Reset search
EuropatourEuropatour
SatelliteEdit route

Europatour

June - October 2021
Eigentlich wäremer ez grad in Alaska oder Kanada… eigentlich… Aber d Situation machts leider nöd möglich. Mer möched aber glich sbeschtä druus!
Hallo Europa ✋🏽 Read more
+7
  • 49footprints
  • 15countries
  • 114days
  • 383photos
  • 30videos
  • 20.0kkilometers
Follow Calendar Share Bucket list
Date ascending
  • TravelerEuropatour
    1122
    Day 39

    Lofote 2.0 (in schön 😍)

    August 7, 2021 in Norway ⋅ ⛅ 19 °C

    Wenn denn s Wetter mal mitspiellt sind d Lofote herrlich. Am erste schöne Tag simmer uf de Offersøykammen go Wandere oder halbe chlättere. Ihr chönds eu denke, de Wanderweg isch wieder zu 80% eifach grad berguf gange. De Usblick het eus aber fürd Ufstiigsquale entschädiget, eifach nur en Traum 😍.
    D Lofote sind irgendwie en Mix us Karibik und Hochalpe. Es git überall wunderschöni Sandstränd, ide Theorie chamer Surfe, jetzt im Summer häts aber fast kei Welle gha und sobald mer so um die 500hm durufchraxlet, ischmer gfühlt im hochalpine Gländ.

    Am Abig simmer den ufen Buurehof go Esse und hend eus e Platte (riiiiiessig) mit norwegische Spezialitäte für zwei gönnt. Nach de Erfahrig mit em Stochfisch hemmer eus für die fischlosi Platte entschiede und eus eine mit Fleisch gönnt, es het unter anderem Elch, Rentier und Wal druf gha. Das het au alles zimli guet gschmöcht :).

    De Stellplatz womer im Ahschluss dank de Ines gfunde hend isch de Wahnsinn gsii. D Ines hets nach 20Meter scho beroit, dass sie en Stellplatz mit em Hiiwis „Zuefahrt nur für 4x4“ vorgschlage het. Aber so nach ca. 1 Km fahrt und div. abbrochne Äst simmer den a eusem Traumplätzli ahcho. Mir hend den au mal d Fischerruete füregnoh, hüt na ohni Hagge und Köder und hends usrüehre güebt (für de Fall, dass de Michi mal wett Fische und sich nöd vor allne blamiere muen😂) nach 3-4 Versüech hets au scho ganz guet klapped.

    Am Tag hemmer Bikes uspackt und sind uf de Bøblåheia go Bike. Irgend en lustige Norweger het eus am Parkplatz na gseit es segi super und mer müessi unbedingt ganz ufe. Ja das super isch bi de Ines scho nach öpe 100 Höhemeter verbii gsi und nöd viel besser worde xD Mir hend s Velo nämli ab und zue müesse stosse und wenn nöd isches sau streng gsii.
    Nach guet 2/3 het d Ines den kei Lust meh gha und de Michi isch na ganz ufe, will wenn de Norweger das seit, muemer das natürli au mache. Jaaa die letschte 500m het de Michi s Velo den stahlah wills eis Steifels ohni weg gsii isch….
    D Abfahrt het eus den aber doch nachli Spass gmacht und mir hend eus für d Nacht wieder mal en Hafestellplatz gsuecht.

    Memo a ois:
    - Platte für 2 langet öppe für 4
    - Egal was d Norweger säged, d Trails sind duruf sicher nöd fahrbar
    - D Ines wür am liebste nur ohni Hagge fische (den muemer sicher au kein Fisch usneh)
    - 4X4 Plätz sind suuuper

    Fotis:
    - Offersøykammen
    - Znacht
    - Traumstellplatz
    - Bøblåheia

    Video:
    - en Teil vom Wägli zum Stellplatz
    - Usrüehre finale Version    Read more

    See translation
  • TravelerEuropatour
    1
    11
    Day 40

    Lofote 2.1 (immerno schön)

    August 8, 2021 in Norway ⋅ ⛅ 17 °C

    Euse letschti Tag uf de Lofote bevor dases morn am Morge ufd Fähre in Richtig Senja gaht.

