Reset search
SüdamerikaSüdamerika
SatelliteEdit route

Südamerika

October - December 2022
Jenny und ich hend üs Südamerika, mitem Rucksack, vorgnoh. Read more
  • 76footprints
  • 5countries
  • 75days
  • 297photos
  • 10videos
  • 22.1kkilometers
  • 14.5kkilometers
Follow Calendar Share Bucket list
Date ascending
  • TravelerSüdamerika
    Day 11

    Tag 11: Galapagos Santa Cruz Island

    October 20, 2022 in Ecuador ⋅ ⛅ 21 °C

    Nachem turbulente Abig gester hani super gschlafe. Sogar ohni 1 mal ufzwache bis de Wecker glüte het. Zum Zmorge hets Pancakes geh. Nacher simmer ufd Insle is Darwin Research Center. Det hemmer viel drüber glernt wies d‘riese Landschildchröte vom Ussterbe grettet hend und mit was für Probleme d‘Inslene hützutags z‘kämpfe hend. Natürlich hemmer au ganz viel Schildchrote gseh. Isch aber na komisch gsi Tier hinter Gitter zgseh, anstatt ide freie Wildbahn. Denn isch d‘Hälfti vo de Gruppe abgreisst und die ander Hälfti het chöne im Städli bliibe. Abgreisst sind die 2 Österichischi Cousine (Sophie & Kathi), 1 Schwiizer (Jonas), ein Engländer (Ayusch) und es Holländisches Päärli (Paulette und Bernard). Leider alles die Junge… Mir sind neuemeds en Kaffi go neh und hend na es Tishi kauft. Denn sind neui Gruppenmitglieder dezuegstosse. Es chinesisches Päärli wo eich kei Englisch chan und d‘Frau Tier nid gern hett (keine weiss wieso sie denn da sind?!?!) und na en Amerikaner wo chli zviel freud ah Vögel hett. Zum Glück isch de Andy (en junge Dütsche) nanig abgreisst. Susch hend üs all junge verlah usser na das härzige eltere Päärli us Dänemark. Jetzt wos au chli weniger Lüüt het, düend sie sich üs gegenüber meh öffne und verzehled ganz viel. Am Namitag simer chli id Berge gfahre. Det hemmer d‘Schildchrote in freier Wildbahn gseh. Es het uh viel gha. Wie Sand am Meer. Sie sind würklich riisig gsi und chönd bis zu 450kg werde und über 200 Jahr alt. Denn hemmer na es wilds Büsi gseh. Üse Guide het üs gseit, dass sie immer froh sind, wenn so Huustier vo de Galapagosinsle wegchömed. Am liebste hetti sie grad mitheignoh, wäri nid na 2 Mönet unterwegs… zrugg ufem Boot hets wieder en chliine Snack geh und vorem znacht het ps de Guide, wie jede Tag, en chliine Usblick uf de nögst Tag geh und gseit, was für Aktivitäte uf eus warte werded. Zum Znacht hani wieder eh mega feini Extrawurst als Vegetarierin becho.Read more

