Reset search
Lea WeidmannLea Weidmann
SatelliteEdit route
traveled in 12 countries Read more Winterthur, Schweiz
  • TravelerSüdamerika
    Day 55

    Ab as Meer… ääh See!

    December 3, 2022 in Peru ⋅ ☀️ 12 °C

    D‘Nachtbusfahrt isch wiedermal maximal unchillig gsi. Die erste 2 Stunde hemmer eus eine abgfrohre und nacher isches immer heisser und heisser worde, bises fasch nüm uszhalte gsi isch. Am halbi 6i am Morge simmer den in Puno ahcho. Mir hend am Busbahnhof den grad no s‘Billet für die nögst Busfahrt uf Copacabana glöst und sind den mitem Taxi is Hostel Iguana gfahre. Mir hend den det zum Glück no dörfe de Zmorge mitesse, will am 7ni simmer den scho für eusi Tagestour abgholt worde. Mitem Auto simmer an Hafe vom Titicacasee und den vo det uf es Boot. Mir sind den mitem Boot zu de bekannte schwümmende Insle Uros gfahre und hend det „d‘Mensche wo ez na det Lebed“ chöne go bsueche. Ich schriib das in Ahfüehrigszeiche, will mir doch seeehr sicher sind, das det druf gar niemer me lebt. Es het alles gwürkt wie eis Theaterspiel und „d‘Wohnige“ wo mer hend dörfe ahluege sind überhaupt nid authentisch gsi… Aber bim spötere Ustusch mit anderne Tourteilnehmer, hemmer vlt au eifach chli Pech mit de Insle gha. Nacher simmer mitem Boot 1.5h zunere andere, aber richtige Insle Taquile gfahre. Au det het wieder eis Schauspiel stattgfunde und die iiheimische hend für eus tanzed und gsunge. Mir sind denn nachli umd d‘Insle gloffe und d‘Ussicht isch natürlich wieder wunderschön gsi. Au mitem Wetter hemmer wieder Glück gha. Mir hend den imene chline Resti en feine Zmittag becho. Mir hend eus uf de Tour na mit einere Schwiizerin de Giulia und 2 dütschi Jungs ahgfründed, mit dene mirs echt na lustig gha hend. Geg die halbi 3 hemmer eus wieder ufs Boot begeh und sind wieder zrugg uf Puno cruised, wo mer am 4i ahcho sind. Im Hostel hemmer schnell üses Zimmer bezoge und sind mit de Giulia uf en Kaffi im Cafe Bar de la Casa del Corregidor. Mir sind dete denn recht verhocked und hend grad no Znacht gesse det und chli Bieberbandi gspielt. Im Gspröch hemmer usegfunde, dass Giulia au in Samara ih de Sprachschuel und sozege bide gliiche Gastmuetter gsi isch wie ich😱 Zuefäll gits! Aber ez hani nurno es umso grösser Verlange wiedermal det hii z‘gah und luege wie sich das Dörfli verändered het.Read more

