Reset search
Laura GlatzfelderLaura Glatzfelder
SatelliteEdit route
traveled in 43 countries Read more Bern, Schweiz
  • Asien 23
    Day 49

    Nha Trang: Boxestop

    November 6, 2023 in Vietnam ⋅ ☁️ 27 °C

    Trotzt viu Entspannig ar Küste vo Vietnam het ar Lauras Immunsystem sich gmäudet und het ihre signalisiert sie söu no chli meh umeliege. Fiebrig und huestend ischsi drum nüm ar pralle Sunne gläge sondern im Bungalow blibä. Bir Abreis vo Bai Xep hei de d Medis ghulfe für die knapp füfstündigi Busfahrt nach Nha Trang.
    Nach de nüne am Abe simer de imne guete Hotel, mit eigenem Bad, icheckt. Nha Trang isch e Stadt direkt am Meer und mehreri Quelle hei üs vor de trinkfreudige Russe hie gwarnt. Da mr gad nid so ir Vrfassig (und o ke Lust) für die Art vo firä si gsi, simer nume churz ume Huusegge ga es Banh mí ässe und de zrügg is Bett.
    Am nächste Morge heimer beidi z Morgä vom Hotel la si und si bis am Mittag umegläge. Nach däm mr dr Witertransport und d Visaamäudug für Sri Lanka organisiert hei gha, hani dr nächstglägnig Barber ufgsuecht. Mitere unverhofft neue Scheitlä und emne trimmtä Bart bini de churzi Zyt später mit dr Laura no öbis chlises ga ässä u när scho wieder ufe nächst Bus Richtig Mui ne.
    Nha Trang het üs meh dienet für d Strecki i Süde z haubiere, da ono z Wetter recht bewölkt isch gsi heimer üs ufs gsund wärde fokussiert und si nid mau a Strand gangä :)

    Am Nami simer de mitem Bus witer richtig Mui Ne, miteme richtig gmüetleche Bus, wome sogar het chönnä liege. Bi mir isches zwar chli schwieirg wordä mit ligä wägä de grössi aber isch glich gmüetlech gsi!

    PS: mir hei beidi tatsächlech keni Fotos gmacht in Nha Trang, drum gits eifach es Foto vom Bus 😂☺️    Read more

    See translation
  • Asien 23
    Day 47

    Bai Xep: Smashball ar Küste

    November 4, 2023 in Vietnam ⋅ ☀️ 31 °C

    Nach däm mr usm Zug mit de Softseater und de Chäfere in Dieu Tri usgstiege si, hei sich wie a aune Bahnhöf bis iz, vieli Taxifahrer id Empfangshaue drängt. Das nonid mau haubi 6i am Morge gsi isch und gregnet het simer umso erliechtereter gsi, het üs öber vor nächste Ungrkunft abgholt. D Fahrt nach Bai Xep isch när churzwilig gsi, obwohls no einigi Stopps brucht het bis mr e Bankomat gfunde hei wo no chli Geld het übrig gha.
    Bai Xep liegt ar Südostküste vo Vietnam und da’s ab u zue no chli schüttet, ischs definitiv nid Houptsaison. Die so zuvorkommende und unkomplizierte Lüt vor Ungrkunft hei üs, da z Zimmer scho parat isch gsi, bereits la ichecke und so heimer no chli chönne Schlaf nacheholä.
    Nach däm mr de vorem Mittag si ufgstande um e Omelette z esse, hei sich d Wuuchä scho wieder vrflüchtigt gha und dr Blick ufs Meer isch no idrücklecher gsi. Dr Rest vom Tag heimer ufm Liegestuhl im Sand, ig im Schatte u d Laura natürlech ir bräntige Sunne, vrbracht.
    Einigi Stufe und es paar Klettergriffe hets brucht u de ischme unge am Meer gsi. Die no recht grossä Wäue hei Idruck gmacht, mir heis aber nid wöue la si und hei z Badä im Meer gnossä.

    Am Abä hei mr bim vietnamesische „family dinner“ zuegseit gha. Die Ungerkunft het näbst de härzige Bambus-Bungalow wie mir hei gha o grösseri Zimmer mit eigenem Bad und o e Dorm. Am Abä simer de bi däm zNacht aui (die wo zuegseit hei) zämä amne riesige Tisch ghocket und hei mega fein gässä. Näbä viune öbe glichautrige Reisefüdlä us Frankrich, Grossbritanie, Dütschland, Amerika etc. het o dr ganz Staff mitgässä. Si hei sogar d Vegi-Wünsch sich mega z Härze gno, mir hei gspiesä wie Könige.

