Atur ulang pencarian
Laura GlatzfelderLaura Glatzfelder
SatelitEdit rute
melakukan perjalanan di 43 negara Baca selengkapnya Bern, Schweiz
  • Asien 23
    1
    Hari 68

    Ella: Ussicht mit viune Doggos

    25 November 2023, Srilanka ⋅ ☁️ 22 °C

    D Zugfahrt vo Nuwara Eliya isch wunderschön agleit dür Teeplantage, Primärwäuder und etlechi churzi Tunäu. Z‘Wetter hätti abwechsligsricher nid chönnä si, d Britä vis-a-vis vo üs und mir hei bestimmt 5 mau z Fenster zueta ums churz drufabä wieder ufezschiebe. Z Warte ufne angere Zug het sich so lang agfüehlt das einigi denkt hei gha mir Übernachte vilech sogar uf dene Bänk.
    Sowit ischs nid cho u drü Stund nach däm mr los si, simer im Gröschte Schiff in Ella acho. Dä Ort besteit eich nume us Restis u Hotel entlang vore Strass wo sich dür z Gländ zderuf schlänglet. Üses „Hill top guest house“ trumpft mitere wunderbare Ussicht vor Dachterrasse uf. Nachdäm mr üsi Wöschsäck hei abgä simer dür z Stedtli spaziert und hei imne Kaffi amnä Wohnigsbewerbigstext umedökterlet.

    Zum zNacht hets de ändlech z erste Kottu Rotti gä. Fasch so guet wie dr Keve sinersits het dr Choch i sim Hüsli die Teigflädä mit sine zwöi Spachtlä, unger ohrebetäubendem Lärm, zerhackt und sä mitm Gmües vrmischt. Mega fein!

    Am nächste Morge heimer dr Wecker wieder einisch früeh gsteut: 4:30. churz drufabe simer mit chli Proviant undere Stirnlampe losgloffä. Drüvertu Stund später und es paar Schweiss tribendi Trittä zum Schluss simer ufm „Little Adam‘s Peak“ gstande und hei ufe Sunneufgang gwartet. E Streuner het üs ufm ganze Weg bis ufe begleitet, d Laura hets nid gstört :) Nachdäm ig sitzend uf die erste Sunnestrahle gwartet ha, isch sogar no e zwöite Streuner, näbst aune streuende Touris, cho und het sich vor mir ufm Rucksack härekuschlet.
    D Sunne het de nüm lang uf sich la warte und mir hei die schöni Ussicht is Tal gnosse. Ella isch vorauem uf Grund vo dene schöne Blicke id Landschaft so beliebt u mittlerwile recht touristisch.

    Ufm Wäg zrügg simer zum zwöite Influencer (Hot-)Spot: zur „Nine Arch Bridge“. Mir hei Glück gha, churz drufabä isch e Zug düregfahre mit etleche Touris wo zu de Türe si useghanget. Einigi Fotos später simer de entlang de Gleis zrügg is Dorf gloffe. Dert heimer im Städli zmörgelet und hei üs gfreut nomau chönne ga härä z liege. Dr Nap isch definitiv zlang gsi dasmene no so dörft nenne :)
    Dankem Hunger simer de wieder uf und hei es feins Gmües-Curry gässä und i ha es witers Mau im Cabo vrlore. Z Wetter het o da wieder abm Mittag zueta und es het glägentlech gschüttet. Dr Rest vom Nami heimer de im Schärme umechillt, i ha ir Hängematte „Das Parfüm“ ferti gläsä u freue mi bereits ufe Büechertransport wo am Wuchenend achunnt :)

    Vorem zNacht simer imne chli bessere Hotel ga z Wohnigsbewerbigsformular usdrucke u heis bimnä Bier usgfüllt. Die viele Hünd entlang vor guet befahrnige Houptstrass hei ar Laura’s Helfergen strapaziert. E hinkende Streuner het de drzue gfüehrt das si churz drufabä mit es paar Päckli Hundefuetter usm Supermärit isch usecho. Dä Hund heimer zwar grad nüm so schnäu gfunde, zwöi angeri hei aber im Nu die Mahlzyt vrspiesä u gnüsslech ihri Zähn gläckt.
    Drna heimer ire Beiz vouer Touriste mau wieder Lust ufne Pizza gha. Nachdäm mr dr Berg mit früsch gwäschniger (nid so früsch schmöckender) Wösch hei zämägleit gha, simer de i üsne zämägschobnigä Einzubett ipfuset.    Baca selengkapnya

