Südostasien

Hüt isch Tag der Wahrheit gsi. Klappt de Transport richtig Malaysia, oder ebe nöd. Nachdem mir 15 Minute spöter als erwartet vomene Roller mit Beifahrersitz abgholt worde sind hets schomol guet usgseh. Mitm Van sind mir losgfahre bis es ufzmal gueisse hetn,ir müsset de Bus wechsle. Aber es isch top organisiert gsi und so hend mir neui Tickets becho und hend 40 Minute spöter in en andere Van chöne iistiige. So wies usgseht reiset Touristenweniger mit dem Verkehrsmittel, denn es sind mehrheitlich nur Iiheimischi unterwegs gsi. In Satun acho het de erst Teil vo dere Reis schomol klappt, morn söttis den mit de Fähre wiiter uf Malaysia go. In Satun chan mer leider nöd viel mache. So hend. Ir de Nomitag imene Kaffi mit Spiili spiele verbrocht. Denn hend mir üs uf d Suechi nachere Thai Massage gmacht und sind durch die halb Stadt glofe. Denn wills do überhaupt nöd touristisch isch, gits au ned würkli e Uswahl. Nachdem die erste Salons wo mir gfunde hend zue gha hend sind mir a eim verbii glofe. Zwei mega herzigi Thai-Fraue hend das Studio betriibe. Will sie fast kei Englisch hend chöne, hend mir üs mit Händ und Füess verständigt. Nach de Massage hends gfraget öb mir an en night market wönd. So sind mir bi ihne uf de Roller gstiige und sie hend üs durch de Markt gführt. Aschlüssend sind mir ines resti und hend üs mittel Google Übersetzer verständigt. Sie hend eifach üse Znacht zahlt gha, obwohl mir sie hend wölle iilade. Aschlüssend hend sie üs mitm Roller bis as Hotel gfahre. Was für en Service. Und will mir nöd hend chöne verantworte, dass sie für üs zahlet. Hend mir ihne e grosszügis Trinkgeld wölle ge, wo sie aber nur wiederstrebend agno hend. Schliesslich seget mir ihri Fründe und da machets doch gern eifach so für üs. A dem letze Obig hend mir die Thailändisch Gastfründschaft nomel i volle Züg dörfe erlebe. Was für wunderbari Lüt i dem schöne Land doch lebet.Baca selengkapnya