    Drna hets de Spieli gä, meistens zersch Lotto u später de „Smashball“.
    Ds Spiu hätti gern scho früecher kennt, denn womer no e Billardtisch z Bösinge gha hei (dr Diego und ig hei nid säute ohni Billard-queue gspiut). Bi däm Spiu het jede 3 Läbä und die schwarzi Chuglä muess immer i Bewegig si. D Lüt probiere de ar Reihe na vo Hand mit dr wissä Chuglä die schwarzi z Treffe u bestefaus z versenke. Dank dem zNacht, em Smashball u paarne Bierli drzue ischs relativ eifach gsi mit ganz viune i Kontakt z cho und es isch schwirig gsi d Laura z schla :)

    Da üs dr Ort mit dere wunderbare Ussicht und dr Nöchi zum Meer so gfaue het, heimer gli scho uf 3 Nächt verlängeret. Dr Tagesablouf het sich wiederholt. Mir heis gnossä die viele Idrück vo de letzte Wuche chli la z sackä und si froh gsi kenni witä wägä zrügg z legä, dr Rucksack mau am Bodä la z liege und eifach chli z si.

    Grägnet hets nume no ab u zue ir Nacht und üs het die Meerluft so gfaue, das mir iz ar Küste chli witer abä gö, um a die nächste Stränd ga umezliege. Die nette Lüt vom Staff hei üs de ono dr Bus reserviert und mir hei am Schluss no viu Zyt gha dr dick Hund wo quasi zur Ungrkunft ghört z strichlä. Happy dog, happy Laura 🥰    Read more

    See translation
  • Asien 23
    Day 44

    Hue: Zug, Zitadelle, Zug

    November 1, 2023 in Vietnam ⋅ ☁️ 29 °C

    Im Nachtzug het zersch chli es Chaos gherrscht, wüu irgendwie einigi Plätz neu vergäh si worde und dementsprechend d’Nummerierige nid hei gstumme. Es isch aber zum Glück nid lang gange, bis mir de miteme nette Pärli us Paris e 4er Kabine zuegwise hei übercho. D’Züg und o d’Kabine si i sehr guetem Zuestand und entspreche öpe o üsne europäische Nachtzüg. Nachere recht agnähme Nacht si mir am 10i am morge in Hue acho. Bim Usgang vom Bahnhof si mir grad vo öpe 100 Taxifahrer und Tourguides empfange worde, wo üs aui übertüreti Toure und Fahrte hei wöue adreie. Mir heis de irgendwie us dem Trubel use gschafft und si chli witer weg es Kaffi ga trinke, und hei när es vermuetlech immerno chli übertürts Taxi gno zur Unterkunft. Dert acho heimer sogar scho chönne ichecke, wüu low-season isch, isch z‘Zimmer scho parat gsi. Im Zimmer heimer üs schneu chli früsch gmacht und mau gluegt, wasme in Hue alles so cha mache. Ursprünglech heimer nämlech de Stopp in Hue nur buecht, zum d‘Reis vom Norde i Süde chli chürzer mache. Wüu in Zentralvietnam Regezit inkl. Taifunseason isch, heimer üs drum eifach fürne churze Ufenthalt in Hue entschiede. Hue isch vor allem bekannt für d‘Zitadelle. Sie isch, zur Zit wo Hue d‘Houptstadt isch gsi, d‘Residenz vom Kaiser gsi. Sie besteit us ganz viune einzelne Gebäude, umgäh vo etliche Muure.
    Nachem Mittag heimer üs drum mau ufe Weg gmacht richtig Zitadelle. Underwegs simer no dürne Märit gloffe und no öpis ga z’Mittag esse. De Zuefall hets wöue, das genau im gliche Resti es dütsches Pärli isch gsi, wo mit üs in Japan ufem Fujiusflug isch gsi! D’Wäut isch chli 🤭
    D’Gländ vor Zitadelle isch recht gross, und drum isches es Zitli gange, bismer dür alles düre si gsi. Wüu mir vo de vordere Nacht no chli si mûed gsi und o allgemein scho extrem viu Sache hei agluegt ide letzte Wuchene, heimers beidi recht schnell gseh gha. Und wüu Hue abgseh vor Zitadelle nid mega viu anderi Sehenswürdigkeite het, heimer üs am Namitag spontan entschiede, direkt am Abe grad wieder mitem Nachtzug witer z’gah nach Dieu Tri. Mir hei imene coole Beizli no chli Spieli gspiut und z’Nachtgesse, si zrugg iz Zimmer üsi Sache ga hole und hei wieder uscheckt, bevormer überhoupt richtig icheckt hei 🙈 De Zug isch am 8:45 am Abe in Hue abgfahre, und scho am 5i am Morge in Dieu Tri acho. Wüumer auso quasi mitzt ir Nacht scho hei müesse usstiege, heimer üs dismau für d’Kategorie “softseat” entschiede. Es si eigetlech normali Zugabteil, aber me cha de Sitz abelah, öpe wie imene Flugzüg: Die paar Franke wome da spart heisech definitiv nid glohnt 😂 Mir si fasch die einzige Touris gsi und es isch recht chaotisch zue und härgange. Einigi hei gschlafe, es paari hei lut zeme gredt, de eint het mit üs es politisches Gspräch wöue afah und eini hetsech am 4i am morge e Suppe ufgwärmt. Alles i allem isches aber trotzdem e spannendi Erfahrig gsi! ☺️    Read more

