Reset search
Lea WeidmannLea Weidmann
SatelliteEdit route
traveled in 12 countries Read more Winterthur, Schweiz
  • TravelerSüdamerika
    Day 74

    Heimreise

    December 22, 2022 in France ⋅ 🌧 13 °C

    Nachere eher unruhige Nacht simmer am 8i ufgstande und hend uf es letzts mal üsi Rucksäck packt. Bevor mer aber am Flughafe sind, simmer na ines Kaffi de letzt Avocadotoast go esse. Nachene simmer voll bepackt zersch mit de Metro und nacher na mitm Bus an Flughafe gfahre. Für d‘Sicherheitskontrolle und de Zoll hemmer den eeewigs müesse Ahstah. De Mitarbeiter ih eusem Hüüsli bim Grenzustritt isch währendbii mit de Chopfhörer am Serie luege gsi und het üs keines Blickes gewürdigt. Die Arbeitsmoral da isch echt chli fraagwürdig. Nachem ewige Marsch ah euses Gate hemmer na gschnell es Sandwich gholt und im Dutyfree es Pack Reeses, wo so tüür gsi isch, dass ich das da lieber nid erwähn😂 Mir hend den gli chöne in Flüger stiige und üsi 24 Stündigi Heireis chöne ahtrette…
    De ersti Flug uf Paris mit de AirFrance isch würki sehr ahgnehm gsi. Es isch zwar immer es riise gläuf gsi, aber defür hets ganz hine im Flugi eh chliini Snackbar gha und mer het det immer gratis Getränk und Esse chöne hole und chli det stah und mitenand schwätze. Het de lang Flug grad chli ahgnehmer gmacht. Mir hend sogar 1,2 Stündli chöne nappe.
    In Paris ahcho simmer grad uf de Zug richtig Stadt. Bi de Busstation hemmer üs na en Kaffi gholt, will mer na es silli hend müesse uf de Bus warte. Isch würkli de grusigsti Kaffi uf eusere Reis gsi. Nach de Busfahrt simmer den tatsächlich bim Eiffelturm ahchoo. Bim Wiehnachtsmärt grad nebeddra hemmer na en Glüehwii gnoh. Da mir eh d‘Nacht duregmacht hend, isches üs gar nid so vorcho, als würemer grad am Morge am 10ni de erst Glüehwii trinke👀 Denn hemmer eus na es herzigs Kaffi (Kozy Bosquet) gsuecht und hend richtig feini Pancakes zum Zmittag/Zmorge/Znacht?? gesse. Es isch soo komisch vom Spanisch uf Französisch gwechsle. Ich glaub mit hend meh Gracias wie Merci zu de Lüt gseit😂
    De letzt Flug vo Paris uf Züri het den na eh halb Stund verspöötig gha. Aber nacher simmer guet ahcho und sind beidi vo psere Familie abgholt worde. Mir sind denn no an Wiehnachtsmärt und hend s‘schööne Winterthur gnosse.    Read more