    Hüt hemmer e Walsafari bueched und hoffed dasmer au en Wal und evntl. na paar Delfin gsend. Zum Glück hemer eus gnueg früeh uf de Weg nach Andenes gmacht, will plötzli hemmer im Mail glese, dass Träffpunkt 1.45h vor Abfahrt isch, wills anschiinend na e Museumstour git…

    Im Walmuesum hemer den na öpis glernt z.B das au en Wal Elle und Speiche het und mer s alter vom Wal anhand vode vorhandene Mängi Ohreschmalz bestimme chan. Macht Sinn wie settet die mit ihrne churze Flossene au d Ohre chöne putze 🤷‍♂️

    Vor Andenes ischs meer recht tüüf und mir sind den ca. 50 Minute miteme alte Fischerboot usegfahre und hend denn scho bald de erste Pottwal gortet. Insgesamt hemmer 6 verschiedeni Pottwal gseh. Ihdrücklich wie sie sich nachem Tauchgang erholed und sich nöd gross störe lönd, bevors den wiiter i ca. 800Meter tüfi, so tüf ischs Meer dert ca. gsi, ufd Jagd gönd. Mir sind ca. 3.5h ufem Meer gsi und Seechrank simmer zum Glück nöd worde.
    Falls er wiitere Frage zum Pottwal hend, eifach fröge mir sind jetzt quasi Experte (ähnlich wie bim Fische) 🧐.

    Da in Andenes kes schlaus Restaurant meh offe gha het, simmer den guet 25 Minute in Süde gfahre und hend imene Pub znacht gesse. Da mer am nexte Morge aber früeh uf d Fähre hend möse und die ab Andenes fahrt,
    hemer eus nachem znacht wieder biz i die Richtig begeh zum es Schlafplätzli sueche. Und was gsemmer da uf de Retourfahrt? En Regeboge und den na en zweite Regeboge und plötzi gseht de Michi na e Elchefamilie, eusi erschte Elch, Wuhuuu!!! Insegsamt sinds den acht Elch gsi womer gseh hend. Ufem Video gseht mer nur 5 (ganz gnau luege am Ahfang hets 4, gseht met ufem Foti).
    Es het den au es super Instavideo mit Regeboge, Elch und Sunneuntergang geh 😍.

    Memo a ois:
    - Suppe Esse uf „hoher See“ isch gar nöd so eifach
    - Reservationsbestätigung gnau läse
    - Restaurant google und extra dert hii fahre lohnt sich amigs (wäge Elch und so 🤪)

    Fotis:
    - Pottwal
    - Sunneuntergang

    Videos:
    - Pottwal „Diving!“
    - Rägebogeelchsunneuntergang    Read more

    See translation
  • TravelerEuropatour
    1
    Day 43

    Ufem Weg as Nordkapp

    August 11, 2021 in Norway ⋅ ⛅ 17 °C

    Hüt werdet die letschte knapp 300km as Nordkapp in Agriff gnoh. Ufem Weg hemer euses Allgemeinwüsse nachli ufgfrüscht und sind es Same-Museum go bsueche (für die wo scho bi „möse“, sry Aargau halt, ah öpis anders anstatt „müesse“ denkt hend, d Same sind d „Uriihwohner“ vom Norde vo Skandinavie.).
    Im Freilliechtteil hets na Felsritzige bzw. Bergkunst vode Same gha. Da mer die Felsritzige schlecht erkennt, het mer sich ca. 1970 defür entschiede, zum die rot ahmale dases Touris besser gsend…. Mer gsehts tatsächlich viel besser (siehe Bilder) aber biz Charm isch scho verlore gange.

    Nachdem mer eus ade Salatbar vomene Supermärt wieder mal de Zmittag gholt hend, hemer nur na es schöns Plätzli bruucht. Da isch eus doch so es Chiisstrasse wo biz id Berge füehrt wie gruefe cho und wert hets denkt?! Vo dert gönd natürli no meh Wäägli weg…. Ihr glaubed gar nöd wie fest sich d Ines gfreut het (siehe Videos) 😄

    Nachdem mer das Abentür heil überstande hend isches wiiter in Richtig Nordkapp gange und mer hend gfühlt na 100 Rentier gseh. Womer es wiises gseh hend hemer eus na denkt: geiil die sind sicher mega selte!
    Nachem 3te wisse Rentier glaubed mer fengs, dass die gar nöd so selte sind 🤷‍♂️

    S Nordkapp hemer aso erreicht aber gseh tuet mer ussert Nebel nöd so viel… me dezue tomorrow

    Memo a ois:
    - Salatbar im Supermärt isch super
    - Rentier stönd immer uf de Strass

    Fotis:
    - Same-Museum
    - Rentier
    - En Fjord
    - Die entspannti Ines bim bergab fahre    Read more

    See translation
  • TravelerEuropatour
    1
    Day 44

    Nordkapp

    August 12, 2021 in Norway ⋅ ☁️ 11 °C

    Bis as ändi vo de Wält - oder ebe as Nordkapp (mit zwei PP wil Norwegisch ;-) )

    Da simmer jetzt also, am Nördlichste vom Feschtland us erreichbare Ort. Wiiter ue chammer mit em Auto nümä fahrä.