    See translation
  • Asien 23
    Day 41

    Tam Côc: 2 statt 1 Nacht

    October 29, 2023 in Vietnam ⋅ 🌧 24 °C

    Imänä föidalä 17-Plätzer mit verstellbarem Ledersitz simer vom Hafä diräkt Richtig Nimh Binh gfahrä. Es paar Podcasts, e länge Nuck u e Toilettestop später simer in Tam Coc acho. Mitemne riesige Lachä het üs d Familie vo däm Homestay empfange und üs zwöi Velos füre Rest vom Tag zur Vrfüegig gsteut. Imne härzige Beizli heimer de zwöi rundine Cabo gspiut u när zNacht gesse. Da mr bereits sitm viertu ab 6i uf si, simer de nid z spät hei. Natürlech ischs aber scho dunku gsi und da üsi zwöi Flitzer ke Liecht gha hei, si üsi Stirnlampe zum Zug cho. D Laura het sich gopferet und isch im Windschattä blibä, het drfür z Rückliecht gspiut :)

    Die so härzleche Gastgeber hei ke Check-out Zyt, da mr am nächste Tag ufe Nachtzug gö, dörfemer z Zimmer bis am Abä bhaute u so heimer chönne usschlafä. Mit banana-pancake und vietnamesische Orange hei si üs füre Tag gstärcht.

    D Landschaft hie het vieli Parallele mit dere vo Halong Bay. Beidi si mittlerwile vor Unesco gschützt, si Dräiorte vom King Kong Fium gsi und si dank de Kalksteiformatione und ihrne Höhlinä spektakulär. Dr grösst Ungerschied isch, dass hie di meiste vo Land (Riisfäuder) u nid vom Meer umgä si. Knappi zwöi Stund simer ufere chline Bootsfahrt dür die Landschaft tuckerlet und si unger 3 Höhlinä düregfahrä. Gruederet wird hie meistens nid mit de Arme sondern mit de Bei.

    Drna hets es Bánh mí mit Gmües u Tofu gä. Wie z‘Wetter si o mir när unschlüssig gsi, was mr oder wie wyt mr no wei ga fürne Usflug. Dr Entscheid es paar Spieli z spiele u chli z si isch sicher guet gsi. Ir Dämmerig simer no churz bir Pagoda gad ir nöchi vor Unterkunft vrbi. Nachm z‘Nacht heimer im chline Supermarkt no Wasser u Güetzi füre Nachtzug kouft.

    Nach däm üs dr Fahrer am Bahnhof het usegla heimer gstunet wie vrlasse dä usgseht. Im Bahnhof het üs de öber mitteilt das dr Zug uf Grund vomene Sturm nid fahrä wird. Nach däm mr e Stämpu für d Rückerstattig ufs Ticket becho hei, simer wieder zrügg gfahrä, ir Hoffnig nomau am gliche Ort chönne z‘übernachtä. Üsi Unterkunft heimer aber leider vrrieglet vorgfunde und trotzt chlopfä u rüefe het üs niemer ghört. Es isch scho haubi 11i gsi und mir hei när entschiede d Rucksäck hingerem Hus z vrsteckä und mit de Velos (womer fürne Tag gmietet hei gha u no vorem Hus gstande si) üs uf d Suechi nachere Unterkunft machä. Churz drufabä heimer es Zimmer gfunde gha und ihne gseit mir holä zersch no d Rucksäck (u bringe d Velos zrügg). Chum simer zrügg gsi u hei d Velos parkiert ghq isch de üse härzlech Gastgeber glich uftoucht und het sich gfreut üs wieder z gseh. Mir si de glich wieder zu ihm i üses Zimmer, wo no so isch gsi wimers vrla hei :)

    E witere Tag heisst o witeri Müglechkeite Sache z gseh. Nachm zMorgä heimer de e Scooter gmietet, damit me o a die chli entlägnere Orte guet härä chunnt.