    Lihat terjemahan
  • Asien 23
    Hari 67

    Vo Kandy nach Nuwara Eliya

    24 November 2023, Srilanka

    Für dä Zug, wo vo Kandy bis Ella fahrt, chame 1.,2. und 3. Klass Tickets choufe. Mir hei gläse, dasme söu 2. oder 3. Klass choufe, wüume dert cha d‘Fenster uftue und d‘Türe während de Fahrt offe blibe und meh so d‘Natur no viu besser cha gniesse (Ir 1. Klass hets AC und drum isch alles zue). Mir hei üs also 2. Klass tickets kouft für 1000 Rupie (2.70 Franke). Bim istige i Zug isch aber es mega Chaos gsi und wüus so viu Lüt het gha simer schlussendlech ir 3. Klass glandet. Wüu aber bide erste Stopps scho immer wieder paar Lüt si usgstiege, hetsechs de mit de Zit glockeret. De Sacha het sogar e Sitzplatz chönne ergattere, i bi lieber bir Türe bliebe und ha dert d‘Ussicht und die früschi Luft gnosse. I ha 2 jungi dütschi Froue troffe, und die ganzi Fahrt chli mit ihne plöiderlet und Fotos gmacht. E Gruppe iheimischi jungi Männer hei üs de ono aquatscht und hei unbedingt mit üs es Selfie wöue mache, und obwohl sie die Strecki nach eigener Ussag regelmässig Fahre, heisi o flissig Fotos gmacht vor Landschaft. D‘Zugfahrt wird nämlech nid zu Unrecht als eini vode schönste Zugfahrte weltwit bezeichnet. Quer düre Dschungel, umgäh vo Palme und Eukalyptusböim, und ab und zue fahrt me dürne Teeplantage. Es isch extrem idrücklech und schön. Aber haut o lang 😂 Nach guet 5h simer in Nuwara Eliya acho und hei üs gfreut, es paar Schritte z’loufe. E Tuktuk-Fahrer het scho uf üs gwartet und het üs dür z’Städtli zu üsere Unterkunft bracht. Die letzte paar Meter si so steil gsi dasi ha Angst gha, z‘Tuktuk gheit hingerübere. Bir Unterkunft si mir vom Eigetümer vom Homestay scho härzlech empfange worde miteme Fruchtsaft und Tee. Z’Zimmer het e meeega schöni Ussicht gha uf d’Landschaft vo Nuwara Eliya.
    Nachem ichecke heimer üs entschiede, e chlini Usfahrt z’mache id Teeplantagene, Nuwara Eliya isch nämlech sehr berüehmt füre Tee. Mitem gliche Tuktukfahrer wo üs scho zur Unterkunft hei bracht simer när guet 3 Stund dür die schöni Landschaft gfahre, ab und zue heimer aghaute u si chli dür z’Züg gloffe. Es het einisch churz afah rägne, 15 Minute speter isch aber schowieder blaue Himmu gsi. Zum Schluss simer no ine Teefabrik gange und hei e chlini Füehrig gmacht dür d’Produktion.
    Womer wieder dehei si gsi, heimer no chli zit gha zum chille und chli si, bevormer ir Unterkunft selber es mega feins und huusgmachts Curry hei gässe. Wüumer vor Zugfahrt und üsem Usflug zude Teeplantage mega müed si gsi, simer wieder früeh ga schlafe.
    Am nächshte Morge heimer uf üsere Terasse es typisch srilankesisches z’Morge übercho, Roti (Art Pancake) mitere Kokosnuss-Zuckerfüllig, sehr fein gsi. Mit vollem Mage simer de gege Mittag wieder mit üsem Tuktukfahrer des Vertrauens Chandra zum Bahnhof gfahre, zum de Zug näh richtig Ella. Dismau heimer grad vo Afang ah es Ticket ir dritte Klass kouft, üse Tuktukfahrer het üs sogar no chönne Sitzplätz organisiere ☺️    Baca selengkapnya

    Lihat terjemahan
  • Asien 23
    Hari 66

    Sri Lanka: Ayubowan

    23 November 2023, Srilanka ⋅ ☁️ 30 °C

    Nachemne churzwilige Stop in Bangkok (inkl. Sunnecreme choufe) simer fasch um Mitternacht in Sri Lanka glandet. Dr Flug isch überne Stunde (!) länger gangä us plant da z Flugi schins nid überem offnige Gwässer zuegla isch 🤯
    Üse Gastgeber, womer es Zimmer ir Nöchi vom Flughafä buechet hei, isch so lieb gsi u het knappi einehaubstund uf üs gwartet. Lang ischs de när o nid gange bis mr beidi töif gschlafe hei.

    Am nächste Morgä heter üs früschi Frücht und Toast uftischt u drna het üs si Kolleg a Busbahnhof in Negombo gfahre. Dert simer i Bus nach Kandy igstiege u hei gwartet bis dr Chauffeur Lust het gha loszfahrä. Mit offnigä Türä und luter Musik simer losgfahrä u na-dis-na si Lüt igstiege. Fasziniert wie d Lüt usm no fahrende Bus i- oder o usstiege. Wär ke Platz het git eim wo hockt sini Täschä ufä Schoss. Mitm Fahrtwind wo dür die offnigä Fenster inechunnt bruchts definitiv ke Klima und vieli Vrchäufer stiege immer wieder i zum jensti feini Sache z vrchoufä.

