Tetapkan semula carian
Luisa BöbnerLuisa Böbner
SatelitSunting laluan
Sertai 18 Jan 2019 Baca lagi
  • PengembaraUSA 2023
    Hari 33

    Lake Tahoe & San Francsico

    27 Julai 2023, Amerika Syarikat ⋅ ☀️ 21 °C

    Lake Taaaaaaaho oder Lake Tahoooooo mir wüsse leider immer nonig wie mers richtig usspricht. 🗣️ Nachere länge Passfahrt mit Schnee ❄️ (!) simmer mega begeisteret gse vo dere schöne Natur und Landschaft, wo üs ou chli a deheime erinneret het und üs mit chüelere Temperature beschänkt het. E wöukommnigi Abwechslig nach dene heisse Nächt. 🥵 De Camping isch füre Pris leider ned ganz das gseh was mir erwartet hei, de Platz isch sehr schreg gsi und d’Hygienealage ned so suber. Jano, defür simmer i 5 Minute am wunderschöne Zephyr-Strand gse. Znacht hets es Räschterisotto gä und mir hei weder mau Spieli gspielt und ändlech mau ‚The Game‘ besiegt. Am nächste Morge simmer uf nach South Lake Tahoe, hei de Ervin illegalerwis ufemene Supermarkt abgstöut und üse letschti Tag ade Westküste nomau so richtig gnosse, am Strand entspannt und si im erfrüschende, blaue See go bade. Es isch eifach troumhaft gse, mir hei üs chli gfühlt wie am Meer🌊😍.

    Gäge Abe ie hemmer de wohl oder übel die 3.5 stündigi, letschi Etappe uf üs gno und si ist ohni Zwüschefall in San Francisco acho. Früeh simmer is Bett, damit mer am nächste Tag parad si füre Reisetag. Mir si nämlech grad echli beschäftiget gse mit Packe, Putze und useruume, bevor mir am 11 de Ervin hei müesse abgä. Zum Glück isch aues ribigslos gange und mir si ou mega happy gsi, dass üsi Campingusrüschtig ane holländischi Familie witergange isch, wo sich mega drüber gfreut het. 🇳🇱 Gsamthaft hei mir 4‘800 km zrugggleit - woooow, e riese Strecki.🛣️

    Da mer ersch am Mitternacht witer nach New York gfloge si, hei mier am Namitag grad chli Zyt müesse überbrücke. Doch mier wärde ned mier, wenn mer ou für das ned e perfekte Plan usgheckt hätte. Mir füchs si eifach is Shoppingcenter näbem Campingverleih und hei nach däm Monet Wandere, Sand und dreckige Campingplätz üsne Füess wieder mau chli Wellness gönnt.🧽🦶

    Mit de Koffere simmer schliesslich a Flughafe, wo scho die nächsti chlini Challenge uf üs gwartet het: üse Flug isch 3 Stund verspätet gse.. United het aber zum Glück a däm Abe mehreri Flüg uf NYC gha, wo mer churzerhand eine früehner hei chönne nä. Phu, grad nomau guet gange, mir hei nämli die letschte Plätz übercho. ✈️🧑‍✈️😍 Am Gate simmer fast e chli übermüetig gse und hei üs meeeega uf New York gfreut. Mir verrate nur sovöu; mir si sicher da acho. Was mer aues erläbt hei, läsiter i üsem letschte Bitrag.    Baca lagi

    Lihat terjemahan
  • PengembaraUSA 2023
    Hari 27

    Kings Canyon & Yosemite NP

    21 Julai 2023, Amerika Syarikat ⋅ ☀️ 25 °C

    Ich (Nadine) entschoudige mi scho iz, faus dä Biitrag vom Schribstil chli sött abwiche, aber d‘Luisa hockt grad ufem Chindersitz hinde inne und isch ned ide Lage dä Biitrag säuber z‘verfasse. 😵‍💫