    See translation
  • TravelerSüdamerika
    Day 54

    Stadttag in Cusco 2.0

    December 2, 2022 in Peru ⋅ ☀️ 19 °C

    Hüt bini wieder früeh wach gsi. Am 7ni hani es Telefondate gha und bin mer vorher na en Kaffi go hole. Mir hend den so de ganz Morge chli im Hostel verchillt, bis mer denn am 10ni hend müesse uschecke. Mir sind denn is Kafi La Rabona go Zmörgele. Eigentlich hemmer denn na es Museum welle mitneh, aber das isch den grad am umbaue gsii… Denn simmer halt direkt an Mercado San Pedro. Eh riise Halle mit ganz viel Souvenir-, oder Essensständ. Langsam aber sicher chömmer ahfange Souvenirs chaufe, ohni sie no 300 Jahr müesse mitzschleicke. Geg die 2 hemmer den welle ine Bar hocke, zum de Schwiiz Match luege. Mit viel liebi hemmer eus den es chliises Vegetarisches Resti (Greens) usglese wo au Mezzeteller ahbütet. Mir sind den ineghocked, mit Sicht uf de Fernseh, numme zum den müesse feststelle, dass ja Brasilie vs. Kamerun glichziitig lauft und sich da in Südamerika absolut niemer für d‘Schwiiz intressiert🤦🏻‍♀️🤦🏻‍♀️ Ih de Pause hemmer den Location gwechslet ihne Sportsbar (Papa Cho’s) mit meeega viel Fernseh. Mir hend den mega lieb gfröged, öbs nid zumindest uf eim Fernseh chönd de Schwiizmatch laufe lah. Natürlich nid, obwohl die halb Bar leer gsi isch👀 denn hemmer üs ufm Handy es VPN ihgriichtet und ihn so glueged… defintiv spannender gsi als de ander Match😅. Nacher simmer nomal chli umegloffe, hend üs na en Kaffi gholt, sind go dusche und geg die halbi 7ni wieder is Papa Cho‘s gsesse. Mir hend am Namitag scho gseh, was für geili Burger die ahbüütet. Nacher hemmer eus wieder chli umd Planig vo de nögste Täg kümmered. Mir hend Hostels und Büs buecht. Bis mer denn gmerkt hend, dass mer üs bim einte Hostel um en Tag verplant hend😂 Storniere hemmer irgendwie nüm chöne, jetzt bliibemer halt in Puno en Tag länger… Geg die 9ni hemmer eus den vom Hostel us es Taxi as Busterminal gnoh. Hüt hemmer üsi 2t letzti Nachtbusfahrt vo eusere ganze Reis… Isch en Teil wo mir sicher nid vermisse werded…Read more

    See translation
  • TravelerSüdamerika
    Day 53

    Stadttag in Cusco

    December 1, 2022 in Peru ⋅ ☀️ 21 °C

    Es isch tatsächlich scho Dezember. Es isch unglaublich wie schnell die Ziit da umegaht. Und bi dene tägliche 25 Grad isches au schwär in Wiehnachtsstimmig zverfalle. Aber Cusco git sich da ganz viel Müeh. Überall lauft Wiehnachtsmusig und au de Plaza des Armas isch gschmückt mit Wiehnachtsbelüchtig. Mir hend de Tag ganz ruhig gstartet und sind zersch mal go fein Zmorge esse. Nacher hemmer die 4 berüehmte Inkaruine rund um Cusco welle go ahluege. Z‘Fuess und mitm öffentliche Bus hemmer eus uf de Weg gmacht.
    Station 1: Saqsayhuaman
    Eh Festig wo bizli erhöht isch in Cusco. Sie isch Teil vo de Muur rund um Cusco gsi und isch genau bim Aug vom Puma gsi (Cusco het d’Form vomene Puma gha) Also isch sie mit ihrne 3 Wachtürm sicher gmacht gsi zum Usschau halte. D‘ Festig isch baut worde us riise Stei, wo bis zu 12.5 Tonne schwer sind und so perfekt gformt sind, das sie super inenand inepassed.
    Station 2: Puka Pukara
    Heisst in Quechua „rote Festung“, da d‘Stei wohl mal rot gsi sind.👀 Es isch wahrschindlich mal en militärische Stützpunkt gsi und mer het Ware glageret wo über d‘Staffeteläufer ustuscht worde sind. (Staffeteläufer hend dazumals es schnells Postsystem garantiert. Ih dem sie wie inere Staffete über d‘Ande grennt sind und sich so abgwechslet hend.
    Station 3: Tambomachay
    En Tempel wo binere natürliche Wasserquelle erbaut worde isch. Isch wahrschindlich als Weihwasser für heiligi Zeremonie gnutzt worde.
    Station 4: Q‘enko
    Isch um en grosse heilige Stei baue, wo wahrschindlich mal en Puma dargstellte het. (Kondor het die Überirdisch Welt dargstellt, Schlange die Unterirdisch und de Puma die irdisch. Ente als Verbindigstier, will sie cha laufe, schwümme und flüge.) Es isch en grosse Felskomplex mit viel Schnitzereien ih de Stei. Inere Hölli hets au en Art Altar, wo drum Opfergabe vermuete laht.
    Nachdem mir das alles Besichtigedhend simmer zrugg an Plaza des Armas und hend en Kaffi gnoh. Nacher simmerno ines Muesum, wo chli d‘Entwicklig vo Cusco dargstellt het bis zrigg id Steiziit. Es Schoggimuseum hemmer auno mitngnoh, wo mir viel hend dörfe probiere, unter anderem au en Schoggi-Tee. Nacher simmer langsam is Hostel zrugg und hend eusi Rücksäch umpackt. Da es in nögster Ziit wohl so heiss bliebt, hemmer die dicke Sache ganz une in Koffer verdammt. Nacher simmer wieder los und hend bim Inka Grill es glas Wiisii zum Apero gnoh. Genau ih dere Ziit hets in Cusco grad en Stromusfall für öppe 20 Minute geh und es isch grad richtig schön gsi uf dere Terrasse z‘sitze. Go Znachtesse simmer bim italiener La Bodega wos eh richtig geili Lasagne geh het. Nacher simmer im Molly‘s nomal uf en Schlumi und den gli zrugg is Hostel go Pfuuse.    Read more