    Z Schwitzä bim Ufstieg zum „Mua Cave“ isch mitere super Ussicht belohnt wordä. Iz heimer vo obä vo dene Kalksteine id Landschaft chönne luege womer am Vortag si umeböötlet. Nachdem d Kokosnuss usgschlürft isch gsi, simer mitm Scooter witerblochät. Nachere aute Stadt simer de zure riesige buddhistische Alag cho. Chli überrascht wie weni Lüt dert si, het üs aber ds sehr gfaue. Näbst riesige Buddhas u Gebäude wo si schutzä, grüene Gärte mit spektakuläre Pflanze hets o ne riese Stupa gha wo e grandiosi Ussicht uf d Landschaft ermüglecht.

    Da mr no gar nid so viu gässä gha hei, heimer üs mit 3 Päckli Chips gstärcht u üs scho ufs zNacht gfreut. Ir Dämmerig simer de dür die schöni Landschaft zrügg gfahrä u hei im Dörfli vor Unterkunft „fried rice“ (Lauras neue Lieblingsesse) und „Pho“ (vietnamesischi Suppä) gässä.

    Z Prozedere drna heimer ja när scho kennt. Mir hei no mit de zwöi Chind vo dere super Gastfamilie chli umeblödelet bis z Taxi isch cho. Diesmau simer nid di einzige am Bahnhof gsi, es het vieli anderi Touriste gha. Es 14jährigs Meitli vo Ninh Binh het üs gfragt obs zu üs darf hocke um chli englisch z üebe. Somit heimer de no 20 Minute mit ihre gredt u si het üs sogar no öbis vorgsunge, so süess. Churz drufabe isch de üse Zug cho und mir hei üs ufgmacht Richtig Hue.    Read more

    See translation
  • Asien 23
    Day 40

    Halong Bay: Kajak, Velo und Felse

    October 28, 2023 in Vietnam ⋅ ⛅ 30 °C

    Was natürlech nid darf fähle, weme im Norde vo Vietnam isch, isch Halong Bay. Mir hei üs entschiede, e 2 Tagestour z‘mache mit Übernachtig ufeme Schiff, damitmer chli meh gseh und dasme chli witer use chunnt. Pünktlech uf die 8i am Morge simer bi üs im Hostel abgholt worde. Während de guet 3h länge fahrt vo Hanoi zum Hafe in Tuan Chau Island, Ha Long City het de Tourguide sehr viu spannendi Infos über Vietnam allgemein, Hanoi und Halong Bay verzeut. O de Sacha, wo die Carfahrt eigetlech lieber gnützt hätti zum chli Schlaf nachehole, het gspannt zueglost.
    Bim Hafe acho heimer zersch no es chliners Schiff gno, wo üs de während ca. 40 Minute zu üsem eigetleche Schiff gfahre het. Scho während dere Fahrt heimer e sehr schöne Usblick gha uf z’Halong Bay, und z’Wetter hets o sehr guet gmeint mit üs. Nachdem mir ufem grosse Schiff si acho heimer chönne üses Zimmer - wo super schön isch gsi mit Blick uf z’Meer - bezieh und derna hets grad scho z’Mittag gäh, wo sehr fein isch gsi. Nachem Esse heimer no chli chönne chille und sünnele ufem oberste Deck vom Schiff, bevormer üs am spätere Nami uf gmacht hei fürne Kajakusflug. Z Padle um die Gsteidbrocke im Wasser isch astrengender gsi us denkt, i ha emu am nächste Tag zimlech Muskukater gha 😂 es hetsech aber definitiv glohnt und het Spass gmacht, und zum Sunneuntergang simer anes chlises Strändli gfahre und hei dert chli badet. Zrugg ufem Schiff simer ga dusche und hei üses Zimmer grad usgnützt zum es paar Chleider z’wäsche und ufzhänke. Vorem z’Nacht hets no e chline Chochkurs gäh, womer glernt hei wieme Früehlingsrolle macht. Bim z’Nacht heimer es sehr netts und lustigs Ehepaar us de Schwiz (us Bade) kenneglernt und recht lang mit ihne no gredt. De Anker gsetzt über Nacht heimer im ruhige und eher abglägnige Lan Ha Bay.
    Am nächste Morge hets scho am 6:30 (!!!) z’Morge gäh, wüu de Usflug uf Cat Ba am 7i gstartet het. Cat Ba isch die grössti Insle vo Halong Bay. Mir hei dert aui es Velo übercho und si es paar Kilometer iz Innere vo dere Insle gfahre und hei unter anderem e Stop gmacht bimene Fish-Spa. Die Fische si aber viu grösser gsi aus die Fish Spas womer bis iz kennt hei, i hami drum nid würk trout mini Füess dert z’tünkle, de Sacha het das überno (obwohls nach sinere Pedicure in Thailand nüm viu z’kkabbere het gäh). Es het o gaaanz viu süessi Hünd gha 🐶😍 Nach dere Tour simer ca. am 9ni zrugg ufem Schiff gsi, und am 10ni hets no e Brunch gäh. Dert heimer wieder die coole Schwizer troffe und mir ihne plöiderlet, bises de leider zit isch gsi zum wieder zrugg zum Festland z’fahre. Vom Hafe simer nüm zrugg uf Hanoi, sondern mitem Bus witer richtig Süde.    Read more