    See translation
  • TravelerSüdamerika
    Day 12

    Tag 12: Galapgos - Floreana Island

    October 21, 2022 in Ecuador ⋅ ⛅ 20 °C

    De Tag het ganz ahgnehm am 7ni am Morge gstartet. Da mer über d‘Nacht wieder gfahre sind, hani nid sooo prickelnd gschlafe. Churz nachem feine zmorge, simmer bide Insle Floreana ad Postoffice bay. Mit de Dinghys simmer chli ah de Küste entlang gfahre. Det hemmer viel Seeleue mit viel chliine Babys gseh. Und zu de Postoffice bay ghört au es Postoffice. Oder eifach en eher schäbige Briefchaste wo all Touries ihri Postcharte chönd inedue, aber nur wenns defür 2 anderi wieder mitnehmed, ih das Land wo sie ih nöchster Ziit reised. Mir hend eusi 3 det lah und defür 8 anderi für id de Schwiiz mitgnoh. Ich bin gspanne wie langs gaht, bis au eusi ahchömded. Denn simmer no es Lavatunnel go ahluege, wod ohni Taschelampe nid wiit cho wärsch. Nacher simmer vom Strand us no go schnorchle. Nebed unzählige Wasserschildchrötli hemmer tatsächlich nah 3 Pinguine gseh, wo uuh nöch ah eus verbiigschwumme sind und überhaupt kei Angst gha hend. Zrug an Board hets au scho glii wieder zmittag geh. Doch chum hends eus d‘Suppe serviert, chunt üse Guide und seit mir sölled schnell usecho und luege. Das Bild wird ich niemeh vergesse. Sicher über 100 Delfine sind üsem Boot nahgjagt und sind überall uegumpt. Mer hetts amels sogar ghört Miipe. Mir sind usem stuune fasch nüm usecho. Doch das sind wohl zviel Tier für’d Frau vom Chines gsi. Sie isch ih dere Ziit im Zimmer gsi und het uf üs geartet…. Nacheme chliine Mittagsnap ufem Deck simmer zumene wiitere Schnorchelgang ah de Devil‘s Crown. Zmitzt im Meer hemmer um paar Gsteinsbrocke chöne schnorchle, wo chli usgseh hend wie eh Chrone. D‘Strömig und de Wellegang sind echt tricky gsi. Trotzdem hemmer en white-tipped-shark, 2 Roche und wieder mal ganz viel Fischis und Meeresschildchrötli gseh. Die Stund isch umegange wie im Flug. Denn simmer no mit de Dinghys an Punto Cormoran. Det simmer anere Lagune mit Flamingos verbii gloffe ahnen wunderbare Strand. Mir hend eh perfekti Ahbigsstimmig chöne gnüsse. Im seichte Wasser hetts nomal paar Roche und Meeresschildis gha. Zrug an Board hets wieder Sushi zum Apero geh und ich als Vegi ha wieder eh wunderbars extra-Sushi becho. De Choch de Walter verwöhnt eus würklich vo A nach Z! Am Abig sind wieder es paar Galapagos-Sharks um euses Boot gschwumme. En glungene Tag gaht z‘end.
    Funfact: In Ecuador duet mer frisches Popcorn id Chürbissuppe. Sehr fein!    Read more

    See translation
  • TravelerSüdamerika
    Day 13

    Tag 13: Galapagos - Espanola Island

    October 22, 2022 in Ecuador ⋅ ⛅ 19 °C

    D‘Nacht hüt währed em Segle isch wiedermal maximal Schwankig gsi. Wo mer am Morge am 6:30 hend welle go zmörgele, isches dusse au immerno so wulchig gsi, mer hett gar kei Lust gha zum ihn Tag starte. Trotzdem simmer am halbi 8i mit de Dinghys ufd Española Insle. Am Strand Punta Suarez hets scho tausend Seeleue mit ihrne Babys gha. Uf de Wanderig hemmer na paar Meeresiguanas, Albatrossen und generell viel Vögel gseh, was üse Vogelfan sehr greud het. Zrugg an Board hets en chliine Powernap und Lunch geh. Denn simmer zu üsem letzte Tauchgang gfahre. S‘Wasser isch arschchalt gsi und viel hemmer nid gseh. Defür hemmer immer ih so Höhlene chöne inetauche. Denn simmerna ahnen schöne Strand Gardener Bay gfahre zum chlli chille. Aber ah dem Strand sind 3 toti Seeleue glege und ganz viel Flüüge. Also nid sehr iihladend. Nacher simmer wieder 4h gsegled richtig Insle Santa Cruz. Das heisst es wird ih de Nacht nid gsegled und das find ich super! Uf de Znacht hend sich alli Crewmitglieder wieder richtig schön useputzt und es het en Abschiedsdrink geh. Zum Znacht hetts Hamburger geh und für mich eh feini gfüllti Aubergine jnd zum Dessert en Chueche. De Choch staht gfühlt amel de ganz Tag ih de Chuchi zum eus das Esse chene ahnezaubere. Am Abig hemmer no dörfe is Städli vo de Insle Santa Cruz. Mir sind chli umegloffe und s‘ältere dänische Ehepaar het üs allne na es Bier spendiert. Alles ih allem en seehr glungene Abig gsi und en perfekte Abschluss für die wunderbari Reis!Read more