    Vo Las Vegas hei mr üs ufe Wäg rechtig Bakersfield gmacht. Chline Funfact: Mr hei bis vorere Wuche säuber ned gwüsst, dass mr det no e Halt möche und drum ou ke Campingplatz buechet gha. Dä Zwüschehalt het sech aber us sehr gueti Entscheidig usegstöut, wöu süsch d‘Fahrt ih Yosemite 7 Stund duuret hätt (und das nach Vegas). 🙈 D‘Fahrt isch nämli ou so scho gnueg läng und ahsträngend gse und wöu de Chüelschrank vom Ervin aues Gas ustrunke het, hemer no müese ga Propan ufföue. Das isch es komplizierts Unterfange gse, simer doch zu 3 Tankstöue gfahre und entweder heisi zue gha oder kei Propan… So si d‘Spaghetti fürs Znacht e riise Zitterpartie gse, wöu mr ständig hei müese befürchte, dass z‘Gas usgeit. 😰 Met ufgföutem Propantank hei mr üs am nächste Morge uf ih Sequoia Nationalpark gmacht, aso eigentli ih Kings Canyon Nationalpark, wöu mr met üsem Ervin ned hei döfe düre Sequoia fahre. De Grund füre Bsuech si die riisegrosse Mammutböim gse. 🌳

    Wöu mr ide Houptsaison de Yosemite Nationalpark bsueche, hei mr leider nur 1 Nacht im Yosemite Valley chönne bueche. So hemer müese ufe Campingplatz in Forks uswiche, wo 1.5 Stund entfernt isch. Das isch aber gar ned schlimm gse, wöu Forks grad amene chliine See liht und mier hei chönne e Abchüelig nä nach dem ahsträngende Tag. 🏊🏻‍♀️ Es letschts Mal hemer üsi Grillkünste unter Bewiis gstöut und dasmau isch ned nur z‘Fleisch, sondern si ou d‘Crevette und z‘Gmües ufem Grill glandet. 🥕🦐 Obwou mr chli Paranoia vor de Bäre gha hei, hei mr einigermasse guet gschlafe. 🐻

    Am Morge am 6i simer rechtig Yosemite losdüset und so ohni längs Ahstah ih Park iegfahre. D‘Strasse si eng und kurvig gse, doch mier Äntlibuecherinne si üs das ja gwöhnt. 😎 Ou d’Natur (Nadelwälder, Berge & e Fluss) hei üs ad Heimat erinneret. ⛰️🌲 D‘Temperatur isch endlech sehr ahgnehm gse und drum hemer üs motiviert uf di 3-stündig Wanderig zu de Yosemite Falls gmacht. Dä Wasserfall z‘gseh, mues mr sech verdient ha, es isch nämli sehr steil ue gange und das vo Afang bis Schluss. D‘Ussicht ufs Yosemite Tal und de berüehmti Half Dome isch defür wunderschön gse. 😍 Nacheme stärkende Zmettag hemer zur Regeneration es Bad im chaute Fluss gno. 🥶 Mr si nämli am spätere Nami no zum Mirror Lake gspaziert. Üsi Wanderluscht isch demit no ned gstillt gse und so simer am nächste Morge zu de Vernal Falls gloufe und hei ou no dä Wasserfall vo nöchem bestuunet. Nachher hemer üsi Wanderchleider aber definitiv versorget und si via Tioga Pass zum Lake Tahoe gfahre.    Baca lagi

    Lihat terjemahan
  • PengembaraUSA 2023
    Hari 25

    Las Vegas!! 🌟🎰🗼😎

    19 Julai 2023, Amerika Syarikat ⋅ ☀️ 43 °C

    Spoiler: Mir hei de Jackpot ned knackt.🥺😂

    Aber vo vore… Früeh simmer am Morge vom Zion Nationalpark richtig Valley of Fire losgfahre, üses Ziel; de Camping, wo mer ned cha vorbueche. Wies de Name scho seit, es isch det füürig heiss! Stöuit euch folgendi Situation vor: Es isch Mittag am 12, mir chöme ufem Camping OHNI Schatte ah, kei Lüt und kei Internet und d Klimaalag schafft die gschätzte 45° grad mau uf vlt. 32° abzchüehle. 🥵 De ursprünglechi Plan wär gseh, am Abe chli gs z‘wandere. Düre Tag isch das nämlech sozäge unmöglech, sie warne eim ja schliesslich mit ‚DO NOT DIE TODAY‘. Mir hei üs auso churzerhand dezue entschide, scho e Nacht früehner ufe Camping in Las Vegas z‘ga, wo mer üse Ervin am nächste Tag hei chönne parkiere. Bim Glacé-Schläcke am Pool hemmer gmerkt, was das füre brillianti Entscheidig gse isch.😎