    See translation
  • TravelerSüdamerika
    Day 73

    Letzti Tag in Santigo

    December 21, 2022 in Chile ⋅ ☀️ 31 °C

    Hüt isch ganz klar en ruhige und gmüetliche Tag ahgseit gsi. Mir hend uspfuused und eus irgendwenn uf de Weg gmacht wieder im Wonderland Cafe en feine AvocadoToast z‘esse. Nacher hemmer grad welle uf de chliini Huusberg Cerro Santa Lucia ufelaufe, solangs nanig sooo heiss isch. Mir sind die wenige Steggetritt uegloffe, ohni eus grad d‘Lunge usezchotze. Hoch lebe die Küste 🙌🏻 D‘Ussicht isch au sehr schön gsi und mer hett bis ad Sandhügel am Rand vo de Stadt gseh. Au s‘Liecht hett eim z‘erchenne geh, dassmer zmitzt ih de Wüesti sind. Nacher hemmer ine Mall welle gah, da mers de Tag dur ih de Stadt selber eh fasch nid ushaltet. Mir sind denn entlang am Fluss Mapoche füre gloffe. D‘Mall isch riiisiig gsi und bumsvolle. D‘Lüt sind wohl chli im Wiehnachtsstress gsi. Im oberste Stock hets sone Foodmeile gha, mit sicher ca 50 verschiedene Foodständ. Geg de Mittag isch würklich gfühlt jede einzelni Tisch det bsetzt gsi und überall sinds ahgstande. Mir hend eus bim Cinnabun wieder eh feini Zimtrolle gholt.
    Wo mer den us de Mall use sind, het eus d‘Sunne wieder fasch erschlage. Mir hend üs denn dezue entschiide mit de Metro zruggzfahre. Am Abig simmer ines Resti go Ramen esse. Während em esse simmer na vonere Dragqueen-Perfomence unterbroche worde. Was unteranderem zeigt, wie weltoffener die Stadt isch, im Gegesatz zu de andere latinamerikanische Städt, wo mir hend dörfe bsueche.
    Nacher simmerna im Partygässli en letzte Pisco Sour und en Sangria go neh und hend üs en schöne Abschluss für die Reis gmacht…    Read more

    See translation
  • TravelerSüdamerika
    Day 72

    Streetart ah de Pazifikküste

    December 20, 2022 in Chile ⋅ ☀️ 21 °C

    Hüt staht die letzti Tour ah. Mir sind am halbi 7ni vom Guide abgholt und richtig Pazifikküste gfahre worde. Zersch hets aber na en Kaffihalt geh. S‘erste Ziel isch d‘Stadt Valparaiso direkt ah de Küste zue gsi. Die isch sehr bekannt für ihri Streetart. Ufm Weg hemmer üsi Gruppe und de Guide chli kenneglernt. De Guide isch en riiiise Schnorri und lost am liebste sich selber zue. Gruppe isch relativ gross und het sochli Rentner-Vibes. Mir hend mit niemer würklich gredt. In Valparaiso selber hemmer en chliine Spaziergang gmacht dur die verwinklete Gässli und ihr Streetart. Währendbii het de Guide es Böxli mitgnoh und die ganz Ziit dür eus chilenischi Musig laufe lah und debii nur bizli cringe tanzed. Zmittag hets den ih de 2te Stadt geh in Viña del Mar. Mir hend au direkt bi de Küste zue ghalte. D‘Freiziit hemmer gnutzt um na sletzt mal am Strand entlang z‘laufe und d‘Füess chli is Wasser z‘hebe. Ufm Rückweg hemmer beidi pfuused. Wo mer in Santiago ahcho sind, simmer grad direkt zu sonere Pommesbude, wo‘s letzti uuh ahgstande sind. Mer het det eh zünftigi Portion Pommes becho und 2 Toppings het mer dezue na chöne welle. Isch würklich na sehr fein gsi. Im Airbnb hemmer üs na rasch frisch gmacht und sind denn nomal is Partyviertel füre. Det simmer ih sone fancy Wii-Bar und hend sones Probierpaket mit 3 Gläser chilenischi Rotwii (Jenny het Wiswii gnoh) bstellt. Dezue no so en geile Brownie mitere Peanutbutter Creme und Glace. Nacher hemmer na d‘Bar gwechsled und hend dd Abig bimene Glas Sangria und Spieli usklinge lah.Read more