    So guet mir ja sind im Plane, händ mir eus natürlich vorgängig au chli mit em Wätter befasst - wänn scho nur en „Übertürte Parkplatz“ dänn bitte au mit chli schönem Wätter.
    Niicht, natürlich isch das mit em Wetter chli id Hose, s App het immerhin e churzi uflockerig am Abig ahzeigt gha, susch aber nur bewölcht. Lang hets au guet usgseh (fahrsch ca. 2 Stund eifach de Küschte entlang ohni Wohngebiet ohni nüt)
    bis mer denn um die letscht Kurve gfahre sind und im dickste Näbel grad no knapp d Zuefahrtsschranke entdeckt hend. Churz hämmer zögeret öb mer eus das würkli ahtüend - doch das isch würkli nur churz gsi. Pro Person hesch ca. 25.- müesse zahle. Defür hesch 24 Stund döfe uf dem Parkplatz sie. Somit hemmer eus dobe es Plätzli gsuecht und hend als erschts mal Znacht parat gmacht. Dusse hetts immer no dichte Nebel gha und gwindet wie Sau (Sorry für de usdruck).
    Plötzlich, no bevor mer mit choche ahgfange hend, hets es bizli uftah. D Ines het ihri Kamera packt und isch grännt wie blöd. De Michi het nur de chopfgschüttlet.

    D Nacht dur hetts wiiter gstürmt und es isch mehrmals go Rägne cho au am Morge simmer wieder bi dichtem Näbel ufgstande und hend dänkt, immerhin hetts geschter chli uftah.
    Aber au am morge plötzlich us em nüt ischs heller und heller worde und wärs glaubt d Sunne isch fürecho. So schnäll chas gah i de höchi!

    Ah und übrigens… Mer sind jetzt stolzi Mitglieder vom „The Royal North Cape Club“ und hend es läbelangs rächt zum dahi zrugg z cho 😄

    (Fötelis: Nordkapp bi Näbel, Nordkapp bi Sunneschii, The ROYALS ;-) )

    Memo a ois:
    - gnueg lang warte denn wirds sicher mal schön
    - d Solarpannels hemmer no nie brucht - Strom aber au nöd.
    - 6500km simmer gfahre bis da ane (6000 de Mich, de grossi Rescht d Ines)    Read more

    See translation
  • TravelerEuropatour
    111
    Day 46

    Levi

    August 14, 2021 in Finland ⋅ ☁️ 14 °C

    Nachdem mär ja im schwedische Åre zwei super Biketäg gha hend, hemmer natürlich au no wellä Finland under d Lupe näh, gnauer Levi.

    Levi, DAS Wintersportgebiet in Finland… Oder eifach de einzig Hügel mit 531 müM wiit und breit (stimmt nöd ganz, aber fasch😉)

    Da mer am spötere Abig ersch z Levi ahcho sind und mer z fuul gsii sind en Stellplatz oder ähnlichs z sueche, hemmer eifach uf em Parkplatz vor de Gondelstation gschlafe.
    Mer hend sogar chöne usschlafe, will au d Suomis sich nöd stressä lönd und ersch am 10ni alles ufmöched. Obwohls Samstig gsi isch (jaa mir hend wieder mal super planet🙈) hetts fasch kei lüüt gha! So simmer gmüetlich öbbe uf di halbi 11i ufs Bike.

    Die blaue Trails sind sogar de Ines rächt schnäll langwilig worde, so das mer eus langsam a die rote anetaschtet händ. Und mol die sind kuul gsi! Technisch nöd ahspruchsvoll aber zum üebe top.

