Sophia Didier

bi gar noni ready zum tschüss sege... ich chönt mer guet vorstelle, no es paar mönet i dem wunderschöne land z bliibe und au no anderi länder in südamerika z erkunde! 😍 aber ich ha mier vorgnoh, no es paar freii wuche im dezember i de schwiiz z verbringe, zum zügle, e nachmieter z gfinde (ha mini wohnig scho kündt, aber no kei nachmieter gsuecht) und d wiehnachtsziit dehei z verbringe - und wer weiss, was denn s neue jahr so bringt. wie seid mer so schön: mer sell denn gah, wenns am schönste isch 😉
zrugg in bogota gahni nomal uf erkundigstour und triffe d serena. feini fruchtsäft und paar souvenir dörfed nid fähle, bevor ich mich nacheme churze nap, zmittzt i de nacht ufe heiweg mache.
zum abschluss dörfi no mini ersti und zum glück einzigi gfährlichi erfahrig in kolumbie mache... ich ha für die churzi nacht es hostel-zimmer mitde serena teilt. s erste mal uf minere reis isch s hostel vonem security guard überwacht. woni s uber bstelle, warted de security guard mit mier bises da isch und fragt mi, obs au würkli s richtige isch. ich cha s nummerschild im app abgliche und im security guard bestätige, dass es überistimmt. i dere churze ziit woni d stege abelaufe, und de security guard zrugg is hostel, nöchered sich 2 gstalte... woni d türe vom taxi uftue, rüeft de taxifahrer mer zue, sofort izstiege & türe zue z tue ... ganz knapp schaffis, mitsamt em backpack is taxi z springe und d türe zuezzieh, bevor di 2 männer mit irne schläger nebem taxi stönd... de fahrer fahrd sofort los und stoppt churz wiiter vore, um mitde d männer uf spanisch luuthals "z diksutiere". denn fahrt er wiiter und stoppt es paar strass wiiter vore nebenem polizei töffli. nacheme churze wortwechsel fahrid d poliziste mit vollgas richtig hotel und mier möched üs wiiter ufe weg richtig flughafe... de taxifahrer probiert sich denn di ganz fahrt uf spanisch für sini landslüüt und für das erlebnis z entschuldige & ich probier ihm mit händ und füess z antworte 😅
mann oh mann - grad e chli action i mine letste minute in kolumbie 😵
aber die letsti erfahrig trüebt mini erinnerig uf die wunderschöni ziit in kolumbie nid im gringste - ich wirdes uf jedefall seehr fest vermisse & i bester erinnerig bhalte!Read more