    See translation
  • TravelerSüdamerika
    Day 52

    Dur‘s Tal zrugg uf Cusco

    November 30, 2022 in Peru ⋅ ⛅ 20 °C

    Hüt Morge hemmer absolut kein stress gha und hend eifach mal in Ruhe usgschlafe. Geg die halbi 9ni simmer im Hostel go Zmorge esse. Es sind na öppe 5 anderi det scho am esse gsi und jede isch chli komischer als de ander gsi😅 was chli schad gsi isch, will mit 3 vo ihne werdemer de hütigi Tag verbringe. Mir hend nämlich es Taxi bstellt, wo eus dur s‘Tal fahrt und bi allne wichtige Sehenswürdigkeite churz ahhaltet und eus Ziit laht zums ahluege und eus am Schluss in Cusco wieder abladed. Am halbi 10ni simmer losgfahre und glii zu eusem erste Halt cho. Es isch es Terrasseartigs Loch im Bode gsi mitem Name Moray. Mit dem hend Inkas s‘Klima vo de Küste au ide Berge chöne imitiere, zum au Coca-Blätter waschse lah. Denn simmer zu de Salzterassene vo Maras gfahre. Det wird in über 3000 Pools verschiedeni Salze hergstellt. Spöter simmer no zunere Alpakafarm, wo mer de Prozess gseh hend, vom Alpaka schäre bis zumene schöne Pulli. De letzti Halt hemmer in Chinchero gmacht. Ebefalls en ehemaligi Inkastadt, wo en wichtige Inka residiert hett.
    Geg die 4i simmer in Cusci ahcho und mir sind direkt im Plaza des Armas en Iiskaffi go neh. Nacher simmer wieder is gliiche Hostel (Homman) go iihvhecke, da mer det auna euse grosse Rucksack lah hend. Mir hend grad wieder eh Wösch ufgeh und sind go Dusche. Go Znacht simmer imene richtig feine Resti go esse. Eigentlich isches eher eh Tacoria gsi (also Mexikanisch) aber sie hend au richtig feins indisches Esse uf de Charte gha. Also isches doch es Curry worde👀. Nacher simmer no ines irish Pub (Mollys) gsesse mit live Musik. Es isch fascht so ne Art Usgang gsi für eus💪🏻 Es hett es paar Rundene Drinks und 4-Gewinnt geh, bis mir denn geg die halbi 12i wieder zrugg is Hostel sind.    Read more