    Am nächste Tag hemmer Göfferli packt, de Ervin sicher parkiert und si mitem Taxi uf i üsi Churzferie is Luxor. Mir wärde wahrschinlech nie me vergässe, wies gse isch, i das Hotel iezloufe. Es het überau blinkt, gsoundet und 100 vo Flipperchäste hei üs zöiklet. 🎰 Zmittag hemmer i üsem huuseigente Foodcorner igno, bevor mir ou de Pool vom Hotel usprobiert hei. Imene Bad so gross wie de Ervin hemmer üs ready gmacht für üsi ersti Nacht in VIIIGAAAAS. De Zuefau wetts, dass 2 Kollege vo de Luisa genau zur gliche Zit in Las Vegas gse si, drum hei mir mit ihne abgmacht. 😊 Gstartet simmer mitere langersehnte Pizza im Venetian Hotel, witer zude Wassershow und zum Gamble 💸 im Bellagio und schlussendlech simmer no ga s Tanzbei schwinge im Club. Wo mer det am früeche Morge usegstürchlet si, isch immer no gfühlt 35° gse. Wöu üs üses Taxi versetzt het, simmer muetig und entschlosse e haubstund heigwanderet. So verwunderets ned, dass mir üsi weiche Queensize-Bed (sorry Ervin) so richtig uskostet hei und ersch nachem Mittag usem Zimmer cho si.. 😴 De Hunger het üs is Mandalay Bay, s Nachbershotel, überetribe. Det cha mer underirdisch dür versteckti Gäng überega, die Hotel si aui mitenand verbunde. Mir wüsse itz ou wieso!🌡️🫠

    Nachem mexikanische Zmittag hei mir die glorrichi Idee gha, dass mir itz doch ou mau dä 5-🌟 Pool vom Mandalay chönnte usprobiere. Das het d Pool-Igangskontroue aber andersch gseh.. Jano. Zrugg am Luxor-Pool hemmer üs eine abgschwitzt, bevor mir üs gnuuuueg Zyt gno hei, zum üs nomau parad z‘mache. Mir plange nämlech scho sit 3 Jahr uf die Show, wo mer am Abe bsuecht hei. Mir hei ungloubech de Gspass gha mit dene flotte Manne und säge nur so vöu; What happens in Vegas, stays in Vegas. 🤫🔞😂 Zum Abschluss vo dere Hammer Nacht hemmer no e Usflug zude Fremont Street gmacht, wo richtig cooli Stimmig gsi isch und hei üs mitemene feine Ässe gstärcht.😊

    Üsi letschti Vegas-Morge isch absolut plakativ gse. Mir hei am 10:45 gmerkt, dass am 11 Checkout isch - chöit euch de Stress auso vorstöue. Mitemene luxoriöse Taxi simmer zrugg id Realität, zum Ervin, wo üs scho sehnlechst erwartet het. I 2 Täg het är sechs ou la guet ga und het s ganze Gas gsoffe, d Milch hets ned gschafft. Sie isch chli suur gseh uf üs😠.    Baca lagi

    Lihat terjemahan
  • PengembaraUSA 2023
    Hari 22

    Zion Nationalpark

    16 Julai 2023, Amerika Syarikat ⋅ ☀️ 37 °C

    Erhout simmer mitemene feine Zmorge i Tag gstartet und si nomau die schönste Ussichtspünktl vom Bryce Canyon abgfahre. Würkli e sehr ästethische Park😍. Uf üsere Reis fougt aber Highlight uf Highlight, drum si mier scho gli uf em Wäg richtig Zion Nationalpark gsi. Die Fahrt dür dä Park isch die bisher abentüürrichsti gsi. Die rote, änge, kurvige Strasse hei üs chli ad Lammschlucht erinneret und drum hemmer nid nur einisch gschwitzt. De Ervin isch aber heil unde im Tal acho! Begrüesst worde simmer bi mindestens 38° und d‘Suechi nach de Wanderusrüschtig füre nächsti Tag het üs einigi Närve kostet! 🔥🥾🥵