    See translation
  • TravelerSüdamerika
    Day 14

    Tag 14: Galapagos - Santa Cruz —> Quito

    October 23, 2022 in Ecuador ⋅ ☁️ 14 °C

    Hüt morge simmer nachere ruhige Nacht ufm Boot wieder am 6i ufgstande zum packe. Nachem Zmorge isches los gange. Mitem Bus simmer is Interpretation Center. Ufere grosse Charte het üse Guide eus nomal erchlärt wo mir gnau duregfahre sind und mir hend alles nochli Revue passiere lah. Vo 13 Insle hemmer 6 dörfe go bsueche. Nacher hemmer imene Museum nochli Gschicht vo de Galapagos chöne lese. Vode Entstehig, zude Besiedlig bis zude hütige Problem wo d‘Mensche uf die Inslene bracht hend. Denn simmer an Flughafe gfahre und es het gheisse Abschied neh. D‘Crew isch immer super süess gsi. Eusi Yacht Eden isch au eini vo de wenige Schiff, wo vo Locals betriebe wird und drum die lokali Wirtschaft unterstützt. Vo üsem dütsche Migo de Andy und em herzige Dänische Päärli isch de Abschied eher schwierig gsi. Die beide alte hend sogar müesse weine… De Flughafe isch de chlinst wos je hets gits. Mit 2 Gates chasch zum Flugzüg laufe und selber ihstiige. De Flug isch tiptop gsi und mitem Taxi simmer den vor euses Hostel The Secret Garden Quito gfahre worde. Mir hend churz ihcheggt eusi Wösch abgeh und sind id Stadt en Znacht go hole. Mir hend versuecht chli z‘überlegge was mer die nögste Täg wennd mache und wie mer am beste in Amazonas chömed. Mir hend denn beschlosse mir fröged eifach mal im Hostel nah, da die sehr viel Toure ahbüütet. Ca. am 8i hett sich ein Mitarbeiter für eus Ziit gnoh. Mir hend chli de wiiteri Verlauf versproche und er hett üs na überreded scho ah dem Abig in Amazonas zgah. Die einti Tour fahri am 11i am Abig ab. Also hemmer üsi Reservation im Hostel glöst und heimlich üsi Rucksäck usem Schlafsal gholt und Better flach gstriiche, das niemer gseht, das mir mal da gsi sind^^ denn hemmer de Frau vom Wöschsalon es zünftigs Trinkgeld geh, dassi psi Wösch no vorem 11i cha fertig mache. De Priis: üsi Wösch isch eher gschrumpt wegem heftige tumblere😂 Trotzdem het alles meh oder weniger klapped und mir sind am 11i im Bus gsi und hend üs uf die langi fahrz vorbereitet. Hoffentlich chömmer chli schalfe.Read more