    See translation
  • TravelerSüdamerika
    Day 71

    Stadttag in Santiago de Chile

    December 19, 2022 in Chile ⋅ ☀️ 27 °C

    Hüt hemmer wieder richtig usgschlafe. Nach dem mir beid gester müeh gha hend mit ihschlafe mit plötzlich soooo viel Privatsphäre😅 Geg die halbi 10ni simmer id Stadt use und hend im Wanderland Cafe en feine Avocado-Toast und Scones zum Zmorge schnabuliert. Am 11i het d‘Free-Walking Tour ahgfange. Mir hend die verschieden Stadtteil abklappered und na ganz viel Vorschläg vom Guide becho. Mir sind nacher direkt somne Vorschlag nahgange und zum Mercado La Vega Central. De isch au ziemlich riesig gsi und de Bsuech wert. Det hets au ganz viel Chatze gha, um ide Nacht d‘Müüsli det z‘jage. Ih dere Halle chasch au jedes Nahrigsmittel, wo‘d je chöntsch bruuche. Wo mer us de Halme cho sind, hets grad paar Blöck wiiter zünftig brennt. Eh riiise Rauchwulke isch in Himmel gstiige und paar Füürwehrautos sind ah eus verbiigflizzt. Mir hend eus nid beeire lah und sind zrugg is Stadtzentrum. Det hetts gwimmlet vor Lüt. Was eim aber nid cha wundere, da über 8 mio. Mensche da wohned. Jedi Gass mit Läde het ih de Mitti nomal 2 chlini Strasse mit Ständ, wo‘d Lüt ihri Sache verchaufed. Mer weiss amel gar nid wo luege. Mir hend denn glii müesse in Starbucks flüchte um chli abezcho. Es sind au dusse knap 30 Grad gsi😅. Nacher simmer namal dur‘d Läde gschlenderet und hend s‘eint oder ander kauft, wie z.B. eh Handyhülle, wo mis Handy nid mal drin Platz hett🤦🏻‍♀️🤦🏻‍♀️. Mir hend den eusi Iihchäuf rasch is Airbnb bracht bevor mer wieder ufd Gass sind. Ihmene feine Resti hemmer dusse en Falafelsalat und en maximalfeine Sangria gschlürft. Uf de Heiweg hets na es Glace geh und denn simmer na inen Lade, um Zmorge für morn poste. Zrugg im Airbnb hemmer wieder es huere Fest gha und üs vor Lache fasch nüm chöne erhole😂. Drufabe simmer den am 11i is Bett. Morn gahts wieder früeh los…Read more

    See translation
  • TravelerSüdamerika
    Day 70

    WM-Final in Calama

    December 18, 2022 in Chile ⋅ ☀️ 22 °C

    Hüt hemmer eus s‘komplette usschlafe gönnt. Mir sind zwar am 8i scho wach gsi, aber well grested. Denn simmer im Hostel go Zmorge esse und es isch echt de fetisti Zmorge wo mer imene Hostel becho hend. Ahgfange demit, dasses tatsächlich Milch geh het und keis Milchpulver zum ahrüehre😅 Denn hetts tatsächlich Nutella gha und chli Fruchtsalat und sie het jedem Frisch eh Crepe gmacht😍 Mir hend üs Büch voll gschlage und de schöni Morge gnosse. Am 11:40 isch den euse Bus uf Calama gfahre. 2 Stund lang simmer eifach dur die Atacamawüesti gfahre, wo die trochenisti Wüesti vo de Welt isch. Immer wieder simmer ah riise Solar- und Windräderkomplex verbiigfahre. Calama isch au wieder eh grösseri Stadt, wos usem nüt ih die Wüesti gstampft hend. Mir sind denn grad direkt an Flughafe, da mer vo da uf Santiago de Chile flüged. Wo mer usgstiige sind hemmer üs grad innes Kaffi mit Fernseh gsetzt. S‘Final isch scho ide 70 Minute gsi und mir sind grad pünktlich uf‘s 2-0 cho wo glii den zumene 2-2 worde isch. Während de erste Verlängerig simmer den rasch dur d‘Sicherheitskontrolle und hend eus den im Flughafe vor de eint Fernseh gsteölt, wos scho eh riise Truube gha hett. Wo s‘Bording ahgfange het, hetts eich niemer intressiert. S‘Penaltyschüsse isch da viel spannender gsi. D‘Lüt wo grad frisch glandet sind, sind amel grad usem Flügzüg gseckled und zu eus an Fernseh gstande. Es isch würklich sauspannend gsi und de ganz Flughafe, inkl. Mitarbeiter, hend mitzittered und sich mit Argentinie mitgfreut. Wennd überleisch: Mir sind grad zmitzt ide Atacamawüesti und alli lueged uf de Fernseh, uf de gliich Match wie all andere Mensche uf de Welt und sind mit so viel Emotione und Freud debii… Ich glaub kein andere Alass susch schafft das.
    Nacher hemmer s‘Boarding na gschwind hinter üs bracht und sind sogar mit chli verspöötig losgfloge. Geg die halbi 6i simmer in Santiago ahcho. Mir sind denn mitem Bus mal id Stadt gfahre und hend die letzte Kilometer mitem Taxi gmacht. S‘chilenische Spanisch isch echt andersch. Ich verstahns wenig bis gar nid😂. Da mir ih dere Stadt 4 Nächt verbringed unds euse letzt Stopp isch hemmer eus für es Airbnb entschiede und mir hend echt s‘best vom best buecht. Mir sind imene Block im 9te Stock zmitzt im Zentrum. Hend en Balkon mit super Ussicht und mir hend beid es eignigs Zimmer mitem eigene Bad. Das Ganze hemmer genau für 45€ pro Nacht buecht. Nacher simmer na gschwind neumeds go Znacht sueche und hend eus sofort wie dihei gfühlt. Mer bechunt ih dere Stadt nüt vom suschtige südamerikanische Chaos mitüber, es het eher en europäische Flair. Au d‘Abigstimmig het perfekt mitgspielt. Nachere feine Pizza simmer wieder zrugg id Wohnig, hend eus iihgrichtet und sind glii go pfuuse.    Read more