    Zum Glück het üse Camping e chline Pool gha, wo mer üs hei chönne ga abchüehle und mitemene feine Curry hemmer üs gstärcht fürd Wanderig am nächste Tag. Ganz nachem Motto der frühe Vogel fängt den Wurm simmer am 4:45 usem Bett use gheit, hei üsi gmietete Neoprensöckli und Wasserwanderschueh montiert, de Wanderstäcke packt und si zum erste abus am Morge losmarschiert. De Bus het üs zum Virgin River gfahre, wo mir die berüehmti Narrows Flusswanderig im Zion Canyon gmacht hei. Mir louft debi im Flussbeet stromufwärts und wird zum Teil bis zude Bruscht nass (vorauem die chlinere Gschöpf, aso d Chanti😉). Ds erste Mau dünkle im Fluss isch zwar rächt chaut - vorauem wenns Morge am 7ni isch - aber d Wanderig a sich isch ungloublech abwächsligsrich, schön und abentüürlech. Mir hei nid nur einisch gstuunet ab dere schöne Natur und hei de Fluss bim uewandere mehrheitlich für üs gha! Es het sich bezaut gmacht so früeh ufzsta. Bim Rückwäg simmer zwar mit de Strömig gschwumme/gloffe, aber es si üs scho gli die vorakündigte Touristemasse entgägegströmt. Wo mer am Mittag wieder devore acho si, het mer fast müesse asta zum usem Fluss usezcho und mir hei die unmöglechste Wanderoutfits gseh; vo de Nonnechutte bis zu länge Jeans isch aues debi gsi. 👖 Zrugg im Ervin hemmer e Rissalat gässe, chli Siesta gmacht und de Pool nomau gnosse. Us Belohnig für die 5-stündig Wanderig simmer am Abe ines feins Resti ga ässe und d Nädi het ändlech ihri 🦐-Pasta übercho. 🧆😍

    Ide nächste zwöi Täg wärdit ier ned so vöu vo üs ghöre. Mir gäi im Ervin 2 Täg Ferie, zieh is Luxor Hotel und möche Las Vegas unsicher.🥳 Wenn mer de Jackpot knacke, würde mer de spontan verlängere.💴😎    Baca lagi

    Lihat terjemahan
  • PengembaraUSA 2023
    Hari 20

    Kanab und Bryce Canyon

    14 Julai 2023, Amerika Syarikat ⋅ ☀️ 36 °C

    Üse letschti Morge in Page isch gmüetlech gstartet. Mir hei de Chüehlschrank nomau gfüllt, de Ervin putzt und si richtig Kanab losgfahre. Prospektli hei vöu versproche, Kanab isch aus chlises Western Hollywood dargstöut worde und mir uf Cowboys und Saloons gfreut. Scho bim Bsuech vom Little Hollywood (wo aus Universals vode Western Filme beschriebe worde isch) simmer z‘erste mau ufe Bode vode Tatsache ghout worde. Chli me aus verlotteriti Holzhüüsli, vetröchnets Gras und Grümpu hets ned zum aluege gä. S Dörfli säuber isch ou ned so charmant gseh, wie mirs üs vorgstöut hei, aber s Znschtässe im Iron Horse het aues wieder wett gmacht. D‘Nädi het ändlech iri Saloontüre chönne ufschwinge, mir hei Live Country-Musig und authentischs Westernässe gnosse. 🍖🍟🔥

    Ufem Wäg i Bryce Canyon hemmer am nächste Tag no d Sand Caves vo Kanab besichtiget. Im Gägesatz zu anderne Attraktione si die touristisch no sehr unberühert und nachemene chline Chlätterakt hemmer die schöne Höhlene chönne bestune. Zum d Schlangebiss vermide, hemmer wiedermau Christoph-Böbners-Stampftechnik agwändet. D Chance, dass mer d Klapperschlange itz de mau träffe stigt, wöu mir inzwüsche aui andere vorakündigte Tier troffe hei. 🫨🐍

    Wo mir im Bryce Canyon acho si, simmer positiv vom informative Visitor Center überrascht gsi mit Kino, Sternekunde und geologische Modell. Zum Sunneundergang hemmer e 1.5 stündigi Wanderig düre Bryce Canyon gmacht und mir si absolut gflasht gsi vo dene rote Hoodoos (die rote Türmli) 😍🌅 und de höche Wänd i de sogenante Wallstreet. Wo mer zruggcho si, het üs d Chanti es feini Bolognese zouberet und mir hei de beeidruckendi Stärnehimmu agluegt, bevor mir bi agnehme Temperature si ga pfüsele. ✨💫    Baca lagi