    See translation
  • Asien 23
    Day 39

    Hanoi: Plastikschämeli und „egg-coffee“

    October 27, 2023 in Vietnam ⋅ ⛅ 30 °C

    Nachemne Flug imne fasch leere Flugzüg simer z Hanoi schnäu immigriert. Obwohl d Laura und ig zur gliche Zyt z gliche eVisa beatreit hei, darf i agäblech no guet zwöi Wuche länger im Land blibe :)
    Am Flughafä heimer üsi restleche Baht, bestimmt zumne super Kurs, gäge vietnamesischi Dong‘s tuscht u si z‘erste mau Millionäre gsi.

    Nach däm mr die viele Taxifahrer hei chönne abwimmlä heimer dr Localbus is Stadtzentrum gno. Dert heimer dr Toni, e sehr extrovertierte spanische Backpacker us Granada, atroffä u hei die füfviertustündigi Fahrt mit ihm vrbracht. Si Chopf het e Schwizerin in Thailand gad so vrdräit gha, dasmer no e Videobotschaft a die unbekannti mit ihm vrfasst hei. Dr Zuefall hets wöue das er es Bett im gliche Hostel wie mir reserviert het gha. Churz vor de 10ne simer de im Stadtzentrum acho und si i die lebendigi Stadt itoucht. Näbst de hunderte vo Scooters sis d Grüch vo de Strassechuchine mit de töife Plastigschämeli u Tischli a jedem Strasseegge wo die Stadt usmachä. Dr Toni het sich de, nid sehr überraschend, am Pub Crawl agschlossä, während dem d Laura und ig nume no churz si ga Wasser choufä u nachärä Duschi üs ufs Bett gfreut hei.

    Nachm wärschaftä zMorgä (wo näbstm Gratisbier vo 7-8 pm o im Pris vo 5chf drbi isch) simer spontan grad glichzitig mit dene wo e Stadttour, gratis vom Hostel organisiert, machä losgangä. Churzer Hand heimer üs ihne agschlossä u hei so dankere Iheimischä vieli spannendi Infos über d Stadt erfahre. Nebstem Bsuech vomne Tämpu, em französische Quartier heimer o vieles über d Kulinarik vo Hanoi erfahrä. I ha de grad es Egg-Kaffi probiert, nebstem süsch guete Kaffi wos hie git isch dert no es gstockts Ei drin. D Konsistenz isch am Afang chli schwirig, mä weiss nid so recht obme trinkt oder isst, am Schluss hetme de o beides gmacht :) Gschmacklech ischs ähnlech wie Zabaione oder Vanillecreme mit Kaffi.
    Nebstm Kaffi, hüt isch Vietnam dr zwöitgröscht Exporteur vo Kaffeebohne, wo d Franzose hie hei afa pflanze, vrdanke si dene drüfarbnigä Gügglä o z „Banh mi“.
    Am Endi vor Tour heimer de am Strasserand ds gfüllte Baguette vrschlungä, wird bestimmt nid z letzte gsi si! Vor luter Idrück und äuä o Hunger simer nachlässig gsi mit de Fotos drvo.
    O uf dere Tour isch natürlech de Toni oh wieder debi gsi! Zuesätzlech simer o mit einige anderne junge Backpackers iz Gspräch cho, unter anderem e Schwizer us Luzern.

    Später heimer de mitemne Fruchtsaft voremne Ventilator am Strasserand dr lonelyplanet für die nächste Täg gnauer studiert und gmerkt das üses Bedürfnis nach Strand u Meer grösser isch us z Verlange im Norde dür d Riisfäuder z tschaupä.