    Mit vouer Blasä simer 4 Stund später in Kandy acho und si mitemne Tuktuk zu üsere Ungrkunft gfahrä. Es härzigs Ehepaar het üs mitemne Fruchtsaft (Frücht usm eigete Garte) i Empfang gno. Si hei üs vrzeut das uf Grund vom viele Räge d Züg momentan usfaue.
    Hungrig simer de dr Hügu abe id Stadt spaziert und hei üs ufm Weg zum zNacht bim Bahnhof no informiert. Wägä dr schlechte Wetterprognose wird am tagdruf dr Zug nume bis Nuwara Eliya fahrä (und nid bis uf Ella).

    Zum zNacht heimer mega feini „Dosa“ gässä. Ig Massala Dosa und d Laura Massala Cheese Onion Dosa (nid überraschend). Ds isch e mega dünne Teigflade, eher so Crepes ähnlich, wo gfüllt mit Härdöpfu u viune Gwürz serviert wird. Drzue gits chlini Töpfli zum dünkle mit Dhal u witere feine Sachä. Obwohl si üs, mir si öbe di einzige „wisse Westler“ gsi, Bsteck hei härä da hei o mir ds wie aui angere vo Hand gässä. Ds Gricht het mi so fest a letzt Ufenthalt in Sri Lanka mitm Keve erinneret und im Spezielle ds Gricht hani scho fasch vrgässä gha.
    Am Schluss wischt mä d Händ bim Bründli zmitzt im Restaurant und tröchnetse mitemne meh bessere Notizpapier ab :)

    Da gad ganz ir Nöchi dr „Sri Dalada Maligawa“ Tämpu gsi isch und üs d Gastfamilie gseit het dases am Abe e Zeremonie git, heimer no churz wöue ga vor härä sta. Us churz isch chli länger wordä, ä Guide het üs agsprochä und am Schluss simer e Haubstund mit ihm dür dä Tämpu gloffe u er het üs viu über die buddhistische Ritual vrzeut.
    Nach däm mr üsi Schue de wieder gschnüerret gha hei simer de definitiv müed is Tuktuk gstiege u hei üs la zrügg id Unterkunft fahrä.

    Am nächste Morgä hets bereits am 7ni es srilankesischs zMorgä gä: mir hei leider nid vrstande wie die Flädä heisse aber drzue hets früschi Frücht u wässrigä Kaffi gä. Meh aus satt heimer üs vrabschidet und si a Bahnhof. Dert hets gheisse dr Zug fahrt iz glich bis Ella aber mir hei üses Ticket glich nume bis Nuwara Eliya kouft. Während däm d Laura d Rucksäck bewacht het und fürne guete Sitzplatz igstande isch, bini no churz uf d Post und ha när no feini Samosas für ungrwegs kouft. Pünktlech isch dr Zug, bereits recht vou, in Kandy igfahrä und mir si los zum nächste Ort.    Baca selengkapnya

    Lihat terjemahan
  • Asien 23
    Hari 64

    Phnom Penh zum 2ten

    21 November 2023, Kamboja ⋅ ☁️ 31 °C

    Nachere sehr gedignige Busfahrt mit Kaffi u Fried Rice simer nachm Mittag zrügg ir Houptstadt acho. Bis mr hei chönne ichecke heimer amne Strasseeggä ä Kokosnuss und es Espresso trunke und Plän füre Nami gschmiedet. Nach zwöi intensive „Tämputäg“ isch d Motivation öbis ga azluege auerdings mässig gsi. So ischs drzue cho das nachem Bezug vom Zimmer d Laura s het vorzoge d Bei höchzlagere und im Bett z chille und ig bi es paar Hüserblöck witer imene Kaffi ga Charte schriebe und im Buech läsä.

    Am Abä heimer üs es letzts Mau mit dr Maya und Laura zum zNacht troffä. Nachm letzte mau womer sä gseh hei in Can Tho si si när uf Koh Rong und so heimer wieder viu z vrzeue gha. Zersch heimer bim „russian market“ ire Bar öbis trunke und dr Usblick uf ds gschäftige Tribä bestunt.
    E churzi Tuktuk-Fahrt z 4t später simer imne Resti nomau ga Amok (und Burger) ässä. Zum Abschluss heimer imne Usgangsviertu no es Bierli trunkä und hei üs vrabschidet. Si si am nächste Tag witer nach Siem Reap (u när witer nach Thailand) greist. Z nächste Wiederseh wird de ir Schwiz (äuä im Apres-Ski) stattfinde :)

    Am nächste Morgä heimer de uf Empfählig vo ihne doch no d Killing Fields bsuecht. Mir hei zersch nid gwüsst gha ob mr ds wei bsueche da mr bereits bim erste Ufenthalt im Gfägnis S21 viu über die Gräueltate vo de Khmer rouge erfahre hei.
    E junge Tuktuk Fahrer het üs usserhaub vor Stadt abglade. Dr Man United Fan het sogar YB kennt und mir hei einigi lustigi Anekdote erfahre.