    See translation
  • TravelerSüdamerika
    Day 15

    Tag 15: Amazonas Cuyabeno

    October 24, 2022 in Ecuador ⋅ ⛅ 27 °C

    D‘Busfahrt het gfühlt nie ufghört. Am halbi 9ni simmer in Lago Agrio ahcho. Det hemmer churz es Stündli ghaltet und mir hend en feine Zmorge becho. Denn simmer nomal bis öppe am 12i wiiter gfahre bis mer zum Ihgang vom Nationalpark Cuybeno cho sind. Det hend üs die Guides vo de einzelne Lodges abgholt. Zu üsere Lodge Pirañia sind nurno 2 anderi cho. Denn simmer ufeme Böötli 2h lang de Rio Cuyabeno entlang gfahre. Ufem Weg simmer scho paar mal ahghalte zums Wildlife z‘beguetacht. 2 verschideni Affe hemmer gseh (Parahuago und de Masoalehalleaff), Papageie und anderi Vögel. Mir sind eifach so tüüfer und tüüfer ih de Wald inegfahre. Mer cha sichs chum vorstelle. Denn simmer bi üsere Lodge ahcho. Euse Guide, de Miguel, het eus empfange. Er isch Füür und Flame für de Amazonas, voller Energie und gseht us wie en richtige Abentüürer. Es sind na 3 anderi Jungi da gsi. 2 Fraue us Düütschland ( Angi und Ariana) und ein Maah us Kanada (Chris) Hend aber all 3 en nette iihdruck gmacht. Ich denk mir werded guet zgang cho. Es hett Zmittag geh und mir hend üsi Zimmer bezoge. Es isch eh uhuere Hitz. Nacher hemmer us parat gmacht für s‘erste Amazonas-Abentüür. Mitem gliiche Motorboot, wies eus gholt hend simmer richtig einere Laguune gfahre. Ufem Weg hemmer cho en Caiman gseh und es 3-Fingerfuultier. Bi dere Lagune simmer nid s‘einzig Schiffli gsi. Vo allne Lodges ih dere Umgbig sinds cho. Und denn hemmer tatsächlich s‘Glück gha es paar pinke Delfine z‘geh, wie sie ad Oberflächi chömed go schnuufe. Ich bin uf Ecuador mit keim Gedank dassi überhaupt wird Delfine gseh & jetzt au no die 😍 es isch eh wunderbari Abigstimmig gsi und während d‘Sunne untergange isch hend mir zmitzt im Amazonas chöne is Wasser springe und go bade. Es isch unglaublich gsi. Wos den ganz dunkel gsi isch simmer na in Wald selber. Nach gaaanz viel Riesespinn und Frösch spöter simmer wieder zu eusem Boot cho und hend eus uf de Weg zrugg gmacht. Aber de Weg zrugg isch bis ez glaub mis Highlight gsi. Ich ha nonie so en klaare Sternehimmel gsh mit nid nur eim Wülchi. Es isch würklich Atemberaubend gsi. Am 8i simmer den ca. zrugg bide Lodge gsi. Es hett Znacht geh (s‘Esse isch au da wieder sehr fein und mini Vegiwünsch werded berücksichtigt) und de Guide het üs de Morgig Tag erchlärt. Müed simmer is Bett gfalle und zum getoss vom Amazonas ihpfusst.
    Funfact: Die pinke Delfine sind nur pink will mer ihres Bluetgfässsystem deunder gseht. Und wenn sie ufgregt etc. sind, werdeds halt „rot“    Read more

    See translation
  • TravelerSüdamerika
    Day 16

    Tag 16: Amazonas Cuyabeno

    October 25, 2022 in Ecuador ⋅ ⛅ 31 °C

    Die Nacht hani pfuused wie en Stei und es isch nid mal sooo heiss gsi wie denkt. De zmorge am 8i isch sehr fein gsi und churz drufabe simmer mitem Motorboot wieder dur das Flusssystem im Amazonas gfahre. Nid lang isches gange und es Rudel mit sicher 15 Djorongos-Affe het über eusem Chopf de Fluss welle überquere, dicht gfolgt vo Totechopfäffli. Mir sind nachli wiiter gfahre und hend den zumene Ruederboot gwächsled. Denn simmer zunere wiitere Laguune gruederet. Sie isch Riesig gsi, aber nid so tüüf wie die ander, drum hemmer leider nid chöne schwümme. Aber überall sind einzelni Bäum usem Wasser gragt. Das hett sehr nice usgseh. Denn hemmer en chliine Abstecher in Wald gmacht. Da isch er nid soo tropisch gsi. Mir hend es paar Spure gseh und eh Frucht gesse^^ Nacher hemmer de gaaaanz Weg müesse zruggpaddle, was eim ewiigs vorcho isch. Ufem Weg sind üs auno paar Papageie über de Chopf gfloge und en Tucan hemmer auna gseh:) Nachem zmittag hemmer 2h gnapped und denn simmer mitem Boot s‘erstmal ih die ander Richtig vom Fluss gfahre. Mir sind ah ganz viel verschiedene Lodges verbiidüüst bis mer denn bimene iiheimische Dorf ahcho sind. Es isch krass wie euse Guide das Flusssystem kennt. Als wärs üses Strassenetzt. Bi de iiheimische Familie hemmer zersch miteme Schamman chli chöne rede und Frage stelle und denn het er na es Ritual mit eus gmacht. Die Sach isch mer aber eher komisch vorcho, will er vorher na in ganz normale Chleider umegloffe isch und sich währendem Ritaul immer nach de verbiifahrende Böötli umglueged hett… Nacher hemmer bi de andere Familie us de Yucawurzle es feins Fladebrot gmacht. Debii hemmer Zuckerrohr chöne Snacke und en anderi iiheimischi Frucht, sie seged ihre IceCreamFrucht. Ufem Heiweg simmer wieder unter de Atemberaubende Milchstrass umedüst. Zum Glück isch de Heiweg 1h gange und mir hend gnueg Ziit gha de Moment völlig zgnüsse. Nachem Znacht hemmer nachli mit de 2 Dütsche Fraue gredet und sind denn gli ihgschlafe.
    Funfact of the Day:
    Als Schaman gilt mer, wemmer sich ab 18 jede Monet sicher 1 Mal Ayuasca inepfifft zum „sin Körper z‘reinige“. Das heisst jede cha eich Schaman werde.    Read more