    See translation
  • TravelerSüdamerika
    Day 51

    Ab is Valle Segrado

    November 29, 2022 in Peru ⋅ ☁️ 16 °C

    Nachere würklich miserable Nacht (shoutouts gönd use ade Barkeeper vo Gester) hemmer das wunderbare Örtli Aguas Calientes müesse verlah. Nach dem mir im Hostel gesse hend, simmer am 10vor 9ni wieder uf de Zug. Da zwüsches Cusco und dem Dörfli verchehrt nur de PeruRail. Euse Guide ufem Machu Picchu het gester erchlärt, das die Linie eigentlich de Britte ghört und de ganz Gwünn drum uf England gaht und d‘Locals, auf ein neues, devo nid chönd profitiere… Ih eusem Zugwagon isches dasmal richtig Luut gsi. Irgend eh Gruppe vo 10 Lüüt het eis Chäferfest gha und mir hend fast nid normal chöne mitenand rede🥲 zum Glück isches nid allzulang gange und mir sind in Ollantaytambo ahcho. Ollantaytambo ghört (wie au de Machu Picchu) zum Valle Segrado - s‘heilie Tal vo de Inkas. S‘Tal zieht sich entlang vom Rio Urubamba und isch dazumal fliessig vo de Inkas gnutzt worde. Nach dem mir ih eusem Hostel ihcheggt hend, hemmer eus uf de Weg gmacht, das Tal chli z‘erkunde. Für hüt hemmer welle uf Pisaq und dete s‘Dörfli und sini Inkaruine ahluege. Zum det ahnecho hemmer ih 3 verschiedeni Büs mösse. Als Büs sinds eich nid gsi sondern eher so VW-Büs wo 12 Sitzplätz drin hend. Aber wär ja langwillig wen au würklich nur 12 Lüt chönd mitfahre. Drum hets ameö bis zu 22 Lüt det drin gha😂 Pisac selber isch es sehr süesses Dörfli gsi. Inkaruine meets Hippies, echli so het ihres Motto usgseh mit all dene süesse Kaffis. Da mir beide eher uf de Schnorre gsi sind, weg de churze Nacht undem Macchu Pichu ufstiig, hemmer eus de Bsuech da sehr gmüetlich vorgstellt. Doch wo mer zu de Inkaruine gloffe sind, seit eus de Dude am Empfang so: ja ihr chönd ez 2h uelaufe und den wieder 1h abelaufe. Mir hend genau gwüsst, das mached mir nid… mir sind den müehsam de Hoger wenigstens es bizeli durufkragslet und hend de wunderbari Agrarkomplex mit all dene Terassene bestuunt. Nachem Abstieg simmer den na is Kaffi El Encanto en feine Kaffi-Bananeshake go neh. Vom Kaffi us hemmer na wunderbar ih de botanisch Garte inegseh. Während de Rückfahrt ih dene Minibüs het grad d‘Abigsunne is Tal glüchtet und d‘Bergspitze mega schön belüchtet. Ich verstah wieso d‘Inka sich das Tal usgsuecht hend😅 Zrugg in Ollantaytambo simmer imene Resti go Znacht esse und ahschlüssend na neumeds (Sunshine Cafe) go Dessert esse. Mir hend det es Stuck Rüeblichueche und es Stuck Apple-Crumblechueche gnoh und sie sind würklich soooooo feeein gsi😍 Es hett uuh mega gmundet! Relativ früeh, aber trotzdem todmüed simmer den ih euses Bett gfalle.Read more

    See translation
  • TravelerSüdamerika
    Day 50

    Hani Machu Picchu ghört?