    Acho bi dene „Killing Fields“ isch de die gueti Stimmig schnäu vrflogä. Dankem Audio-Guide heimer nomau meh erfahre was zwüsche 1975-1979 abgangä isch und si dert gstande wo über 20‘000 Persone ihres Läbä gla hei. Über 175 witeri so „Killing Fields“ hets zu dere Zyt gä wo lediglich drzue dient hei, d Exekutione wahrznä. O Massegräber vouer Knoche vo Chind u Froue fingt mä dert. No hüt chöme nach Rägefäll immer no Chnöche zum Vorschin. Vieli drvo heisi gsammlet und ihre Gedenk-Stupa ufgstaplet.
    Dä Genozid isch üs würk sehr nöch gange und wärdä ds Kapitu vo däm schöne Land genau so wie die nätte Mönsche u z feine Ässe i Erinnerig bhaute.

    Lang ischs still gsi uf dr Fahrt zrügg id Stadt. Drna heimer üsi Rucksäck is Tuktuk gladä und si a Flughafe tukerlet. Am 5i simer mitm Flugzüg abghöbä u hei Kambodscha vrla Richtig Sri Lanka.    Baca selengkapnya

    Lihat terjemahan
  • Asien 23
    Hari 62

    Siem Reap: Laura Croft in Angkor

    19 November 2023, Kamboja ⋅ ☁️ 29 °C

    Nid verpasse bire Reis in Kambodscha darfme e Bsuech bir weltwit grösste Tämpualag: Angkor.
    Die hüt buddhistische Tämple si ursprünglech us Hindu-Gebäude bout worde und mä geit drvo us das dert die ersti Megapolis existiert het.
    Vor de Tor vo däm riese Areal liegt d Stadt Siem Reap wo bsunders uf d Beherbergig (und Ungrhautig) vo de Touris usgleit isch. Mir hei imene coole Hostel es Doppuzimmer für drü Nächt bezoge und üs nach dr Akunft und eme zNacht über die vrschidnige Toure informiert. Mir hei recht gstunet über d Ticketprisä für ufs Gländ (64 Dollar für 3 Täg pro Person) und hei nach däm mr akzeptiert hei in Kambodscha z’Budget definitiv z verfähle o e Tuktuk-Tour reserviert.

    Am nächste Tag simer nach Usschlafe u zMörgele (am Mittag) de am 2i los mitemne 4-er Tuktuk. Zämä mitm Paul (ä guet 50 jährige Brit us London) und dr Sophie (ä 30 jährigi Ungarin us Oustralie) heimer a däm Nami 5 verschidni Tämple bsuecht. Die uftürmte Steiblöck si ungrschidlech guet erhaute, vo fasch komplette Ruine mit einzelne Steine am Bodä bis zu Sülegäng mit Dach und Wanddekoration vo Steimetze hets aues gha. Dr Dschungu ringsum het über vieli Jahr dert dominiert und vieli spektakuläri Biuder hets gä wo Böim über die Gebäude gwachse si.

    Vorem letzte Tämpu heimer es paar bratni Nudlä gässä und si när zum letzte Tämpu ufemne chline Hügu pilgeret. Mit hunderte (!) andere heimer de gspannt dr Sunneungrgang abgwartet. Wunderschön isch dä orange Fürball langsam am Horizont vrschwundä und churz drufabe simer im dunklä zrügg zum Tuktuk gloffä.

    Dr Plan das mr, nach däm üs z Tuktuk bir Ungrkunft het abglade, no churz öbis gö ga ässe u när früeh gö ga liege het e Bier Tower kaputt gmacht. Zämä mit üsne zwöi Tuktuk-Fründe Sophie&Paul heimer de no zwöi witeri Bier-Towers bsteut u si de bizli später ga pfuse. Nid bsunders lang da mr am nächste Morge bereits am 4.30 is nächste Tuktuk gstiege si. Wieder i üsere 4er Gruppä heimer dismau d Sunrise-Tour gmacht. Bim grösste u berühmtiste Tämpu, em Angkor Wat, heimer gwartet bis d Sunne ufgeit. Mi chunnt sich scho biz vor wie dr Indiana Jones weme drna dür die uftürmtä Steine schlicht. Drna simer wieder mitm Tuktuk vo Tämpu zu Tämpu gfüehert wordä und es isch teils schwirig gsi die usenand z hautä.
    Eine vo de letzte Stops isch bim „Ta Prohm“ gsi, dert heisi Tomb Raider dräit.

