Andrea Sempach

Mir si witers uf Panama City greiset😄
Die Stadt imponiert mit ihrne Wolkenchratzer und generell mit ihrere Skyline. Üs het das würkli guet gfaue.
Mir si am erschte Tag der Panama Kanal ga aluege. Wow, mir hei auso nid schlecht gstuunet wo mir die ganzi Anlag hei gseh. Us üsere Sicht wird däm zurecht nachegseit, dasses vo dä neue Weltwunder d‘Numere 8 isch.
Würkli beeidruckend👀‼️

Mir hei vor Ort im nä riese IMAX Chino Saal zersch dörfe ä Fium luege wo ca. 45 Min. isch glüffe. Es isch drum gange wie dä Kanal isch entstande und wär das wie het erbout.
D‘Idee ä Kanal zwüschem Atlantische und am Pazifische Ozean z’boue stammt usem Jahr 1523 vo dä Spanier. Si hei dazumal d‘Landengi z‘erschte mau überquert und ä Lösig gsuecht, wie mä die Idee cha umsetzä.
Es si abr när zwüsche dä Jahr 1881 & 1889 d‘Franzose gsi wo z‘erschte mau hei versuecht ä Kanal z‘boue, i däm si gmeint hei, es göng de so eifach wie mitem Suezkanal. Si hei probiert die ganzi Erdmasse uszhebä und dr Kanal jedoch ohni Schleuse z’boue. Z Ganze Projekt het enormi Chöschte generiert und dr Schuldeberg isch immer wie grösser worde. Zudem si nä ou reihenwiis d‘Arbeiter weggstorbe, da si a Gelbfieber & Malaria erkrankt si und mä zu däm Zitpunkt no ke Impfstoff het gha u mä nid het gwüsst wie die Viren übertreit wärde. Insgsamt si während dene 7-8 Jahr Bouzit über 20‘000 Bauarbeiter a Gelbfieber & Malaria gstorbe 🧐😨 Schlussendlich isch die französischi Kanalgsellschaft ruiniert gsi und hei müesse ufgä (Panamaskandal).

Schlussendlich sis d‘Amerikaner gsi (Los Gringos) wo gseit hei, ä Kanal uf Meereshöchi isch nid realisierbar u drum hetmä sech fürnes dreistufigs Schleusensystem entschiede. Für das bruchts ä enormi Wassermengi u drum heisi bim Fluss Chagres ä Staumuur bout. Damit isch der Stausee Gatun entstande - Weltwiit der zweitgröscht Stausee.
Si hei je 3 Schleusen uf der Atlantik und uf der Pazifik Seite bout. Damit chöi si d‘Schiff uf 26 Meter hieven, damit si d‘Höchi vom Stousee erreiche. D‘Schleusen si je 300m läng und 33m breit. 1914 isch der Kanal eröffnet worde, jedoch isch das weniger es Spektakel worde aus plant, wöu genau denn der erst Weltkrieg het ahgfange.

Da d‘Schiff im Verlouf vo dä Jahr immer wie grösser si worde, het der Panama Kanal müesse erwiteret wärde. Es si je 3 witeri Schleuse uf der Atlantik und uf der Pazifik Seite mitem nä Mass vo 427m Längi und 55m Breiti erbout worde.

D‘Schiff fahre mit eigetem Ahtrieb dür d‘Schleusene düre (seeehr langsam)☺️. Damit d‘Schiff bir Schleusendurchfahrt am Rand nid ahschlöh, wärde si vo jeweils sechs bis acht schwere Diesel Lokinä und Stahlseili stabilisiert. Ä Durchfahrt choschtet durchschnittlech rund
1 Mio. USD pro Schiff‼️

Es isch würkli wahnsinnig imposant, wemä gseht wie sones riiese Frachtschiff belade mit tuusige vo Container die Schleusene dürquert!Read more