    See translation
  • TravelerSüdamerika
    Day 69

    Tag der Touren

    December 17, 2022 in Chile ⋅ ⛅ 26 °C

    Die ersti Nacht im Chile isch guet aber churz gsi. Am halbi 5i simmer scho für die ersti Tour abgholt worde. Mir hend welle Geysir El Tatio go ahluege. Und am beste macht mer das ganz früeh am Morge wenns no arschchalt, dass mer die Wasserdampfsüüle guet gseht. Eus isch au gseit worde, dasses chalt wird. Aber mit -7 Grad hemmer nid grechnet😂 D‘Geysire sind au würklich schön und iihdrücklich gsi und de Wasserdampf zum Glück au schön warm. So het mer d‘Jenny und mich immer ih dene Süüle gfunde. Glii isch aber denn d‘Sunne füre cho und het eus ufgwärmt. Üse Guide isch au na witzig gsi. En Dütsche wo vo 10 Jahr uf Chile usgwanderet isch und jetzt nid hei chan, will sink Tochter z‘jung isch und er sie so nid dörf mitneh. Er het viel mit eus gred und sini Meinig zum dem Land nid würklich chöne verstecke😅 De Zmorge hemmer den zmitzt ih de Berglandschaft ufeme schöne Parkplatz gnoh. Sie hend ufeme Campingtischli es härzigs Buffet ufgstellt und ufeme Gaschochet no Rüehrei für alli gmacht. Ufm Heiweg hemmer na 2 Stopps gmacht. De Ersti direkt bim Rio Putana zue und mer het au wunderbar uf de Vulkan Putana gseh. Am Fluss zue hend na paar Vicuñas grased und es isch wiedermal en wunderbare ahblick gsi. De 2ti Halt hemmer binere Lagune mit viel Flamingos gmacht. Da die Lagune eher tüüf gsi isch, hend d‘Flamingos wie Ente müesse schwümme und ihre Chopf is Wasser due, dass ihre Schwanz so useraggt. Das hani bi Flamingos 🦩 ez au nanie gseh. Am 12i ca simmer wieder bi San Pedro de Atacama gsi. Mir sind churz is Hostel, hend chli chillt und eus für d‘Namitagstour parat gmacht. Bevor die gstartet hend simmer na is Roots Cafe en Smoothie als stärkig go trinke. De Guide für eusi Namitagstour isch sehr en komische gsi. Und da sozege all andere us eusere Gruppe portugiesisch gredt hend, hett er mit ihne au portugiesisch gredt und mir hend nie cheggt um was dasses grad gaht. Mir hend eus denn versuecht uf d‘Landschaft konzentriere und üs nid z‘fest weg üsere Gruppe ufregge. Zersch hemmer d‘Lagune Cejas chöne bewundere. Det lebed immerna Bakterie wos scho sit de Dinoziit git. Drum dorf mer det au nid drin bade. Aber grad bide Lagune Piedra nebeddra scho. Sie het so en hööche Salzghalt, dass mer det drinn grad schwebt unds mega ahstrengend gsi isch sini Füess Unterwasser z‘bhalte. Wo mer nacher use sind, isch üse Körper au schneewiis vom Salz gsi. Zum Glück hets dete na eh Duschi gha. Nacher simmer na zunere grössere Lagune Tebenquiche gfahre. Ufem Heiweg hemmer au wieder ufeme Parkplatz ghalte und es het en chliine Apero geh. Es isch nid soo gsi, als hettemer gross Bock druf gha no länger mit dene Lüt Ziit z‘verbringe aber de Apero isch echt sehr härzig gsi. Es het für alli en Pisco Sour geh und dezue Chips mkt Guacamole, Chäs, Olive und na viiiles meh. Am halbi 8i simmer wieder im Städtli zrugg gsi und mir sind den grad wieder is Roots Cafe gsesse für en feine Veggie Burger. Wo mer den vor de Tür vo eusem Hostel gstande sind hemmer scho ghört, wie alli det im Innehof hocked und mitenand reded. Au da hett mer eus wieder ahgmerkt, dass mer echt langsam chli Reisemüed werded, will mer grad so kei Lust gha hend wieder mit dene müesse zschwätze und connecte. 