    November 28, 2022 in Peru ⋅ ☁️ 14 °C

    Hüt isches sowiit! Am 4:45 het üse Wecker gschelled und mir hend üs rasch parat gmacht zum richtig Busstation z‘laufe. De ersti Bus fahrt bereits am 5:30 und mir wend sicher gnueg früeh det si, dass mer au ih de erste Büs platz hend. Es hett den zum Glück scho für de 2ti glanged und mir sind den de steili Berg 1300 Höhemeter duruf cruised. Hett mer theoretisch au chöne laufe, aber wer wett sich das scho geh🙃. Pünktlich am 6i sind den Tore ufgange und mir hend grad direkt zum erste Fotipunkt chöne gah. D‘Ussicht isch würklich unbeschriblich gsi. D‘Morgesunne het wunderbar uf d‘Ruine glüchtet und sozege kein Mensch isch fängs am durelaufe gsi. Mir hend wunderbari Föteli chöne mache und de Moment richtig chöne gnüsse. Neb de Ruinestadt hend mir auno de Berg Machu Picchu welle duruf laufe. Es het umd Stadt 2 Berge. De Huayna Picchu (junger Berg) und de „eigentlichi“ Machu Picchu (alter Berg). Pünktlich am 7ni hemmer eus für de Ufstig am Ihgang ihgschriibe. Det hetts auna en Zettel gha, das de Ufstieg vo 655 Höhemeter uf 3085 müM in 2670 Stegetritt z‘bewältige isch. Das hemmer denn au nach genau 1.5 Stunde gschafft. Es isch au nid mal sooo mega streng gsi und d‘Ussicht zwüscheddure natürlich wiedermal überwältigend. Mir sind die 3&4 Mensche gsi wo dobe ufm Gipfel ahcho sind. Zum verschnuufe hemmer den üses Sandwich gesse und es Gipfelbier het au nid dörfe fehle. Spöter bim abelaufe hend üsi Bei amel soo fest zitteret, wenn mir churz stahbliibe sind😂 Es sind üs au langsam recht viel Mensche entgegegloffe und mir sind richtig froh, simmer so früeh losgange und hend de Gipfel für eus ellei gha. Wieder ide Ruinestadt ahcho hetts au meh Lüt gha. Mir hend eus den na en Tourguide gnoh für de Rundgang ide Stadt selber. Natürlich bini, wie immer, erstuunt über das Inka-Volk. Ich bin richtig gspanne, was mer ih dem „heilige Tal“ no meh über sie erfahre werded. Öppe geg die halbi 2 simmer wieder in Aguas Calientes gsi. Mir sind denn grad ines Resti (El Museo de Papa) mit Fernseh ghockt, ide hoffnig nochli vom Schwiizmatch chöne mitzneh, aber hend de leider verpasst. Mir hend im Resti eh Portion Nachos bstellt, aber die „Chips“ hend meh Ähnlichkeite zu Fasnachtschüechli gha, also zu würkliche Chips… defür isch d‘Guacamole geil gsi. Denn simmer zrugg is Hostel hend rasch dusched und chli chillt. Geg die 6i simmer wieder is Dörfli zrugg und sind bim italiener (Incontri) go richtig feini Gnoccis go esse. Doch mer het üs ahgmerkt wie fertig mir sind. Entweder mir hend eus vor lache nüm chöne erhole, oder mir sind eifach det ghocked und hend chli id Nacht usegstarrt. Nacher hemmer na en Pisco inere Bar welle nä, wo au chli öppis lauft. Schlussendlich simmer aber inere echt schmudlige Bar (Orquidea’s Grill) glandet🙃. De Pisco isch aber glich fein, zwar stark, gsi. Am 9ni simmer den müed is Bett gfalle und sind froh, chömmer morn bis am halbi 8i usschlafe.Read more