    Nid fählä in Hanoi darf dr Bsuech bir „train street“. Mittlerwile für Touristegruppe vrbote, darfme dert nume inä weme es Getränk bi de agrenzende Ständ konsumiert. Zug isch leider kenä cho, aber idrücklech ischs gsi wie äng u schmal die Gass wo nä Zug dürefahrt isch, üsm Fründ vor SBB würde d Haar z Bärg sta.

    Nachm zrüggschlendere übere Nightmarket, emne Gratisbier im Hostel heimer de nid wit drvo uf somne töife Plastikstüehli „sweetsour Tofu“ und „fried noodles“ gässä und üs über die viele Lüt und die ohrebetäubendi Musig amüsiert.

    Die Stadt mit ihrne 8.5 Millione Iwohner und über 5.000 Töffe isch nach Japan ungloublech chaotisch, und mir hei üs i ds Chaos vrliebt :)    Read more

    See translation
  • Asien 23
    Day 36

    Pattaya: Pool, Strand und Eichhörndli

    October 24, 2023 in Thailand ⋅ ☁️ 32 °C

    Wie es paari villech scho wüsse, hei mir üs während de Reis entschiede anstatt uf Sulawesi uf Vietnam und Kambodscha z’ga. Mir hei aber irgendwie vergesse, gnue früeh z’Visum z’beaträge. De Sacha het zum Glück in Tokyo mau die Sach id Hand gno und hetsech bir Botschaft informiert, wo das Visum cha beatreit werde und wie lang wos geit. Mir hei ner müesse einigi Dokument ireiche, und es het gheisse dases - trotztm Support und Nachefrage uf dr Botschaft vo Sacha’s Mami - 3-5 Täg duuret. Leider hei mir haut de Flug uf Hanoi scho im Vorus buecht gha, miteme Zwüschestopp in Bangkok (de Flug wär 2 Täg nachdem mir z’Visum beatreit hei gange), und sogar ig mit mine beschränkte mathematische Fähigkeite ha gmerkt, dass mir das Visum eue nid pünktlech wärde übercho. Drum hei mir z’Risiko nid wöue igah, und hei Thai Airlines aglüte zum üse Flug vo Bangkok uf Hanoi z’verschiebe. Das isch zum Glück sehr unproblematisch und sogar gratis möglech gsi. Weme jedoch d’Chöste vom Telefonat i betracht zieht (30min à 1.50/min) isches de doch nid ganz gratis gsi 😂 Mir hei aber z’Beste us dere Situation wöue mache und hei de Flug grad um 4 Täg verschobe, damit mir in Pattaya, das isch 2h vo Bangkok mitem Bus, no chli Strandferie hei chönne mache.
    Mir hei es härzigs Bungalow-Zimmer gha inere schöne und grüene Alag, und grad vorne drann isch z’Meer gsi. Es het ide Böim und Palme überall ganz viu Eichhörnli gha (übrigens am Sacha sis Lieblingstier), wo immer wieder vo Ast zu Ast si gumpet.
    Die einti Frou het am Strand de Sacha fasch chli usglacht wege sine länge Zeihenägel, und nachdem sie zum 5. mau isch düregloffe heter igwilligt zunere Pedicure inklusive Hornhuut-Scrub 🦶🏼Wüu das so guet und entspannend het usgseh hanimi de ono la überrede, und iz heimer beidi wieder schöni und weichi Füess 😍 Während de Pedicure heimer sogar no grad e wunderschöne Sunneuntergang chönne bestuune.
    Die paar Täg Pool und Strand hei sehr guet ta, und o ig has trotz Güetelrose chönne gniesse. Bade und richtig sünnele hani aber trotzdem no la si, da hani aber im Verlouf vo üsere Reis sicher no gnue Möglechkeite dezue!
    Mir si ize bereits wieder am Flughafe, mit gültigem Visum, und freue üs uf z‘nächste Land: Vietnam    Read more

    See translation
  • Asien 23
    Day 34

    Tokyo: Goodbye Japan

    October 22, 2023 in Japan ⋅ ☀️ 20 °C

    Nachdäm mr wie d Sumoringer jewius früeh uf si hei mr üs, mit de Biuder vom Mt. Fuji vor Ouge, ä biz Schlaf gönnt. Ohni Wecker ufgwache simer zersch üse Koffeinspicher ga uffüue u när düre nachglägnig Park spaziert. D Laura isch nid unglücklech über die viele Hundehalter gsi mit ihrne Tierli, meistens eher chli und nid säute imne Wägeli (?!), und i ha mi uf die öffentleche Toilette (entworfe vom Shigeru Ban) fokussiert.