    Åre blibt aber ganz klar eusä Favorit! 🥇

    Memo a ois (und dasmal au hiiwis a alli wo nöd Biked
    - vo obe gseht JEDES schänzli grösser us (lönd eu aso nöd tüsche vo de Ines ihrem gümpli 😂)
    - au de Michi het bi sim Sprung d Hose voll gha 😉
    - Dönerpizza isch komisch aber na geil
    - zum Glück het eus Google wiedermal ghulfe und ois mitteilt, das Finland inere andere Ziitzone isch und zwar +1

    (Föteli: Bikeprofis in Levi 🤙🏽🥴)    Read more

    See translation
  • TravelerEuropatour
    Day 50

    Unterwägs nach Stockholm

    August 18, 2021 in Sweden ⋅ 🌧 14 °C

    Und da isch er, eusi nöchsti Footprint.
    Ja wieso isch das so lang gange?! Will schlichtwäg nöd viel gloffe isch. Sit mer in Levi abgfahre sind, ischs wätter immer schlächter worde und irggendeinisch hetts denn nur no gräggnet (innerhalb vo 24h so viel wie die lteschte 2 Mönet in Schwede). Drum hend mir eus denn au rächt schnäll entschiede so wiit abe zfahre wie möglich.
    So hemmer denn au schnäll a höchi verlore und sind scho glii in Stockholm glandet 😉

    Unterwegs hemmer aber glich no chli was gseh und gmacht.
    Mer hend zum bsp. no en chline abstächer nach Rovaniemi gmacht. Det wohnt offiziell de Santaclaus 🎅 und er het dete au sies Post Büro.
    Jaaa es isch en Witz gsi das Dorf im Summer go zbsueche und hett sich überhaupt nöd glohnt. Aber heiii mer sind dete gsi😂

    Aber ez würkli ab uf Schwede und natütlich hetts a de grenze grad no e Ikea gha - so das mer dete doch no go hotdog 🌭 hole sind 🤤

    Underwegs hemmer eus no Gammelstads ahgluegt. Früehner hetts noni so viel Chile gha und will für vieli d Ahfahrt rächt lang und umständlich gsi isch, hät mer um d chile chlini Hüsli baut so das mer sich het chöne vo de ahreis erhole. Die meiste Hüsli vo de Gammelstads sind hüt no im Familiebsitz. Drine durhaft wohne isch aber verbote.

    Gschlafe hemmer meistens irgendwo ussert einisch, da hemmer wiedermal en Hafestellplatz gfunde. Mer sind eigentlich immer no am meiste Fan vo denä (nebst de traumhafte Naturplätzli natürlich) 🤗

    Ah und in Uppsalla simmer au no churz gsi und hend feini Mezze gässe 🤤

    (Föteli: Santaclaus Village, Hotog, Es glesli Wii uf eusem Übernachtugsplatz, Gammelstads, Hafestellplatz, Znacht in Uppsalla & rääääggge)

    Memo a ois:
    - Wänns scho in Norwege nöd rägnet, dänn halt in Schwede    Read more

    See translation
  • TravelerEuropatour
    1
    Day 53

    Stockholm

    August 21, 2021 in Sweden ⋅ ☀️ 17 °C

    Und da simmer, in Stockholm, dä Hauptstadt vo Schwede.

    Stockholm isch e mächtigi Stadt, sie umfasst 14 Insle und die sind mit meh als 50 Brugge mitenand verbunde, so das mer bi de Besichtigung vo de Stadt uf d ÖV ahgwiese isch.

    S ihdrücklichste für eus isch s Vasa Museum gsi (D Stadt sälber isch würkli au wunderschön, aber ebe fasch zu verzettled)

    Im Vasa Museum isch d Hauptattraktion d Vasa sälber😄. Es 400 jährigs Kriegsschiff, s gröschte zu sinere Ziit, wo bi sinere Jungferefsahrt nach bereits 1300 Meter gsunke und den über 330Jahr ufem Meeresgrund vor Stockholm gläge isch. Bevor mer sie usgloffe isch, hetmer na en Test gmacht und 30 Lüüt vo Backbord nach Steuerbord renne lah. De Versuech hetmer den abbroche, will s Schiff fast kenntert isch. Naja usgloffe isch mer den trotzdem, het ja viel Geld kostet das Schiff, und obwohls kei Wind gha het isches nach 1300m fahrt gsunke. Nachher isches über 330 Jahr ufem Meeresgrund gläge bevor mers 1956 entdeckt het und den im Jahr 1961 erfolgrich borge het. Nachdem mers wieder zämebastlet het isches 17 Jahr mit irgendeme chemische Zeugs ihspreit zum s Wasser usem holz löse und s Wasser quasi mit dem chemische Zeugs z ersetze.


