsi u het wider chli meh Iblick id Kultur gäh. Natürlich hei si oh no dr Prozess wie Kakao isch uf Europa cho u wime Schoggi herstellt erklärt, aber ds kenni ja scho u drum bini dert chli schneller derdür gsi. Mittlerwile bini oh vollgschwitzt gsi u ha zudem nach Muggespray gstunke u mi sehr unwohl gfüehlt.
Am 3 bini de wider zur Busstation u ha afa warte. Churz vor de 4i ischer de uftoucht u es isch endlech zrugg uf Mérida gange. I bi mega froh gsi woni de zimlech müed, verschwitzt u stinkend (i ha mi sogar säuber gschmöckt) bi zrugg im Hostel gsi u endlech ha chönne ga dusche.

Mini Zimmerkollegin isch de oh gad zrügg cho u mir si zäme iz Gspräch cho zimlech lang. Irgendwenn hani de mega hunger gha u gseit, i müess mau öpis ga esse. I ha wöue ir Stadt öpis esse, dasi immerhin glich no chli öpis vo Mérida gseh. Chum bini ume Egge hets afa Rägne wie nüt u innert churzer Zit si de die Strasse gfluetet gsi. I ha mi unternes Dach grettet u dert usgharrt bis es weniger isch worde. När bini zrugg iz Hostel, wiu i ha Turnschueh an gha u ha nid wöue das die no meh nass werde. Weme d Strass het wöue überquere isch me nämlech Chnöcheltöif im Wasser gstande. Mini Zimmerkollegin het mer de abote mit ihre z ässe u ds heimer när e so gmacht u hei e gmüetleche Abe im Hostel gha.
So hani haut leider nid würklech öpis vo Mérida gseh, wiu i ga scho ume e Ort witer morn.Meer informatie