    Lihat terjemahan
  • PengembaraUSA 2023
    Hari 17

    Page

    11 Julai 2023, Amerika Syarikat ⋅ ⛅ 36 °C

    Ufem Desert View Drive hemmer üs a verschiednige Ussichtspünkt vom Grand Canyon verabschiedet. Nid nur mier si trurig gsi, sondern ou de Petrus: Es het nach 2.5 Wuche z erste Mau gwitteret und grägnet und de eRVin erstrahlt i neuem Glanz. 🚌

    Nach 4 Stund Fahrt und emene Ichouf im 🐳-märt, hemmer üs ufem Camping in Page igrichtet. D Nacht isch heiss gsi, aber das chamer eifach im wörtleche Sinn verstah. 🥵 D‘Chanti isch nid nur einisch ufgstande zum de Airconditioner wieder azla.

    Früeh simmer drum wieder uf de Bei gsi, hei zmörglet und üs ufe Wäg zum Lower Antelope Canyon gmacht. D‘Tour vomene Navajo Indianer dür die gschwungnige Sandsteine isch eimalig gsi! S‘Farbspiel vo dene gäub über orange bis zu rote Fäuse isch scho fast chli kitischig gse und drum isches ou ned verwunderlich, dass Microsoft, Apple und LG die Fotos aus Bildschirmschoner bruche.🌅😍

    Am Namitag hemmer üs im Lake Powell abkühlet, es Iskaffi gnosse und eifach chli gsünnelet. Übrigens: Dür de Stoudam vom Colorado River isch s Glen Canyon Gebiet überfluetet worde und so isch de Lake Powell enstande. Das gseht mer ou de Stadt ah, wo 1957 usem Bode gstampft worde isch. Page isch würklich chli gsichtslos und längwilig. 🫣

    Will s Thermometer guet über 40° geit, hemmer ou de nächsti Tag mehrheitlech im Wasser verbrunge. Am Morge hemmer e Kajaktour 🛶 gmacht und am Nami simmer nomau a Strand. Wäre mer vorher z Las Vegas gsi und hätte de Jackpot knackt, hätte mer üs natürli es Boot gleistet, es het aber leider de glich nur fürs handbetribnige Kajak glänget. Trotzdäm simmer aber wie die Riche und Schöne mitemene Golfcart zum Alegepunkt brunge worde.💰

    Nach däm Wassertag hemmer no e Abespaziergang zum berüehmte Horseshoe Bend gmacht - zäme mit sicher 1000 asiatische Lüüt😉.    Baca lagi

    Lihat terjemahan
  • PengembaraUSA 2023
    Hari 15

    Grand Canyon

    9 Julai 2023, Amerika Syarikat ⋅ ☀️ 34 °C

    Welcome to Grand Canyon Nationalpark 🌅

    Vom Joshua Tree Nationalpark simmer ufbroche und hei die gross Reis richtig Grand Canyon in Angriff gno. Wöu das aber zlang zum fahre gsi wär, hemmer ei Nacht in Kingman verbacht. Die Stadt lit direkt a de wäutberüehmte Route 66 und drum simmer doch tstsächlech ou die letschte 10 Minute det drufe cruiset. Mir wösse itz aber, wieso die Strass ihri Hochblüeti hinder sich het. Es rucklet und holperet, no me aus uf de andere Strasse. D Chanti het drum vorsorglech e Motion Sickness Tablette igno.😵‍💫 Imene mega coole 50er Jahr Diner hemmer üses Zmittag igno und si wiedermau erstunt gse, wie vöu und schnöu die Amis chöi ässe. De Shake, wo mir aus Dessert z dritte teilt hei, trinke si ganz säubstverständlech näbe Burger und Pommes aus Getränk zum Menu.🤨😂

    Bevor mer richtig Grand Canyon los si am nächste Tag, hemmer im Route 66 Museum no e Bsuech abgstattet und hei ganz vöu spannendi Sache erfahre, unter anderem, dass d Route 66 nur grad mau 100 Jahr in Gebruch gsi isch, bevor sie vode Interstate Outobahne abglöst worde isch. Ändlech simmer de am Abe im sageumwobene Grand Canyon acho und hei scho nach 200 Meter im Park fast es Wapiti mitgno (🦌). Erstunt simmer gsi, dass üs vorauem Waud und grüen begrüessthet und nid kargi und roti Fäuse. Bevor mer üs füre strängi Tag parad gmacht hei, hemmers aber ned chönne lasi und si de Sunneundergang überem Canyon ga luege. Es absoluts 10/10!🌅😍