    Zimlech müed simer de 7 Stund später zrügg im Hostel gsi und hei nachere Omelette u chli Frücht üs ufs Bett gfreut. Dr Rest vom Tag heimer de rächt gmüetlech gno und si vorem zNacht no ines Spa-Gschäft. D Laura het sich uf e neui Pedicure gfreut und i ha mr ä stündigi Thai/Khmer Massage gönnt. Düreknättet und -knackst simer drna mitm Paul no ga zNacht ässä. Die typische kambodschanische Curries hei mr gnüsslech vrschlungä und hei üs när nach 2 Bier vom Paul vrabschidet. Am nächste Morge ischs wieder zrügg id Houptstadt gangä.    Baca selengkapnya

    Lihat terjemahan
  • Asien 23
    Hari 60

    Phnom Penh: Z‘Fuess uf Kambodscha

    17 November 2023, Kamboja ⋅ ☁️ 27 °C

    Vo Phu Quoc heimer wieder d‘Fähre zrugg uf z‘Festland gno, dismau aber uf Ha Tien, wo ar Gränze zu Kambodscha ligt. Vo dert heimer es chlises Büsli gno, wo üs bis churz vor d Grenze bracht het. Zersch heimer bir Vietnamsite no müesse üse Usreisestämpu hole, när heimer müesse ca. 100 Meter loufe bismer de uf de kambodschanische Site si gsi. Zum erste mau bini auso nid per Flugzüg, Zug oder Outo, sondern z‘Fuess überne Landesgrenze gloffe. Dert acho heimer inere Halle, wo ca. 40 Grad isch gsi, üses Visa-on-Arrival beatreit. Mir hätte no zuesätzlech zaut fürnes Foto, aber wüumer in Japan imene Fotooutomat für z‘Visum vo Vietnam scho Passfotos gmacht hei heimer die tatsächlech nomau chönne bruche 😂 Nachdem mir z‘Visum becho hei heimer no zumene Gsundheitscheck müesse, was genau die aber testet hei wüssemer nid, mir hei nur müesse ine Kamera luege 🤷🏽‍♀️ Nach ca. 40 Minute heimer de ändlech aui Dokument zäme gha und hei offiziell chönne in Kambodscha ireise 😍 Es het scho es Büsli uf üs gwartet, wo üs uf Phnom Penh gfahre het. I ha während de Fahrt nid z’fest dörfe use luege, de Fahrer het links und rechts alles überholt wo ihm id queri isch cho, uf Gegeverkehr heter grundsätzlech nid gachtet. Aber nach paar Stund simer unbeschadet in Phnom Penh acho. Es isch scho Abe gsi, u drum heimer üs recht schneu ufgmacht zum ga esse. Mir hei e mega coole Märit gfunde wome ir Mitti vom Platz am bode uf Teppiche het chönne esse.
    Am nächste Tag heimer einisch meh es sehr truurigs Museum bsuecht, nämlech übere Genozid vode „Khmer Rouge“ vo 1975-1979. Die rote Khmer hei i dere churze Zit meh aus 2 Millione mönsche umbracht, wüu sie ihri Vorstellige vo Kommunismus hei wöue düresetze. Aui Lüt si us de Städt vertribe worde und hei müesse Zwangsarbeit ufem Feld verrichte. Eigete Bsitz isch absolut verbote worde, und es het nurno dörfe Buure gä. Esse und Chleider hets nur vom Staat gäh, sogar d‘Frisur isch vorgäh gsi. Läse und Schribe isch absolut verbote gsi. Bildeti Mönsche hei ide Ouge vode Khmer Rouge de Kapitalismus verkörperet, drum si Lehrer, Studente oder allgemein Bildeti umbracht worde. E Brülle, helle Hutton oder schöni Handschrift het glängt, zum als intellektuell gelte und sofort exekutiert oder ines Gfängnis bracht z’werde. Eis vo dene Gfängnis isch S21 in Phnom Penh gsi, wo sit de 80er Jahr es Museum und e Gedenkstätt isch. Mir si miteme Audioguide, wos sogar uf dütsch het gha und extrem guet isch gsi, dür die verschidene Gebäude vom Gfängnis. O wemer uf dere Reis mit Hiroshima undem Vietnamchrieg scho viu ungloublech Tragisches gseh hei, gits nüt wodi uf die Grausamkeit vo dene Khmer Rouge vorbereitet. Im S21 Gfängnis allei si über 20‘000 Mösche zersch über Wuche oder Monate gfolteret und schlussendlech umbracht worde. D‘Folter het dezue dient, die Gfangnige dezue z‘bringe, es Gständnis abzlege über ihri kapitalistische Tätigkeite und ihri Gehilfe. Die meiste hei us puurer Verzwiflig am Schluss gstande, ir Hoffnig, irgendwie z‘Überlebe. Aber das Gfängnis isch nid konzipiert gsi zum lebendig use cho. Z’Gständnis het schlussendlech als Rechtfertigung dient, öper z’töte. Vo über 20‘000 Gfangnige i dem Gfängnis hei nur öppe e Handvoll überlebt. Insgsamt hets 179 vo dene Gfängnis gäh, im ganze Land verteilt. Faus öper chli meh wott wüsse zu dem Thema, chöimer de Podcast vo Geo Epoche uf Spotify sehr empfähle.

    https://open.spotify.com/episode/35AhRvCv2ozHqn…

    Vorem Ticketschalter vom Museum heimer no e Kolleg vom Sacha us Militärzyte und sini Fründin troffe, und wüumer när chli d‘Zit vergässe hei heimer chli müesse pressiere für zrugg zum Hotel. Mir hei nämlech am Nami scho de Bus gha für uf Siem Reap.    Baca selengkapnya