    Au simmer no s Rathus vo Stockholm go bsueche. De einti Ruum isch komplett mit goldigem Mosaik bestückt. Die Frau wo d Füehrig mit eus gmacht het, het eus no verzellt das es sehr beliebt segi i dem Rathus z hürate. Jede Samstig findet da im 5-10Minute Tackt trauige statt und es segi sehr luschtig vor em Rathus das ahzluege - da mir am Samstig eh no bizli ziit gha hend bevor eusi Fähri abfahrt hemmer eus das Specktackel ahgluegt. Und ja es isch würkli luschtig gsi und doch isch es sehr ruhig zue und her gange.

    Am Fritig abig, hemmer eus no under d Partybevölkerig g mischt und eus wiedermal ein zwei Drinks gönnt 😄🍻

    Jetzt heissts aber für eus Tschüss Norde, es isch sehr schön gsi! Mer chömed wieder mal 🤗 und Hallo Oste. Ab uf d Fähri nach Estland.

    (Fotis: Stockholm, Vasa, Rathus, Usgang, tschüss Norde, ändlich Bruchemer mal euses liecht am Abig im Büssli😅)

    Memo a ois:
    - en MC oder da ebe MAX muss au da in Stockholm nach em Usgang sii    Read more

    See translation
  • TravelerEuropatour
    Day 54

    Tallinn Estonia

    August 22, 2021 in Estonia ⋅ ⛅ 15 °C

    Byebye Skandinavie, hello Baltikum

    Mit de Baltic Queen gahts, inkl. Blöterliwii früehstück, i knapp 16 Stund vo Stockholm uf Tallinn (eusi erschti Chürzfahrt quasi).
    S erschtmal richtig gfreut in Estland het sich de Michi scho nach wenige Minute, Diesel 1.22 geilooo, grad mal volltanke de Chlapf. Nachdem mers trotz komische verkehrsfüehrige irgendwie doch na zu eusem Hotel gschafft hend, simmer au scho bald go d Stadt erkunde.
    Zerscht simmer inen Teil vo de Stadtmuure bzw. Stadtfäschtig vo Talliin. Dert chamer unter anderem i zum Teil über 300 Jahr alte Tunnelsystem umelaufe und gseht, wie das Tunnelsystem vom 17 Jahrhundert bis churz nachem zweite Weltkrieg verwendet worde isch. Mir hend döt au na en versteckte van Gogh gfunde, kei Ahnig eb de Vincent au mal i dene Gäng umegeisteret isch 🤷‍♂️

    Denn ab id Altstadt (Unesco Weltkulturerb) womer beide zimli gflasht gsii sind. Überall sind na reschtä vode Fäschtig ume, die werdet au hüt na gnutzt und sind dementsprechend sehr guet erhalte. Die ganz Altstad isch aber au sehr guet pflegt, irgendwie hesch überall chönne durelaufe und es isch eifach immer nur schön gsii. Fascht biz wie in Italie, es het gfühlt au genau soviel Souvenirshops gha.

    D Altstadt, d Neustadt und de „Hippster-Stadtteil“ (alles volle Grafiti und so 50% pflegt und 50% verfalle“) sind au relativ guet z fuess erreichbar.

    Es het au na es cools Maritimmuseumm. Vo Eissegleschiff (wo über 100km/h schnell werdet) über Uboot und Flugabwehr, het mer dert alles chönne ahluege.

    Erwähne mömer natürli au na euses romantische Znacht (s T-Shirt vo de Ines eifach ignoriere). Entli wieder mal richtig geils Fleisch 😍 und das fascht no gratis 😅.

    Memo a ois:
    - Ziitumstellit beachte (den het d Ines am Morge früeh uf de Fahre nöd scho en halbe Herzinfarkt 😄)

    Fotis
    - Uslaufe Stockholm / blöterli zmorge
    - Fäschtig
    - Altstadt (hetet na viel meh fotis)
    - Maritimmuseum
    - Znacht (Iberico Schwein und Filet)    Read more

    See translation
  • TravelerEuropatour
    Day 56

    Underwägs in Estland

    August 24, 2021 in Estonia ⋅ ☁️ 12 °C

    Nachdem mer eus ade Altstadt satt gluegt händ simmer ächt gspannt gsi wies im Estland susch no usgseht.