    See translation
  • TravelerSüdamerika
    Day 17

    Tag 17: Amazonas Cuyabeno

    October 26, 2022 in Ecuador ⋅ ⛅ 30 °C

    Die Nacht isch einiges heisser gsi und dementsprechend hani nid sooo guet gschlafe. Aber am 6:00 isch eh scho Tagwach gsi. Mir sind mitem Böötli zu de Lagune füre zum de Sunneufgang ahzluege. Ufem weg hemmer wieder die oinke Delphine gse. Sogar es Baby isch unterwegs gsi. Ganz viel Affe hend natürlich au nid dörfe fehle. Mir sind eis vo de einzige Boot gsi wo unterwegs gsi isch. Nachem Zmorge sind die Düütsche abgreist und mir hend eus anere andere Gruppe müsse ahschlüsse. Mir sind wieder mitem Paddelboot use und hend en Halt gmacht für eh chliini Wanderig. Mir sind maximal dur de Busch gloffe. Ih dem Wald sind 5 verschiedni Ökosystem gsi und das hemmer au gmerkt. Vo Laubwald zum maximale Sumpf über de Äquator zum tropische Regewald. Denn simmer wieder alllles zruggpaddled. Zum Glück hett eus es Motorboot für die letzte Kilometer mitgnoh. Nacheme lange Mittagsnap Simmer wieder mitem Motorboot chli d‘Lagune go erkunde, hend während em Sunneuntergang en Schwumm gnacht und sind wos stockdunkel gsi isch nomal chli dur de Dschungel gloffe. Euse Guide isch echt en nice:) Er hett immer sooo viel Energie und isch nur am rede und am verzehle. Mer merkt richtig wie Füür und Flamme er für de Amazonas isch. Er will eus würklich s‘beste Erlebnis schenke, dass au mir (Touris us de ganze Welt) merked, dasses wichtig isch de Wald z‘beschütze 🌳
    Funfact: Papageie chönd bis zu 80 Jahr alt werde, sind aber Emotional uf de gliiche Ebeni wie es 3 Jöhrigs chind. Sie lebed Monogam und wenn ihre Partner stirbt, cha de ander us truur au glii sterbe.    Read more

    See translation
  • TravelerSüdamerika
    Day 18

    Tag 18: Amazonas Cuyabeno —> Quito

    October 27, 2022 in Ecuador ⋅ ☁️ 15 °C

    Hüt isch de Tag vo de Abreis. Weg vom Dschungel. Drum het üs euse Guide am 6i am Mlrge nomal uf eh privati Bootsfahrt entfüehrt. Mitere Tasse Kaffi ide Hand hett er eus richtig Süde in en enge Gang vom Fluss gfüehrt wo mer wieder in Gnuss vo grosse Vögel, Brüllaffene (wo anschienend sehr selte sind) und Paraguaco cho. Nach dem mir zruggpadled sind hets en feine Zmorge geh. Am 9:30 het üs den wieder s‘Boot abgholt wo eus ih 2h an Parkihgang Cuyabeno bracht het. Am 12i isch euse Bus zrugg nach Quito gfahre. Miteme Halt für en Znacht am 6i simmer am 11i am Abig endlich im Hostel ahcho. Mir sind eus de Luxus vo de Hostel nachbdere Urwaldlodge gar nüm gwöhnt gsi😂 Us de Duschi sind meh als 3 Tröpfli usecho und au s‘Wasser isch klar gsi. Au bide Spüelig hemmer nüm 20 Min müesse warte bis mer sie es 2ts Mal cha betätige. Das ih dem Hostel au mega guets WLan gha het, hemmer die Situation no gnutzt und hend chli id Schwiiz telefoniert. Doch da es scho so spat gsi isch, hets im Hostel selber nüm soo viel Möglichkeite gha zum bequem Ahnesitze. Zersch bini ih de Lobby gsi, bis en neue Gast vollgas in Chübel kotzt het und nüm het welle ufhöre. Denn bini ih euse Schlafsaal zrugg. Det sind aber na 3 sich am komplett besuufe gsi und hend sich gegesiitig ihri Lebensgschichte verzehlt und wie unglüchlich sie doch sind. Mer het gar nid nöd chöne zuelose. Wo denn au die is Bett sind (geg die 2 am Morge) hend au mir üsi Telefonat beendet. Zum Grüsch vo 2ne wo grad no Sex im Zimmer gha hend, hemmer üsi Ohrestöpsel montiert und sind den iihpfused. Also: Das Hostel isch eh rechti Partymeile und nid umbedingt z‘empfehle.Read more