    Lihat terjemahan
  • Asien 23
    Hari 56

    Phu Quoc: Troumstränd uf dr Pfäfferinslä

    13 November 2023, Vietnam ⋅ ☀️ 31 °C

    Mit Brötli u Kaffi vor Ms. Ta simer los mitm Bus drü Stund bis zu Fähre in Rach Gia. Nomau knapp so lang simer de uf dr Fähri gsi um die südlechsti Insle vo Vietnam z‘erreiche. D Franzose hei zu ihrer Zyt hie es Gfängnis errichtet gha wo de o währendem Vietnamkrieg betriebe worde isch. Vieli Bewohner hei ungrdessä vom Aabou vo schwarzem Pfeffer gläbt bis iz na-dis-na dr Tourismus immer wie meh azoge het. Die troumhafte Sandstränd gsümt mit Palme heis o üs a ta. Imänä härzige Bungalow heimer de nach dr Akunft (z‘erste mau uf dere Reis!) üses mitgschleipftä Moskitonetz chönne ufhänke. Erinnerige ad Vorlesige vo „tensile structures“ are ETH si mr i Sinn cho wöni ds Werk mit üsere Wöschleine zum Ufhänke vom Netz ha beöigt😂

    Da d Ungrkunft nid direkt am Meer isch gsi heimer üs für die Täg chönne e Roller uslehne und hei so jede Tag e neue Strand chönne astürä. Meistens heimer üs amne troumhafte Strandabschnitt ufnä Liegi vomne mehbessere Hotel gsetzt und hei de im Gägezug öbis i de liecht übertürte Strandbeizli konsumiert.
    Um üs vo dere füechte Hitz abzküehle hets einigi Usflüg pro Tag is louwarme Meer brucht. D Laura, wieder fit, het ihres Strandhobby „Kampfbrüne“ (ds het si in Fuerteventura bereits perfektioniert) gfröhnt und i ha mi schnudernd u huestend im Schatte vo de Palme stillghaute und „Das Parfüm“ (woni irgend imne Hostel ha gäge „Der Boxer“ tuscht) afa läsä.

    Am Abä hets meistens um di 6i, quasi mit dr Dämmerig, churz gwitteret. Nachere Duschi bi üsm Bugalow, üses Bad im hingere Teil vom Bungalow isch vorusse ungr freiem Himmu gsi, simer de när jewius nomau ufe Roller ghüpft um entlang vom Strässli öbis feins z Ässe. Dr Pfäffer het chum ufere Mahlzyt gfäut und o die witere Gwürz hei sich bereits vo dene in Zentralvietnam dütlech ungrschiede.

    Mir hei die Täg sehr gnosse und üse Körper hets o gschätzt mau wieder es paar Täg ohni Klimaalag z löie. Z‘Meer, die mega fine Sandstränd und die Palme wärdemer gloub nie müed azluege.

    Nach däm üs ds Pouschalagebot zur Witerreis nach Kambodscha vor Ungrkunft z tür isch gsi heimer üs lediglich e Platz uf dr Fähri nach Ha Tien la reserviere u si nach üsere vierte Nacht uf Phu Quoc am Morge bezite uf ums uf di ersti Fähre z schaffe.

    Dr 10. Haut in Vietnam isch somit o üse letzt gsi uf dere Reis i dem tollä Land. Mir si vo Afang a vo de Härzlechkeit u Hiufsbereitschaft vo dene Lüt überwäutigt gsi. Näbst wunderschöne Landschafte heimer o die riesigi Diversität vom Ässe extrem gschätzt. Nach däm mr in Japan bereits viu Sache agluegt hei isch üses Bedürfnis nach Wärmi u Strand sehr gross gsi, mir wettä aber üsi Stops im Nordä nid missä und si üs sicher irgendeinisch wieder i ds Land zrügg z cho.    Baca selengkapnya

    Lihat terjemahan
  • Asien 23
    Hari 55

    Can Tho: Floating Markets mit de Ms. Ta

    12 November 2023, Vietnam ⋅ 🌙 25 °C

    Zum no chli öpis vom Mekong-Delta z’gseh, simer vo HCMC nach Can Tho gfahre. Can Tho isch berüehmt für die sogenannte “Floating Markets”, auso e Märit ufem Wasser. Gege abe simer i üsem Homestay acho und hei d’Ms. Ta, d’Bsitzerin, kenneglernt. Scho womer d’Unterkunft online buecht hei, hei ganz viu ide Kommentär gschribe was fürne tolli und offnigi Person sie isch, und das ihri Tour zu dene Markets mega guet isch. Mir hei drum o grad bi ihre sone Tour buecht füre nächst Tag. Ursprünglech heimer plant gha, nume 1 Nacht dert z’bliebe und nach dere Tour grad witer z’gah, aber wüu üs de Ort het gfalle und mir o nid hei möge pressiere heimer üs grad no bim check in entschiede, no e Nacht z’verlängere.