    Japan‘s berühmtisti Velorenne finde uf dr Bahn statt und in Tokyo gits mehreri Velodromes. D Disziplin Keirin stammt us Japan und ghört zu eine vo 4 Sportarte wome legal darf druf wette. Igfüehrt wordä um dr Wiederufbou nachem Zwöite Weltkrieg mitzfinanziere. Sit 2000 ghöre die churze Sprintrenne zum Olympische Programm (2012 o bi de Froue).

    Leider si aui diesbezügleche Homepages rein japanisch und trotzt Übersetzer und nachefrage bim Guide simer imme Velodrome glandet, wo zwar vieli auti Päpple am wette si gsi u drum o dr Bierstand offe gha het, uf dr Bahn aber nume es paar einzelni am trainiere si gsi. Z Renne wo übertreit wordä isch, de meiste ischs nume um d Wettquote gange, het amne angere Ort im Land statt gfunde.
    Nach däm mr zwöi, drü Runde bim Training hei zuegluegt simer de wieder zrügg i Chueche vor Stadt.

    Am Abä simer de no d Strass „Omotesandoō“ abeglschenderet. Vieli türi Läde (und Boute) Reihe sich hie wie d Hüehner ufm Stängeli. Vieli bekannti Architekturbüros hei Gebäude entworfe, ar Laura und mir hei aber nid bsunders viu gfaue und anderi Gässli hei definitiv meh Charme. Dä Wettkampf unter dä Läde isch mitm Prada-Gebäude vo H&deM ersch so richtig usbrochä. Ds Modell woni im Büro öfters gseh ha, hani iz o no im Massstab 1:1 bestunt :)

    Die zwöi letzte Täg in Tokyo si de gmüetlech zue und här gange. Per Zuefall isch e Kollegin vor Laura, wosi vor Uni kennt, o grad in Tokyo gsi. Mir hei sie drum am einte Morge imene Anime Kaffi troffe, wosi härzigi Figure us Schuum forme und ufe Kaffi tüe.

    Da ar Lauras Oug entzündet isch plus bi ihre no e Gürturose usbroche isch heimer no e Ougearzt und e Dermatologin ufgsuecht. Mit de Medikament wosi ihre hei gä, sötti ds ize aues schnäu wieder guet wärdä.
    Drzwüsche simer, zuefällig obwohl mr ds o us Tipp becho hei, i schön Garte „Koishikawa Kōrakuen“.

    Vieli Orte heimer im letzte Monet bsuecht, und vieli Idrück gsammlet. No es letzts mau Sobanudlä hets gä und iz simer am Flughafä, ready zum witerreisä.    Read more

    See translation
  • Asien 23
    2
    Day 31

    Mt. Fuji: 4 Touri Hotspots, 1 Vulkan

    October 19, 2023 in Japan ⋅ ☁️ 18 °C

    Was natürlech nid darf fähle, weme in Japan isch: e Usflug zum berüehmte Vulkan Fuji. Wüume mitem ÖV mega oft muess umstige und schlussendlech über 3h het (wimer im Nachhinein erfahre hei gits da no besseri Verbindige, die het üs aber Google Maps leider nid azeigt) heimer üs entschiede, e gfüerti Tour miteme Bus z’mache. Gstartet het das ganze am 8:30 vor Shinjuku Station us. Mir hei extrem Glück gha mit de Wetterbedingige, u drum hei mir de Fuji scho während de härefahrt ab und zue chönne erspähe. Nach guet 1.5h heimer de üse erst Spot erreicht gha: Chureito Pagoda in Fujoyoshida. D’Ussicht muesme sich aber zersch verdiene, sie steit nämlech ufeme Hügu. Nach ca. 300 Stägetritte heimers de aber gschafft und hei die sehr schöni Ussicht chönne gniesse.
    Wieder unde acho, simer z’Fuess 10 Minute zum nächste Spot gloffe: Die berüehmti Honcho Street. Vo dert hettme dür die Strass düre e wunderschöne Blick ufe Fuji. Es müesse aber 2 Poliziste de ganz Tag dert bir Chrüzig stah und d’Touris devo abhlate, eifach uf d’Strass z’loufe für Fotos 😂 Vor Honcho Street us simer witer zumene Ort mit 5 Teiche gfahre. Es het recht viel Lüt gha und trotz de Ussicht ufe Fuji het üs dä Ort vo aune am wenigste umghoue. Vo dert us simer nachere Stund Ufenthalt zum Kawaguchi See gfahre. O dert hets gnue Lüt gha, aber dank em grosse Park heisech d’lüt recht guet verteilt. Es het sehr viel schöni, farbigi Pflanze und Böim gha und isch definitiv es Highlight gsi vo dem Tag. O dert heimer e Stund verbracht und gnue Zit gha, de ganz Park und z’schöne Ufer, natürlech mit super Blick ufe Fuji, z’bestuune. Churz nach de haubi 4i heimer üs när vo dert us mitem Reisebüsli ufe Heiweg gmacht. Mit chli Stou simer när chli nach de 6i zrugg in Shinjuku gsi. Zum z’Nacht simer när im Quartier “Roppongi” richtig feini Burger ga esse!    Read more