    Ufgstande simmer mitemene 4 ufem Wecker und hei üs scho ganz früeh am Morge ufem South Kaibab Trail i Canyon abe gwagt. S tükische ade ganze Sach isch, dass mer bim Abstieg genau weiss, dass mer de glich wäg wieder ue muss und s vo Minute zu Minute heisser wird. Am Morge am 8:30 isch gfühlt scho 35°. Mir heis aber bis zum Skeleton Punkt (letschte Stop vorem Colorado) gschafft und si nach 4 Stund schwitze wieder obe acho. Drum simmer de Nami ruhig agange, mit Iskaffi, Spieli spile und gmüetlech zämesitze. Belohnt hemmer üs am Abe mitemene feine Barbecue! 🍻    Baca lagi

    Lihat terjemahan
  • PengembaraUSA 2023
    Hari 12

    Joshua Tree Nationalpark

    6 Julai 2023, Amerika Syarikat ⋅ ☀️ 38 °C

    Nachere intensive Ziit a de Westküste hemmer im Stadtlebe de Rügge kehrt. Mehrspurigi Highways simmer hei üs id Wüesti gfüehrt, wo mer de aber eher elei underwegs gseh si. 🚍 Dürri Landschaft und höchi Ussetemperature si üsi stetige Begleiter gseh. Bevor mer i üsem erste Nationalpark ahcho si, hemmer no e Abstächer id Wüestestadt Palms Springs gmacht. Det simmer uf de Suechi nacheme Iiskaffee fascht verschmachtet, ds Thermometer het nämlich 42 Grad ahzeigt. 🥵
    Pünktlich zum Sunneundergang simmer im Joshua Tree Nationalpark ahcho. Mer si überwäutiget gseh vo de wunderschöne Natur. Öberau hets baumartigi Kakteegwächs gha, die sogenannte Joshua Trees, wo sich zwüsche bizarre Jumbo-Steine i de Ebeni usbreitet gha hei. Zerste Mau hemmer e Camping-Platz ohni Strom- und Wasserahschluss gha, nume Natur und ou ke Telefonempfang. Scho gliner aus erwartet, simmer de ufd Tier troffe, wo üs d Schilder devo gwarnt hei. Hase, Chipmunks, Rebhüener und Eidechsli si üsi Nachbere gseh. Bim Tomate schnide het d Chanti de sogar Bekanntschaft mit eme Koyot gmacht, drum hemmer de ds Znacht vorsichtshalber im Camper gesse. Nur die giftige Klapperschlange hemmer zum Glück nie gseh (mir vermuete, dass das as Böbner Christophs Stampf-Taktik gläge isch). 😉
    Endlich si ou üsi Sportkleider zum Ihsatz cho, wo mer am Morge früeh e Wanderig zum Mount Ryan undernoh hei. Wöu mir ja güebti Wandererinne si, hemmer grad no zwe wiiteri Rundwäge ahghänkt. Am Mittag und Namittag hemmer de e chline Vorgschmack devo öbercho, was üs i de paar nächste Täg werd erwarte. D Temperature si gstige und mir hei e Siesta dringend nötig gha, so hemmer üs de i üse Camper verzoge und hei Speli im Schatte vo üsem Erwin gspöut. Am Abe hemmer de nomau e wiitere Rundweg zum Skull Rock gmacht und bi Sunneundergang es Bierli ufem Jumbo Rock nebe üsem Campingplatz trunke, eifach herrlich!😍🍻    Baca lagi