    Als erschts hemmer grad mal de höchsti Wasserfall (und gemäss de Este au eine vo de schönstä in Europa 🧐) wos git go besichtige. Mer sind au da wieder chli skeptisch gsi, will mer binere Touritour wo a eus verbii gloffe isch ufgschnappt händ, das mer soebe de höchsti Punkt vo Estland erreicht hegi (de ihgang vonere Burg i de Altstadt 😅)
    Jaaaa okey, so würkli höch isch er nöd gsi und viel Wasser het er au nöd gfüehrt. Aber mer hend eus doch chöne vorstelle, das er rächt imposant chönnt werdä wenns mal chli länger rägnet.
    Apropos Räge… was mer in Norwege nöd gha hend hemmer irgendwie susch überall.
    Es rägnet wieder mal in ströme und besserig isch noni in ussicht.

    Egal mer sind trotzdem wiiter zoge. Als nöchsts hemmer wellä e Wanderig dur eine vo de viele Nationalpärk mache. Moorwanderig seg ein MUSS und öbbe s einzige wo mer in Estland cha mache😅

    So hemmer eus denn für ein Nationalpark entschiede (eine wo mer chan Bade, de Michi het gmeint er welli nämmli no drii🤔) und sind am Abig au no lostrottlet. Bi sonete Moorwanderig lauft mer eigentlich eimal uf so Holzsteg ums ganze Gebiet und uf de hälfti vom wäg hetts denn au no en Ussichtsturm.
    Chuez nach dem mer lostrottlet sind isch au scho de erschti Badeteich ersichtlich gsi. D Ines het denn nur so gmeint, aso wennd da ine gasch chunsch 100.- über. Gesagt getan 🤦🏽‍♀️ langsam sött sie doch ihre Fründ känne und wüsse das er das ohni zögere macht. Jeglichi Film und Foti Material gits nöd dezue, mer hend ja au nüt zum Bade debii gha 🤪
    Ja und dänn no zum Ussichtsturm… Leider isch de vome Jugendverein bsetzt gsi, so das mer nöd ue händ chönä 😔
    Drum hend mir eus eifach bim nöchste Nationalpark es Übernachtigsplätzli gsuecht und sind am morge druf eifach nomal e chlini Wanderig go mache.

    Ja und susch isch Estland überhaupt nöd so wie mirs eus vorgstellt hend. Die wenige Wohnsiedlige wos hät sind ime „guete“ zuestand und d Strasse gönd langwilig immer gradus dur Waldgebiet. Irgendwie vermissemer langsam d Bärge chli 😅    Read more

    See translation
  • TravelerEuropatour
    Day 58

    Riga

    August 26, 2021 in Latvia ⋅ 🌧 12 °C

    Ja jetzt simmer ah cho… was für zwei unterschiedlichi läbensstiel zwüschet Estland & Lettland und zwüsched de Hauptstädt Tallin & Riga. Während Tallin no rächt en Finnische touch het, segs i de Sprach oder eifach im ganze ufträte isch mer in Riga definitiv im Baltikum ah cho.

    Begrüesst worde simmer uf de 80er Strecki gad mal dur en sturzbetrunkene Spaziergänger zmitzt uf de Strass.
    Es isch denn au leider so wiiter gange, immer wieder sind der in Riga Schnappsnase entgäge glofe… obwohl eigentlich uf öffentlichem Ruum Alkohol trinke verbote isch.

    Au da in Riga hämmer eus wäg em Wätter wieder es Hotelzimmer „gönnt“ ( S 4* Parkhotel isch günstiger als die einte Camping in Norwege gsii).
    So simmer z Fuess chli dur d Stadt gschlenderet. Viel z gseh hetts nöd geh, usserhalb de Altstadt hets entsprechend viel alti, halb zerfallendi Gebäude gha, i de Altstadt defür wieder guet erhaltni alti Gebäude. Aber gege Tallinn het Riga kei Chance. Am Schluss sind mer denn no ine typisch alti Markthalle wo mer alles het chöne poste.

    Das wärs aber au scho wieder gsi für eus in
    Lettland. Jetzt gahts wiiter uf Litaue 😄
    Mer sind gspannt…

    (Fotis: vieli farbigi Gebäude☺️, Markthalle)

    Memo a ois:
    - keis Wunder sind da alli schnappsliechene wenn de Alkohol günstiger isch als s Wasser
    - die schönste Gebäude sind immer d Bibliothekä    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English