    See translation
  • TravelerSüdamerika
    Day 49

    Aguas Calientes

    November 27, 2022 in Peru ⋅ 🌧 9 °C

    Hüt hemmer Cusco wieder müesse verlah. Am 7ni simmer go Uschecke und hend üs den grad es Uber bstellt. Mir hend müesse uf Poroy zu de Zugstation. Zum Glück isch Taxifahrt nur 30 Minute gange. Im Wartesaal hettmers de Lüt genau ahgseh, öb sie uf de tüüri Zug gönd, oder wie mir, uf die billig Variange. Die riiche hend sogar no en Champagner uf de Weg becho. Aber au üses Zugabteil isch ganz okeii gsi. Nur müehsam sind d‘Fenster ide Decki gsi, wo d‘Sunne hett chöne dureschiine und eusi Sitzplätz maximal erwärmt hett. Geg die 12i simmer den in Aguas Calientes ahcho. Es isch eim wieder vorcho als wäremer imene ganz andere Teil vo de Welt. Mer isch würklich zmitzt im Tal und überal gönd steili Wänd de Berg duruf und s‘Wetter isch wieder sehr tropisch. Ih eusem Hostel Usgar Machu picchu het de Mitarbeiter ah de Reception eus die letzte Informatione erchlärt. Mir sind denn grad direkt ines Kaffi und hend mal chli entspannt. Nacher simmer im Dörfli chli umegloffe und sind genau an Andi anegloffe. Er isch mit eus ufm Galapagos-Schiff gsi und isch grad Hüt scho ufm Machu Picchu obe gsi. Sie hend üs chli verzehlt, wies für sie gsi isch und hend den ganz nebedbii erwähnt, dasser ja ab morn zue segi. Mir hend zersch gmeint er verarschi üs, aber er hetts tatsächlich todernst gmeint. Es heged anschienend scho es paar Lüt sie drufhii gwiese. In Cusco sinds scho sit längerem am protestiere, das hemmer nämlich auscho dete erläbt. D‘Regierig will nämlich es neus Gsetzt erlah, das alli Ihnahme vom Tourismus uf Lima göne und den dete „fair verteilt werded“. Jede weiss, dass denn die Communitys da, wo au härt schaffed, leer werded usgah. Mir sind denn eher gschockt gsi und hend denn ahgfange recherchiere. Und tatsächlich isch überall gstande, dass abem 28.11 Cusco und Region in en Streik gönd uf unbestimmti Ziit. Grandios! Mir sind denn nomal im Hostel go fröge, öb sie öppis wüssed. Sie hend eus bizli chöne beruhige und gseit sie heged bis ez na kei Informatione und es segi generell illegal de Machu Picchu zuezmache, aber garantiere chengeds nüt… Mir werdeds mirn wohl gseh. Mir sind denn nochli dur de Märt gloffe und hend es paar Ohrering und Fingerring kauft und sind denn is Resti Fullhouse go Spieli Spiele und Znacht esse. Relativ glii drufabe simmer zrugg is Hostel und go pfuuse.Read more