😂 Mir hend eus denn lieslig ah ihne verbiigschliiche und hend jegliche Blickkontakt vermiide. Nachem dusche hemmer eus den ines ruhigeres Eggli zruggzoge und nachli organisatorischi Sache gmacht. Mir hend wieder über Peru gredt und nahglese wie schlimm d‘Sitution det isch. Mir hend na kontakt zu de Giulia, wo immerna in Cusco festhockt und hofft vorem 22.12 uf Lima z‘cho für ihre Rückflug. En andere Schwiizer, wo au am 22 vo Lima zriggflügt isch zum Glück na in Bolivie und versuecht Ziit da chli totschlah. Er flügt ez fürs WM-Final uf Argentinie. Es isch komisch z‘lese wie d‘Lüüt ah Orte feststecked, wo mir na vor paar Täg gsi sind. Früeh und müed simmer den is Bett.Read more

    See translation
  • TravelerSüdamerika
    Day 68

    Jeep Tour Tag 3

    December 16, 2022 in Chile ⋅ ☀️ 28 °C

    Hüt simmer am halbi 5i go zmörgele. De Grund: die Geysire, wo mer wennd go ahluege, sind nur am Morge würklich aktiv. Wo mer no uf de Zmorge gwartet hend, simmer chli usegstand und de Sternehimmel isch ganz en andere gsi. D‘Erde dreht sich also tatsächlich. Jetzt het eus de Mond und d‘Milchstrass ahglacht. Bi de Geysire selber hemmer den eh mystische Morgestimmig chöne gnüsse. Überall het de Bode blubberet und Rauch isch ufgstiige. Nacher hemmer binere andere Lagune zue chöne ih natürliche Hot-Tubs go Bade. Während mir das bis zu 40 Grad warme Wasser hend chöne gnüsse, sind nöch nebeddra wieder es paar Flamingos umestolziert. Ufem Weg zu de nögste und letste Lagune hemmer zmitzt ih de Wüesti nomal en Halt gmacht und no s‘letzt Gruppebild gschosse. Bi de Laguna Blanca hets den gheisse Abschied neh. Jenny und Ich sind die einzige ide Gruppe gsi, wo uf Chile übere und nid wieder zrugg uf Uyuni gönd. Au wenn mer die Lüt nur 3 Täg kenned, hemmers glich sehr guet gha und es fühlt sich amel ah, als hett mer viiiel meh Ziit mitenand verbracht. So sind mir den ihnen andere Jeep gsesse, wo eus ad Grenze bringt. Wie immer sehr inoffiziell und ohni jeglichi Frage, sind eus die Migration-Stempel in Pass klatsch worde. Geg die 12i simmer den in San Pedro de Atacama ahcho. Wunderbari 30 Grad hend eus uf de Chopf klatscht. Nach dem mir ih eusem Hostel Campo Base Ihcheckt hend simmer chli durs Dörfli gloffe und hend de nögsti Tag da verplant. Natürlich simmer wieder ih eusi 2 Schwiizerpäärli inegloffe, wl glichzitig wie mir die Jeep-Tour gmacht hend. Spöter simmer nomal is Hostel und hend chli Pauss gmacht bis zum Znacht. Dich irgendwie isch Hüt en ganz komische Tag gsi. Mir sind völlig fertig gsi und hend nüt würklich ufd Reihe bracht. Nachem Znacht simmer froh gsi, hemmer endlich chöne go Dusche und go pfuuse.Read more

