Alain Wohlgemuth

am 27. am morge hemmer eine vode vile spazierweg ustestet, wo vom campingplatz zum meer gfüert hend. Mer hend es schöns plätzli am meer gfunde & hend dete churz chillt, denn simmer wieder zrugg. Bevor mer wieder abgfahre sind simmer no go dusche und hend usem restliche risotto no en milchriis kocht und in küelschrank packt zum mitneh. Denn simmer abgfahre richtig Åsgårdstrand, ufem weg det here hemmer no zwei buurehöf gfunde, wo herzigi lokali sache verkauft hend. Mer sind mit de fähre vo Moss uf Horten und denn in Asgardstrand acho. Sehr es härzigs chlises dörfli, womer ufde wiese am meer chli ane glege sind, glese händ und die restliche täg nochli plant hend. Am abig hemmer welle usswärts gah, de alain het endlich mal no welle rentier probiere. Nachdem eusi suechi nach guete resti immer meh gfailt isch will dt restis entweder zue gha hend (obwohls online gheisse seg sie seged offe), privati aläss drin statgfunde hend oder direkt nebedra es rock konzert stattgfunde het, wo euser meinig nah die schön abigstimmig schüch versaut het, simmer denn nüme so moti gsi, hend mega hunger gha und de alain het sis rentier irgendwenn müse ufgeh, aber au mit de tüfere standards hemmer nüt guets gfunde, und will mer bi somene low point acho sind, simmer denn schlussendlich im mc glandet. Dete zwei vegiburger bstelt und denn ab zume schöne plätzli ide nöchi vom hafe zum de reste vom sunneuntergang no gnüsse. De Vegiburger het denn de abig au nüme würkli grettet (de norweger-mcdonalds chönted sich da e schiibe vom schwizer abschnide). Mer hend eus denn müse ufd suechi begäh nach me stellplatz fürd nacht, und natürlich, passend zu dem abig, isch de einti voll gsi und de ander abgsperrt. Hänu, chli wiiter gfahre ufen campingplatz, womer zimlich direkt go schlafe sind. Am negste morge hemmer denn gmerkt, dases eigentlich mega en schöne camping gsi isch, mit me schöne chline seeli nebedra, womer am abig vorher im dunkle natürlich nöd gse hend. Mer sind sind denn no euse platz go zahle und wieder wiiter gfahre zumene Wasserfall. Dete chli spaziert. Denn uf Skien zrugg gfahre, womer no en park ahgluegt hend mit wunderschöne blueme und ere super sicht ufs städtli. Det hets no es medium feins stuck chueche geh und denn simmer wiiter uf sandefjord. Mer sind de strandpromenade entlang, hend es alts walfangboot beguetachtet, es glace gesse und sind denn zum camping, wo wieder mal sehr schön glege isch ufeme halbinseli. Mer hend Znacht kochet und so guet wie möglich no eusi reste verwertet. De alain isch nochli go fische und ich ha glese. Zum Dessert nochli Milchriis und de neu Top Gun gluegt (ich widerwillig, aber er isch doch nöd soooo schlecht gsi). Am negste morge nachem usschlafe simmer go dusche und hend euses bsteck und alles chochzüg no blitzblank abgwäsche. Bis mer das alles erledigt hend hemmer no zit gha zum in sandefjord go zmittag esse und s walfangmuseum go aluege, wo sehr iidrücklich und irgendwie au chli bedrückend gsi isch. Denn hemmer eus scho müse uf de weg mache uf Larvik zu eusere Fähre, wo denn pünktlich am 17.20 abgfahre isch. Sisch sehr e schöni ruhigu überfahrt gsi mit vill läse und sehr sehr schönem sunneuntergang überem meer😍. Jetzt simmer wieder in Dänemark acho und ufem weg uf arhus.Read more