    Am nächste Morge isches scho am 3:45 losgange, dasmer bi Sunneufgang bim erste Markt si. D’Ms. Ta het üs no es Kaffi und e Tee to go gmacht, ner simer losgloffe zu ihrem Boot. Underwägs heimer no es anders Pärli ufglade und si pünktlech zur Dämmerig bim erste Markt acho. Es isch eher e chline gsi, aber defür nid so touristisch und sehr lokal. D’Stimmig isch sehr schön gsi. Nachdem mir dert chli verwilet si und de lüt bim “trade” hei zuegluegt simer witergfahre zum grössere Markt. D’Fahrt dert häre isch mega schön gsi, dür chlini Näbeflüss düre. D’Ms Ta het druf bestande, es Fotoshooting z’mache ufem Boot, drum simer aui de Reihe nach füre uf z’Schiff balanciert und hei üs vo ihre la fötele. Sie het für üs aui e typisch vietnamesische Huet mitgno gege d‘Sunne, und dä het natürlech nid dörfe fähle ufem foto 😂 De 2. Märit isch när tatsächlech dütlech grösser gsi. Die eher grössere Schiff sie die, wo öpis verchoufe, und die wo choufe fahre mit chlinere Boot nebe drann häre und ner wird d’Ware meistens zuegworfe. Damit d’Chäufer wüsse, wo was verchouft wird, hei aui Verchäufer-Schiff e grosse Bambusstock am Vorderteil vom Schiff, wosi es paar Stück vor Waare härehänke. We es Schiff auso Ananas verchouft, hänkesi es paar Ananas a Bambusstock. Mir hei dert när o grad pho - e vietnamesischi Suppe - gässe und d’Ms Ta het ganz viu Frücht kouft (siehe Foto vom Sacha mit de Ananas, mis absolute Lieblingsfoto 😂)
    Derna simer chli witer gfahre und si imene chline Dörfli 3 Nudelfabrike ga aluege. A jedem Ort heisi anderi Nudle gmacht, und es isch sehr faszinierend gsi, wie sie mit so simple Maschine so viu Nudle herstelle. Am letzte Ort heimer o grad z’Mittag gesse. Dert gets ono ganz süessi Hundewelpe gha 😍
    D’Tour isch sehr schön und spannend gsi, mir si aber glich froh gsi womer am haubi 1 am Nami, auso nach fasch 9h, wieder im Homestay si gsi und hei chönne e Nap näh. De Sacha isch speter am Nami no mit de Maya und Laura (die 2 womer in Mui Ne scho hei troffe) öpis ga trinke, sie si nämlech o grad wieder am gliche Ort gsi wi mir ☺️ I ha mi Nap grad bis am Abe dürezoge, u derna simer no öpis ga esse und trinke. Am nächste Tag isches de wieder recht frùeh losgange, scho am 7:15 isch üs de Mini Bus cho abhole und het üs zum Busterminal bracht, womer i grösser Bus si umgstiege richtig Rach Gia.    Baca selengkapnya

    Lihat terjemahan
  • Asien 23
    Hari 53

    HCMC: Chautä Schweiss und guete Food

    10 November 2023, Vietnam ⋅ ☁️ 31 °C

    Biz mudrig mit Hausweh u chli schnudrig simer im Liegebus i di auti Houptstadt gfahre. Am Stadtrand heimer dr gross Bus vrla und si ine biz chlinere Bus gstigä wo üs de gekonnt düre Stadtvrcher im Zentrum abgsetzt het. O hie maches die abertuusigä vo Scooter nid eifach usm Fenster z luege und mir si immerno jedes mau baff weme über d Strass louft. Amplä gits nämlech nid viu und o wes se het ischs äuä meh e Empfählig. Trotzdem klappets immer weme schön langsam louft, dass si eim gekonnt umkurvä, es brucht aber definitiv chli überwindig :)
    Nachmne feine zNacht bim Inder heimer am Nachtläbä dr Rügge zuekehrt u si ga pfuse.

    Ho-chi-minh-city - hie wirds aber meistens immerno Saigon gnennt - het i ihrer Gschicht scho mehreri Herrscher und Konflikte gseh. Wüus bsunders im Vietnamkrieg da zimlech zue und här gange isch simer de nachemne Kaffi am Strasserand is Museum übere Vietnamkrieg. Es isch sehr beeländend z erfahre was ds Land, die Lüt aues hei müesse düremachä. Nid z erste mau uf dere Reis spiele d Amis nid e sympathischi Roue und bi viune Biuder ischs üs chaut dr Rügge abegloffä. Nach däm mr ufemne Bänkli die Idrück hei afa vrarbeite und dür düregschwitzt Audio-Guide hei zrügg gä, heimer dussä no die Panzer u Flugzüg agluegt u si när fein vegetarisch ga zMittag esse.