    See translation
  • TravelerSüdamerika
    1
    Day 67

    Jeep-Tour Tag 2

    December 15, 2022 in Bolivia ⋅ 🌧 11 °C

    Hüt het de Wecker eus am 6:30 usem schlaf grisse. Mir hend ih dem Salzhostel en Zmorge becho und sind denn scho glii ih euse Jeep ghocked. En lange Tag staht vor eus mit vielne Ussichtspünkt. Mir sind extra so früeh los, dass mir jewiils die Erste bi dd schöne Lagune sind. Mir sind de ganz Tag dur s‘Hochland vo Bolivie gfahre, hend unglaublich schöns Wetter gha und d‘Ussicht isch würklich unbeschriblich schön gsi. Wenn amel na e Herde Vicuñas über d‘Strass gseckled isch, hani mich gfühlt wie ihnere Arte Doku. Mir hend denn immer wieder diversi Hält gmacht bi Lagune mit viel Flamingos, oder Pünkt mit schöner Ussicht ufd Vulkän rundume. Eimal isch üse Fahrer mal ahghalte, wilm er het mösse ufs WC. Mir hends nid chegged und sind au all usgstiige. Per Zuefall hemmer denn ganz viel Chinchillas gseh umehüpfe und plötzlich sind denn na ganz viel anderi Jeeps det gstande und gend die süesse Tierli bewunderet… Defintiv nid so abgloffe, wie sich das de Fahrer vorgstellt hett😂. Öppe geg die 5i simmer ih de Unterkunft ahcho, wo würklich zmitz im nirgendwo gsi isch und chli wie eh Bruchbuude usgseh het. Aber es het tatsächlich en Art Spielruum gha, wo mir denn bis zum Znacht am 7ni chli töggelet hend und es Bier gnah hend. Zum Znacht het üse Guide eus na eh Fläsche Rotwii spendiert, das de letzt Abig gsi isch. Mir sind denn na „lang“ wach gsi und hends ih de Gruppe sehr lustig gha. Bevor mer am 10ni sind go pfuuse hemmer dusse na de Sternehimmel gnosse. Es isch keis Wülchli ume gsi und mer het wieder Sache gseh, wie de Astroidegürtel und de Mars. Au 2, 3 Sternschnuppe sind duregrasst.Read more

