Yuan Shan

Ehn super Tagesusflug vo Taichung! Mit ehm Bus ca. 2.5h de Bärg deruf fahre (dor ehn wunderschöni Palme/Bambus/Högel Landschaft), dobe es Velo miete, um de See ume fahre und weder zrug id Stadt.

Scho im Bus bin ich näb ehmene chinesische Tourist ghocked wo sich härzig um mich kümmered hed. So hed er zum Biespiel wo de Busfahrer öbbis dure gseid hed (wahrschinlich bitte ahgurte), kontrolliert ob ich au joh ahgurted sig. Er hed welle mit mir rede und hed eifach ned chönne begriefe, dass ich ihn ned verstoh au wenn er doch ganz langsam und dütlich chinesisch redt 😂. Dank sim Victorinox Täschli han ich ihm wenigstens chönne z verstoh gäh dass ich us de Schwiiz chäm, do hed er sehr freud gha. Er hed denn au sin Selfiestab füre gnoh und hed es paar Föteli mit sinnere westliche Bekanntschaft welle mache 🤷🏼‍♀️.

Dobe ahcho han ich för öbbe 5 Franke es Velo becho und ha mich uf de Wäg gmacht. Reini Fahrziit sig 2.5h aber es heig viel Sehenswürdigkeite unterwägs esch mer gseid worde und so esch es denn au gsii. Ich has am Afang scho fast bereuht wells so deruf gange esch 😂. Es hed sich aber eidütig glohnt. Ned umbedingt nur wäg ehm See (do hämmer deheime grad so schöni) aber au wäg de Landschaft rundume. Ich bi dor tolli Bambus/Palmewälder gfahre, ha wildi Affe und Tempel gseh.

Zmittag gässe ha ich ih ehmene mega härzige Restaurant wos es zimlichs Züg um mich gmacht händ. Ich ha Riis mit gchochtem Gmües bstellt und bi drum grad mit ihd Chochi gnoh worde, dass ich cha zeige weles Gmües ich wott 😂. Wo ich es chlises Fläschli z Trinke bstellt ha esch sie extra schnell ih Lade näbedra eis go poste und nach dem sii mich beobachted hed wie ich mich mit de Stäbli abmüehe (au wenn ich s Gfühl ha ich chiengs inzwüsche ned schlächt) esch sie mer go ehn Gable bringe.

So han ich ehn tolle, sportliche Tag ih de tropische Natur gha mit unvergässliche Begägnige.Read more