    Drna simer dür d Stadt gschlenderet, Paläst und zämä gheiti Hüsli wächsle sich ab. Is Postgebäude wo d Franzose hei la erboue heimer churz inegluegt u si drna no paar neui Tshirts ga choufä. Z wiss isch nüm grad glich wiss wie am Afang :)

    Dr Himmu isch eher bedeckt, obs vo de Wulche oder de viele Abgas isch heimer nid so recht gwüsst, und d Luftfüechtigkeit sehr höch. Nachemne feine Kaffistop simer de vorem zNacht nomau zrügg üsi Füess ga höchlagere.

    Ufm Wäg zum zNacht simer dürne Park gloffä wo ganz vieli am Spörtlä si gsi. Näbst Choreos hei sich vieli im Badminton und Basketball güebt. Zum zNacht heimer Banh Xeo - e vietnamesische Riismehl Crepe - gässä. Die riesei Flädä, wo meistens o no Meeresfrücht dine hätte, wärde zämä mit Krüttli (Thai-Basilikum) i grossi Salatblätter gfautet u när ine süss-sauer Sauce tünklet. Es het üs sehr gschmöckt!
    Ufm Heiwäg hani am Strasserand de no e Art Waffle mitemne Chäs drin gässä und so heimer när satt zrügg chönne :)

    Am nächste Morge heimer imne Kaffi sogar wieder mau es Gipfeli u nes Pain au Chocolat gfunde u si när gstärcht witer is Mekong-Delta gfahrä.    Baca selengkapnya

    Lihat terjemahan
  • Asien 23
    1
    Hari 51

    Mui Ne: Strand und Düne

    8 November 2023, Vietnam ⋅ ☁️ 30 °C

    In Mui Ne heimer es Zimmer inere Bungalow-Alag gha, direkt am Meer. Mir isches vo Tag zu Tag besser gange, leider hets aber de Sacha när o verwütscht mitere Erkältig 😢 Am erste Tag simer drum eigetlech nume chli umegläge, hei chli Chrüzworträtsu gmacht und spieli gsiut. Es het üs drum o garnid gstört, dases de ganz Tag chli grägnet het. Am 2. Tag isch mega guets Wetter gsi, drum simer eigetlech de ganz Morge/Nami chli am Meer vorne gsi.
    Am nächste Tag het z’Programm eigetlech glich usgseh, ussert dasmer gege Namitag no e Kollegin vom Sacha troffe hei, wo o grad in Mui Ne isch gsi. Mit ihre und ihrere Kollegin simer ine gmüetlechi Bar am Strand und si dert einigi Stunde verhocket und hei es paar Bier trunke. Es isch e mega lustige Namitag/Abe gsi. Wüumer so lang si dert gsi heimer dert o grad zeme z’Nacht gässe. Sie hei mega vo ihrere Tour zude Düne gschwärmt. Die Düne sie in Mui Ne eigetlech sehr bekannt, wüu de Sacha aber chli agschlage isch gsi simer nid sicher gsi, obmer das würk wei mache. Mir hei üs aber när glich dezue entschiede und hei die glichi Tour buecht wie si.

    Am nächste Morge si mir drum scho am 4:20 vo üsem Guide abgholt worde, dasmer ufe Sunneufgang bide Düne si. Es isch zwar mega touristisch, aber hetsech trotzdem glohnt! Uf d’Düne ufe chunntme mit Quads. Me cha entweder selber fahre, oder bimene Fahrer hinde druf hocke. Mir hei üs für die 2. Option entschiede, und chli vorem Sunneufgang simer när mit somene Quad ufechauffiert worde (und derna o wieder abe) und hei d’Morgestimmig gnosse.
    Nach de Düne simer no zumene Fischmarkt direkt am Meer gange. Dert wird alles, was dür d’Nacht isch gfischet worde, grad direkt verarbeitet und parat gmacht zum verchoufe. I ha da nid z’fest dörfe häreluege und schmöcke, aber gsamthaft (und vo witem) hets mega schön usgseh mit de ganze Fischerbötli im Hintergrund! Unvorstellbar wie die Fischer i dene Nussschale d Nacht ufm Wasser verbringe. Am Morge sis vorauem d’Froue wo am Bode grüppele u dr Fang (vieli Muschle u Krebse) grad ussortiere.

    Am 8i si mir när vo üsere Tour scho wieder zrugg gsi. Mir si no schnell öpis ga z’Morge esse und derna bis zum Check-out nomau chli ga schlafe. Machem Check out heimer üses Gepäck bir Reception deponiert und si nomau chli füre a Strand, bis üs am 3 am Nami üse Bus richtig Ho Chi Minh City abgholt het.    Baca selengkapnya

    Lihat terjemahan

Bergabung dengan kami:

FindPenguins untuk iOSFindPenguins untuk Android

  • 2024© FindPenguins
  • Beranda
  • Tentang kami
  • Blog
  • Penelusuran Kelompok
  • Pers
  • Ketentuan
  • Privasi & Cookies
  • Dukungan
  • Jejak
  • Bahasa Indonesia