    See translation
  • TravelerSüdamerika
    1
    Day 48

    Rägäbogä-Bärgä

    November 26, 2022 in Peru ⋅ ⛅ 6 °C

    Hüt hett eus de Wecker am 3:45 usem schlaf gholt. Und am 4i simmer ready vor eusere Hosteltür gstande, da pse Tourguide gseit het, er holli üs zwüsched 4:00 und 4:10 ab. Natürlich sinds ersch öppe am 4:30 ihtroffe und au denn hemmer nomal 30min uf de letzt Gast, de Tristan😒, müesse warte, will de wohl verschlafe het. Am 5:00 simmer denn endlich losgfahre. Leider hani den nüm chöne nappe im Bus, aber das isch oke gsi, will mir wieder dur die wunderbari Andelandschaft duregfahre sind. Geg die 7ni hemmer neumeds für dd Zmorge ghalte und es hett det richtig nice Frücht und Pancakes geh. Nachere wiitere Stund Autofahre simmer bim Parkplatz ahcho und denn hets gheisse: laufe. Vo 4700müM hemmer müesse uf 5300müM und au das mal hemmer gschnuufed wie es Wahlross. Es wird wohl nie eifacher😅 Aber au das mal hett sich d‘Ussicht meh als glohnt. Uf de rechte Siite hett mer de Regebogeberg gseh, gradus eh wunderbari Ussicht jf ganz viel Bergchettene und uf de linke Siite en Berg miteme riise Gletscher. So öppis schöns hani würklich scho lang nüm gseh, Länger wie 40 Minute hemmer aber nid dörfe dete verwiile, wills susch weg de Höchi gföhrlich wür werde. Au mir hends chli im Chopf gmerkt. Aber es guets Mittel isch Te de Coca. Also en heisse Ufguss us Kokablätter, us dene mer au Koks macht. Das putsch eim es bizeli uf und regt Durchbluetig ah. Ufem Zruggweg hemmer wieder neumeds ghalte für de Zmittag und geg die 4i simmer wieder zrugg in Cusco gsi. Wo mer usm Bus usgstiige sind, simmer üs vorcho wie imne falsche Film. D‘Stadt isch pumpe volle gsi, überall Polizei, irgend en Umzug mit vielne Musiker*inne und traditionell ahgleiti Tänzer*inne. Und am Abig isch ufem Platz no irgend eh Kundgebig gsi👀 Das ganze hemmer nämlich chöne beobachte vonere Terrasse, wo mer grad en Pisco Sour am schlürfe gsi sind. Währendbii hemmer na die letzte Sache für de Machupicchu müesse plane. Da mer nur mitem Zug und ahschlüssend Bus cha ahreise und d‘Azahl vo de Touriste beschränkt isch, isch das ganze amel müehsamer (und türer🥲) als mer denkt. Defür stiigt d‘Vorfreud umso meh. Womer langsam hunger becho hend simmer is Resti Green Falaffel go Znacht esse. Das isch au eh ganz komischi Situation gsi. Es het üs en 12 Jährige Bueb bedient, wo die ganzi Ziit gseit het, sie hegged die Sache nid da, obwohl mer s‘Bier im Schrank gseh hend👀 Und wo mer fertig bstellt hend, ischer eifach am Tisch stahbliibe, und woni denn gfröged han, öb alles guet isch hetter de Chopf gschüttlet. Irgendwenn ischer denn id Chuchi gloffe. Ganz eh cringi Situation. Aber s‘Esse isch schlussendlich cho und sehr fein gsi. Es isch aber na spannend z‘beobachte gsi, wie jedi wiiteri Gast genau gliich gstruggled het mit dem chliine Bueb😂
    Uf all Fäll simmer den würklich völlig fertig am 8i im Hostel ahcho und hend nurna welle go Dusche, packe und den go pfuuse. Aber denn het Jenny plötzlich ihre Pass etc nüm gfunde. Und wo üse Puls denn uf 300 gsi isch und mir s‘Gepäck ewigs dursuecht hend, hemmeren zum Glück wieder gfunde. Defür isch d‘Müedigkeit weg gsi…
    Wenigstens chömmer morn doch bis am halbi 7ni schlafe..    Read more