    See translation
  • TravelerSüdamerika
    11
    Day 66

    Jeep-Tour Tag 1

    December 14, 2022 in Bolivia ⋅ ☀️ 19 °C

    Hüt hemmer beid gschlafe wie en Stei. Und das auno sehr lang. Am 9ni simmer im Hostel go Zmorge esse und bizli spöter isch eini vo üsem Tourbüro verbiicho und het s‘Geld für die 3-Tages Jeep Tour welle, wo mer gester buecht hend. Pünktlich am halbi 11 isch üse Guide, de Arnoldo eus mitem Jeep go abhole. Üsi Gruppe bestaht no useme Basler, en Kanadier und 2 Bolivianer. Sind alles sehr liebi und herzigi. De ersti Stopp hemmer bimene Zug-Friedhof gmacht. Det sind vieli alti Züg gstande, wo früehner s‘Silber vo z.B Potosi au uf Chile transportiert hend. Denn simmer mitem Auto ab id Salzwüesti. Es isch sehr ihdrücklich gsi, wennd eifach so id wiiti hesch chöne luege und nüt anders gseh hesch. Mir hend eus denn au Ziit gnoh, so lustigi Perspektive Fotis z‘mache. Bimene andere Halt hets weg de letzte Regetäg Pfützene am Bode gha und es het sich alles sehr schön gspieglet. S‘Wetter isch aber immer schlecher worde und es isch richtigi Weltuntergangsstimmig gsi. Eigentlich wär na plannt gsi, de Sunneuntergang z‘luege. Das hemmer aber den wegem schlechte Wetter sii lah. Mir sind denn wiiter is Hostel für d‘Nacht gfahre. Das isch komplett us Salz baue gsi. Am 8i hets Znacht geh und nach de Duschi simmer scho is Bett gange.Read more

    See translation
  • TravelerSüdamerika
    Day 65

    Vo Potosí wiiter uf Uyuni

    December 13, 2022 in Bolivia ⋅ ☁️ 19 °C

    Hüt simmer extra am 8i go Zmorge esse, will mer am 9ni wieder eh Free-Walking Tour da in Potosí hend welle mache. Wo mer uscheckt hend und denn bim Treffpunkt gstande sind, isch aber leider nie en Guide für die Tour cho. Denn simmer halt chli selber umegloffe. Unter anderem simmer ahnen Ussichtspunkt wo mir wunderbar ahn Cerro Rico gseh hend. Oder au wie die Iheimische ihn nennend: De Berg wo‘d Mensche frisst. Eigentlich hemmer d‘Free-Walking Tour vor allem weg dem Berg und sini Gschicht welle mache. Aber da üs ez kein Guide die Informatione cha geh, hemmer sie üs selber beschaffed. Mir sind ihnes Kaffi ghockt und denn hani es paar Reiseblogs usegsuecht und d‘Märlistund het chöne losgah. Im 16 Jahrhundert isch Potosí eine vo de riichtste und bedüütenste Städt überhaupt gsi und das het sie vorallem wegem Silber und Erzvorkomme ih dem Berg chöne bedanke. Sogar s‘US-Dollar Zeiche stammt vomene Stempfel usere Münzraffinere, wo mer eifach s‘ I und s‘S überenand gleit het: $. Wo denn de Pizarro cho isch, hett natürlich die ganz Üsbüütig ahgfange und Potosí hett ah bedüütig verlore. Über 8 Mio. Mensch sind ih de Mine bis hüt ih dem Berg ums Lebe cho und es dchaffed immerno über 12‘000 Lüt det ihne, 2000 devo unter 18i. Ich bin froh, hemmer eus geg eh Füehrig zu dene Miine entschiede. Au wenn die sogenannte Mineros sehr guet verdiened zahleds de Job früehner oder spöter mitem Lebe. Wo mer den gnueg vo dene erschütternde Nachrichte glese hend, simmer mitem Taxi zum Terminal. Leider aber zum falsche und so simmer miteme andere Taxi wieder dur d‘Stadt tuckerled. Am 12:30 simmer losgfahre richtig Uyuni. De Bus isch sehr bequem gsi und so hemmer viel chöne schlafe. Uyuni isch irgend eh Stadt wos usem nüt, zmitzt ide Wüesti baut hend, und so gseht sie au us. Mir hend den einigi Reisebüros abklappered, bis mer den s‘best Ahgebot für die 3-Tägigi Uyuni Salzwüesti-Tour becho hend. Nacher simmer imene süesse Resti Tika go eh feini Erdnusssuppe und würklich sehr geili Pommes go esse. Churz drufabe simmer is Hostel und hend eus ready für d‘Nacht gmacht.Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English