    Lihat terjemahan
  • PengembaraUSA 2023
    Hari 10

    San Diego

    4 Julai 2023, Amerika Syarikat ⋅ 🌙 18 °C

    San Diego - Surfers Paradise! 🏄🏼‍♀️🌸

    Sit üsem letschte Itrag isch scho wieder vöu Wasser de Colorado River ab, aber üsi Täg si aktuell eifach immer vo Morge bis Abe erläbnisrich und zuesätzlech hemmer i üsem erste Nationalpark, Joshua Tree, kei Empfang gha. Aber aues i de reihe na! Ufghört het üse letschti Itrag in Los Angeles. Die Site, wo mir vo dere Stadt gseh hei, si sehr schön und hollywoodmässig gse! Witer simmer am Tag druf richtig San Diego und si nach 2 Täg früeh ufstah und de ganz Tag umelaufe, nah gsi, für e chillige Tag. Drum hemmer üses Zmorge ganz gemüüüütlich igno. Mir ässe meistens es Müesli mit griechischem Joghurt und Früchte, trinke e Orangejus (Chanti und Nädi) oder es Kaffi (Luisa), mitem stolz koufte Biagletti oder choche amene Sunntig ou mau es Ei 🥚. Üse Camper het zwar inzwüsche sehr vöu z biete, z.B. e Mikrowälle, det transportiere mer aber lieber üse Toaster, wo mer für 10 $ im Walmart kouft hei. De Alex vom Camping in Santa Barbara het das e sehr interessanti Transportart gfunde😂. Platzoptimierig isch sitem Start vo üsem Campingabentür sowieso üsi Houptbeschäftigung Nr. 1!

    Aber ebe, zrugg zu San Diego. Die Stadt het üs vom erste Momänt a fasziniert. Bis zum Strand simmer dür paar richtig cooli Ami-Quartierli gfahre - wie mer das vom Färnseh könnt. De Pacific Beach het üs de ändlech die langersehnte schöne Stunde am Strand bote und mir si sogar im chaute Pazifik go bade. D Luisa het üs s Surfe gründlech erklärt. Und übrigens; D Amis hei Nationalfiertig gha und vieli hei de Tag am Strand verbrunge. De Camping isch nachher richtig luxuriös gsi und het sogar e riese Pool gha, judihui😍. De 4th of July hemmer im heisse Wihrlpool gfiret und üsi Nachbere hei mit Liechter und crazy Deko Gas gä. 🇺🇸

    Am nächste Tag hemmer San Diego erkundet. Gstartet simmer im Balboa Park mit wunderschöne Gebäude und em Spanish Village, si witer uf Downtown is Gaslamp Quartier und de Wolkechratzer und de mitem Schiff uf Coronado Island zu de Riche und Schöne (füre Apéro het üses Budget knapp glänget). Wie sichs so nöch ade mexikanische Gränze ghört, si Tacos ufem Spisplan gstande und ou de Cheesecake ide Cheescake Factory isch himmlisch gseh - d Kalorie ignoriere mer mau.😉🍰 San Diego, du hesch üses Härz🫶🏼🌴🌸🇺🇸🏄🏼‍♀️.    Baca lagi

    Lihat terjemahan
  • PengembaraUSA 2023
    1
    Hari 9

    Universals & Griffith

    3 Julai 2023, Amerika Syarikat ⋅ ☀️ 28 °C

    Nachere churze Nacht simmer am 6.30 Uhr uf und hei de ganz tag d’Universal Studios erkundet. Bi gwüsse Attraktione hets immensi Wartezyte gha, wo sich aber sehr glohnt hei. Mir si grad mit de Revenge of the mummy gstartet, e krassi achterbahn, wo üs aui hellwach gmacht het. Eigentlich hemmer a dem Tag erwartet, dass mir verschiednigi Filmsets gsäi, es isch aber me wie e Europapark gsi. Vorauem de Harry Potter Teil het üs sehr gfaue und d‘Studio Tour, wo mer mehreri Filmsets hei chönne bestune. Mitem Taxi simer füre Abschluss vom Tag zum Griffith Observatory gfahre, wo mer e wahnsinnige Usblick über ganz LA und ufs Hollywood Sign gha het. 🌇 Mit Stadt, Land, Fluss hemmer üs d Wartezyt ufe Sunneundergang vertribe, leider hemmer de Apéro vergässe. 🥹 Hungrig simmer drum i In‘n‘Out Bruger gfahre und hei dä Hype um die bekannte Burger testet. Isch würklech sehr lecker gsi!Baca lagi

    Lihat terjemahan

Sertai kami:

FindPenguins untuk iOSFindPenguins untuk Android

  • 2024© FindPenguins
  • Utama
  • Mengenai kami
  • Blog
  • Penjejakan kumpulan
  • Akhbar
  • Terma
  • Privasi & Cookies
  • Sokongan
  • Cetakan
  • Melayu