    See translation
  • TravelerSüdamerika
    Day 19

    Tag 19: Quito —> Latacunga

    October 28, 2022 in Ecuador ⋅ ☁️ 16 °C

    Nach dem mir gester spat is Bett sind, hemmer de Wecker ersch uf die halbi 9ni gstellt. Denn simmer uf de Rooftopbar vom Hostel The Secret Garden go Zmorge esse. Nach dem mer Uscheckt hend, het üsi Backpackreis gfühlt ersch ez ahgfange. Endlich hemmer Quito richtig Süde verlah und sind mitm Bus nach Latacunga. Nach 3 Stund fahrt und eimal umstiige simmer ahcho. Mir hend den grad im nögste Hostel Tiana Café ihcheggt. Da zahlemer 18$ für eus beidi für 1 Nacht. Die Priise überrasched eus immer wieder ufs neue. Denn simmer chli dur‘s Städli selber gloffe, das git aber nid sooo viel her. Im Kaffi Leche y Miel hemmer endlich wiedermal feine Kaffi trunke. Dezue hets zum Zvieri en Cheescake und Pancakes geh. Chessecake isch glaubs eifach nid so ihri Spezialität und mir hend beschlosse da in Südamerika niemeh en Cheesecake z‘bstelle… Nacher hemmer na all üsi To-Dos abgarbeitet. Sind üsi Sim-Chartene go uflade, hend gnueg Geld abghebt und sind chli Snacks für die nögste 3 Täg go poste. Zum Znacht simmer is El Gringo y la Gorda. Det isch grad Happy Hour gsi und drum hets zum Znacht en Mojito geh und dezue eh riise Schüssle Thai-Salat wo würklich unglaublich geil gsi isch. Für die 2 Salöt und 2 Mojitos hemmer wieder nur knapp 20$ zahlt. Hett sich also glohnt. Zrugg im Hostel hemmer packt und eus gnueg informiert für üses nögste Vorha. Mir wend nämlich ih 3 Täg vo da us zum Quilotoa-Loop laufe. Dassmer gnueg fit sind, simmer dasmal gnueg früeh is Bett.Read more

    See translation
  • TravelerSüdamerika
    Day 20

    Tag 20: Latacunga —> Isinlivi

    October 29, 2022 in Ecuador ⋅ ⛅ 13 °C

    Hüt isches sowiit und mir startet üsi Wanderig zum Quilotoa-loop. Am Morge geg die 8i nehmemer de Bus nach Sigchos und det gahts los. Landschaft isch wunderbar. Überall uf de Hügel hetts Felder, woe wahrschindlich kein Traktor ahnechunt. S‘Wetter isch au wunderbar und d‘Sunne brennt abe. Die hütig Etappe isch sehr machbar gsi. Bis uf ein Ahstiig wo mer ca. 500 Höhemeter uf ein Schlurz hend müesse mache. Mir sind denn aber scho geg die 3 ide Lodge gsi und de Znacht hetts ersch am 7ni geh. Mir hends guehe WLan gnutzt und wieder heiahglühte und ich han sogar Tula vor d‘Linse bechoo😍 Denn simmer im Städtli en Lade go sueche und hend üs es Glace und paar Snacks gegönnt. De Znacht isch denn au sehr fein gsi und mir sind denn gli drufabe is Bett. Da ide Berge chüelts am Abig recht ab und ich bin froh gsi, hani mini Thermounterwösch debii gha.Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English