    See translation
  • Asien 23
    Day 29

    Tokyo: Metropole mit Sumos

    October 17, 2023 in Japan ⋅ 🌙 22 °C

    Bi schönstem Wätter u mit dr wärmi vom letzte Onsenbad heimer üs ufe Weg id Houptstadt gmacht. Bereits bim Usstiege am Shinkansen-Bahnhof in Tokyo chunnt dank de sich uftürmende Wuuchekratzer Grossstadtfeeling uf. Da dr Bahnhof bizli grösser us dä z Loupe isch, heimer e Moment brucht bis mr z Ticketoffice vor Metro gfunde hei gha. Dert heimer de gad üsi Mehrtagespäss kouft und si när ungerem Bode is Quartier vo üsm Hostel.
    Nach däm mr icheckt hei simer z Fuess los gloffe Richtig Shibuya. Z lebendige Quartier isch bi Jugendleche sehr beliebt. Etlechi schrilli Neonschilder u Screens machä Wärbig für Restis, Clubs, Läde u vieles meh. Dank de Masse vo Lüt und dr für üs ungwöhnleche Fuessgängeraordnig (diagonal; heimer im ganze Land immer wieder atroffä) ghört d „Shibuya Crossing“ zu de weltbekanntiste. Zu Stosszyte überquere über 3‘000 Lüt glychzitig d Strass. Erstunlecherwis geit ds relativ ribigslos anenand vrbi, d Gfahr vomne Selfiestick im Oug isch definitiv grösser us vomne Outo über d Füess :)

    Am nächste Morge het dr Wecker bezyte tschäderet. Mir hei unbedingt es paar Sumo-Kämpfer in Action wöue gseh. Da zur Zyt gad keni Wettkämpf astö, die si jährlech 5mau a 2 Wuche, heimer üs d Glägeheit bim Training ga zuezluege nid wöue la nä. Wo mir am 20 ab 7ni vorem Fenster vo ihrem Trainingsrum achöme ghöremer zu de Erste. Nachm längere Iturne si mir de es paar mau zämezuckt wo die Prüglä ufenand los si. Die Sumos wo zämä trainiere läbä wie e Familie oberhaub vo ihrem Trainingsrümli und nämä o ihri Mahlzyte zämä i. Erstunlecherwis ässe die um die 125kg wiegende Flöigegwicht nume zwöi mau am Tag. Womer gange si isch z Gedränge vorem Fenster gross gsi :)

    D Laura, chli am kränkle, het sich drna nomau ufs Ohr ghoue und i ha z Ginza Quartier agluegt. Dert bini de o no i gross Uniqlo-Ladä inä. Dä Ladeumbou, ursprünglech uf die Olympische Spiu 2020 plant, isch zu mire Baslerzyt vomne Projektteam vom gliche Stock planet wordä u drum het mi ds wunder gno, was schlussendlech drus wordä isch.

    Nachm gmeinsame Mittagesse bim Inder gad ume Egge vom Hostel heimer üs es witers Quartier vorgno. Vor luter Quartier muess mä sägä, dass die Metropole eher wie e Asammlig vo ganz viune Städt würkt. Vo enge Strasse mit niedere Gebäude, zu futuristische Wuuchechratzer änderet sich je nach Stadtteil d Wahrnähmig und mi het z Gfühl mi reist ir Zyt zrügg u när wieder id Zuekunft.
    In Akihabara pilgere aui Manga und Anime-Freaks härä und isch o für aui wo da ni so vrtrout si es Spektaku das z gseh. Tuusigi vo Comics, DVD aber o auti Spielkonsolä u Spieli drvo chame choufe. Nid weni vo dä Lüt si verchleidet und es wimmlet nume so vo dene riese Puppe.

    Am Abe heimer de zumene feine Phadthai üse vrgässnig Papierkram für d Witerreis müesse erledige und hei üs ufe nächst Tag gfreut, ufne Usflug zum berühmtiste Vulkan Mount Fuji.    Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English