    See translation
  • TravelerSüdamerika
    Day 47

    Cusco

    November 25, 2022 in Peru ⋅ ☁️ 19 °C

    D‘Busfahrt isch wiedermal nid soo mega toll gsi. Aber gliich hemmer d‘Nacht irgendwie umebracht. Geg die 8i am Morge simmer in Cusco ahcho und sind direkt ih euses Hostel go Ihchecke. D‘Rüüm hemmer leider nanig chöne bezieh. Mir hend üs den uf de Weg is Städtli gmacht und sind neumeds go Zmorge (Cafe Macchiato) esse. Denn simmer chli umegloffe und hend bim Büro PeruRails eusi Zugbillet für de Weg nach Aguas Calientes müesse go abhole. Zu dem Dörfli chunt mer ebbe leider nur mitem Zug. Zum Glück jet alles riibigslos klapped. Mir sind denn no bizeli go poste und ich ja denn na so en richtig nice Fasi vo patagonie kauft👌🏻 Am Namitag simmer wieder ane Free-Walking Tour. De Guide het würklich soooo unglaublich viel gwüsst und so viel spannendi Sache zu Cusco und zu de Inkas chöne verzehle. Zum Biespiel au, dass mir eus grad imene La Niña Jahr befindet. Das heisst ez für eus, dass sich d’Regesaison das Jahr chli hindere verschiebt und ersch im Januar 23 z’erwarte isch. Was eich guet für eus isch, will denn wärded mir weniger verrägnet wie denkt👀. Defür wirds aber am Namitag amel chli chälter wegem Wind. Aber das chömmer handle. Au während de Tour isches immer chälter worde und mir immer müeder. Völlig erschöpft simmer den is Resti Qura gsesse und hend üs binere Tasse Tee ufgwärmt. Eh feini Bowl hetts denn auna geh. Zrugg im Hostel simmer eich wieder relativ früeh is Bett, da mir morn wieder früeh abgholt werded…Read more

    See translation
  • TravelerSüdamerika
    Day 46

    Arequipa

    November 24, 2022 in Peru ⋅ ⛅ 17 °C

    Hüt hemmer wieder en ruhige Tag vor eus gha. Drum simmer in ruhe ufgstande, hend packed und uscheckt. Nacher simmer im Yea Rico go zmörgele. Natürlich hets wieder en Avocado-Toast geh. Denn simmer neumeds en Kaffi go hole und sind gmüetlich in Plaza des Armas ghocked und hend d‘Sunne chli gnosse. Geg die 12i simmer den is Museum Santuarios Andinos. Det isches um d‘Opferigszeremonie vo de Inkas gange. Immer nacjere Naturkatastrophe wie z.B en Vulkanusbruch, es Erdbebe oder de el Niño hend sie s‘Gfühl gha, Götter seged hässig uf sie und sie mössed es Opfer bringe. Das hends au gmacht in Form vomene Chind. In Ande hett mer bis hüt 16 Chinde gfunde und ih dem Museum het mer „Juanita“ chöne go aluege. Es 12 jöhrigs Meitli, wo mer im Iis gfunde het und drum no sehr gueg zwäg isch. Es isch em sehr gruslige Ahblick gsi, aber s‘Museum selber sehr spannend. Nacher hemmer chli Abwechslig bruucht und sind anen Pisco-Workshop gange. Dete hemmer wieder viel chöne probiere und hend glernt was de Unterschied zwüsched em peruanische und em chileanische Pisco isch. Es isch nämlich schwirig zum sege, vo wo das er würklich chunt. Aber de chilenischi isch stärker, de peruanischer defür aromatischer, da jewils en anderi Kombination vo Truube brucht wird. Nacher hemmer uf de Rooftopbar üsi 3 Pisco Sour gschlürft, nomeh Sunne gnosse und über Gott und die Welt diskutiert. Wos denn langsam chli z‘heiss worde isch, hemmer es Glace brucht und sind en McFlurry go hole mit de Sublime Schoggi (peruanischi Schoggi wo chli wie Reeses schmöckt). Denn hemmer imene schöne Innehof bim Las Gringas en Wiiswii gnoh und hend chli Bieberbandi gspielt. Wo‘s denn endlich Ziit für de Znacht gsi isch simmer is El Buda Profano gange, es vegans Sushi-Restaurant. Det hemmer so es Probier-Menü bstellt. Es hett miteme Gurkesalat ahgfange, mit Gyozas wiitergange, denn eh feini Sushiplatte und mitere Misosuppe hets ufghört. Au wenns eher chliini Portione gsi sind, hemmer nur 8 CHF pro Person zahlt. Denn simmer zrugg is Hostel und hend eus ready für d‘Busfahrt gmacht - über d‘Nacht gahts nämlich endlich uf Cusco!!Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice